2 Ɩya-ɩya 17

Yuda wogyu Yehosafati

1 Asa wobi Yehosafati e di bugyu e sere wote gɩsɩrɩ, gɛ ɛ sa wo bugyu buu gedikʋn fɔ ɔkɛma gepepe gɛtɛ bàà talɩ be yela ma Isareli gɩfɩɩ. 2 Ɛ sɩ̀-sɩ̀ bɩtà bʋʋ bɛtàlɛ Yuda watele ma ɔkɛma fɔ yaanɩ, gɛ e sere bɩtà bʋʋ bɛtàlɛ baasarakʋn Yuda ma Efrayim atele gɛtɛ wote Asa ɛ kpà e to fɔ yaanɩ.

3 Yahwe ɛ sara ma Yehosafati yema ɔkʋna gɛtɛ e sere wo bugyu buu gedi fɔ, ɛ tɛrɛma wotu Dafidi bɩsɩrɩ. Ɛn sʋma Baali wokpen. 4 Mɔ fɔ, ɛ sʋma gɛ wotu wo Wurubwarɛ gɛ e di wo-ise yii koro. Ɛn tɛrɛma Isareli begyu baade-mɛlɛ. 5 Gɛlɛ wuu koro Yahwe ɛ yɛ Yehosafati bugyu bu sere ɩkpaa, gɛ bɛnɩ powu gɛtɛ bɛ̀ sa Yuda fɔ bɛ bɛ kyɛ wɔ anyan gɛ wʋ yɛ wɔ e wura koro gaanyan gepepe ma gebù. 6 Ɛ ka woturu powu ɛ tɛrɛma Yahwe wo-isele, gɛ nkele mɔ, e ni tiri asʋmakʋn ma Asera wo-iyon gɛtɛ ɩ̀ sa Yuda fɔ.

7 Yehosafati bugyu buu gedi bʋʋ gɩkyan-siyeefɛ gaanɩ fɔ, ɛ sa wɔ bɛndɩrɛbi Ben-Hayili, ma Obadiya, ma Sekariya, ma Netaneli, ma Mikayiya alɛ bɛ ma wùlà ade Yuda watele yaanɩ. 8 Ɛ sa Semayiya, ma Netaniya, ma Sebadiya, ma Asaheli, ma Semiramoti, ma Yehonatan, ma Adoniya, ma Tobiya ma Tobi-Adoniya gɛtɛ bè di Lefi bete fɔ, fɩya ma gedi gɩɩ bɛtɛlɛ Elisama ma Yehoram. 9 Gɛ bɛ ka Yahwe wo-ise yɩɩ gɩkpa fɔ be silin be wùlà bɛnɩ ade Yuda watele powu yaanɩ.

10 Gɛ Yahwe ɛ yɛ gɩsaa gi gyu bugyu-bugyu baadikʋn gɛtɛ bu silin Yuda bu tuma powu fɔ, gɛtɛ bɛn mɩnɩ ma kpà ma Yehosafati. 11 Filisiti bete bɛkɩ bɛ ka anyan-kyɛlɛ ɩkɩ, ma gɩkyan-gɩkyan gɩɩ sɩka-fututu-tolɛ bɛ mɔma Yehosafati. Gɛ Arabi bete bɛ ka bɛyɛran-teni ɩgbaa isiyee ma nkpɩn nɩyɛ ma akpilin ton (7,700), ma begbebi ɩgbaa isiyee ma nkpɩn nɩyɛ ma akpilin ton (7,700) bɛ bɛ kyɛ wɔ.

12 Okoro Yehosafati ɛ̀ bɔ ee wura ɔkɛma ɛ fɩya, gɛ e sere atele gɛtɛ bɛ mara ɩpɔrɩ be silin yi ma atele sɩ̀lɛ anyan Yuda gɩfɩɩ gaanɩ. 13 Yaanɩ gɛ bɛɛ sɩ̀ baanyan kpekpesi, gɛ ɛ ka bɩtà bʋʋ bɛtàlɛ gɛtɛ bɛ̀ nyɩ̀ bɩtà baanɩ gepepe fɔ ɛ sɩ̀ Yerusalem. 14 Ofoli-kamasɛ wuu be gyegeyelɛ, ma wʋʋ bɩtà bʋʋ bɛtàlɛ baasɔ ntɛ ba lɛ.

Ye Yuda wofoli waanɩ fɔ, Adina na mɛ bɩtà bʋʋndɩrɛ gɛtɛ ɛ nya bɩtà bʋʋ bɛtàlɛ asepekyi fwo-ton (300,000) boo koro.

15 Ɛndɩrɛ-nyɔɔfɛ n di Yehohanan gɛtɛ ɛɛ nya bɩtà bʋʋ bɛtàlɛ asepekyi fwo-anaa (280,000) boo koro fɔ,

16 gɛ ɛndɩrɛ-siyeefɛ fɔ n di Sikiri wobi Amasiya gɛtɛ ɛ ka koro ɛ tɛ Yahwe gʋtʋn gɩɩ gɛmɛ fɔ, gɛ ɛ nya bɩtà bʋʋ bɛtàlɛ asepekyi fwo (200,000) boo koro.

17 Benyamin wofoli wʋʋ bɩtà bʋʋ bɛtàlɛ baasɔ ɩ̀ ba asepekyi fwo (200,000), gɛ bè de bɩsɩnta ma awɔrɔnyan-dɩyɛlɛ koro. Bɔɔndɩrɛ n di Eliyada, gɛ ɛ̀ ba oturu.

18 Wɔnyɔɔfɛ n di Yehosabadi gɛtɛ ɛɛ nya bɩtà bʋʋ bɛtàlɛ asepekyi yɛkɩ anaa (180,000) gɛtɛ bɛ pɩna koro gepepe tɛ bɩtà fɔ boo koro.

19 Nyabɛ n di bɩtà bʋʋ bɛtàlɛ gɛtɛ bɛ sʋma egyu Yerusalem, fɩya ma bɩtà bʋʋ bɛtàlɛ gɛtɛ ɛ sɩ̀ Yuda watele ma ɔkɛma yaanɩ fɔ.