2 Ɩya-ɩya 23

1 Mɔ gɩkyan kwarankɩfɛ gaanɩ fɔ, gedi gɩɩtɛlɛ Yehoyada ɛ mɛ wamɩnlɛ alɛ ɛɛ̀ mɛ gɩnyankɩ. Ɛ tà dikola ma bɩtà bʋʋ bɛndɩrɛ gɛtɛ bɩtà bʋʋ bɛtàlɛ akpilin ton-ton bɛ̀ sa bɔɔ gatɩn fɔ. Ɛbɛ n di Yeroham wobi-teni Asariya, ma Yehohanan wobi-teni Isimayeli, ma Obedi wobi-teni Asariya, ma Adaya wobi Maaseya, ma Sikiri wobi Elisafati. 2 Gɛ bɛ san bɛ kʋla Lefi bete ma Isareli wakpaara-akpaara yɩɩ bɛndɩrɛ Yuda watele powu yaanɩ. Gɛtɛ be be gyu Yerusalem fɔ, 3 bɛnɩ dikpi fɔ powu bɛ tà dikola ma egyu-dɩrɛ Yowasi Yahwe Dikwo-dɩrɛ fɔ daanɩ, Wurubwarɛ bʋnʋn.

Dʋkɔ gɛ Yehoyada ɛ dɔ̀ bɛ alan, <<Egyu wobi nan di bugyu, anlɛ gɛtɛ Yahwe ɛ dɔ̀ ɛ sɩ̀ ka da ma Dafidi wodu wʋʋ bɛnɩ boo koro fɔ. 4 Gɩnyan gɛtɛ yàà mɛ fɔ n di alɛ, gengyi ɛyɩ gedi gɩɩ bɛtɛlɛ ma Lefi bete ɩ̀ ba gʋtʋn Duwi-tunalɛ daanɩ fɔ, bè yo yaanɩ akpen asiyee fɔ, yaanɩ dikpen dɩkɩ nan mɛ Dikwo-dɩrɛ dii-itunu yɩɩ bɛdɩyɛlɛ, 5 fɔ dikpen dɩkɩ dàà dɩyɛ digyu-kpaara fɔ, fɔ dikpen-kurumakyɛɛ fɔ mɔ baà dɩyɛ gesere-ɔpɩ wuutunun fɔ. Fɔ nkele bɛnɩ-kurumakyɛɛ fɔ powu bàà sara Dikwo-dɩrɛ fɔ dɩɩ bɛkpata baanɩ. 6 Wun di gɛtɛ ɛnɩ ɛkɩ èè gyu Yahwe Dikwo-dɩrɛ fɔ daanɩ, sɩyɛɛ gedi gɩɩ bɛtɛlɛ gɛtɛ bɛɛ mɛ gʋtʋn dʋkɔ fɔ booko. Baà talɩ be gyu, yema be fere koro. Mɔ bɛnɩ-kurumakyɛɛ fɔ powu bɩrɛ, wù di gɛtɛ bàà dɩyɛ, anlɛ gɛtɛ Yahwe e wùlà bɛ fɔ. 7 Wù di gɛtɛ Lefi bete fɔ baanɩ-kamasɛ èè ton wakpanyan, fɔ bàà yela silin egyu fɔ dɩyɛ wɔ. Gengyi ɛnɩ-fon ɛkɩ è gyu dikwo fɔ daanɩ fɔ, baà wolo wɔ.>>

8 Lefi bete ma Yuda bɛnɩ powu bɛ mɛ anlɛ gɛtɛ gedi gɩɩtɛlɛ Yehoyada ɛ bɔ ɛ dɔ̀ fɔ. Bɩtà bʋʋ bɛtàlɛ bɔɔndɩrɛ-kamasɛ ee wura ɛ kʋla wɔ bɛnɩ gɛtɛ bɛɛ san gʋtʋn duwi-tunalɛ daanɩ, ma ɛbɛ gɛtɛ bɛn taa san fɔ powu, yema gedi gɩɩtɛlɛ Yehoyada ɛn taa yɛ bɛnɩ gɛtɛ bɛ san gʋtʋn duwi-tunalɛ daanɩ fɔ bàà biri san baakpaara. 9 Gɛ Yehoyada ɛ tɛ bɩtà bʋʋ bɛndɩrɛ gɛtɛ bɩtà bʋʋ bɛtàlɛ akpilin ton-ton bɛ sa bɔɔ gatɩn fɔ bɩtʋrʋnyan ma awɔrɔnyan-dɩyɛlɛ-koro adɩrɛ-dɩrɛ ma aburuburu gɛtɛ ì di egyu Dafidi woyo, gɛ ɩ̀ dɔ Wurubwarɛ Dikwo-dɩrɛ daanɩ fɔ. 10 Gɛ ɛ yɛ bɛdɩyɛlɛ fɔ be yela be silin egyu fɔ gɛtɛ bè de baakpanyan. Be yela ye gbɛma gedi gɩɩ gɛtɛ̀kʋn ma Dikwo-dɩrɛ fɔ, ye gatɩn gɩɩ gɩlan ma sere gatala gɩɩ gɩlan.

11 Ɛwʋ gɛ Yehoyada ma wo bebi-teni bɛ ka Yowasi be ye okòro gɛ be tin wɔ digyu-koto, gɛ bɛ ka ise yɩɩ gɩkpa bɛ tɛ wɔ, gɛ be sɩ̀ wɔ bugyu. Bɛ sʋrʋ wɔ bʋnɔ gɛ bɛ ka afala bɛ dɔ̀ alan, <<Egyu sara nkpa ma ɔfɔ!>>

12 Gɛtɛ Ataliya ɛ nʋn afala gɛtɛ bɛnɩ fɔ bɛ gbɛrɛ be di ɔsɛ fɔ, ɛ san baakʋn Yahwe Dikwo-dɩrɛ fɔ daanɩ. 13 Gɛtɛ ɛ nya fɔ, e we egyu-dɩrɛ fɔ è yela ma pila otunu. Bɛndɩrɛbi fɔ ma akantan yɩɩ bɛfʋ̀nlɛ bè yela egyu fɔ wakʋn, gɛ gɛtʋnkwaa fɔ gɩɩ bɛnɩ powu bee di ɔsɛ, gɛ bɛɛ fʋ̀n akantan, gɛ ɩnʋn yɩɩ bɛnʋmalɛ bè de ɩnʋn yɩɩ gɛnʋma gaanyan bɛɛ nʋma gesila gɩɩ-ɩnʋn. Ɛwʋ gɛ Ataliya e gye wɔ ngba ɛ fɛɛran, gɛ ɛ gbɛrɛ afala kin-kin alan,<<Ɛgbanlɛ bɛnɩ! Ɛgbanlɛ bɛnɩ!

14 Ɛwʋ gɛ gedi gɩɩtɛlɛ Yehoyada ɛ dɔ̀ bɩtà bʋʋ bɛndɩrɛ gɛtɛ bɛɛ nya bɩtà bʋʋ bɛtàlɛ akpilin ton-ton boo koro fɔ alan, <<I tiri wɔ i ye bɛnɩ fɔ baanɩ, fɔ yàà wolo ɛkamasɛ gɛtɛ ɛ̀ tɛrɛma wɔ fɔ. Yema gedi gɩɩtɛlɛ fɔ ɛ dɔ̀ alan, <Ɩ kara wolo wɔ Yahwe Dikwo-dɩrɛ daanɩ.> >> 15 Okoro be gye wɔ, ɔkʋna gɛtɛ ee gyu Abengyi Yiitunu, digyu-kpaara fɔ daanɩ fɔ, gɛ be wolo wɔ dʋkɔbɛ.

16 Yehoyada ma bɛnɩ fɔ ma egyu fɔ bɛ tà dikola gɛtɛ baà mɛ Yahwe bɛnɩ. 17 Ɛwʋ gɛ bɛnɩ fɔ powu bɛ san Baali dikpen-kwo bɛ ma sila dɩ bɛ fɩna. Be gbena gedi gaatɛ̀kʋn ma bekpen fɔ buruburu gɛ be wolo Baali wokpente Matan gedi gaatɛ̀kʋn dʋkɔ.

18 Gɛ Yehoyada ɛ sɩ̀ bɛdɩyɛlɛ Yahwe Dikwo-dɩrɛ fɔ daanɩ. Gɛ ɛ ka Yahwe Dikwo-dɩrɛ fɔ dɩɩ gʋtʋn ɛ sa gedi gɩɩ bɛtɛlɛ ma Lefi bete baalɔ fɔ bàà mɛ gʋtʋn gɛtɛ Dafidi ɛ tɛ bɛ alɛ bɛ mɛ Dikwo-dɩrɛ fɔ daanɩ fɔ. Wù di gɛtɛ bàà tɩ̀ tɛ Yahwe gekuma gii gedi anlɛ gɛtɛ bɛ ŋwara bɛ sa Mose Wose yɩɩ gɩkpa gaanɩ fɔ, fɔ bàà nʋma ɩnʋn anlɛ gɛtɛ Dafidi ɛ dɔ̀ bɛ fɔ. 19 Gɛ e biri ɛ sɩ̀ otunu wʋʋ bɛdɩyɛlɛ gɛtɛ bàà nya Dikwo-dɩrɛ dii tunun yii koro, fɔ ɛnɩ gɛtɛ ɛ̀ ba dɩdɩɩ fɔ ɛ kara wura e gyu daanɩ.

20 Ɛwʋ gɛ Yehoyada ɛ ka bɩtà bʋʋ bɛtàlɛ bɔɔ bɛndɩrɛ gɛtɛ bɩtà bʋʋ bɛtàlɛ akpilin ton-ton bɛ̀ sa bɔɔ gatɩn fɔ ma bɛnɩ gɛtɛ bɛ ba gingyebi, ma begyegeyelɛ, ma gatʋnkwa fɔ gɩɩ bɛnɩ powu gɛ bɛ tɛrɛma egyu fɔ be ye Yahwe Dikwo-dɩrɛ daanɩ. Bɛ da gɛ ma Gatala Giitunun fɔ waanɩ be gyu digyu-kpaara fɔ daanɩ, gɛ bɛ ka egyu fɔ bɛ sɩ̀ gigyu-bɩya gii koro. 21 Gɩfɩɩ fɔ gɩɩ bɛnɩ powu be di ɔsɛ, gɛ olila wʋ ba gɩfɩɩ fɔ gaanɩ, yema be wolo Ataliya.