2 Ɩya-ɩya 19

1 Yuda wogyu Yehosafati e biri ɛ ma gyu wo digyu-kpaara Yerusalem olila waanɩ. 2 Gɛ Hanani wobi Wurubwarɛ wɔtabʋrʋlɛ Yehu ɛ ma tuma egyu fɔ, gɛ ɛ dɔ̀ wɔ alan, <<Wù di gɛtɛ àà kpà omiri-kpen wuu bete fɔ àà len ɛbɛ gɛtɛ bɛɛ kyʋn Yahwe? Nyawʋ wuu koro, Yahwe ɛ ka owurufa-dɩrɛ ma awɔ. 3 Mɔ fɔ, ade-kpara bɛrɛɛ ɩ̀ sa aanɩ, yema a tiri Asera wo-iyon gɛtɛ ɩ̀ sa gɛtʋnkwaa fɔ gaanɩ powu, gɛ a ka aaturu aa bugiti Wurubwarɛ.>>

Yehosafati ɛ sɩ̀ gɔdɔ gɩɩ bɛdɔ̀lɛ

4 Yehosafati ɛ sara Yerusalem, mɔ ee tì ye Beseba ɛ san Efrayim wo-idon yɩɩ gɛtʋnkwaa gaanɩ ɛɛ ma tabʋrʋ ɛ tɛ dʋkɔ wʋʋ bɛnɩ gɛtɛ bàà biri fi boo-ituru ba Yahwe, bootu ɛbɛ boo Wurubwarɛ fɔ wakʋn. 5 Ɛ sɩ̀ gɔdɔ gɩɩ bɛdɔ̀lɛ Yuda watele-kɛmalɛ-kamasɛ yaanɩ. 6 Gɛ ɛ dɔ̀ bɛ alan, <<Ɩ nya gɛtɛ yaà dɔ̀ gɔdɔ-kamasɛ ma giisele, yema nka bɛnɩ-nyalɛ gɛ ɩɩ dɔ̀ gɔdɔ fɔ ɩ tɛ, ɩɩ dɔ̀ ɩ tɛ gɛ Yahwe. Gɛ ɛ̀ fɩya ma ɛyɩ ɔya-kamasɛ gɛtɛ ɩɩ tɛ aten ma dɩpwɛ gɔdɔ gaanɩ fɔ. 7 Ɩ yɛ Yahwe geserenti gàà sara yaanɩ. Ɩ dɔ̀ gɔdɔ ma giisele, yema Yahwe tii Wurubwarɛ ɛn taa len akutugyi, abɛɛ diligi, abɛɛ ma dibilin daanyan yii geto.>>

8 Gɛ Yerusalem ditele daanɩ fɔ, Yehosafati ɛ sɩ̀ Lefi bete ma gedi gɩɩ bɛtɛlɛ ma akpaara yɩɩ bɛndɩrɛ bɛkɩ gɛtɛ bàà tɛrɛma Yahwe wo-ise fɔ dɔ̀ gɔdɔ fɔ bàà pɩna itiira gɛtɛ ɩ̀ sa bɛnɩ boo getite. Bɛ sara gɛ Yerusalem dʋkɔ. 9 Ɛ dɔ̀ bɛ alan, <<Wù di gɛtɛ yàà mɛ gɩnyan-kamasɛ Yahwe geserenti ma nʋnkwarɩ anɩ. 10 Ɔya-kamasɛ gɛtɛ yɩɩ bɛnɩ baanɩ ɛkɩ gɛtɛ e ye ditele dɩkɩ daanɩ, ɛ̀ ka ade ɩkɩ ɛ mɔma yɩ fɔ, gengyi wù di gɩnɩ-wolo gaade oo, wù di ade kadama ise fɔ oo, abɛɛ ade-wùlàlɛ oo, abɛɛ ade-mɛlɛ oo, abɛɛ ade-tɩyɛlɛ-sɩ̀lɛ ɩkɩ yii koro oo, ɩ dɔ̀ bɛ fɔ bàà nya gepe gɛtɛ baà dɔ̀ gɔdɔ fɔ ma giisele, fɔ bɛ kara bɛ mɛ Yahwe ade-kpen. Nka gɛlɛ fɔ, wowurufa-dɩrɛ waà ba ɛyɩ ma yɩɩdɩrɛ ɛbɛ boo koro. Ɩ mɛ nyawʋ gɛtɛ ɩ kara bɛ mɛ ade-kpen.

11 Amariya gɛtɛ è di gedi gɩɩtɛlɛ ɛndɩrɛ fɔ nan nya yii koro ade powu gɛtɛ ɩ̀ san ma Yahwe gɩlan fɔ. Gɛ Isimayeli wobi Sebadiya gɛtɛ è di egyegeyelɛ Yuda wofoli waanɩ fɔ nan nya yii koro dɩsarabi daade powu yaanɩ. Gɛ Lefi bete fɔ mɔ nan mɛ bɛndɩrɛbi bɛ tɛ yɩ. I yela kin-kin, fɔ Yahwe ɛ̀ɛ̀ fɩya ma ɛbɛ gɛtɛ bɛɛ mɛ ade-kpara fɔ.>>