1 Ɔkʋna gɛtɛ Yosiya e di bugyu fɔ ɛ̀ ba bɩkyan nɩyɛ, gɛ e di bugyu Yerusalem bɩkyan dikpilin ma fwo-dɩkɩ. 2 Ɛ mɛ ade gɛtɛ ɩ̀ tʋna Yahwe bʋnʋn gɛ ɛ san wotu Dafidi wo-isele powu yaanɩ. En fi san dɩbɩyan abɛɛ ologyi. 3 Wo bugyu buu gedi bʋʋ gɩkyan-nɩyɛfɛ gaanɩ, ma gɛtɛ è di ebi gba fɔ, e sere ɔpɩ ɛɛ sʋma wotu Dafidi wo Wurubwarɛ fɔ. Wɔ gɩkyan fwo-nyɔɔfɛ gaanɩ fɔ, e sere ɔpɩ ee muru asʋmakʋn, ma Asera wo-iyon, ma bekpen gɛtɛ bɛ salɩ, ma bekpen gɛtɛ bɛ mara powu gɛtɛ bɛ sa Yuda ma Yerusalem fɔ. 4 Ɛ yɛ be gbena Baali wo gedi gaatɛkʋn fɔ, gɛ be gbena olifwi wuu gedi gaatɛkʋn gɛtɛ ɩ̀ gbɛma yɩ fɔ, gɛ be tunla Asera wo-iyon fɔ ma bekpen fɔ bɛ fɩna. E gbena anyan nyayɩ dugudugu, gɛ ɛ yasɩ yɩ e lù bɛnɩ gɛtɛ bɛ sʋma bekpen fɔ bɔɔ bɩsan buu koro. 5 E kuma bekpen fɔ boo gedi gɩɩ bɛtɛlɛ baanankʋba gedi gaatɛkʋn fɔ yii koro ɛ ka ɛ kpa Yuda ma Yerusalem dɩdɩɩ. 6 Gɛ ɛ mɛ gɛlɛ ke Manase, ma Efrayim, ma Simeyon boo-ifoli yaatele yaanɩ, ka ma ye Nafitali. 7 E tùnla-tùnla gedi gaatɛkʋn fɔ, ma Asera wo-iyon fɔ ɛ fɩna, gɛ ɛ kpààrà boo bekpen fɔ ɛ mɛ ɔnʋmʋ, gɛ e gbena-gbena boo-ilifwi yii gedi gɩɩ gɛtɛkʋn fɔ buruburu Isareli anɩ powu, gɛ e biri ɛ da Yerusalem.

8 Yosiya bugyu buu gedi bʋʋ gɩkyan fwo-nɩyɛfɛ gaanɩ fɔ, gɛtɛ e tiri dɩdɩɩ daanyɩmɩnyan fɔ e ye gɛtʋnkwaa fɔ gaanɩ, ma Dikwo-dɩrɛ fɔ daanɩ fɔ, ɛ sa Asaliya wobi Safan, ma gɩfɩɩ gɩɩnyalɛ Maaseya, ma gɩkpa gɩɩŋwaralɛ Yowahasi wobi-teni Yowa alɛ bɛ ma pɩna Yahwe, wo Wurubwarɛ Dikwo-dɩrɛ fɔ.

9 Ɛwʋ gɛ bɛ san Gedi gɩɩtɛlɛ ɛndɩrɛ Hilikiya wakʋn, gɛ bɛ ka sɩka gɛtɛ otunu wʋʋ bɛdɩyɛlɛ gɛtɛ ɛbɛ n di Lefi bete fɔ be to be ye Manase wɔfan-do fɔ, ma Efrayim bete, ma Isareli bɛnɩ-kurumakyɛɛ, ma Yuda bete powu, ma Benyamin bɛnɩ, ma Yerusalem bete baakʋn fɔ bɛ tɛ wɔ. 10 Ɛwʋ gɛ bɛ ka sɩka fɔ bɛ sa gʋtʋn gɩɩ bɛnyalɛ gɛtɛ bɛɛ nya Yahwe Dikwo-dɩrɛ fɔ dii koro fɔ bɔɔ gʋlɔ. Gɛ bɛ ka sɩka fɔ be le gʋtʋn gɩɩ bɛmɛlɛ fɔ. 11 Gɛlɛ ke gɛ bɛ tɛ bɛkapɩnta, ma ɩpɔrɩ yii beserelɛ sɩka bàà ka se ataa, ma iyon bàà ka pɩna ɩpɔrɩ gɛtɛ Yuda begyu-dɩrɛ ben ton gepe, gɛ i gbena fɔ.

12 Gʋtʋn gɩɩ bɛmɛlɛ fɔ bɛ ka nʋnkwarɩ bɛ mɛ gʋtʋn. Lefi bete Yahati ma Obediya gɛtɛ be ye Merari dɩkpaara daanɩ fɔ, ma Sekariya ma Mesulam gɛtɛ be ye Kohati dɩkpaara daanɩ fɔ na nya boo koro. Lefi bete-do gɛtɛ bɛ̀ nyɩ̀ ɩnʋn yɩɩ gɛnʋma yaanyan yaanɩ gepepe fɔ, 13 bɛɛ nya gʋtʋn gɩɩ bɛmɛlɛ gɛtɛ bɛ̀ sa bʋtʋn-kperen-kperen baanɩ fɔ boo koro. Lefi bete bɛkɩ mɔ bɛ mɛ akpa yɩɩ bɛŋwaralɛ, ma akpa yɩɩ bɛŋwaralɛ-sɩ̀lɛ, ma otunu wʋʋ bɛdɩyɛlɛ.

14 Duwi dɩkɩ, gɛtɛ bee tiri sɩka gɛtɛ bɛnɩ bɛ ka bɛ ba Yahwe Dikwo-dɩrɛ fɔ daanɩ fɔ, gedi gɩɩtɛlɛ Hilikiya e we Gɩkpa gɛtɛ Yahwe Wose gɛtɛ ɛ da ma Mose wo koro ɛ tɛ fɔ ɩ̀ sa gaanɩ fɔ. 15 Gɛ Hilikiya ɛ dɔ̀ gɩkpa gɩɩŋwaralɛ Safan alan, <<Na we Ose wʋʋ Gɩkpa fɔ Yahwe Dikwo-dɩrɛ fɔ daanɩ.>> Gɛ ɛ ka gɩ ɛ tɛ Safan.

16 Ɛwʋ gɛ Safan ɛ ka gɩkpa fɔ ɛ san ma egyu-dɩrɛ, gɛ ɛ dɔ̀ wɔ alan, <<Ɛtɩ aa bɛsaranyan tɩɩ mɛ gʋtʋn-kamasɛ gɛtɛ a ka a sa tɩɩ gʋlɔ fɔ. 17 Tɩ ka sɩka gɛtɛ wʋ̀ sa Yahwe Dikwo-dɩrɛ daanɩ fɔ gɛ tɩ ka wɔ tɩ sa gʋtʋn gɩɩ bɛmɛlɛ ma ɛbɛ gɛtɛ bɛɛ nya gʋtʋn fɔ gii koro fɔ bɔɔ gʋlɔ. 18 Gɛ gɩkpa gɩɩŋwaralɛ Safan ɛ dɔ̀ egyu-dɩrɛ alan, <<Gedi gɩɩtɛlɛ Hilikiya ɛ ka gɩkpa gɩkɩ ɛ tɛ mɩ.>> Gɛ Safan ɛ kalan gɩ egyu-dɩrɛ bʋnʋn.

19 Gɛtɛ egyu-dɩrɛ ɛ nʋn Ose fɔ waade-dɔ̀lɛ fɔ, ɛ fɛɛran wɔ ngba. 20 Ɛwʋ gɛ ɛ dɔ̀ Hilikiya, ma Safan wobi Ahikam, ma Mika wobi Abidon, gɩkpa gɩɩŋwaralɛ Safan, ma egyu-dɩrɛ wɔma-tenlɛ Asaya alan, 21 <<Ɩ san i ma lila Yahwe ɩ tɛ nmɩ ma Yuda bɛnɩ powu ka da ma ade gɛtɛ bɛ ŋwara bɛ sa gɩkpa nyagɩ gɛtɛ be we fɔ gaanɩ lɛ. Yahwe ɛ ka wowurufa-dɩrɛ tii koro, yema tiitu ɛbɛ ben di gɩkpa fɔ gaade yii koro. Bɛn mɛ ade gɛtɛ bɛ ŋwara bɛ sa gɩkpa fɔ gaanɩ fɔ.

22 Wʋʋ gama fɔ, Hilikiya ma bɛnɩ gɛtɛ egyu-dɩrɛ ɛ sa ɛ fɩya ma ɛwɔ fɔ bɛ san bɛ ma kasɩ ade fɔ bɛ tɛ Wurubwarɛ wɔtabʋrʋlɛ-nanɩ Hulida gɛtɛ wɔsan n di Tikifa wobi Salum gɛ wotu n di Hasira gɛtɛ ɛɛ nya ngba gɛtɛ bʋ̀ sa Dikwo-dɩrɛ daanɩ fɔ buu koro fɔ wakʋn. Ɛ sara gɛ Yerusalem Wɔlanlan-Nyɔɔfɛ fɔ waanɩ.

23 Gɛ ɛ dɔ̀ bɛ alan, <<Yahwe, Isareli wo Wurubwarɛ fɔ alan, ɩ dɔ̀ ɛnɩ gɛtɛ ɛ sa yɩ maakʋn fɔ alan, 24 <Yahwe alɛ ɛɛ̀ yɛ gyerebi ɛ̀ɛ̀ nʋ̀n Yerusalem ma wɔ bɛnɩ boo koro anlɛ gɛtɛ bɛ ŋwara bɛ sa gɩkpa gɛtɛ bɛ kalan bɛ tɛ Yuda wogyu-dɩrɛ lɛ gaanɩ fɔ. 25 Gɛtɛ be kere mɩ gɛsʋma bɛ yɛ gɛ be kuma olifwi bɛ tɛ gɛ bekpen, gɛ bɛ mɛ bekpen bɛ sa mɩ owurufa okoro, miinwurufa waà tɔ Yerusalem wo koro gɛ wʋn nan nʋ̀n wʋ nya.> 26 Ɩ ma dɔ̀ Yuda wogyu gɛtɛ ɛ sa yɩ alɛ ɩ ma lila Yahwe ɩ nʋn fɔ alan, <Yahwe, Isareli wo Wurubwarɛ ɛɛ dɔ̀ ka da ma ade gɛtɛ ɩ nʋn lɛ alɛ, 27 gɛtɛ i foma yaamɩnlɛ, gɛ ɩ warama koro gatɩn ɩ tɛ nmɩ Yahwe, ɔkʋna gɛtɛ ɩ nʋn gefura gɛtɛ na fura gɩfɩɩ fɔ ma gɩɩ bɛnɩ ma gɛfwala gaade gɛtɛ na dɔ̀ ka da ma gɛtʋnkwaa fɔ ma gɩɩ bɛnɩ alɛ baà bɛ̀ mɛ bɛnɩ fwalalɛ, gɛ ɩ fɛɛran yɩɩ ngba gɛ i wula mɩɩn bʋnʋn okoro, nmɩ Yahwe na nʋn yiinyun-tiri. 28 Gɛlɛ wuu koro, nan yɛ yɩ yàà ku bàà lò yɩ olila waanɩ pɛ gyerebi gɛtɛ nan yɛ ɛ̀ɛ̀ ba Yerusalem wo koro fɔ ɛ̀ɛ̀ ba.> >>

Ɛwʋ gɛ be birima wanyun-gyebi fɔ bɛ ma dɔ̀ egyu-dɩrɛ.

29 Ɛwʋ gɛ egyu Yosiya e kpèlè bɛndɩrɛ fɔ powu gɛtɛ bɛ̀ sa Yuda ma Yerusalem fɔ e tuma. 30 Gɛ ɛwɔ ma Yuda bɛnɩ ma Yerusalem bɛnɩ, ma gedi gɩɩ bɛtɛlɛ, ma Wurubwarɛ bɛtabʋrʋlɛ fɔ, ma bɛnɩ-kurumakyɛɛ, (beyenpu oo, bɛkyɩnyɩn oo) ɛbɛ powu bɛ bʋn bɛ san Yahwe Dikwo-dɩrɛ fɔ daanɩ. Gɛ ɛ kalan Dikola dɩɩ gɩkpa gɛtɛ be we Yahwe Dikwo-dɩrɛ daanɩ fɔ ɛ tɛ bɛnɩ fɔ powu. 31 Ɛwʋ gɛ egyu fɔ ɛ tɔ e yela wo pila wʋʋpɩ, gɛ ɛ pɩna ɛ tà Dikola ma Yahwe alɛ ɛɛ̀ ka woturu powu ma wɔkala ɛ tɛrɛma wɔ, gɛ eè di wo-ise ma wade-wùlàlɛ, ma wade-tɩyɛlɛ-sɩ̀lɛ fɔ yii koro anlɛ gɛtɛ bɛ ŋwara wanyun-gyebi bɛ sa gɩkpa fɔ gaanɩ fɔ.

32 Ɛwʋ gɛ ɛ yɛ Yerusalem ma Benyamin bete powu bɛ kan ntam gɛtɛ baà di bootu ɛbɛ boo Wurubwarɛ fɔ dikola fɔ dii koro.

33 Gɛ egyu-dɩrɛ Yosiya e tiri bekpen baanyɩmɩnyan fɔ e ye Isareli gɛtʋnkwaa gɩɩkʋn-kamasɛ, gɛ ɛ yɛ ɛbɛ powu gɛtɛ bɛ̀ sa Isareli fɔ bɛ sʋma Yahwe, boo Wurubwarɛ fɔ. Wɔ nkpa wawi yaanɩ fɔ, ben mini kere Yahwe, bootu ɛbɛ boo Wurubwarɛ fɔ gɛsʋma ya.