1 Ɩya-ɩya 22

1 Ɛwʋ gɛ Dafidi alan, <<Yahwe, Wurubwarɛ Dikwo daà sere nfan, gɛ Isareli bete boo gekuma gii gedi gɩɩ gɛtɛ̀kʋn mɔ gaà sere nfan.>>

Gɛpɩna koro tɛ Dikwo-dɩrɛ fɔ dii gesere

2 Ɛwʋ gɛ Dafidi ɛ yɛ be kpèlè besela gɛtɛ bè si Isareli fɔ be tuma, gɛ e tiri ataa yɩɩ bɛkpalɩlɛ e ye baanɩ gɛtɛ bàà pɩna ataa tɛ Dikwo-dɩrɛ fɔ dii gesere. 3 Dafidi e len gɩwɔrɔnyan gepepe ɛ tɛ gɛtɛ bàà ka mɛ aŋanbi ma imini-kɔntɔn-kɔntɔn tɛ itunu-yon, gɛ e ni len gɩwɔrɔnyan-sɩya gepepe gɛtɛ ɛnɩ ɛɛn talɩ e keri. 4 Gɛlɛ ke gɛ e ni len seda wo-iyon gɛtɛ ɛnɩ ɛɛn talɩ ɛ kalan, yema Sidon bete ma Tire bete bɛ ka yɩ kpekpesi bɛ bɛ tɛ Dafidi.

5 Ɛwʋ gɛ Dafidi ɛ dɔ̀ alan, <<Miinbi Solomon è di gɛ ebi, gɛ ɛɛn nyɩ̀ anlɛ gɛtɛ bɛɛ sɩ̀ ade yaanɩ gepe. Gɛ wù di gɛtɛ Yahwe Dikwo gɛtɛ eè sere fɔ mɔ dàà mɛ Dikwo gbaa, gɛtɛ dɩ̀ ba ɔmɩrɩ, gɛ dɩ̀ ba gebù, bɩfɩɩ powu bʋʋ bʋnʋn. Okoro nan tɩ̀ pɩna koro n tɛ dii gesere.>> Okoro Dafidi e len anyan gepepe ɛ sɩ̀ pɛgɛ e ku.

6 Ɛwʋ gɛ ɛ yɛ be kpèlè wobi Solomon bɛ tɛ wɔ, gɛ ɛ ka Yahwe, Isareli wo Wurubwarɛ fɔ Dikwo fɔ dii gesere ɛ sa wɔ gʋlɔ. 7 Gɛ Dafidi ɛ dɔ̀ Solomon alan, <<Miinbi, na len gɛtɛ nan sere Dikwo-dɩrɛ n tɛ Yahwe, miin Wurubwarɛ. 8 Mɔ Yahwe ɛ dɔ̀ mɩ alan, <A wolo bɛnɩ kpekpesi, gɛ a kpà akpa kpekpesi. Okoro an nan sere Dikwo a tɛ mɩ, yema a daa nkalan gʋsɔ a lulu gɛtʋnkwaa gii koro mɩɩn bʋnʋn baanɩ. 9 Mɔ aà wo ebi-teni ɛkɩ gɛtɛ ɛɛ̀ mɛ olila wʋʋnɩ, ma getuna gɩɩnɩ, gɛ nan tiri wɔ n ye wɔ bɛkyʋnlɛ gɛtɛ be silin wɔ be tuma fɔ powu baalɔ yaanɩ èè wura getuna. Wo diyere nan mɛ Solomon, yema nan yɛ Isareli ɛ̀ɛ̀ sara olila waanɩ, gɛ nan dɩyɛ wɔ wo bugyu buu gedi baanɩ. 10 Ɛwɔ nan sere Dikwo-dɩrɛ bàà tɩ̀ sʋma mɩ daanɩ. Ɛɛ̀ mɛ miinbi, gɛ nan mɛ wote. Gɛ nan yɛ wo bugyu buu gedi bʋʋ gɛbɩya gàà sere ɩkpaa gakpaakpa Isareli anɩ.

11 Okoro nkele, miinbi, Yahwe ɛ fɩya ma awɔ, fɔ àà talɩ sere Yahwe, aa Wurubwarɛ fɔ Dikwo fɔ anlɛ gɛtɛ ɛ dɔ̀ alɛ aà mɛ fɔ. 12 Wurubwarɛ ɛ tɛ wɔ̀ gɛkɛrɛ-ade-nya ma gɛsɛyɩ ɔkʋna gɛtɛ ɛɛ̀ bɛ ka wɔ̀ ɛ sɩ̀ bugyu ɛ tɛ Isareli fɔ, fɔ àà ton Yahwe, aa Wurubwarɛ fɔ Wose fɔ waanɩ. 13 Gengyi à di ade-tɩyɛlɛ-sɩ̀lɛ ma wo-ise gɛtɛ Yahwe ɛ ka ɛ tɛ Mose alɛ ɛ tɛ Isareli fɔ yii koro fɔ, ade yaà san gepe ɩ tɛ wɔ̀. Sa koro ɔkɛma, fɔ àà yela kin-kin. Kara yɛ gɩsaa gàà ton wɔ̀, abɛɛ koro gàà yɔ wɔ̀.

14 Na sa aniya na len sɩka-sɩya gɛtɛ wʋʋdʋrʋ wʋ̀ ba bekilo bemiliyon besiyee ma asepekyi dikpilin ma fwo-kwarankɩ ma ɩgbaa ton (3,750,000), ma sɩka-fututu gɛtɛ wʋʋdʋrʋ wʋ̀ ba bekilo bemiliyon dikpilin ma fwo-kwarankɩ ma asepekyi dikpilin ma ton (37,500,000), ma gɩwɔrɔnyan-sɩya ma gɩwɔrɔnyan gepepe gɛtɛ ɛkɩ ɛɛn talɩ e keri, fɩya ma iyon ma ataa. Gɛ wù di gɛtɛ àà bugiti fɩya yaanɩ. 15 À ba gʋtʋn gɩɩ bɛmɛlɛ kpekpesi. À ba ataa yɩɩ bɛkpalɩlɛ, ma ɩpɔrɩ yɩɩ bɛmaralɛ ma bɛ kapɩnta. Gɛlɛ ke gɛ à ba bɛnɩ gɛtɛ bɛɛ talɩ bɛ mɛ gʋtʋn-kamasɛ. 16 Bè di sɩka-sɩya ma sɩka-fututu ma gɩwɔrɔnyan-sɩya ma gɩwɔrɔnyan yɩɩ bʋtʋn bʋʋ bɛmɛlɛ. À ba adawʋ yɩɩ bɛsalɛ gɛtɛ bɛn talɩ bɛ kalan bɛ. Okoro, nkele sere gʋtʋn fɔ gɩɩ gɛmɛ! Yahwe ɛ fɩya ma awɔ!>>

17 Gɛ Dafidi ɛ dɔ̀ Isareli begyegeyelɛ fɔ powu alɛ bɛ kpà wobi Solomon. 18 Ɛ dɔ̀ bɛ alan, <<Yahwe, yii Wurubwarɛ fɔ na fɩya ma ɛyɩ, gɛ ɛ yɛ yɩ i wura getuna ofèn-kamasɛ. Yema ɛ ka gɛtʋnkwaa fɔ gɩɩ bɛnɩ ɛ sa mɩɩn gʋlɔ, gɛ bɛ̀ sa Yahwe ma ɛtɩ wɔ bɛnɩ tɩɩ gatɩn. 19 Okoro ɩ ka yii-ituru ma yɩɩ bɛkalan powu ɩ sʋma Yahwe. Ɩ kya Yahwe, Wurubwarɛ Dikwo fɔ dii gesere, fɔ yàà wura ɩ ka Yahwe Dikola dɩɩ dɩdaka fɔ, ma Wurubwarɛ wanyan-fɩrɩnfɩrɩn fɔ ɩ bɛ sa Dikwo gɛtɛ yaà sere bàà tɩ̀ sʋma Yahwe fɔ daanɩ.>>