2 Ɩya-ɩya 24

Yuda wogyu Yowasi

1 Ɔkʋna gɛtɛ Yowasi è di bugyu fɔ ɛ̀ ba bɩkyan kwarankɩ, gɛ e di bugyu Yerusalem bɩkyan akpilin anyɔɔ (40). Wɔna diyere n di Sibiya, e ye Beseba. 2 Gedi gɩɩtɛlɛ Yehoyada wawi powu yaanɩ fɔ, Yowasi ɛ mɛ ade gɛtɛ ɩ̀ tʋna Yahwe bʋnʋn. 3 Yehoyada e to bɛna bɛnyɔɔ ɛ tɛ Yowasi, gɛ e wo bebi-teni ma bebi-nanɩ.

4 Bɩkyan bʋkɩ bʋʋ gama fɔ, Yowasi ɛ sa amɩnlɛ alɛ ɛɛ̀ pɩna Yahwe Dikwo-dɩrɛ fɔ. 5 Gɛ e kpèlè gedi gɩɩ bɛtɛlɛ ma Lefi bete fɔ gɛ ɛ dɔ̀ bɛ alan, <<Ɩ san Yuda watele, fɔ yàà ma to gɩkyan gɩɩ sɩka gɛtɛ bɛnɩ fɔ bee le fɔ, fɔ tàà ka tɩ̀ pɩna yii Wurubwarɛ Dikwo-dɩrɛ fɔ. Ɩ tɔ ɩ san nkenkele.>> Mɔ Lefi bete fɔ bɛn tɔ ade fɔ yii koro bilen.

6 Okoro egyu e kpèlè gedi gɩɩtɛlɛ ɛndɩrɛ Yehoyada, gɛ e lila wɔ alan, <<Anʋn yii koro gɛ an tɛ yɛ Lefi bete bàà to kɔba gɛtɛ Yahwe wɔsaranyan Mose ɛ tɛ ose alɛ be le be ye Yuda ma Yerusalem bàà ka mɛ Yahwe Dɩyan dii dikwo dɩɩ gʋtʋn fɔ?>>

7 Duyu-kɛma dɩɩna Ataliya bebi-teni bɛ ma gbena Yahwe Dikwo-dɩrɛ fɔ, gɛ bɛ ka anyan-fɩrɩnfɩrɩn fɔ ɩkɩ bɛ sʋma Baali.

8 Okoro Yowasi ɛ yɛ Lefi bete fɔ bɛ mɛ dɩdaka-tolɛ sɩka, gɛ bɛ ka dɩ bɛ sɩ̀ Yahwe Dikwo-dɩrɛ fɔ diitunun okòro. 9 Gɛ bɛ sa Yerusalem ma Yuda bete ɔtʋn alɛ ɛnɩ-kamasɛ ɛ ka kɔba gɛtɛ Yahwe wɔsaranyan Mose ɛ tɛ ose otonkuma waanɩ alɛ Isareli bete bɛ ka bɛ bɛ tɛ Yahwe fɔ bɛ ba. 10 Gɛ bɛndɩrɛbi fɔ ma bɛnɩ fɔ powu bɛ ka bɔɔ kɔba bɛ ba sa dɩdaka fɔ daanɩ ɔsɛ waanɩ, ka ma sere gɛtɛ dɩdaka fɔ dɩ yɔn. 11 Ɔyɛ-kamasɛ gɛtɛ dɩdaka fɔ dɩ̀ yɔn fɔ, Lefi bete fɔ bɛɛ ka dɩ bɛ ma tɛ egyu-dɩrɛ bɛndɩrɛbi. Fɔ egyu gɩkpa gɩɩŋwaralɛ ma gedi gɩɩ tɛlɛ ɛndɩrɛ wɔmalɛ bee tiri kɔba fɔ be ye dɩdaka fɔ daanɩ, fɔ be birima dɩ bɛ ma sɩ̀ dɩɩ gɛsarakʋn. Bɛɛ mɛ gɛlɛ duwi n di duwi, gɛ be wura kɔba gepepe.

12 Ɛwʋ gɛ egyu ma Yehoyada bɛ ka kɔba fɔ bɛ sa ɛbɛ gɛtɛ bɛɛ nya Yahwe Dikwo-dɩrɛ fɔ dɩɩ gɛpɩna gii koro fɔ bɔɔ gʋlɔ. Gɛ bɛ hayɩ ɩpɔrɩ yɩɩ bɛmaralɛ ma bɛkapɩnta, gɛ bɛ nɩ̀ hayɩ gɩwɔrɔnyan-sɩya ma gɩwɔrɔnyan yɩɩ bʋtʋn bʋʋ bɛmɛlɛ bàà bɛ pɩna Dikwo-dɩrɛ fɔ.

13 Gɛ ɛbɛ gɛtɛ bɛɛ mɛ gʋtʋn fɔ bɛ ka ɔkɛma bɛ mɛ gʋtʋn fɔ. Bɛ pɩna Wurubwarɛ dii Dikwo-dɩrɛ fɔ anlɛ gɛtɛ dɩ̀ fʋrʋma dɩ̀ dɔ fɔ, gɛ di wura ɔkɛma dɩ fɩya. 14 Gɛtɛ bɛ mɛ gɛpɩna gɩɩ gʋtʋn fɔ be were fɔ, bɛ ka kɔba gɛtɛ wu kuruma fɔ bɛ bɛ tɛ egyu ma Yehoyada. Gɛ bɛ ka wʋ bɛ mɛ anyan kperen-kperen bɛ sa Yahwe Dikwo-dɩrɛ fɔ daanɩ. Ɛyɩ n di anyan gɛtɛ bɛɛ ka bɛ sʋma, ma ɛyɩ gɛtɛ bɛɛ ka bɛ tɛ gekuma gii gedi, ma bɛtasa, ma bɩtɩyɛ, ma anyan gɛtɛ bɛ ka sɩka-sɩya ma sɩka-fututu bɛ mɛ fɔ. Gɛ awi powu gɛtɛ Yehoyada è si nkpa fɔ, bɛɛ tɩ̀ tɛ Yahwe gekuma gii gedi ɔya-kamasɛ Dikwo-dɩrɛ fɔ daanɩ.

15 Yehoyada ɛ dan gepepe, e di bɩkyan akpilin kooron ma fwo (130), gɛ e ku. 16 Be lò wɔ begyu boo gelòkʋn, ɔkʋn gɛtɛ bee kpèlè Dafidi Ditele fɔ, wade-kpara gɛtɛ ɛ mɛ ɛ tɛ Wurubwarɛ ma wo Dikwo-dɩrɛ Isareli anɩ fɔ wuu koro.

Yowasi duyu-kɛma daade

17 Yehoyada diku dɩɩ gama fɔ, Yuda bɛndɩrɛbi bɛ ka gebù bɛ ma kura egyu Yowasi, gɛ ɛ nʋn baakʋn. 18 Be kere bootu ɛbɛ boo Wurubwarɛ, Yahwe Dikwo-dɩrɛ fɔ daanɩ dɩɩ gɛsʋma bɛ ya gɛ bɛ yɛ bɛɛ sʋma gɛ Asera wo-iyon, ma bekpen. Okoro Wurubwarɛ wowurufa wʋ ba Yuda ma Yerusalem bete boo koro.

19 Ma gɛtɛ Yahwe ɛ sa wɔ bɛtabʋrʋlɛ bɛnɩ fɔ baakʋn gɛtɛ bàà biri ba wakʋn, gɛ be tiri baade-kpen be sere bɛ gba fɔ, bɛn nʋn baakʋn.

20 Ɛwʋ gɛ Wurubwarɛ gifiye gɩ sara Yehoyada wobi-teni Sekariya wo koro, gɛ e yela bɛnɩ fɔ bɔɔ bʋnʋn ɛ dɔ̀ alan, <<Wurubwarɛ alan, <Anʋn yii koro gɛ ɩn taa di Yahwe wo-ise fɔ yii koro? Wʋn nan pe wʋ tɛ yɩ. Yema i kere Yahwe ɩ ya, gɛ wʋ yɛ ɛwɔ mɔ e kere yɩ ɛ ya.> >>

21 Mɔ bɛnɩ fɔ bɛ mɛ onyun alɛ baà wolo Sekariya. Ɛwʋ gɛ egyu ɛ dɔ̀ bɛ alɛ be fun wɔ ataa be wolo Yahwe Dikwo-dɩrɛ fɔ daanɩ. 22 Egyu Yowasi ɛn kʋna gɩnɩ-kpara gɛtɛ Sekariya wote Yehoyada e tiri e wùlà wɔ fɔ, mɔ e wolo wobi. Gɛtɛ Sekariya ɛɛ kpà ma diku fɔ, ɛ dɔ̀ alan, <<Yahwe ɛ nya ade gɛtɛ aa mɛ lɛ, fɔ ɛ̀ɛ̀ dɔ̀ aa gɔdɔ.>>

23 Gɛtɛ gɩkyan fɔ gii were fɔ, Aram bɩtà bʋʋ bɛtàlɛ bɛ ma bʋn be yela Yowasi wo koro. Bɛ sʋ Yuda ma Yerusalem bɛ sa, gɛ be wolo boo begyegeyelɛ fɔ powu, gɛ be kpila baanyan kpekpesi bɛ san bɛ ma tɛ boogyu Damasiko. 24 Ma gɛtɛ Aram bɩtà bʋʋ bɛtàlɛ gɛtɛ bɛ ma sʋ Yuda ma Yerusalem bɛ sa fɔ bɛn sɔ gba fɔ, Yahwe ɛ yɛ bɛ be di Yuda bete fɔ boo koro, yema Yuda bete be kere Yahwe, bootu ɛbɛ boo Wurubwarɛ fɔ bɛ ya, okoro Wurubwarɛ e tɩn Yowasi dɩpwɛ. 25 Gɛ ɔkʋna gɛtɛ Aram bete be ye akpà fɔ yaanɩ fɔ, be pira Yowasi gɛtɛ wʋn ma gɛnya. Mɔ ɛwɔ gbagba bɛndɩrɛbi bɛ mɛ onyun wo koro, gɛ be wolo wɔ wɔ gɛdʋrɔkʋn yema gɛtɛ e wolo gedi gɩɩtɛlɛ Yehoyada wobi-teni fɔ wuu koro. Okoro e ku, gɛ be lò wɔ ɔkʋn gɛtɛ bee kpèlè alɛ Dafidi Ditele fɔ, mɔ nka begyu boo gelòkʋn fɔ baanɩ. 26 Ɛbɛ gɛtɛ bɛ mɛ onyun wo koro fɔ n di Amon-na Simeyati wobi-teni Sabedi, ma Mowabi-na Simriti wobi-teni Yehosabadi. 27 Bɛ ŋwara ade gɛtɛ Yowasi bebi-teni bɛ mɛ, ma ade gɛtɛ Wurubwarɛ bɛtabʋrʋlɛ bɛ tabʋrʋ ka dama wo koro, ma anlɛ gɛtɛ ɛ pɩna Wurubwarɛ Dikwo-dɩrɛ fɔ bɛ sa begyu baakpa yaanɩ. Gɛ wobi Amasiya e di bugyu e sere wɔ gɩsɩrɩ.