2 Ɩya-ɩya 29

Yuda wogyu Hesekiya

1 Hesekiya e sere bugyu buu gedi fɔ, ɛ̀ ba bɩkyan dikpilin ma ton, gɛ e di bugyu fɔ Yerusalem bɩkyan dikpilin ma yɛkɩ. Wɔna diyere n di Abiya, gɛtɛ è di Sekariya wobi-nanɩbi fɔ. 2 Ɛ mɛ ade gɛtɛ ɩ̀ tʋna Yahwe bʋnʋn anlɛ gɛtɛ wotu Dafidi ɛ bɔ ɛ mɛ fɔ.

3 Wo bugyu buu gedi gaanɩ gɩɩ gɩkyan gyangbasɛ, giibon-gyangbasɛlɛ wanɩ fɔ, ɛ tana Yahwe Dikwo-dɩrɛ fɔ diitunu fɔ, gɛ ɛ pɩna yɩ. 4 Gɛ e kpèlè gedi gɩɩ bɛtɛlɛ ma Lefi bete fɔ e tuma Dikwo-dɩrɛ fɔ dɩɩ dɩkpaara fɔ daanɩ ofila wʋʋ gɛtakʋn wʋʋ gɩlan, 5 gɛ ɛ dɔ̀ bɛ alan, << Lefi bete, ɩnʋn maakʋn! Ɩ kpa koro dɩdɩɩ fɔ yàà mɛ Yahwe, yiitu ɛbɛ boo Wurubwarɛ Dikwo-dɩrɛ fɔ fɩrɩnfɩrɩn. Fɔ yàà tiri gɩnyan-kamasɛ gɛtɛ gɩɩ sa ɔkʋn fɩrɩnfɩrɩn-kʋn fɔ dɩdɩɩ fɔ. 6 Tiitu ɛbɛ ben di nʋnkwarɩ tɛ Yahwe tii Wurubwarɛ. Bɛ mɛ ade-kpen, gɛ be terema wɔ. Be kere wɔ bɛ ya, gɛ be fi gama be ten wɔ. 7 Bɛ nɩ tan Dikwo-dɩrɛ fɔ dɩɩ-ɩpʋnʋ, gɛ be wolo bɛkandɩya fɔ, gɛ bɛn mɩnɩ kuma olifwi tɛ Isareli wo Wurubwarɛ fɔ gedi Ɔkʋn-fɩrɩnfɩrɩnkʋn fɔ nya. 8 Gɛlɛ wuu koro Yahwe ɛ ka owurufa-dɩrɛ Yuda ma Yerusalem boo koro. Gɛ wʋ yɛ bɛnɩ be gyu gɩsaa-dɩrɛ, gɛ be biligi gɛmʋmwa-yoli gɩɩ bɛnɩ, anlɛ gɛtɛ ɛyɩ gbagba ii we lɛ. 9 Ɛwʋ na yɛ gɛ tiitu ɛbɛ be ku bɩtà baanɩ, gɛ tii bebi-teni, ma tii bebi-nanɩ, ma tɩɩsɔ ɛbɛ bɛ̀ sa gɩdɩ gaanɩ lɛ. 10 Mɔ nkele, n tɛ mɛ amɩnlɛ gɛtɛ nan tà dikola ma Yahwe, Isareli wo Wurubwarɛ fɔ, gɛtɛ eè kere wowurufa-dɩrɛ fɔ ɛ ya. 11 Miin bebi, ɩ kara nyà ade ɩ sɩ̀. Yema ɛyɩ gɛ Yahwe e tiri gɛtɛ yàà tì kuma olifwi ɩ tɛ wɔ, fɔ yàà gyegeye tɛ bɛnɩ fɔ bàà tɩ̀ sʋma wɔ.>>

12 Gɛ Lefi bete nyabɛ be sere bɔɔ gʋtʋn gɩɩ gɛmɛ.

Bɛnɩ gɛtɛ be ye Kohati dɩkpaara daanɩ fɔ n di

Amasayi wobi-teni Mahati, ma Asariya wobi-teni Yoweli.

Bɛnɩ gɛtɛ be ye Merari dɩkpaara daanɩ fɔ n di

Abdi wobi Kisi, ma Yehalele wobi Asariya.

Ɛbɛ gɛtɛ be ye Gerison bete baanɩ fɔ n di

Sima wobi Yowa, ma Yowa wobi Eden.

13 Bɛnɩ gɛtɛ be ye Elisafan dɩkpaara fɔ n di

Simiri ma Yeyeli.

Bɛnɩ gɛtɛ be ye Asafu dɩkpaara n di Sekariya ma Mataniya.

14 Bɛnɩ gɛtɛ be ye Heman dɩkpaara daanɩ fɔ n di

Yehiyeli ma Simeyi.

Bɛnɩ gɛtɛ be ye Yedutun dɩkpaara Semaya ma Usiyeli.

15 Gɛlɛ wʋʋ bɛnɩ nyabɛ bɛ kʋla bɔɔwɔlɔn ɛbɛ Lefi bete, gɛ bɛ kpa koro dɩdɩɩ. Gɛ be gyu Yahwe Dikwo-dɩrɛ fɔ daanɩ bɛ mɛ dɩ fɩrɩnfɩrɩn anlɛ gɛtɛ egyu-dɩrɛ ɛ dɔ̀ bɛ fɔ. Bɛ mɛ anlɛ gɛtɛ Yahwe wose wuu wùlà fɔ. 16 Gedi gɩɩ bɛtɛlɛ fɔ be gyu Dikwo-dɩrɛ fɔ daanɩ bɛ mɛ dɩ fɩrɩnfɩrɩn, gɛ bɛ ka gɩnyan-kamasɛ gɛtɛ be we gɛ gi gyu dɩdɩɩ fɔ be ye Dikwo-dɩrɛ fɔ diikòro. Gɛ Lefi bete fɔ be tola yɩ bɛ ma sa Kidiron Dɩtagba daanɩ. 17 Ebon-gyangbasɛlɛ duwi-gyangbasɛlɛ daanɩ fɔ, be sere ɔpɩ bɛɛ mɛ dɩdɩɩ dɩɩ gɛkpa dɩɩ gʋtʋn fɔ, gɛ duwi nɩyɛfɛ fɔ, be werema Yahwe Dikwo-dɩrɛ dɩɩkpata fɔ wʋʋ gɛmɛ fɩrɩnfɩrɩn. Gɛ bɛ ka awi nɩyɛ-do mɔ bɛ mɛ Yahwe Dikwo-dɩrɛ fɔ gbagba daanɩ fɩrɩnfɩrɩn, okoro be werema gʋtʋn fɔ ebon fɔ duwi fwo-kooronfɛ daanɩ.

18 Gɛ Lefi bete fɔ bɛ ma dɔ̀ egyu-dɩrɛ Hesekiya alan, <<Tɩ mɛ Yahwe Dikwo-dɩrɛ fɔ powu fɩrɩnfɩrɩn ti were. Tɩ mɛ gekuma gii gedi gɩɩ gɛtɛ̀kʋn ma ganyan powu, ma ɔkpʋlɔ gɛtɛ bɛɛ sɩ̀ boroboro wuu koro fɔ, ma wanyan powu fɩrɩnfɩrɩn. 19 Gɛ anyan powu gɛtɛ egyu-dɩrɛ Ahasi ee di bugyu gɛ en di nʋnkwarɩ, gɛ e tiri yɩ e ye Dikwo-dɩrɛ fɔ daanɩ fɔ, tɩ kpa yɩ dɩdɩɩ, gɛ ti birima yɩ tɩ sɩ̀ Yahwe gedi gɩɩ gɛtɛ̀kʋn fɔ gɩɩpɩ.>>

20 Gɛtɛ kere gɩ kpa gagyɩgyan fuu fɔ, egyu-dɩrɛ e kpèlè ditele fɔ dɩɩ bɛndɩrɛbi e tuma, gɛ bɛ san Yahwe Dikwo dɩrɛ fɔ daanɩ. 21 Bɛ ka bɛkwɔ kwarankɩ, ma ayɛran-gbʋgbʋ kwarankɩ, ma bɛyɛran atan kwarankɩ, ma begbebi-teni kwarankɩ bɛ ma tɛ ade-kpen yɩɩ gɛkakyɛ yii gedi tɛ Bugyu buu gedikʋn fɔ, Dikwo-dɩrɛ fɔ, ma Yuda. Egyu-dɩrɛ dɔ̀ gedi gɩɩ bɛtɛlɛ fɔ gɛtɛ bè di Aaron wodu waanɩ wʋʋ bɛnɩ fɔ alɛ bɛ tɛ gedi fɔ Yahwe gedi gɩɩ gɛtɛkʋn fɔ gii koro. 22 Okoro be wolo bɛkwɔ fɔ, gɛ gedi gɩɩ bɛtɛlɛ fɔ bɛ ka nkalan fɔ bɛ ŋwan gedi gɩɩ gɛtɛkʋn fɔ gii koro. Wʋʋ gama fɔ be wolo ayaran-gbʋgbʋ fɔ, gɛ bɛ ka yɩɩ nkalan bɛ ŋwan gedi gɩɩ gɛtɛkʋn fɔ gii koro. Gɛ be wolo ayara-tan fɔ, gɛ bɛ ka yɩɩ-nkalan bɛ ŋwan gedi gɩɩ gɛtɛkʋn fɔ gii koro. 23 Gɛ bɛ ka begbebi gɛtɛ baà ka bɛ tɛ ade-kpen yɩɩ gɛka-kyɛ yii gedi fɔ bɛ ba egyu-dɩrɛ ma bɛnɩ dikpi fɔ bɔɔ bʋnʋn, gɛ bɛ ka baalɔ bɛ gyaga boo koro. 24 Ɛwʋ gɛ gedi gɩɩ bɛtɛlɛ fɔ be wolo begbebi fɔ, gɛ bɛ ka bɔɔ nkalan be lù gedi gɩɩ gɛtɛkʋn fɔ gii koro bɛ ka bɛ fɔ Isareli powu wade-kpen yɩɩ gɛka-kyɛ.

25 Ɛ yɛ gedi gɩɩ bɛtɛlɛ bɛ ka akyaka, ma adʋlɛ ɛbɛ, ma adʋlɛ-dɩrɛ-dɩrɛ ɛbɛ, anlɛ gɛtɛ egyu-dɩrɛ Dafidi, ma Gadi gɛtɛ è di Wurubwarɛ wɔtabʋrʋlɛ tɛ egyu-dɩrɛ fɔ, ma Wurubwarɛ wɔtabʋrʋlɛ Natan bɛ dɔ̀ fɔ. Yahwe na da ma wɔ bɛtabʋrʋlɛ boo koro ɛ dɔ̀ ade nyayɩ. 26 Okoro Lefi bete fɔ bɛ pɩna koro gɛtɛ bè de Dafidi wɔ-ɩnʋn yɩɩ gɛnʋma yaanyan fɔ, gɛ gedi gɩɩ bɛtɛlɛ fɔ mɔ bè de baakantan.

27 Gɛ Hesekiya ɛ dɔ̀ bɛ alɛ bɛ tɛ tɛ gekuma gii gedi, gedi gɩɩ gɛtɛkʋn fɔ gii koro. Gɛtɛ be sere gedi fɔ gɩɩ gɛtɛ̀ fɔ, bɛ ka egyu-dɩrɛ Dafidi wɔ-ɩnʋn yɩɩ gɛnʋma gaanyan ma akantan, gɛ bɛ nʋma ɩnʋn bɛ tɛ Yahwe. 28 Gɛtɛ ɩnʋn yɩɩ bɛnʋmalɛ fɔ bɛɛ nʋma ɩnʋn, gɛ akantan yii bɛfʋ̀nlɛ baakantan fɔ, bɛnɩ dikpi fɔ powu bɛ waran be kura bɛ sʋma Yahwe. Bɛ mɛ gɛlɛɛ ma ye gɛtɛ bɛ tɛ gekuma gii gedi gɩɩ gɛtɛ̀ fɔ gi were.

29 Gɛtɛ bɛ tɛ gedi fɔ be were fɔ, egyu-dɩrɛ ma ɛnɩ-kamasɛ gɛtɛ ɛ̀ sa dʋkɔ fɔ, bɛ waran be kura baakpin yii koro, gɛ bɛ sʋma Yahwe. 30 Ɛwʋ gɛ egyu-dɩrɛ Hesekiya ma wɔ bɛndɩrɛbi bɛ dɔ̀ Lefi bete fɔ alɛ bɛ ka egyu-dɩrɛ Dafidi ma Wurubwarɛ wɔtabʋrʋlɛ Asafu baanyun-gyebi bɛ nʋma ɩnʋn be sila Yahwe. Okoro bɛ nʋma gesila gɩɩ-ɩnʋn ɔsɛ waanɩ, gɛ bɛ warama baayun gatɩn bɛ sʋma Yahwe.

31 Ɛwʋ gɛ Hesekiya alan, <<Nkele i fere koro i were. Okoro ɩ yaanyan-tɛlɛ gedi, ma onyun wʋʋ gɛsa gaanyan ɩ ba Yahwe Dikwo-dɩrɛ fɔ daanɩ.>> Okoro bɛnɩ dikpi fɔ bɛ gedi gɩɩ gɛtɛ̀ gaanyan ma onyun wʋʋ gɛsa gaanyan bɛ ba, gɛ ɛbɛ powu gɛtɛ wʋ kya bɛ oturu fɔ mɔ bɛ bɛ tɛ gekuma gii gedi.

32 Bɛnan gɛtɛ bɛnɩ dikpi fɔ bɛ ka bɛ bɛ tɛ gekuma gii gedi fɔ powu n di bɛkwɔ akpilin asiyee ma fwo (70), ma ayaran-gbʋgbʋ akpilin ton (100), ma ayaran-tan (200). Bɛ ka bɛnan nyabɛ powu bɛ bɛ tɛ gekuma gii gedi. 33 Bɛnan gɛtɛ be tiri bɛ mɛ bɛ fɩrɩnfɩrɩn tɛ gedi gɩɩ gɛtɛ̀ fɔ powu bɔɔkʋna wʋ̀ ba bɛkwɔ-teni nkpɩn bisiyee (600), bɛyɛran ma begbebi gbaa ma nkpɩn ton (3,000). 34 Gɛtɛ gedi gɩɩ bɛtɛlɛ bɛn sɔ gɛtɛ bàà bɩya bɛnan fɔ be tiri baakpa okoro, bɔɔwɔlɔn ɛbɛ Lefi bete bɛ bɛ kpà bɛ kʋtʋmaa gʋtʋn fɔ gi were, ka sere ke gɛtɛ Lefi bete fɔ bɛ kpa koro dɩdɩɩ be were. Yema Lefi bete bɔɔ bʋnʋn baanɩ fɔ, koro gii gefere gì di bɛ ade-dɩrɛ da gedi gɩɩ bɛtɛlɛ. 35 Bɛ tɛ gekuma gii gedi kpekpesi, fɩya ma ayo gɛtɛ be kuma bɛ tɛ olila wuu gedi, ma bʋkan buu gedi gɩɩ gɛtɛ̀.

Okoro dɩsʋma di biri di sere ɔpɩ Yahwe Dikwo-dɩrɛ fɔ daanɩ. 36 Hesekiya ma bɛnɩ fɔ powu be di ɔsɛ, yema Wurubwarɛ ɛ kpa bɛ, gɛ bɛ mɛ ade nyayɩ ɔya-kpenkpesen waanɩ.