2 Ɩya-ɩya 9

Seba wogyu-nanɩ ɛ be silin Solomon

1 Gɛtɛ Seba wogyu-nanɩ ɛ nʋn anlɛ gɛtɛ Solomon diyere di ye fɔ, ɛ ka ade-lilalɛ ma ɔkɛma ɩkɩ ɛ ba ɛ̀ɛ̀ bɛ kɛrɛ wɔ nya. Ɛ ka bɛnɩ dɩtɩnpan, ma akpɔŋɔ, gɛtɛ ì tola anyan ma ofen, ma sɩka-sɩya gepepe, ma ataa ma ɔyɛ-kɛma ɛ ba Yerusalem. Gɛtɛ e be gyu Solomon wakʋn fɔ, ɛ dɔ̀ Solomon ade powu gɛtɛ ɩ̀ sa wamɩnlɛ yaanɩ. 2 Ɛwʋ gɛ Solomon e tiri wade fɔ powu yiinyun ɛ tɛ wɔ. Ade ɩkɩ ɩn mɛ egyu-dɩrɛ ɔkɛma ma yaanɩ yii getiri tɛ wɔ. 3 Gɛtɛ Seba wogyu-nanɩ e we gɛsɛyɩ gɛtɛ Solomon ɛ̀ ba, ma digyu-kpaara gɛtɛ e sere, 4 ma anyandilɛ gɛtɛ ɩ̀ gyaga wɔkpʋlɔ wuu koro, ma anlɛ gɛtɛ wɔ bɛndɩrɛbi bè si, ma wɔ bɛsaranyan ma bɛsʋgʋgyan gɛtɛ bɛ̀ sa bɔɔ ngba, ma wɔ bʋkan bʋʋ bɛyaranlɛ, ma gekuma gii gedi gɛtɛ ɛ tɛ Yahwe Dikwo-dɩrɛ fɔ daanɩ fɔ, ɔmɩrɩ wu ku wɔ wʋ kààrà.

5 Ɛwʋ gɛ ɛ dɔ̀ egyu-dɩrɛ fɔ alan, <<Ade gɛtɛ na nʋn mɩɩn gɩfɩɩ gaanɩ ka da ma aa gʋtʋn gɛtɛ a mɛ, ma aa gɛsɛyɩ fɔ, ɩ̀ sa waanɩ. 6 Mɔ min to ade fɔ di bè ye ma ɔkʋna gɛtɛ nmɩ gbagba na ka mɩɩn gʋnʋn na be we. Nkyɛ bɛn dɔ̀ mɩ aa gɛsɛyɩ gaade-dɩrɛ fɔ yɩɩfan gba. Aa gɛsɛyɩ gɩ kààrà ade gɛtɛ bɛnɩ bɛ dɔ̀ mɩ fɔ. 7 Aa bɛnɩ bɛ ma duyu-kpara! Gɛlɛ ke gɛ aa bɛndɩrɛbi, gɛtɛ bɛɛ nʋn aa gɛsɛyɩ gaade ɔya-kamasɛ fɔ, bɛ ma duyu-kpara! 8 Ɩ yɛ taà sila Yahwe aa Wurubwarɛ gɛtɛ ee len aade, gɛ ɛ ka wɔ̀ ɛ sɩ̀ bugyu, wo gigyu-bɩya gii koro, fɔ àà di bugyu wo diyere daanɩ fɔ woyo. Yema gelen gɛtɛ Yahwe ɛ̀ ba tɛ Isareli, ma wo gelen gɛtɛ èè ton bɛ ɛ ma ye gakpaakpa fɔ gii koro gɛ ɛ sɩ̀ wɔ̀ bugyu, fɔ àà dɔ̀ gɔdɔ kyɛkyɛ ma giisele waanɩ.>>

9 Ɛwʋ gɛ egyu-nanɩ fɔ ɛ tɛ egyu-dɩrɛ sɩka-sɩya gɛtɛ wʋʋdʋrʋ waà mɛ anlɛ bekilo ɩgbaa ɩnyɔɔ ma nkpɩn bʋnyɔɔ ma akpilin-ton (4,500), ma anyan ma ofèn kpekpesi, ma ataa ma ɔyɛ-kɛma. Solomon en te wura anyan ma ofèn yàà nɩma anlɛ gɛtɛ Seba wogyu-dɩrɛ-nanɩ ɛ tɛ wɔ fɔ nya.

10 Gɛlɛ ke gɛ Hiram bɛnɩ ma Solomon bɛnɩ bɛ ka sɩka-sɩya be ye Ofiri bɛ mɔma wɔ. Be biri bɛ ka alimugi wo-iyon, ma ataa ma ɔyɛ-kɛma mɔ bɛ ba. 11 Gɛ egyu-dɩrɛ ɛ ka alimugi wo-iyon fɔ e sere akyikya-bʋnkʋn ɛ sa Yahwe Dikwo-dɩrɛ fɔ, ma digyu-kpaara fɔ, gɛ ɛ ka ɩkɩ ɛ mɛ adʋlɛ ɛbɛ ma adʋlɛ ɛbɛ dɩrɛ-dɩrɛ ɛ tɛ ɩnʋn yɩɩ bɛnʋmalɛ. Ben we gɩnyankɩ gɛlɛ Yuda gɛtʋnkwaa gaanɩ nya. 12 Egyu-dɩrɛ Solomon ɛ tɛ Seba wogyu-nanɩ gɩnyan-kamasɛ gɛtɛ ee len abɛɛ e lila fɔ. Ɛ tɛ wɔ anyan ɛ kààrà anlɛ gɛtɛ ɛ bɛ tɛ wɔ fɔ. Ɛwʋ gɛ ɛwɔ ma wɔ bɛnɩ gɛtɛ bɛ nyɩma wɔ bɛ ba fɔ be biri bɛ da bɔɔ gɩfɩɩ gaanɩ.

Solomon gɩkyɩnyɩn

13 Sɩka-sɩya gɛtɛ Solomon ee wura gɩkyan gaanɩ fɔ wʋʋdʋrʋ wʋ̀ ba bekilo disepekyi ma gbaa ma nkpɩn-ton (23,000), 14 gɛtɛ sɩka gɛtɛ anyan yii befulɛ ma gɩyɛ gii bedilɛ be le fɔ wʋn fɩya. Gɛlɛ ke gɛ Arabiya begyu-dɩrɛ powu, ma Isareli bete bɔɔ gɩfɩɩ gɩɩ bɛnyalɛ fɔ bɛɛ ka sɩka-sɩya ma sɩka-fututu bɛ mɔma Solomon.

15 Egyu-dɩrɛ Solomon ɛ yɛ bɛ ka sɩka-sɩya be tiba bɛ mɛ awɔrɔnyan-dɩyɛlɛ-koro gɛkpɩn (200). Bɛ ka sɩka-sɩya bekilo besiyee ma ɔfan bɛ mɛ gɩwɔrɔnyan-dɩyɛlɛ koro-kɩlɩn. 16 E biri e tiba sɩka-sɩya ɛ mɛ awɔrɔnyan-dɩyɛlɛ-koro-titi gɛkpɩn ma akpilin-ton (300). Ɛ ka gɛ sɩka-sɩya bekilo besiyee ma ɔfan e tiba ɛ mɛ gɩwɔrɔnyan-dɩyɛlɛ-koro-kɩlɩn. Gɛ egyu-dɩrɛ ɛ ka yɩ ɛ ma sɩ̀ digyu-kpaara, ɔkʋn gɛtɛ bee kpèlè Lebanon Gɩkan fɔ daanɩ. 17 Egyu-dɩrɛ ɛ salɩ gigyu-bɩya-dɩrɛ, gɛ ɛ ka etola wanyaa ɛ sa gɩ adawʋ ofèn wʋkɩ, gɛ ɛ ka sɩka-sɩya-kpara ɛ bɔlɩ giifen-do. 18 Gigyu-bɩya fɔ gɩ̀ ba akyikya-bʋnkʋn kooron, gɛ bɛ ka sɩka-sɩya bɛ mɛ bɩsɩrɩ buu gekyikyakʋn bɛ sa gɩ. Gɛ gɛbɩya fɔ gɩ̀ ba alɔ yɩɩ gɛgyagakʋn, giifen ɩnyɔɔ fɔ powu yaanɩ. Bɛ mɛ bɛdɩ̀rɛ̀ bɛnyɔɔ be yela gɛbɩya fɔ gɩɩ dɩbɩyan ma giilogyi. 19 Bɛdɩ̀rɛ̀ fwo-bɛnyɔɔ bè yela akyikya-bʋnkʋn kooron yii koro. Ɛdɩ̀rɛ̀ ɛkɩ-ɛkɩ è yela gekyikya-bʋnkʋn-kamasɛ giifèn-kamasɛ wuu koro. Bɛn tɛ mɛ gigyu-bɩya nyagɩ gaakɩ anlɛ nyagɩ giidu tɛ bugyu buu gedikʋn bʋkɩ bɛ nya. 20 Bɛ ka gɛ sɩka-sɩya bɛ mɛ egyu-dɩrɛ Solomon bɛkɔpʋ powu. Gɛ digyukpaara dɩɩkʋn gɛtɛ bee kpèlè Lebanon Gɩkan fɔ daanyan powu ì di gɛ sɩka-sɩya-kpara gɛ bɛ ka bɛ mɛ yɩ. Gɩnyankɩ gɩn ma gɛtɛ bɛ ka gɛ sɩka-fututu bɛ mɛ gɩ, yema Solomon wɔya waanɩ fɔ, sɩka-fututu ɛn ma gɩyɛ anlɛ sɩka-sɩya. 21 Fɔ egyu-dɩrɛ ɛ̀ ba gɩyɛ gɩɩ-ɩkʋlɩ-kpekpesi ɛpʋ wo koro, fɩya ma Hiram woyo ɩkʋlɩ fɔ. Bɩkyan bisiyee-kamasɛ fɔ, ɩkʋlɩ fɔ ii biri i ye Tarisisi ɩ ba ma sɩka-sɩya, ma sɩka-fututu, ma atola-nyaa, ma bɛsɩsɩra, ma betema.

22 Egyu-dɩrɛ Solomon gɛsɛyɩ ma wo koro gaanyan gɛtɛ e wura fɔ, ɩ da gɛtʋnkwaa giigyu-kamasɛ woyo. 23 Gɛlɛ wuu koro begyu powu bee ye ande yaanɩ bàà bɛ nʋn Solomon gɛsɛyɩ gaade gɛtɛ Wurubwarɛ ɛ tɛ wɔ fɔ. 24 Gɩkyan n di gɩkyan, ɛnɩ-kamasɛ gɛtɛ ɛ̀ ba wakʋn fɔ, ɛɛ bɛ kyɛ wɔ anyan. Ɛyɩ n di sɩka-fututu, ma sɩka-sɩya baanyan, ma ngba-serelɛ, ma akpanyan, ma anyan ma ofèn, ma abengyi, ma akpɔŋɔ-tɩtɩɩ. 25 Solomon e wura abengyi ma tiiramisan ɛbɛ baayelakʋn ɩgbaa ɩnyɔɔ (4,000) ma abengyi ɩgbaa kooron (12,000), gɛtɛ ɛ ka ɛ ma sɩ̀ tiiramisan ɛbɛ baatele yaanɩ, ma ɛwɔ egyu-dɩrɛ gbagba wakʋn Yerusalem. 26 E di bugyu begyu powu boo koro ye Efirati getu giinyun ka ma sere Filisiti bete bɔɔ gɛtʋnkwaa, ma Egyipiti wɔbalan waanɩ.

27 Egyu-dɩrɛ ɛ yɛ sɩka-fututu e gbintin Yerusalem anlɛ ataa tun-tun, gɛ seda wo-iyon i gbigi anlɛ gɛtɛ Sikamo wo-iyon ɩ yɔn odon wʋʋ gatɩn fɔ. 28 Bɛ tɩyɛma gɛ Solomon wabengyi fɔ be ye Egyipiti, ma ntʋnkwaa-fon powu baanɩ.

Solomon diku

29 Bɛ ŋwara Solomon wade-mɛlɛ-kurumakyɛɛ, ma wo bugyu buuyo, ye digyegeye daanɩ ma sere geweremakʋn powu bɛ sa Wurubwarɛ wɔtabʋrʋlɛ Natan wo koro gaade yɩɩ gɩkpa gaanɩ, ma Wurubwarɛ wɔtabʋrʋlɛ Ahiya gɛtɛ e ye Silo fɔ wɔ gɛtabʋrʋ gɩɩ gɩkpa gaanɩ, ma Wurubwarɛ wɔtabʋrʋlɛ Ido wade gɛtɛ Wurubwarɛ e tiri e wùlà wɔ anlɛ okute waanɩ ka da ma Nebati wobi Yerobwam wo koro fɔ yɩɩ gɩkpa gaanɩ. 30 Solomon ɛ sara Yerusalem e di bugyu ɛ tɛ Isareli bete powu bɩkyan akpilin-anyɔɔ (40). 31 Gɛ e kù, gɛ be lò wɔ Yerusalem wɔkʋn gɛtɛ bee kpèlè alɛ Dafidi Ditele fɔ. Gɛ wobi Rehobwam e di bugyu e sere wɔ gɩsɩrɩ.