Solomon e sere Wurubwarɛ Dikwo-dɩrɛ
1 Solomon ɛ kya Yahwe Dikwo-dɩrɛ fɔ dii gesere Moriya wodon gɛtɛ wʋ̀ sa Yerusalem fɔ wuu koro, ɔkʋn gɛtɛ Yahwe e tiri koro e wùlà wote Dafidi fɔ. Be sere dɩ Yebusi-te Aruna wamɔrɔ yii getibakʋn gɛtɛ Dafidi e wùlà ɛ sɩ̀ fɔ. 2 Ɛ kya dii gesere ye wo bugyu buu gedi bʋʋ gɩkyan-naafɛ, giibon-nyɔɔfɛ, wo duwi-nyɔɔfɛ daanɩ. 3 Dikwo-dɩrɛ gɛtɛ Egyu-dɩrɛ Solomon ee sere fɔ daabo ɩ̀ ba bɩsɩrɩ akpilin anaa ma fwo (90), gɛ daayɛrɛ ɩ̀ ba bɩsɩrɩ dikpilin ma fwo (30). 4 Dikwo-dɩrɛ fɔ dɩɩ kpata wayɛrɛ ɩ̀ ba bɩsɩrɩ dikpilin ma fwo (30), gɛtɛ wù di Dikwo-dɩrɛ fɔ daayɛrɛ, gɛ daatɔ ɩ̀ ba bɩsɩrɩ akpilin yɛkɩ (180). Bɛ ka sɩka-sɩya-kpara bɛ bɔlɩ dikwo fɔ dɩɩ gamɩ. 5 Solomon ɛ yɛ bɛ ka seda wo-iyon be sere bɛ marama ɔpɔrɩ fɔ, gɛ bɛ ka sɩka-sɩya bɛ bɔlɩ yɩ, gɛ bɛ ta iben-yon ma agbarɩgbarɩ bɛ sa dɩ ɔmɩrɩ. 6 Ɛ ka gɛ ataa ma ɔyɛkɛma ma sɩka-sɩya gɛtɛ ɛ tɩyɛma e ye Parifayim fɔ ɛ pɩna Dikwo-dɩrɛ fɔ. 7 Ɛ ka sɩka-sɩya ɛ bɔlɩ Dikwo-dɩrɛ fɔ dɩɩ gɛwalɩkʋn fɔ gɩɩ-ɩtaa-walɩlɛ fɔ, ma itunu-yon, ma ɩpɔrɩ, ma itunu fɔ, gɛ ɛ mɛ kerubi ɛbɛ ɛ gyaga ɩpɔrɩ fɔ yii koro.
8 Gɛ e sere Dikwo-dɩrɛ dɩɩkʋn-dɩrɛkʋn gɛtɛ waabo ma waayɛrɛ ì we kyɛkyɛ, anlɛ gɛtɛ Dikwo-dɩrɛ fɔ daayɛrɛ ì we fɔ. Daabo ɩ̀ ba bɩsɩrɩ dikpilin ma fwo (30), gɛ daayɛrɛ ɩ̀ ba bɩsɩrɩ dikpilin ma fwo (30). Ɛ ka sɩka-sɩya-kpara gɛtɛ wʋʋdʋrʋ wʋ̀ ba bekilo disepekyi ma gbaa ma nkpɩn ton (2,300) ɛ bɔlɩ Dikwo-dɩrɛ dɩɩkʋn-dɩrɛkʋn fɔ. 9 Sɩka-sɩya gɛtɛ ɛ ka ɛ mɛ aŋanbi fɔ wɔdʋrʋ wʋ̀ ba kilo-fan, gɛ ɛ ka sɩka-sɩya ɛ bɔlɩ gatala gaakwo fɔ yɩɩ-ɩpɔrɩ fɔ mɔ.
10 Solomon ɛ mɛ kerubi ɛbɛ bɛnyɔɔ, gɛ ɛ ka sɩka-sɩya ɛ bɔlɩ bɛ, gɛ ɛ ka bɛ ɛ sɩ̀ Ɔkʋn-dɩrɛ Wʋʋkʋn-dɩrɛkʋn fɔ. 11 kerubi ɛbɛ bɛnyɔɔ fɔ baabanban yaabo ɩ̀ ba bɩsɩrɩ dikpilin ma fwo (30). Kerubi ɛkɩ dɩbanban-kɩlɩn daabo ɩ̀ ba bɩsɩrɩ kwarankɩ ma ɔfan (7.5), gɛ dɩɩ kya ɔpɔrɩ fɔ. Wɔ dɩbanban-do fɔ mɔ daabo ɩ̀ ba bɩsɩrɩ kwarankɩ ma ɔfan, gɛ dɩɩ kya kerubi-do fɔ woyo. 12 Gɛlɛ ke gɛ Kerubi-nyɔɔfɛ fɔ dɩbanban-kɩlɩn daabo ɩ̀ ba bɩsɩrɩ kwarankɩ ma ɔfan (7.5), gɛ dɩɩ kya ɔpɔrɩ fɔ. Gɛ wɔ dɩbanban-do fɔ mɔ daabo dɩ̀ ba bɩsɩrɩ kwarankɩ ma ɔfan, gɛ dɩɩ kya kerubi gyangbasɛlɛ fɔ woyo. 13 Kerubi ɛbɛ bɛnyɔɔ nyabɛ baa banban yaabo ɩ̀ ba bɩsɩrɩ dikpilin ma fwo (30). Bè yela bɔɔ bɩsɩrɩ buu koro, gɛ be fi bɔɔ bʋnʋn be ten gamɩ gii dikwo fɔ. 14 Gɛ ɛ yɛ bɛ ka bɛnan baanu nkeni butu, ma ɩsɩsɩya, ma ɔkpɩ wuu butu, ma ifututu-kpara bɛ lɔ dɩyan-sʋlɛ otunu tɛ Dɩyan dii Dikwo fɔ, gɛ bɛ lɔ kerubi ɛbɛ bɛ gyaga dii koro. 15 Be sere bepila bɛnyɔɔ Dikwo-dɩrɛ fɔ dɩɩ bʋnʋn, gɛtɛ wʋkamasɛ waabo wʋ̀ ba bɩsɩrɩ akpilin anyɔɔ ma fwo bʋnyɔɔ. Gɛ ayu gɛtɛ ɩ̀ gyaga bepila fɔ baayu yii koro fɔ dɩkamasɛ daatɔ ɩ̀ ba bɩsɩrɩ kwarankɩ ma ɔfan (7.5). 16 Gɛ ɛ lɔ imini ɩkɩ anlɛ agbarɩgbarɩ ɛ gyaga bepila fɔ baayu yii koro. Gɛ e biri ɛ mɛ pomegraniti wabi akpilin ton (100) ɛ sa ma agbarɩgbarɩ fɔ. 17 E sere bepila fɔ Dikwo-dɩrɛ fɔ dɩɩ bʋnʋn, wʋkɩ wù sere gatɩn gɩɩ gɩlan, gɛ wʋkɩ mɔ wù sere gatala gɩɩ gɩlan. Gɛ ɛ sa ɛwʋ gɛtɛ wʋ̀ sa gatɩn gɩɩ gɩlan fɔ diyere alɛ Yakin3:17 Yakin gɛtɛ wuu wùlà alɛ <<E sere.>>, gɛ ɛ sa ɛwʋ gɛtɛ wʋ̀ sa gatala gɩɩ gɩlan fɔ diyere alɛ Bowasi3:17 Bowasi gɛtɛ wuu wùlà alɛ <<Ɔkɛma>>.
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)