2 Ɩya-ɩya 7

Solomon ɛ ka Dikwo-dɩrɛ fɔ ɛ sa Wurubwarɛ gʋlɔ

1 Gɛtɛ Solomon e tiri onyun e were fɔ, ɔtan wu ye gatala wu be kuma gekuma gɩɩ gedi ma gedi gɩɩ gɛtɛ̀ kperen-kperen fɔ, gɛ Yahwe gingyebi gɩ yɔn Dikwo-dɩrɛ fɔ daanɩ. 2 Gedi gɩɩ bɛtɛlɛ fɔ bɛn talɩ gyu Dikwo-dɩrɛ fɔ daanɩ, yema Yahwe gingyebi gɩ yɔn daanɩ. 3 Gɛtɛ Isareli bete powu be we gɛtɛ ɔtan fɔ wʋ waran wu ye gatala wʋʋ ba gatɩn, gɛ Yahwe gingyebi gɩ yɔn Dikwo-dɩrɛ fɔ daanɩ fɔ, bɛ waran be kura baakpin yii koro, gɛ bɛ ka bʋnʋn be tin gɛtʋnkwaa, gɛ bɛ sʋma Yahwe bɛ sa wɔ onyun bɛ dɔ̀ alan,

<<Ɛ̀ kɔlɔ,

gɛ wo gelen gɩ̀ sa gakpaakpa!>>

4 Ɛwʋ gɛ Solomon ma wɔ bɛnɩ powu bɛ ka bɛnan bɛ tɛ Yahwe gedi. 5 Egyu-dɩrɛ Solomon ɛ ka bɛkwɔ disepekyi ma gbaa (22,000), ma bɛyɛran ma begbebi asepekyi kooron (120,000) ɛ tɛ gedi. Gɛlɛ gɛ egyu fɔ ma bɛnɩ fɔ powu bɛ mɛ bɛ ka Wurubwarɛ Dikwo-dɩrɛ fɔ bɛ sa Wurubwarɛ gʋlɔ. 6 Fɔ gedi gɩɩ bɛtɛlɛ fɔ bè yela boo geyelakʋn. Gɛlɛ ke gɛ Lefi bete bè yela boofèn, gɛ bè de ɩnʋn yɩɩ gɛnʋma gaanyan gɛtɛ Dafidi e len ɛ sɩ̀ fɔ, gɛ bɛɛ nʋma ɩnʋn be sila Yahwe, gɛ bɛ sa wɔ onyun bɛ dɔ̀ alan, <<Wo gelen gɩ̀ sa gakpaakpa.>> Lefi bete boofèn-do fɔ waanɩ fɔ, gɛtɛ gedi gɩɩ bɛtɛlɛ bɛɛ fʋ̀n baakantan fɔ, Isareli bete fɔ powu bɛ tɔ bè yela.

7 Solomon e tiri dɩkpaara fɔ dii getite gɛtɛ wʋ̀ sa Yahwe Dikwo-dɩrɛ fɔ dɩɩ bʋnʋn fɔ ɛ mɛ fɩrɩnfɩrɩn, gɛ ɛ tɛ gekuma gii gedi, ma anyan yaabi yii gedi, ma olila wuu gedi gaayo, yema gedi gɩɩ gɛtɛ̀kʋn gɛtɛ bɛ ka gɩwɔrɔnyan-sɩya bɛ mɛ fɔ gì we pɩɩ gɛtɛ gɩn nan talɩ gi to gekuma gii gedi, ma anyan yaabi yii gedi, ma olila wuu gedi waayo fɔ. 8 Okoro Solomon ma Isareli bete powu be di ɔsɛ-dɩrɛ ɔya wʋtɔkɔ awi kwarankɩ. Bɛnɩ bè lu ye Lebo-Hamati ka ma sere Egyipiti gifobi gaanɩ. 9 Duwi-nɩyɛfɛ daanɩ fɔ, be biri be tuma. Fɔ be were be di ɔsɛ awi kwarankɩ bɛ ka bɛ mɛ gedi gɩɩ gɛtɛ̀kʋn fɔ fɩrɩnfɩrɩn. Gɛ be biri be di ɔsɛ awi kwarankɩ bɛ fɩya. 10 Gɛ ebon-kwarankɩfɛ wo duwi dikpilin ma disiyeefɛ daanɩ fɔ, Solomon e tiri bɛnɩ fɔ osele gɛ bɛ da bɔɔ-ɩlɛ ɔsɛ waanɩ, yema ade-kpara gɛtɛ Yahwe ɛ mɛ ɛ tɛ wɔsaranyan Dafidi ma Solomon ma wɔ bɛnɩ Isareli bete powu fɔ yii koro.

Yahwe e tiri koro e wùlà Solomon

11 Gɛtɛ Solomon e werema Yahwe Dikwo-dɩrɛ fɔ ma digyu-kpaara fɔ yii gesere, gɛ e werema gɩnyan-kamasɛ gɛtɛ ɛ sa amɩnlɛ alɛ ɛɛ̀ mɛ Yahwe Dikwo-dɩrɛ fɔ daanɩ, ma ɛwɔ gbagba wo digyu-kpaara fɔ, 12 Yahwe e tiri koro e wùlà wɔ odente, gɛ ɛ dɔ̀ wɔ alan,<<Na nʋn aanyun-tiri, gɛ na to Dikwo-dɩrɛ nyadɩ na sa gɛtɛ bàà tɩ̀ tɛ mɩ gedi nfan. 13 <<Gengyi ǹ tan gatala, gɛ ɛsʋn ɛn taa nʋ̀n, abɛɛ ǹ yɛ bɛkpagyɩgyɩ bɛ bɛ mɩna yii-ili yaanyɩmɩnyan, abɛɛ ǹ yɛ gyerebi ɛkɩ ɛ nʋ̀n mɩɩn bɛnɩ boo koro, 14 gɛ gengyi mɩɩn bɛnɩ gɛtɛ miin diyere dɩ̀ gyaga boo koro baà warama koro gatɩn, bàà tiri onyun, bàà fɔ mɩ alɛ n kpà bɛ, gɛ bè kere baade-kpen bɛ ya fɔ, nan nʋn boonyun-tiri n ye gatala, fɔ nan ka baade-kpen n kyɛ bɛ, fɔ nan yɛ bɔɔ gɛtʋnkwaa gàà biri pe. 15 Nkele mɩɩn bʋnʋn baà tirima, gɛ maaten yaà nʋn yiinyun-tiri gɛtɛ yaà tiri i ye nfan nyawʋ fɔ. 16 Yema na tiri Dikwo-dɩrɛ nyadɩ, gɛ na mɛ dɩ fɩrɩnfɩrɩn gɛtɛ daà mɛ mɩɩn gɛsarakʋn gakpaakpa. Mɩɩn bʋnʋn ma miinturu waà sara dʋkɔ ɔya-kamasɛ.

17 <<Awɔ bɩrɛ, gengyi aà sʋma mɩ nʋnkwarɩ anɩ anlɛ gɛtɛ aate Dafidi ɛ mɛ fɔ, gɛ à di ade gɛtɛ na dɔ̀ wɔ̀ alɛ mɛ fɔ powu yii koro, gɛ à di maade-wùlàlɛ, ma mii-ise powu yii koro fɔ, 18 nan yɛ aa gigyu-bɩya gàà sere anlɛ gɛtɛ na dɔ̀ na sɩ̀ na tɛ aate Dafidi alan, <Ɔya wʋkɩ wʋn nan ba alɛ nka aadu waanɩ wʋʋnɩ nan di bugyu Isareli> fɔ. 19 <<Mɔ gengyi ɛyɩ ma yii bebi ì kere mɩɩn gɛsʋma ɩ ya, gɛ in di mii-ise, ma maade-wùlàlɛ gɛtɛ na tɛ yɩ fɔ yii koro, gɛ ɩ̀ san ɩ ma sʋma bekpen fɔ, 20 nan kpa Isareli n ye gɛtʋnkwaa gɛtɛ na tɛ bɛ fɔ gaanɩ, gɛ nan terema Dikwo-dɩrɛ gɛtɛ na mɛ fɩrɩnfɩrɩn miin diyere dii koro fɔ. Gɛ bɛnɩ powu baà tɩ ka Isareli gɩfɩɩ be di giforo, bàà mʋmwa gɩ yoli. 21 Dikwo nyadɩ daà biligi Dikwo-gbenalɛ. Gɛ ɛnɩ-kamasɛ gɛtɛ ɛɛ̀ bɛ dama dɩɩpɩ fɔ, ɔmɩrɩ waà ku wɔ, gɛ ɛɛ̀ yɩyɛ eè lila alan, <Anʋn yii koro gɛ Yahwe ɛ yɛ ade nyayɩ ɩ ba gɛtʋnkwaa nyagɩ ma Dikwo-dɩrɛ nyadɩ yii koro?> 22 Fɔ bɛnɩ baà tiri wuunyun alan, <Yema be terema Yahwe, boo Wurubwarɛ gɛtɛ e tiri bootu ɛbɛ e ye Egyipiti gɛtʋnkwaa gaanɩ fɔ, gɛ bɛ yɛ bɛ ka koro bɛ tɛ bekpen bɔɔ gɛsʋma. Gɛlɛ wuu koro gɛ Yahwe ɛ ka gyerebi-dɩrɛ nyawɔ ɛ ba boo koro.> >>