1 Bɩkyan dikpilin gɛ Solomon ɛ ka gɛ e sere Yahwe Dikwo-dɩrɛ fɔ, ma digyu-kpaara fɔ. 2 Solomon ɛ pɩna atelebi gɛtɛ Egyu-dɩrɛ Hiram* ɛ ka ɛ tɛ wɔ fɔ e sere, gɛ ɛ yɛ Isareli bete bɛ ma sara yaanɩ. 3 waanɩ gɛ Solomon ɛ ma gye Hamati ma Soba atele bɩtà. 4 Gɛ e sere ɩpɔrɩ e silin Tadimori ditele, otonkuma waanɩ, ma anyan yɩɩ gɛsɩ̀kʋn yaatele gɛtɛ e sere Hamati wɔ-ɩlanla yaanɩ fɔ powu. 5 Gɛ ɛ pɩna e sere Gatala gii Beti-Horon ma Gatɩn gii Beti-Horon atele fɔ, gɛtɛ ì di atele ma ɔkɛma fɔ, gɛ be sere ɩpɔrɩ be silin yɩ, gɛ bɛ sa yɩ itunu, ma awɔrɔnyan. 6 Gɛ e biri e sere ɩpɔrɩ e silin Baalati ditele ma atele-sɩ̀lɛ anyan powu, ma atele gɛtɛ wo tiiramisan ɛbɛ ma waabengyi ɩ̀ sa yaanɩ fɔ. E sere gɩnyan-kamasɛ gɛtɛ è len èè sere Yerusalem, ma Lebanon, ma ntʋnkwaa gɛtɛ ee di bugyu baanɩ powu fɔ. 7 Bè ye ma ɔkʋna wʋtɔkɔ fɔ, bɛnɩ bɛkɩ bɛ̀ sangba bè si gɛtʋnkwaa fɔ gii koro gɛtɛ ben di Isareli bete. Bɛnɩ bɛtɔkɔ n di Hiti bete, ma Amori bete, ma Perisi bete, ma Hifi bete, ma Yebusi bete 8 gɛtɛ Isareli ben wolo fɔ boodu waanɩ na kuruma gɛtʋnkwaa fɔ gaanɩ lɛ. Ɛbɛ gɛ Solomon ɛ mɛ bɛ bɛdɩ̀, gɛ bɛ mɛ gʋtʋn ma ɔkɛma anlɛ gɛtɛ wu we be ye ma ǹdò lɛ. 9 Mɔ Solomon ɛn nyɩ̀ Isareli bete fɔ bàà mɛ bɛdɩ̀ wɔ gʋtʋn gaanɩ, mɔ fɔ, ɛ yɛ baanɩ bɛkɩ bɛ mɛ wɔ bɩtà bʋʋ bɛtàlɛ, ma bɩtà bʋʋ bɛndɩrɛ, ma wɔ bɛndɩrɛbi, ma wo tiiramisan ɛbɛ yɩɩ bɛnyalɛ, ma waabengyi yɩɩ bɛsaralɛ. 10 Gɛ Egyu Solomon ɛ̀ nɩ ba Isareli bɛndɩrɛbi gɛkpɩn ma akpilin anyɔɔ ma fwo (250) gɛtɛ bɛɛ nya bɛnɩ gɛtɛ bɛɛ mɛ gʋtʋn fɔ boo koro.

11 Solomon e tiri Farawo wobi-nanɩ e ye Dafidi Ditele ɛ ba digyu-kpaara gɛtɛ e sere ɛ tɛ wɔ fɔ daanɩ, yema ɛ dɔ̀ alan, <<Wʋn kʋtʋma gɛtɛ mɩɩnsɔ ɛ̀ɛ̀ sara Isareli wogyu Dafidi digyu-kpaara daanɩ, yema ɔkʋn-kamasɛ gɛtɛ Yahwe Dikola dɩɩ dɩdaka fɔ dɩ̀ sa fɔ, wù we fɩrɩnfɩrɩn.>>*

12 Solomon ɛ tɛ Yahwe gekuma gii gedi, gedi gɩɩ gɛtɛ̀kʋn gɛtɛ e sere Yahwe Dikwo-dɩrɛ dɩɩ kpata bʋnʋn fɔ gii koro. 13 Ɛ tɛ gedi fɔ anlɛ gɛtɛ Mose wo-ise ii wùlà alɛ bɛ mɛ duwi-kamasɛ daanɩ, ma Awi-Tunalɛ yaanɩ, ma Bebon-Bon, ma gɩkyan bʋʋ-ɩsɛ isiyee yii gedi, gɛtɛ ɛyɩ n di Boroboro gɛtɛ bɛn sa Gɩfa-ŋanlɛ wɔsɛ wuu gedi, ma Awi-nɩyɛ ɛbɛ Yaawi yii gedi, ma Ɩpanpan Yaawi yii gedi. 14 Solomon ɛ tɛrɛma ade-tɩyɛlɛ-sɩ̀lɛ gɛtɛ wote Dafidi ɛ tɩyɛ ɛ sɩ̀ fɔ. Ɛ sɩ̀ gedi gɩɩ bɛtɛlɛ akpi-akpi tɛ bɔɔ gʋtʋn gɩɩ gɛ mɛ, gɛ e tiri Lefi bete gɛtɛ bàà gyegeye tɛ gesila gɩɩnʋn yɩɩ gɛnʋma, fɔ bàà kpà gedi gɩɩ bɛtɛlɛ fɔ anlɛ gɛtɛ wù di gɛtɛ baà mɛ gʋtʋn duwi-kamasɛ daanɩ fɔ. Gɛlɛ ke gɛ ɛ sɩ̀ itunu yɩɩ bɛdɩyɛlɛ akpen-akpen gɛtɛ bàà yela itunu yɩɩ-ɩpɩ. Yema gɛlɛ gɛ Wurubwarɛ wɔnɩ Dafidi ɛ dɔ̀ bɛ alɛ bɛ mɛ. 15 Gedi gɩɩ bɛtɛlɛ ma Lefi bete fɔ bɛ bɔ bɛ mɛ gɛ anlɛ gɛtɛ Dafidi e wùlà alɛ bɛ mɛ fɔ, fɩya ma dikwo gɛtɛ bɛɛ sɩ̀ anyan gbaa-gbaa daanɩ fɔ dii koro wʋʋ gɛnya.

16 Solomon gʋtʋn fɔ powu gi were nkele. Ye duwi gɛtɛ be sere Yahwe Dikwo-dɩrɛ dɩɩ gʋtʋn fɔ gɩɩpɩ ma ye gii geweremakʋn. Okoro Yahwe Diko-dɩrɛ fɔ di were.

17 Ɛwʋ gɛ Solomon ɛ san Esiyon-Gebri, ma Elati, Ɛpʋ-sɩya wonyun gɛtɛ wù sa Edom gɛtʋnkwaa gaanɩ fɔ. 18 Gɛ egyu-dɩrɛ Hiram ɛ yɛ wɔ bɛndɩrɛbi, ma ɛbɛ gɛtɛ bɛ̀ nyɩ̀ ɩkʋlɩ yaade fɔ bɛ nya ɩkʋlɩ fɔ yɩɩ-ɩsan yii koro. Ɛbɛ ma Solomon bɛndɩrɛbi fɔ na ye dʋkɔ bɛ san bɛ ma gyu Ofiri, gɛ bɛ ka sɩka-sɩya bekilo ɩgbaa nɩyɛ ma nkpɩn ton (17,000) bɛ mɔma Solomon.