2 Ɩya-ɩya 20

Yehosafati e di Mowabi ma Amon bete boo koro

1 Nyawʋ wʋʋ gama fɔ, Mowabi bete ma Amon bete ma Mewun bete bɛkɩ bɛ ma kpà ma Yehosafati.

2 Ɛwʋ gɛ bɛnɩ bɛkɩ bɛ bɛ dɔ̀ Yehosafati alan, <<Bɩtà bʋʋ bɛtàlɛ dɩtɩnpan dɩkɩ be ye Edom, ɛpʋ ofèn bɛ̀ bɛ̀ tà wɔ̀ bɩtà. Be were gyu Hasason-Tamari.>> (Dʋkɔ n di En-Gedi fɔ) 3 Gɩsaa-dɩrɛ gi gyu Yehosafati, okoro e lila Yahwe gɩnyan gɛtɛ ɛɛ̀ mɛ. Ɛ dɔ̀ gɛtɛ ɛnɩ-kamasɛ gɛtɛ ɛ̀ sa Yuda fɔ ɛ ban onyun. 4 Gɛ bɛnɩ gɛtɛ bɛ̀ sa Yuda watele powu yaanɩ fɔ, be be tuma Yerusalem bɛ bɛ fɔ Yahwe ɛ̀ɛ̀ kpà bɛ.

5 Ɛwʋ gɛ Yehosafati ɛ tɔ e yela Yuda bete ma Yerusalem bete bɔɔ bʋnʋn, Yahwe Dikwo-dɩrɛ fɔ dɩɩ kpata-fon fɔ bʋnʋn, 6 gɛ e tiri onyun alan,

<<Oo Yahwe, tiitu ɛbɛ boo Wurubwarɛ, aako n di Wurubarɛ gɛtɛ ɛ̀ sa gatala. Awɔ nte di bugyu gɛtɛ bʋ̀ sa gɛtʋnkwaa gii koro powu buu koro. Awɔ n otimi ma ɔkɛma wuute, gɛ ɛkɩ ɛn nan talɩ e yela ma awɔ. 7 Oo tii Wurubwarɛ, ɔkʋna gɛtɛ aa bɛnɩ be gyu gɛtʋnkwaa nyagɩ gaanɩ fɔ, a berema bɛnɩ gɛtɛ bè si gaanɩ fɔ, gɛ a ka gɩ a tɛ aa wɔlɔn Abraham wodu wʋʋ bɛnɩ gàà mɛ booyo gakpaakpa. 8 Aa bɛnɩ bɛ sara nfan gɛ be sere Dikwo-dɩrɛ bàà tɩ sʋma wɔ̀, gɛ bɛ dɔ̀ alan, 9 <Gengyi gyerebi ɛkɩ anlɛ bɩtà, abɛɛ geyeba, abɛɛ dɩkpan dɩɩ ba tii koro fɔ, taà be yela aa bʋnʋn, aa Dikwo-dɩrɛ nyadɩ daanɩ, fɔ tàà wula tɩ tɛ wɔ̀ alɛ to tɩ ya, fɔ àà nʋn tɩ fɔ àà to tɩ.>

10 Nya anlɛ gɛtɛ Amon, ma Mowabi, ma Edom bɩtà bʋʋ bɛtàlɛ bɛɛ mɛ tɩ. Ɔkʋna gɛtɛ tiitu ɛbɛ be ye Egyipiti fɔ, an yɛ bɛ bàà gyu bɔɔ ntʋnkwaa baanɩ, okoro be fi gɩlan be kere bɛ bɛ ya. 11 Nya anlɛ gɛtɛ bee le tɩ gutoro. Bɛ ba bàà bè berema tɩ ye gɛtʋnkwaa gɛtɛ a ka a tɛ tɩ fɔ gaanɩ. 12 Oo tii Wurubwarɛ, tiira bɛ giten, yema tɩn ma ɔkɛma gɛtɛ taà kpà ma bɩtà bʋʋ bɛtàlɛ dɩtɩnpan gɛtɛ bɛɛ ba bàà ba kpà ma ɛtɩ lɛ. Tɩn nyɩ̀ gɩnyan gɛtɛ taà mɛ, mɔ aa koro gɛ tɩɩ bʋnʋn bʋ̀ gyaga.

13 Waanɩ fɔ, Yuda beteni powu ma bɔɔsɔ ɛbɛ, ma boo bebi, ma bebi-sorobi be be yela Yahwe bʋnʋn.

14 Ɛwʋ gɛ Yahwe Gifiye gɩ ba Sekariya wobi Yahasiyeli wo koro ɔkʋna gɛtɛ è yela dikpi fɔ daanɩ fɔ. Wotu n di Benayiya, wotu akpin n di Yeyeli, gɛ wotu olongoron n di Lefi-te Mataniya gɛtɛ è di Asaf wodu waanɩ wʋʋnɩ fɔ.

15 Gɛ ɛ dɔ̀ bɛ alan, <<Egyu Yehosafati ma ɛyɩ gɛtɛ ɩ̀ sa Yuda ma Yerusalem powu ɩ nʋn! Yahwe alan, <Ɩ kara yɛ gɩsaa gàà ton yɩ, abɛɛ koro gàà yɔ yɩ bɩtà bʋʋ bɛtàlɛ dɩtɩnpan nyadɩ dii koro. Yema akpa fɔ in di gɛ yiiyo, mɔ fɔ, ì di gɛ Wurubwarɛ woyo. 16 Gɩsa, ɩ waran ɩ ma kpà ma ɛbɛ. Yaà we bɛ gɛtɛ bɛɛ bʋn ma Sisi wosele fɔ bɛɛ ba. Yaà tuma bɛ dɩtagba gɛtɛ dɩ dɔ̀ ma ye Yeruweli wotonkuma waanɩ fɔ dii kere. 17 Nka ɛyɩ nan kpà gɛlɛ gaakpa nyayɩ. I yela kin-kin, fɔ yàà nya anlɛ gɛtɛ Yahwe ɛɛ̀ yɛ yɩ yàà di boo koro. Oo Yuda ma Yerusalem bete, ɩ kara yɛ gɩsaa gàà ton yɩ, gɛ ɩ kara yɛ koro gàà yɔ yɩ. Gɩsa ɩ san akpà fɔ yaanɩ, Yahwe ɛ̀ fɩya ma ɛyɩ.> >>

18 Gɛ egyu Yehosafati ma Yuda bete ma Yerusalem bete fɔ powu bɛ waran be kura bɛ ka bʋnʋn be tin gɛtʋnkwaa bɛ sʋma Yahwe. 19 Gɛ Lefi bete bɛkɩ gɛtɛ be ye Kohati ma Kora baafʋrɩ yaanɩ fɔ bɛ tɔ be yela, gɛ bɛ ka gɩta-dɩrɛ be sila Yahwe, Isareli wo Wurubwarɛ fɔ.

20 Kere-kpalɛ gɛgyɩgyan fuu fɔ, Yuda bɩtà bʋʋ bɛtàlɛ fɔ bɛ tɔ bɛ da Tekowa wotonkuma waanɩ. Gɛtɛ bɛ tɔ bàà da fɔ, Yehosafati ɛ dɔ̀ bɛ alan, <<Yuda ma Yerusalem bete, ɩ nʋn maakʋn! I to Yahwe, yii Wurubwarɛ i di, fɔ yàà talɩ i yela kin-kin. I to wɔ bɛtabʋrʋlɛ fɔ i di, fɔ ade yàà san gepe ɩ tɛ yɩ.>> 21 Gɛtɛ Yehosafati ma bɛnɩ fɔ be tiri amɩnlɛ be were fɔ, e tiri baanɩ bɛkɩ ɛ sɩ bɩta bʋʋ bɛtalɛ fɔ bɔɔ bʋnʋn alɛ bàà tɩ nʋma ɩnʋn bɛ tɛ Yahwe, bàà sila wo gingyebi-fɩrɩnfɩrɩn fɔ, bàà dɔ alan,

<<Ɩ sa Yahwe onyun,

yema wo gelen gɩ̀ sa gakpaakpa.

22 Gɛtɛ be sere ɔnʋn fɔ wʋʋ gɛnʋma ma Yahwegesila fɔ, Yahwe ɛ yɛ gɩsaa-dɩrɛ gi gyu Amon ma Mowabi ma Edom bɩtà bʋʋ bɛtàlɛ gɛtɛ bɛ tɩtrɩ bee gyu Yuda ga tʋnkwa gaanɩ fɔ, gɛ Uuda bett be di boo koro. 23 Amon ma Mowabi bɩtà bʋʋ bɛtàlɛ be gyu Edom bɩtà bʋʋ bɛtàlɛ fɔ baanɩ, gɛ be muru bɛ. Gɛtɛ be wolo Edom bete be were fɔ, bɛ tɔ be wolo booko-booko mɔ.

24 Ɔkʋna gɛtɛ Yuda bɩtà bʋʋ bɛtàlɛ fɔ be be gyu ɔkʋn gɛtɛ baà talɩ be we otonkuma fɔ waanɩ waran san fɔ, be we gɛtɛ bɛnɩ be ku bɛ̀ fɩna bɛ̀ fɩna gɛtʋnkwaa. Ɛnɩ n di ɛnɩ en ye waanɩ. 25 Okoro Yehosafatɩ ma wɔ bɩtà bʋʋ bɛtàlɛ fɔ bɛ ma kpila bɔɔ bɛ kyʋnlɛ fɔ baanyan. Be wura gʋtʋn gaanyan, ma ngba ma anyan gbaa-gbaa kpekpesi. Anyan fɔ ɩ̀ sɔ gepepe gɛtɛ bɛn talɩ kʋla yɩ duwi-kɩlɩn, okoro awi asiyee gɛ bɛ ka bɛ kʋla yɩ. 26 Duwi-naafɛ fɔ, be tuma Beraka dɩtagba daanɩ gɛ be sila Yahwe ɛwʋ gɛtɛ ɛ mɛ fɔ wuu koro. Nyawʋ na yɛ gɛ bee kpèlè dʋkɔ Beraka dɩtagba bè ye ma ǹdò lɛ. 27 Yehosafati e gyegeye Yuda ma Yerusalem bete powu bɔɔ bʋnʋn, gɛ be biri bɛ san Yerusalem ɔsɛ waanɩ, yema Yahwe e di bɔɔ bɛkyʋnlɛ boo koro ɛ tɛ bɛ. 28 Gɛtɛ be gyu Yerusalem fɔ, bɛ ka adʋlɛ ɛbɛ dɩrɛ-dɩrɛ, ma adʋlɛ ɛbɛ ma akantan bɛ nʋma ɩnʋn be gyu Yahwe Dikwo-dɩrɛ fɔ daanɩ.

29 Gɛ bɩfɩɩ-bɩfɩɩ buu bugyu baadikʋn gɛtɛ bʋ nʋn anlɛ gɛtɛ Yahwe ɛ kpà ma Isareli bɛkyʋnlɛ fɔ bu gyu gɩsaa. 30 Gɛ wʋ yɛ olila wʋ ba Yehosafati bugyu baanɩ, yema wo Wurubwarɛ ɛ yɛ olila wʋ ba wɔ gɛtʋnkwaa powu gaanɩ.

Yehosafati bugyu buu gewere

31 Yehosafati e di bugyu Yuda gɛtʋnkwaa gaanɩ. Ɔkʋna gɛtɛ e di bugyu fɔ, ɛ̀ ba bɩkyan dikpilin ma fwo-ton (35), gɛ e di bugyu Yerusalem bɩkyan dikpilin ma ton (25). Wɔna diyere n di Asuba, gɛtɛ e di Silihi wobi-nanɩ fɔ. 32 Yehosafati ɛ mɛ ade gɛtɛ ɩ̀ kɔlɔ Yahwe bʋnʋn, gɛ ɛn falɩ ye wote Asa osele gɛtɛ ɛ san fɔ waanɩ, ɛ san gɛ osele fɔ wuu koro. 33 Mɔ fɔ, en gbena asʋmakʋn fɔ, gɛ bɛnɩ fɔ bɛn ka boo-ituru tɛ bootu ɛbɛ boo Wurubwarɛ fɔ.

34 Bɛ ŋwara ade-kurumakyɛɛ gɛtɛ Yehosafati ɛ mɛ, ma ɛyɩ gɛtɛ ɛ mɛ wo bugyu buu gedi gaanɩ, ye digyegeye ma sere ɔkʋna fɔ bɛ sa Hanani wobi-teni Yehu gɩkpa gɛtɛ bɛ ka bɛ fɩya Isareli begyu-dɩrɛ boo koro gaade yɩɩ gɩkpa gaanɩ fɔ gaanɩ.

35 Gamama fɔ, Yuda wogyu Yehosafati ɛ mɛ onyun ma Isareli wogyu Ahasiya gɛtɛ è di duyu-kɛma diite fɔ. 36 Gɛ ɛ dɔ̀ e yera ma ɛwɔ gɛtɛ bàà salɩ gɩyɛ gɩɩ-ɩkʋlɩ-dɩrɛ-dɩrɛ. Gɛtɛ bɛ mɛ ɩkʋlɩ fɔ bɛ sɩ̀ ɩkʋlɩ yii geyelakʋn Esiyon-Geberi ditele daanɩ be were wʋʋ gama fɔ, 37 Dodafahu wobi Eliyeseri gɛtɛ e ye Maresa fɔ ɛ tabʋrʋ Yehosafati wo koro gaade alan, <<Gɛtɛ a mɛ onyun-kɩlɩn ma Ahasiya wuu koro, Yahwe ɛɛ̀ mɩna aa gʋtʋn gɛtɛ a mɛ fɔ.>> Ɩkʋlɩ fɔ ɩ gbena Esiyon-Geberi ditele daanɩ, okoro ɩn talɩ ɩ mɛ gʋtʋn.