2 Ɩya-ɩya 33

Yuda wogyu Manase

1 Ɔkʋna gɛtɛ Manase e di bugyu fɔ, ɛ̀ ba bɩkyan fwo bʋnyɔɔ. Gɛ e di bugyu bɩkyan akpilin anyɔɔ ma fwo-ton (55) Yerusalem. 2 Ɛ mɛ ade-kpen Yahwe bʋnʋn. Ɛ tɛrɛma ade kyʋnlɛ gɛtɛ bɛnɩ gɛtɛ Yahwe e berema e ye Isareli bete bɔɔ bʋnʋn fɔ bɛɛ mɛ fɔ. 3 E biri e sere asʋmakʋn gɛtɛ wote Hesekiya e gbena fɔ, gɛ e biri e sere Baali gedi gaatɛ̀kʋn ma Asera wo-iyon. E kura gatala gaanyan powu, gɛ ɛ sʋma yɩ. 4 E sere bekpen boo gedi gaatɛ̀kʋn Yahwe Dikwo-dɩrɛ gɛtɛ Yahwe ɛ dɔ̀ alan, <<Yerusalem nan mɛ mɩɩn gɛsʋmakʋn gakpaakpa>> fɔ daanɩ. 5 E sere gedi gaatɛ̀kʋn ɛ tɛ gatala gaanyan yɩɩ gɛsʋma Yahwe Dikwo-dɩrɛ fɔ daakpaara anyɔɔ fɔ powu yaanɩ. 6 E kuma wo bebi-teni ɛ tɛ gedi Beni-Hinom dɩtagba daanɩ. Ɛ mɛ gɛsɔma gaade, ma gɩbwɔ ma asɔlɔ-de, gɛ e kpèlè bekpena afiye-kpen. Ɛ mɛ ade-kpen ɛ kara Yahwe bʋnʋn, gɛ wʋ yɛ Yahwe owurufa wʋ tɔ.

7 Ɛ ka bekpen gɛtɛ ɛ mɛ fɔ ɛ sɩ̀ Wurubwarɛ Dikwo-dɩrɛ gɛtɛ Wurubwarɛ ɛ dɔ̀ Dafidi ma wobi Solomon alan, <<Dikwo-dɩrɛ nyadɩ ma Yerusalem gɛtɛ na tiri na ye Isareli wo-ifoli powu yaanɩ lɛ nan mɛ ɔkʋn gɛtɛ baà tɩ sʋma mɩ gakpaakpa. 8 Mɩn nan nɩ yɛ Isareli bete bɔɔ gɩsɩrɩ gàà ye gɛtʋnkwaa gɛtɛ na ka na tɛ bootu ɛbɛ lɛ gaanɩ gengyi bè di ade powu gɛtɛ na yɛ mɩɩnsaranyan Mose ɛ dɔ̀ bɛ fɔ yii koro fɔ. Ade fɔ n di ise fɔ, ma ade-wùlàlɛ fɔ, ma ade-tɩyɛlɛ-sɩ̀lɛ fɔ daanɩ>> 9 Mɔ Manase ɛ yɛ Yuda ma Yerusalem bɛnɩ bɛ mɛ ade-kpen ɩ kààrà bɩfɩɩ gɛtɛ Yahwe e muru Isareli bete bɔɔ bʋnʋn fɔ booyo fɔ.

10 Ma gɛtɛ Yahwe e terema ade ɛ tɛ Manase ma wɔ bɛnɩ gba fɔ, bɛn ka wɔ bɩta. 11 Okoro Yahwe ɛ yɛ Asiriya wogyu-dɩrɛ bɩtà bʋʋ bɛtàlɛ bɔɔ bɛndɩrɛ bɛ bɛ sʋ bɛ bɛ sa, gɛ be gye Manase gɩdɩ, gɛ bɛ sa wɔ gɩwɔrɔnyan dininfere, gɛ bɛ ka gɩwɔrɔnyan-sɩya gaagbarɩgbarɩ bɛ ban wɔ, gɛ bɛ ka wɔ bɛ da Babilon. 12 Gɛtɛ Manase ɛ̀ sa dɩyɩyɛ daanɩ fɔ, e wula ɛ fɔ Yahwe, wɔ Wurubwarɛ fɔ, gɛ ɛ warama koro gepepe wotu ɛbɛ boo Wurubwarɛ fɔ bʋnʋn. 13 Gɛtɛ e wula e kpèlè Yahwe fɔ, Yahwe e to wonyun-tiri, gɛ e birima wɔ ɛ ba Yerusalem, wo bugyu fɔ baanɩ. Ade nyayɩ ɩ yɛ Manase e we ɛ nyɩnla alɛ Yahwe n di Wurubwarɛ.

14 Nyawʋ wʋʋ gama fɔ, e pɩna e sere Ɔkʋn gɛtɛ bee kpèlè Dafidi Ditele fɔ diikòro wʋʋpɔrɩ, butu buu geduru-yekʋn gɛtɛ wʋ̀ sa Gihon fɔ wuufila wʋʋ gɛnʋ̀nkʋn wʋʋ gɩlan dɩtagba daanɩ, ka silin Ofeli wodon, ka ma ye Otunu gɛtɛ bee kpèlè Ɛsʋ̀n Wotunu fɔ. E sere ɔpɔrɩ fɔ gɛtɛ wʋ tɔ gepepe. Gɛ e tiri bɩtà bʋʋ bɛtàlɛ bɔɔ bɛndɩrɛ ɛ sɩ̀ Yuda watele ma ɔkɛma fɔ powu yaanɩ.

15 E tiri bendeni boo bekpen fɔ, ma oyon-salɩlɛ fɔ e ye Yahwe Dikwo-dɩrɛ fɔ daanɩ, ka fɩya ma gedi gaatɛkʋn gɛtɛ e sere Dikwo-dɩrɛ fɔ diidon wuu koro, ma Yerusalem fɔ, gɛ ɛ ka yɩ e fun e lulu ditele fɔ diikòro. 16 Gɛ ɛ pɩna e sere Yahwe gedi gɩɩ gɛtɛkʋn fɔ, gɛ ɛ tɛ olila wuu gedi, ma onyun wʋʋ gɛsa gii gedi, gedi gɩɩ gɛtɛkʋn fɔ gii koro. Ɛwʋ gɛ ɛ dɔ̀ Yuda bɛnɩ alɛ wù di gɛtɛ bàà sʋma gɛ Yahwe, Isareli wo Wurubwarɛ fɔ woko. 17 Bɛnɩ fɔ bɛ̀ bɔ bɛɛ tɛ gedi asʋmakʋn fɔ yaanɩ, mɔ Yahwe boo Wurubwarɛ fɔ gɛ bɛɛ tɛ.

18 Bɛ ŋwara Manase bugyu buu gedi gaade, fɩya ma wonyun gɛtɛ e tiri ɛ tɛ Yahwe, Isareli wo Wurubwarɛ fɔ, bɛ sa Isareli begyu-dɩrɛ boo koro gaade yɩɩ gɩkpa gaanɩ. 19 Bɛ ŋwara Manase wonyun-tiri fɔ waade, ma anlɛ gɛtɛ Wurubwarɛ ɛ nʋn wonyun-tiri fɔ, fɩya ma wade-kpen gɛtɛ ɛ mɛ ma wɔ gɛmandi nʋnkwarɩ, ma ɩkʋn gɛtɛ e sere asʋmakʋn, gɛ e sere Asera wo-iyon ma bekpen, pɛgɛ ɛ bɛ warama koro fɔ powu bɛ sa Hosayi wo koro gaade yɩɩ gɩkpa gaanɩ. 20 Manase e ku, gɛ be lò wɔ wo digyu-kpaara daanɩ. Gɛ wobi Amon e di bugyu e sere wɔ gɩsɩrɩ.

Yuda wogyu Amon

21 Ɔkʋna gɛtɛ bɛ sɩ̀ Amon bugyu fɔ ɛ̀ ba bɩkyan dikpilin ma bʋnyɔɔ, gɛ e di bugyu Yerusalem bɩkyan-bʋnyɔɔ. 22 Ɛ mɛ ade-kpen Yahwe bʋnʋn anlɛ gɛtɛ wote Manase ɛ bɔ ɛ mɛ fɔ. Amon ɛ sʋma bekpen gɛtɛ wote ɛ mɛ fɔ, gɛ ɛ tɛ bɛ gedi. 23 Mɔ ɛwɔ ɛn warama koro gatɩn alɛ wote, mɔ fɔ ɛ mɛ gɛ ade-kpen ɛ fɩya.

24 Amon bɛndɩrɛbi bɛ mɛ onyun wo koro, gɛ be wolo wɔ wo digyu-kpaara daanɩ. 25 Ɛwʋ gɛ Yuda bɛnɩ be wolo bɛnɩ powu gɛtɛ be wolo egyu-dɩrɛ Amon fɔ, gɛ bɛ ka wobi Yosiya bɛ sɩ̀ bugyu be sere wɔ gɩsɩrɩ.