2 Ɩya-ɩya 1

Egyu Solomon e tiri onyun ɛ fɔ gɛsɛyɩ

1 Dafidi wobi Solomon e sere ɩkpaa wo bugyu baanɩ gepepe, yema Yahwe, wo Wurubwarɛ fɔ ɛ̀ fɩya ma ɛwɔ, gɛ ɛ yɛ wɔ e di diyere gepepe.

2 Gɛ Solomon ɛ tabʋrʋ ɛ tɛ Isareli bete powu. Ɛ tabʋrʋ ɛ tɛ bɩtà bʋʋ bɛndɩrɛ gɛtɛ bɛɛ nya bɛnɩ nkpɩn ton-ton, ma akpilin ton-ton boo koro, ma gɔdɔ gɩɩ bɛdɔ̀lɛ ma begyegeyelɛ gɛtɛ bɛ̀ sa Isareli powu, ma akpaara*1:2 Akpara nyayɩ na be bilingi Isareli bete boo-ifoli fwo ɩnyɔɔ fɔ yɩɩ bɛndɩrɛ. 3 Gɛ Solomon ma bɛnɩ fɔ powu bɛ san Gibeyon dɩsʋmakʋn, yema dʋkɔ gɛ Wurubwarɛ Dɩyan-kwo gɛtɛ Yahwe wɔsaranyan Mose e sere otonkuma waanɩ fɔ dɩ̀ sa. 4 Gɛ Dafidi ɛ ka Wurubwarɛ Dikola dɩɩ dɩdaka fɔ e ye Kiriyati-Yarim ɛ bɛ sɩ̀ ɔkʋn gɛtɛ ɛ pɩna ɛ sɩ̀ ɛ tɛ dɩ fɔ. 5 Mɔ gɩwɔrɔnyan-sɩya gii gedi gɩɩ gɛtɛ̀kʋn gɛtɛ Huri wɔnana Besale, gɛtɛ wote n di Uri fɔ ɛ mɛ fɔ gì sere Yahwe Dɩyan dii Dikwo fɔ dɩɩ bʋnʋn Gibeyon ditele daanɩ. Gɛ egyu Solomon ma bɛnɩ fɔ powu bɛ sʋma Yahwe dʋkɔ. 6 Gɛ Solomon ɛ san gɩwɔwɔnyan-sɩya gii gedi gɩɩ gɛtɛkʋn gɛtɛ gì sere Yahwe Dɩyan dii Dikwo fɔ dɩɩ bʋnʋn fɔ gɩɩpɩ, gɛ ɛ ka bɛnan nkpɩn ton (1,000) ɛ tɛ gekuma gii gedi gii koro.

7 Gɛ Wurubwarɛ e tiri wo koro e wùlà Solomon odente wʋtɔkɔ, gɛ ɛ dɔ̀ wɔ alan, <<Lila gɩnyan-kamasɛ gɛtɛ à len nan mɛ n tɛ wɔ̀.>>

8 Ɛwʋ gɛ Solomon ɛ dɔ̀ Wurubwarɛ alan, <<A tiri aa gelen-dɩrɛ a wùlà miinte Dafidi, gɛ a sɩ̀ mɩ bugyu a sere wɔ gɩsɩrɩ. 9 Nkele, Yahwe miin Wurubwarɛ, yɛ ade gɛtɛ a dɔ̀ a sɩ̀ miinte Dafidi fɔ yàà ba waanɩ. Yema a sɩ̀ mɩ bugyu a tɛ bɛnɩ dɩtɩnpan gɛtɛ bɛn talɩ bɛ kalan bɛ. 10 Okoro tɛ mɩ gɛsɛyɩ ma ade yɩɩ gɛnyɩnla gɛtɛ nan ka n di bugyu n tɛ bɛnɩ dɩtɩnpan nyabɛ. Nka gɛlɛ fɔ, ɛnyan nan talɩ ɛ nya aa bɛnɩ dɩtɩnpan nyadɩ dii koro?>> 11 Gɛ Wurubwarɛ ɛ dɔ̀ Solomon alan, <<Gɛtɛ ade nyayɩ gɛ a lila, gɛ an lila koro gaanyan, abɛɛ kɔba, abɛɛ gebù, abɛɛ aa bɛkyʋnlɛ boo diku, gɛ gɛtɛ an lila nkpa ma ɔfɔ, mɔ a lila gɛ gɛsɛyɩ, ma ade yɩɩ gɛnyɩnla anlɛ gɛtɛ aà ka a gyegeye mɩɩn bɛnɩ gɛtɛ na sɩ̀ wɔ̀ bugyu na tɛ bɛ fɔ okoro, 12 nan tɛ wɔ̀ gɛsɛyɩ, ma ade yɩɩ gɛnyɩnla. Gɛ nan biri ntɛ wɔ̀ koro gaanyan, ma gɩkyɩnyɩn ma gebù gɛtɛ begyu-dɩrɛ gɛtɛ be gyegeye wɔ̀ bɛ sara fɔ ben wura, gɛ ɛbɛ gɛtɛ baà bɛ ba aa gama fɔ bɛn nan wura bɛ nya.

13 Ɛwʋ gɛ Solomon e ye dɩsʋmakʋn gɛtɛ dɩ̀ sa Dɩyan dii Dikwo dɩɩ bʋnʋn, Gibeyon ditele daanɩ fɔ, gɛ e biri ɛ da Yerusalem. Gɛ ɛ ma di bugyu ɛ tɛ Isareli.

14 Solomon ɛ kʋla tiiramisan ɛbɛ, ma abengyi, ma yɩɩ bɛsaralɛ, gɛ e wura tiiramisan ɛbɛ nkpɩn kwarankɩ (1,400), ma abengyi ɩgbaa kooron (12,000), gɛtɛ ɛ ka ɛ ma sɩ̀ tiiramisan ɛbɛ baatele yaanɩ ma ɛwɔ egyu-dɩrɛ gbagba wakʋn Yerusalem. 15 Egyu-dɩrɛ fɔ ɛ yɛ sɩka-fututu ma sɩka-sɩya e gbintin Yerusalem anlɛ ataa tun-tun, gɛ seda wo-iyon i gbigi anlɛ gɛtɛ sikamo wo-iyon ɩ yɔn odon wʋʋ gatɩn fɔ. 16 Bɛ ka gɛ Solomon wabengyi fɔ be ye gɛ Egyipiti, ma Kuwe ntʋnkwaa baanɩ. Wɔ gɩyɛ gii bedilɛ fɔ be se yɩ be ye gɛ Kuwe. 17 Be se tiiramisan-kɩlɩn sɩka-fututu abi nkpɩn bisiyee (600), gɛ be se dibengyi-kɩlɩn mɔ sɩka-fututu abi akpilin kwarankɩ ma fwo (150) be ye Egyipiti. Gɛ ɛbɛ mɔ be fu yɩ bɛ tɛ Hiti bete ma Aram bete boo begyu powu.