1 Gɛtɛ egyu-dɩrɛ Solomon e werema gʋtʋn gɛtɛ ɛ mɛ Yahwe Dikwo-dɩrɛ daanɩ fɔ, ɛ ka anyan-tɛlɛ gɛtɛ wote Dafidi e tiri ɛ sɩ̀ ɛ tɛ Yahwe, gɛtɛ ì di sɩka-fututu, ma sɩka-sɩya, ma anyan kurumakyɛɛ fɔ ɛ ba. Gɛ ɛ ka yɩ ɛ sɩ̀ anyan-gbaa-gbaa yɩɩ gɛsɩ̀kʋn, Wurubwarɛ Dikwo-dɩrɛ fɔ daanɩ.

2 Ɛwʋ gɛ egyu-dɩrɛ Solomon e kpèlè Isareli bɛndɩrɛ, ma Isareli wo-ifoli yɩɩ bɛndɩrɛ, ma Isareli wo-itunu yɩɩ bɛndɩrɛ e tuma, gɛtɛ bàà ka Yahwe Dikola dɩɩ dɩdaka fɔ be ye Siyon, ɔkʋn gɛtɛ bee kpèlè alɛ Dafidi Ditele fɔ bɛ ba Dikwo-dɩrɛ fɔ daanɩ. 3 Ɛwʋ gɛ Isareli bɛndɩrɛ powu be be tuma egyu-dɩrɛ Solomon wakʋn ɔsɛ wuu gedi wʋʋya waanɩ gɛtɛ wù di Isareli bete boobon-kwarankɩfɛ waanɩ fɔ. 4 Gɛtɛ bɛndɩrɛ fɔ powu be tuma fɔ, Lefi bete be kukuru dɩdaka fɔ, 5 gɛ bɛ ka dɩ, fɩya ma dɩyan dii dikwo ma daanyɩmɩnyan fɩrɩnfɩrɩn fɔ powu. Gɛ gedi gɩɩ bɛtɛlɛ gɛtɛ bè di Lefi bete fɔ be tola dɩ bɛ san Dikwo-dɩrɛ fɔ daanɩ. 6 Gɛ Egyu-dɩrɛ Solomon ma Isareli bete gɛtɛ be tuma fɔ powu bɛ ka bɛyɛran ma bɛkwɔ kpekpesi gɛtɛ ɛkɩ ɛn talɩ ɛ kalan fɔ bɛ tɛ gedi Dikola dɩɩ dɩdaka fɔ dɩɩpɩ.

7 Ɛwʋ gɛ gedi gɩɩ bɛtɛlɛ fɔ bɛ ka Yahwe Dikola dɩɩ dɩdaka fɔ bɛ bɛ sɩ̀ dɩɩ gɛsɩ̀kʋn, Dikwo-dɩrɛ fɔ dɩɩ gamɩ, gɛtɛ wù di Ɔkʋn-dɩrɛ wʋʋkʋn-dɩrɛ-kʋn fɔ, kerubi ɛbɛ baabanban yɩɩ gatɩn. 8 Kerubi ɛbɛ fɔ bɛ yɛrɛba baabanban be tin ɔkʋn gɛtɛ Dɩdaka fɔ dɩ̀ dɔ fɔ, gɛ wu tin dɩ, ma dii-iyon-tonlɛ-tolalɛ fɔ powu. 9 Iyon fɔ ɩ̀ ba abo, gɛtɛ gengyi à yela Ɔkʋn-fɩrɩnfɩrɩnkʋn, gbɛma Ɔkʋn-dɩrɛkʋn fɔ, aà talɩ a we yɩ, mɔ gengyi à sa okòro fɔ, an nan we yɩ. Gɛ ɩ̀ sa dʋkɔbɛ bè ye ma ǹdò. 10 Gɩnyankɩ gɩn ma Dɩdaka fɔ daanɩ fɩya ma ataa-pansan-pansan anyɔɔ gɛtɛ Mose ɛ ka ɛ sa daanɩ, Horebi wodon wuu koro, ɔkʋn gɛtɛ Yahwe ɛ tà dikola ma Isareli bete, ɔkʋna gɛtɛ be ye Egyipiti gɛtʋnkwaa gaanɩ wʋʋ gama fɔ.

11 Ɛwʋ gɛ gedi gɩɩ bɛtɛlɛ fɔ be ye Ɔkʋn-fɩrɩnfɩrɩnkʋn fɔ. Gedi gɩɩ bɛtɛlɛ gɛtɛ bɛ̀ sa dʋkɔ fɔ powu bɛ kpa koro dɩdɩɩ gɛtɛ wʋn fɛ ma dikpi gɛtɛ daanɩ be ye. 12 Lefi bete powu gɛtɛ bè di ɩnʋn yɩɩ bɛnʋmalɛ, gɛtɛ ɛbɛ n di Asafu, Heman, Yedutun ma boo bebi-teni, ma bɔɔ bɛfʋrɩ be yela gedi gɩɩ gɛtɛ̀kʋn giifila wʋʋ gɛtàkʋn wʋʋ gɩlan. Bɛ sa ngba fututu-kpara, gɛ bɛɛ gbɛrɛ akyaka gɛ bɛɛ tà adʋlɛ ɛbɛ, ma adʋlɛ-dɩrɛ ɛbɛ. Gɛ gedi gɩɩ bɛtɛlɛ akpilin kooron (120) gɛtɛ bɛɛ fʋn akantan fɔ bɛ̀ fɩya ma ɛbɛ. 13 Akantan yɩɩ bɛfʋ̀nlɛ, ma ɩnʋn yɩɩ bɛnʋmalɛ fɔ powu bɛ ka onyun-kɩlɩn bɛ nʋma ɩnʋn be sila Yahwe bɛ sa wɔ onyun. Bɛ ka akantan ma akyaka, ma anyan-kurumakyɛɛ bɛ fɩya, gɛ bɛ nʋma gesila gɩɩnʋn bɛ tɛ Yahwe alan,

<<Ɛ̀ kɔlɔ!

Gɛ wo gelen gɩ̀ sa gakpaakpa.>>

Ɛwʋ gɛ akpaba ɩ bɛ yɔn Yahwe Dikwo-dɩrɛ fɔ daanɩ. 14 Gɛ dɩkpaba fɔ dii koro, gedi gɩɩ bɛtɛlɛ fɔ bɛn mɩnɩ talɩ mɛ bɔɔ gʋtʋn, yema Yahwe gingyebi gɩ bɛ yɔn Yahwe Dikwo-dɩrɛ fɔ daanɩ.