1 Ɩya-ɩya 29

Anyan-tɛlɛ tɛ Wurubwarɛ Dikwo-dɩrɛ fɔ dɩɩ gɛmara

1 Ɛwʋ gɛ egyu-dɩrɛ Dafidi ɛ dɔ̀ dikpi fɔ powu alan, <<Miibi Solomon gɛtɛ Wurubwarɛ e tiri lɛ è di gɛ ebi, gɛ ɛn ta we ade-kpekpesi ɛ̀ɛ̀ nyɩnla anlɛ gɛtɛ bɛɛ sɩ̀ ade yaanɩ gepe. Gʋtʋn fɔ gì di gʋtʋn-dɩrɛ, yema nka bɛnɩ-nyalɛ boo digyu-kpaara dii gesere gaade gɛ wù di, mɔ Yahwe Wurubwarɛ gbagba Dikwo-dɩrɛ gɛ wù di. 2 Na sa aniya na len anyan na sɩ̀ tɛ Wurubwarɛ Dikwo-dɩrɛ fɔ dii gesere. Na len sɩka-sɩya, ma sɩka-fututu, ma gɩwɔrɔnyan-sɩya, ma gɩwɔrɔnyan, ma iyon, ma oniki, ma tukwasi, ma ataa butu-kperen-kperen, ma ataa-kpara-kpara-kamasɛ, ma ataa-ŋalagɩlɛ ma ɔyɛ-kɛma. Na len anyan nyayɩ powu kpekpesi na sɩ̀. 3 Nyayɩ powu yɩɩ gama fɔ, gɛtɛ na ka koro na tɛ miin Wurubwarɛ Dikwo-dɩrɛ dii gesere okoro, ǹ de sɩka-sɩya ma sɩka-fututu wanyan gɛtɛ ì di nmɩ gbagba maanyan-gbaa-gbaa fɔ n tɛ tɛ miin Wurubwarɛ Dikwo-dɩrɛ fɔ dii gesere. 4 Na tɛ sɩka-sɩya-kpara gɛtɛ e ye Ofiri fɔ bekilo asepekyi ton ma ɩgbaa ton (110,000), ma sɩka-fututu-kpara bekilo asepekyi fwo-asiyee (260,000) gɛtɛ bàà ka bɛ marama-marama Dikwo-dɩrɛ fɔ daakwo yɩɩ-ɩpɔrɩ, 5 gɛ sɩka-sɩya wanyan yɩɩ bɛmɛlɛ ma sɩka-fututu wanyan yɩɩ bɛmɛlɛ baà ka sɩka-sɩya ma sɩka-fututu wanyan bɛ mɛ gʋtʋn fɔ. Nkele, ɛnyan n te len ɛ̀ɛ̀ tɛ Yahwe anyan ye woturu waanɩ?

6 Ɛwʋ gɛ Akpaara-akpaara yɩɩ bɛndɩrɛ, ma Isareli wo-ifoli fɔ yɩɩ bɛndɩrɛ, ma bɩtà bʋʋ bɛdɩrɛ gɛtɛ bɛɛ nya bɩtà bʋʋ bɛtàlɛ nkpɩn ton-ton, ma akpilin ton-ton boo koro fɔ, ma bɛndɩrɛ gɛtɛ bɛɛ nya egyu-dɩrɛ gʋtʋn gii koro fɔ bɛ tɛ anyan be ye boo-ituru yaanɩ. 7 Bɛ tɛ anyan gɛtɛ bàà ka bɛ mɛ Wurubwarɛ Dikwo-dɩrɛ fɔ dɩɩ gʋtʋn. Bɛ tɛ sɩka-sɩya bekilo bemiliyon ton (5,000,000), ma sɩka gɛtɛ bee kpèlè dariki fɔ bekilo akpilin anaa ma bɛnaa (84), ma sɩka-fututu asepekyi fwo-nɩyɛ ma nkpɩn kwarankɩ ma akpilin ton (375,000), ma gɩwɔrɔnyan-sɩya asepekyi dikpilin ma fwo-asiyee ma ɩgbaa kwarankɩ ma nkpɩn ton (675,000), ma gɩwɔrɔnyan bemiliyon besiyee ma asepekyi dikpilin ma fwo-kwarankɩ ma ɩgbaa ton (3,750,000). 8 Gɛ ɛnɩ-kamasɛ gɛtɛ ɛ̀ ba ataa ma ɔyɛ-kɛma fɔ, ɛ tɛ gɛtɛ yàà mɛ Yahwe Dikwo-dɩrɛ fɔ daanyan. Bɛ ka yɩ bɛ sa Gerison-te Yahiyeli gʋlɔ gaanɩ. 9 Wʋ mɛ bɛnɩ fɔ ɔsɛ gɛtɛ bɔɔ bɛndɩrɛ bɛ ka oturu-kpara bɛ tɛ anyan, yema bɛ ka gelen ma booturu powu bɛ tɛ Yahwe anyan. Wʋ mɛ egyu-dɩrɛ Dafidi mɔ ɔsɛ gepepe.

Dafidi wonyun-tiri

10 Wʋʋ gama fɔ, Dafidi e tiri onyun ɛ tɛ Yahwe, bɛnɩ dɩtɩnpan fɔ powu bɔɔ bʋnʋn alan,

Oo Yahweh, gesila gì di gɛ aayo,

Tiitu Isareli wo Wurubwarɛ,

Gesila gì di gɛ aayo gakpaakpa.

11 Oo, Yahwe, à sɔ, gɛ à ba ɔkɛma.

À ba gingyebi, ma gebù-dɩrɛ, ma gingyebi-dɩrɛ,

yema gɩnyan-kamasɛ gɛtɛ gɩ̀ sa gatala ma gɛtʋnkwaa fɔ, gì di gɛ aayo.

Oo, Yahwe awɔ n di Egyu-dɩrɛ.

Tɩɩ tɔ̀là aa diyere, yema awɔ n di duyu tɛ gɩnyan-kamasɛ.

12 Gɩkyɩnyɩn ma gingyebi i ye gɛ aakʋn,

À ba ɔkɛma gɩnyan-kamasɛ gii koro.

À ba giteni ma ɔkɛma

gɛtɛ aa yɛ ɛnɩ ɛɛ bʋn e ye, fɔ e sere ɩkpaa.

13 Oo, tii Wurubwarɛ, gɛlɛ wuu koro gɛ tɩɩ tɛ wɔ̀ karan,

gɛ tii sila aa diyere ma gingyebi fɔ.

14 Gɛ ɛnyan gɛ ǹ di, gɛ ɛnyan ɛbɛ gɛ mɩɩn bɛnɩ bè di, gɛtɛ tɩ talɩ tɩ ka tii-ituru tɩ tɛ anyan anlɛ? Gɩnyan-kamasɛ gi ye gɛ aakʋn, gɛ ti birima gɛ anyan gɛtɛ a tɛ tɩ fɔ tɩ tɛ wɔ̀. 15 Aa bʋnʋn baanɩ fɔ, tì di gɛ bɛnɩ-dalɛ ma besela anlɛ tiitu ɛbɛ. Tɩɩ nkpa wawi ì we gɛ anlɛ bilibili, gɛ tɩn nan talɩ ti ye diku daanɩ. 16 Oo Yahwe, tii Wurubwarɛ, anyan pirim gɛtɛ a tɛ-tɛ aa Dikwo-dɩrɛ fɔ dii gesere gɛtɛ bɛnɩ bàà tɩ̀ sʋma wɔ̀ daanɩ fɔ, i ye gɛ aalɔ yaanɩ, gɛ ɛyɩ powu ì di gɛ aayo. 17 Miin Wurubwarɛ, ǹ nyɩ̀ gɛtɛ aa kɛrɛ bɛnɩ boo-ituru a nya, gɛ ɛbɛ gɛtɛ bɛ̀ ba dɩmɩnlɛ-kpara fɔ baade ii di wɔ̀ gʋnʋn. Gɛ dɩmɩnlɛ-kpara gɛ na ka na tɛ wɔ̀ gɛlɛ gaanyan nyayɩ. Gɛ nkele na we anlɛ gɛtɛ aa bɛnɩ gɛtɛ bɛ̀ sa nfan lɛ bɛ ka gelen bɛ tɛ wɔ̀ anyan ye booturu yaanɩ. 18 Oo Yahwe, tiitu ɛbɛ Abraham, ma Isaki, ma Isareli boo Wurubwarɛ, yɛ gɛlɛ wʋʋ dɩmɩnlɛ-kpara nyadɩ dàà sara aa bɛnɩ boo-ituru yaanɩ gakpaakpa, fɔ àà yɛ bɛ bàà di nʋnkwarɩ tɛ wɔ̀. 19 Yɛ gɛtɛ miinbi Solomon ɛ̀ɛ̀ ka woturu powu ton aa-ise fɔ, ma aade-wùlàlɛ fɔ, ma aade-tɩyɛlɛ-sɩ̀lɛ fɔ yaanɩ, fɔ ɛ̀ɛ̀ talɩ yela kin-kin tɛ Dikwo-dɩrɛ gɛtɛ na pɩna anyan na sɩ̀ na tɛ dii gesere lɛ.

20 Ɛwʋ gɛ Dafidi ɛ dɔ̀ bɛnɩ dikpi fɔ powu alan, <<I sila Yahwe, yii Wurubwarɛ fɔ!>> Ɛwʋ gɛ ɛbɛ powu be sila Yahwe, bootu ɛbɛ boo Wurubwarɛ fɔ. Bɛ waran be kura bɛ ka bʋnʋn be tin gɛtʋnkwaa, Yahwe ma egyu-dɩrɛ bɔɔ bʋnʋn baanɩ.

Be to Solomon bugyu bɛ sa

21 Wuu duwi-nyɔɔfɛ fɔ, bɛ tɛ Yahwe gedi, gɛ bɛ tɛ wɔ gekuma gii gedi. Bɛ ka bɛkwɔ-teni nkpɩn ton (1,000), ma ayaran-gbʋgbʋ nkpɩn ton (1,000), ma bɛyɛran-teni atan, fɩya ma bɔɔ bʋkan ma gedi gɩɩ gɛtɛ̀ gaanyan-kpekpesi bɛ tɛ gedi Isareli powu diyere daanɩ. 22 Be di gɛ bɛ nyʋn ɔsɛ waanɩ Yahwe bʋnʋn duwi dɩtɔkɔ.

Ɛwʋ gɛ be to Dafidi wobi Solomon bɛ sa gɛtɛ ɛwɔ n di egyu-dɩrɛ. Bɛ lù wɔ bʋnɔ duyu Yahwe diyere daanɩ bɛ ka be tiri wɔ okòro gɛtɛ ɛ̀ɛ̀ mɛ boogyu-dɩrɛ, gɛ be lù Sadoki mɔ bʋnɔ duyu be wùlà gɛtɛ è di gedi gɩɩtɛlɛ. 23 Okoro Solomon ɛ sara Yahwe gigyu-bɩya fɔ gii koro e di bugyu e sere wote gɩsɩrɩ. Ade ɩ san gepe ɩ tɛ wɔ, gɛ Isareli bete powu be bù wɔ. 24 Gɩfɩɩ gɩɩ bɛndɩrɛ ma bɩtà bʋʋ bɛtàlɛ powu, ma Dafidi bebi-kurumakyɛɛ powu bɛ kan ntam gɛtɛ baà tɛrɛma egyu Solomon.

25 Yahwe ɛ yɛ Solomon e wura gebù-dɩrɛ Isareli bete powu bɔɔ bʋnʋn. Ɛ yɛ wɔ e wura gingyebi-dɩrɛ gɛtɛ Isareli begyu-dɩrɛ gɛtɛ bɛ sara bɛ da fɔ, ben wura gaakɩ nya.

Dafidi diku

26 Anlɛ gɛ Yese wobi Dafidi e di bugyu Isareli powu wanɩ. 27 E di bugyu Isareli bɩkyan akpilin anyɔɔ (40). E di bugyu ɛ sara Hebron bɩkyan kwarankɩ, gɛ ɛ sara Yerusalem bɩkyan dikpilin ma fwo bisiyee (33). 28 Dafidi ɛ dan gepepe pɛgɛ e ku. Ɛ sara nkpa bɩkyan kpekpesi, e wura koro gaanyan, gɛ e wura gebù. Gɛ wobi Solomon e di bugyu e sere wɔ gɩsɩrɩ. 29 Bɛ ŋwara egyu-dɩrɛ Dafidi bugyu buu gedi baade, ye digyegeye ma sere ɔkʋna bɛ sa Wurubwarɛ wɔtabʋrʋlɛ Samuweli, ma Wurubwarɛ wɔtabʋrʋlɛ Natan, ma Wurubwarɛ wɔtabʋrʋlɛ Gadi boo koro gaade yaakpa yaanɩ. 30 Gɛlɛ ke gɛ bɛ ŋwara wo bugyu buu gedi baade, ma wɔkɛma waade, ma anlɛ gɛtɛ ade ɩ ba Isareli gɩfɩɩ gaanɩ ka dama wo koro fɔ, ma bugyu-bugyu buu gedikʋn gɛtɛ bu silin bɛ bu tuma fɔ baade bɛ sa akpa fɔ yaanɩ.