2 Ɩya-ɩya 16

Asa wawi-kurumakyɛɛ

1 Asa bugyu buu gedi bʋʋ bɩkyan dikpilin ma fwo-kooronfɛ gaanɩ fɔ, Isareli wogyu Baasa ma wɔ bɩtà bʋʋ bɛtàlɛ bɛ ma sʋ Yuda bɛ sa, gɛ bɛ sere ɔpɩ bɛɛ mara ɔpɔrɩ bɛ sa Rama ditele anlɛ gɛtɛ waà mɛ gɛ ɛnɩ ɛkɩ ɛn nan talɩ e gyu, abɛɛ èè ye ɔkʋn gɛtɛ Yuda wogyu Asa ee di bugyu fɔ.

2 Gɛ Asa ɛ ka sɩka-fututu ma sɩka-sɩya gɛtɛ wʋ̀ sa sɩka gɛsɩkʋn Yahwe Dikwo-dɩrɛ fɔ daanɩ ma ɛwɔ gbagba digyu-kpaara diiyo, gɛ ɛ ka wʋ ɛ ma tɛ Aram wogyu Ben-Hadadi gɛtɛ ee di bugyu Damasiko fɔ, gɛ ɛ dɔ̀ wɔ alan, 3 <<Yɛ nmɩ ma awɔ taà tà dikola, anlɛ gɛtɛ aate ma miinte bɛ sara fɔ. Nya n de sɩka-fututu ma sɩka-sɩya ntɛ tɩyɛma wɔ̀, fɔ àà kebi dikola gɛtɛ a ta ma Isareli wogyu Baasa fɔ, fɔ èè kere bɩtà bʋʋ gɛtà ma nmɩ ɛ ya.>>

4 Ɛwʋ gɛ Ben-Hadadi e yera egyu-dɩrɛ Asa wade fɔ, gɛ ɛ sa wɔ bɩtà bʋʋ bɛndɩrɛ Isareli watele-dɩrɛ-dɩrɛ yaanɩ. Gɛ e gye Iyon ditele, ma Dan, Abeli-Beti-Maaka, ma Kinereti fɩya ma Nafitali watele-sɩ̀lɛ-anyan powu bɩtà. 5 Ɔya gɛtɛ Baasa ɛ nʋn ade nyayɩ fɔ, e kere Rama ditele dɩɩpɔrɩ fɔ wuu gesere ɛ ya, gɛ e kere wɔ gʋtʋn fɔ ɛ ya. 6 Gɛ Egyu-dɩrɛ Asa ɛ kʋla Yuda beteni powu. Gɛ ɛ yɛ bɛ be tola ataa, ma iyon atoo-atoo gɛtɛ Baasa è de ee sere ɔpɔrɩ e Rama ditele fɔ, gɛ egyu-dɩrɛ Asa ɛ ma ka yɩ e sere e silin Geba ma Misipa atele.

7 Ɔya wʋtɔkɔ waanɩ fɔ, Wurubwarɛ wɔtabʋrʋlɛ Hanani ɛ bɛ dɔ̀ Yuda wogyu Asa alan <<Gɛtɛ a ka bʋnʋn a gyaga gɛ Aram wogyu wo koro, gɛ a kere Yahwe, aa Wurubwarɛ fɔ a ya okoro, gedi gɛtɛ nafɔ aà di Aram bɩtà bʋʋ bɛtàlɛ boo koro fɔ wʋ gbɛrɛ wɔ. 8 Nka Etiyopiya bete, ma Libiya bete n di bɩtà bʋʋ bɛtàlɛ ma ɔkɛma gɛtɛ bɛ̀ ba tiiramisan ɛbɛ ma abengyi yɩɩ bɛsaralɛ kpekpesi fɔ? Mɔ gɛtɛ a ka aa bʋnʋn a gyaga Yahwe wo koro fɔ, ɛ yɛ wɔ a di boo koro. 9 Yema Yahwe ee we gɛtʋnkwaa powu gii koro, gɛ ɛɛ sa ɛbɛ gɛtɛ bɛ ka booturu powu bɛ tɛ wɔ fɔ ɔkɛma. A mɛ anyimapu-de, okoro ye ǹdò san baà tɩ̀ tà bɩtà ma awɔ.>>

10 Ade nyayɩ ɩ yɛ Asa ɛ ka owurufa Wurubwarɛ wɔtabʋrʋlɛ fɔ wo koro, gɛ e gye wɔ ɛ tan dikwo. Ɔkʋna wʋtɔkɔ ke gɛ Asa e sere ɔpɩ ɛɛ nyanla bɛnɩ fɔ bɛkɩ gɛnyanla-kpen.

11 Bɛ ŋwara Asa bugyu baade, ye digyegeye ma sere ɔkʋna powu bɛ sa Yuda ma Isareli begyu boo koro gaanɩ yɩɩ gɩkpa gaanɩ. 12 Asa bugyu buu gedi bʋʋ gɩkyan dikpilin ma fwo-yɛkɩfɛ gaanɩ fɔ, geyeba gɩkɩ gɩ gbɛrɛ wɔ gɩsɩrɩ. Ma gɛtɛ wo geyeba fɔ giinyun gɩ mɛ ɔkɛma gba fɔ, en lila gɛkpà ye Yahwe wakʋn, mɔ fɔ, e len geyeba-kya e ye gɛ geyeba gɩɩ bɛkyalɛ booko baakʋn. 13 Gɛ Asa e ku wo bugyu buu gedi wʋ̀ bɩkyan akpilin anyɔɔ ma gɩkɩfɛ gaanɩ. 14 Gɛ be lò wɔ gɩsàn gɛtɛ ɛ pɩna ɛ sɩ̀ ɛ tɛ ɛwɔ gbagba wo koro fɔ gaanɩ, ɔkʋn gɛtɛ bee kpèlè Dafidi Ditele daanɩ. Bɛ ka wɔ bɛ dʋrɔ npa wo koro, gɛ bɛ ka anyan ma ofen, ma bʋnɔ ma ofen bɛ sʋrʋ wɔ, gɛ bɛ sa ɔtan-dɩrɛ wʋkɩ bɛ ka be wula wɔ.