1 Ɩya-ɩya 21

Dafidi ɛ yɛ bɛ kalan bɩtà bʋʋ bɛtàlɛ fɔ

1 Satan ɛ tɔ e yela Isareli gɩfɩɩ gii koro, gɛ ɛ tɛ Dafidi amɩnlɛ-kpe gɛtɛ ɛ̀ɛ̀ sa bɛnɩ bàà kalan Isareli bete powu. 2 Okoro Dafidi ɛ dɔ̀ Yowabi ma bɩtà bʋʋ bɛtàlɛ bɔɔ bɛndɩrɛ fɔ alan, <<Ɩ San ɩ ma kalan Isareli bete, ye Beeseba san Dan fɔ àà bɛ̀ dɔ̀ mɩ, fɔ nan wura n nyɩnla baasɔ.>>

3 Mɔ Yowabi e tiri wuunyun alan, <<Oo Miinfonte, gengyi Yahwe ɛ̀ yɛ bɩtà bʋʋ bɛtàlɛ fɔ bɛ sɔ disere akpilin-ton gba bɛ fɩya fɔ, ɛbɛ powu be di gɛ aa bɛsaranyan. Anʋn yii koro gɛ awɔ miinfonte aa len àà mɛ gɛlɛ? Anʋn yii koro gɛ aa len àà yɛ dɩpwɛ dàà bè tin Isareli wo koro?>>

4 Mɔ egyu-dɩrɛ ɛ nyɩ wade fɔ yii koro, gɛtɛ wʋ yɛ Yowabi e di yii koro. Okoro Yowabi ɛ san e silin Isareli powu wanɩ, gɛ e biri ɛ ba Yerusalem. 5 Ɛwʋ gɛ Yowabi ɛ ma yɛ egyu-dɩrɛ Dafidi ɛ nyɩnla bɩtà bʋʋ bɛtàlɛ fɔ baasɔ. Isareli anɩ powu fɔ, beteni gɛtɛ baà talɩ bɛ san akpa fɔ bɛ̀ ba miliyon ɛkɩ ma asepekyi ton (1,100,000), fɩya ma Yuda beteni asepekyi dikpilin ma asiyee ma ɩgbaa ton (470,000).

6 Mɔ Yowabi ɛn kalan Lefi ma Benyamin boo-ifoli fɩya, yema en to egyu-dɩrɛ wade gɛtɛ ɛ sa wɔ alɛ ɛ mɛ fɔ ɛ sa. 7 Ade gɛtɛ egyu-dɩrɛ ɛ sa Yowabi alɛ ɛ mɛ fɔ ì di ade-kpen Yahwe bʋnʋn, okoro Yahwe e tiira Isareli gɩfɩɩ giten.

8 Ɛwʋ gɛ Dafidi e tiri onyun ɛ fɔ Yahwe alan, <<Na mɛ ade-kpen-dɩrɛ gɛtɛ na mɛ ade nyayɩ lɛ. Ǹ fɔ wɔ gɛ, ka nmɩ aasaranyan mɩɩn dɩpwɛ dii gedi fɔ kyɛ mɩ. Na mɛ anyimapu-de.>>

9 Ɛwʋ gɛ Yahwe ɛ dɔ̀ Gadi gɛtɛ è di Wurubwarɛ wɔtabʋrʋlɛ tɛ Dafidi fɔ alan, 10 <<San ma dɔ̀ Dafidi alɛ, nmɩ Yahwe alan, <Ǹde giten-tiira akpen asiyee ǹ tɛ sɩ̀ aa bʋnʋn. Tiri yaanɩ wʋkɩ, fɔ nan yɛ wʋ wàà ba aa koro.> >>

11 Gɛ Gadi ɛ san Dafidi wakʋn ɛ ma dɔ̀ wɔ alan, <<Yahwe ɛɛ dɔ̀ alan, <Tiri giten-tiira gɛtɛ à len. 12 Dɩkpan dɩɩ gɛnʋ̀n bɩkyan bisiyee, abɛɛ bebon besiyee gɛtɛ aà serenti a ye aa bɛkyʋnlɛ bɔɔ bʋnʋn, abɛɛ Yahwe ɛɛ̀ ka edon aa koro awi asiyee, gɛtɛ ɛɛ̀ sa wɔsalɛ ɛ̀ɛ̀ bɛ̀ mɩna anyan Isareli gɛtʋnkwaa gɩɩkʋn-kamasɛyɛ ma diyebabi-kpen gɛtʋnkwaa fɔ gii koro. Sa amɩnlɛ wuu koro, fɔ àà yɛ mɩ nan nyɩnla ade gɛtɛ nan ma dɔ̀ ɛwɔ gɛtɛ ɛ sa mɩ fɔ.>>

13 Gɛ Dafidi ɛ dɔ̀ Gadi alan, <<Ǹ sa dɩyɩyɛ-dɩrɛ daanɩ. Mɔ ǹ len nan nʋ̀n Yahwe walɔ yaanɩ, yema wo gutunkoro gii gewe gɩ̀ sɔ gepepe. Kara yɛ mɩ nàn nʋ̀n bɛnɩ-nyalɛ baalɔ yaanɩ.>>

14 Okoro Yahwe ɛ yɛ diyebabi-kpen dɩ nʋ̀n Isareli gɛtʋnkwaa gii koro, gɛ Isareli bɛnɩ asepekyi asiyee ma ɩgbaa ton (70,000) be ku. 15 Gɛ Wurubwarɛ ɛ sa ɛsalɛ ɛkɩ ɛ̀ɛ̀ ma muru Yerusalem. Mɔ ɔkʋna gɛtɛ ɛsalɛ fɔ e sere ge muru bɛnɩ fɔ, gyerebi fɔ ɛ taga Yahwe, gɛ ɛ dɔ̀ ɛsalɛ gɛtɛ ee muru bɛnɩ fɔ alan, <<Wʋ kʋtɩ! Kere ya gɛlɛ!>> Fɔ Yahwe wɔsalɛ fɔ è yela Yebusi-te Arawuna wanaabi yii getibakʋn.

16 Gɛtɛ Dafidi ɛ tɔ̀là bʋnʋn fɔ, e we Wurubwarɛ wɔsalɛ afiye yaanɩ gatala gɛtɛ è de edon, ɛ tʋna gʋlɔ Yerusalem wo koro. Ɛwʋ gɛ Dafidi ma bɛndɩrɛ gɛtɛ bè tin bekotoku baayan fɔ bɛ waran be kura bɛ ka bɔɔ bʋnʋn be tin gɛtʋnkwaa.

17 Gɛ Dafidi e tiri onyun alan, <<Nka nmɩ na dɔ̀ gɛtɛ bàà kalan bɛnɩ fɔ? Nmɩ na mɛ ade-kpen, gɛ na mɛ ade gɛtɛ ɩɩn kɔlɔ. Mɔ anʋn gɛ bɛnɩ nyabɛ gɛtɛ baade ɩ̀ ba gutunkoro lɛ bɛ mɛ? Oo Yahwe, miin Wurubwarɛ, tiira gɛ nmɩ ma mɩɩn dɩkpaara dɩɩ bɛnɩ giten, mɔ kara yɛ gyerebi nyawʋ wàà nʋ̀n aa bɛnɩ boo koro.>>

18 Ɛwʋ gɛ Yahwe wɔsalɛ fɔ ɛ dɔ̀ Gadi alɛ ɛ dɔ̀ Dafidi alɛ ɛ ma sere gedi gɩɩ gɛtɛkʋn ɛ tɛ Yahwe, Yebusi-te Arawuna wanaabi yii getibakʋn. 19 Okoro Dafidi ɛ tɔ ɛ san ɛ ma mɛ anlɛ gɛtɛ Gadi ɛ dɔ̀ wɔ Yahwe diyere daanɩ fɔ.

20 Gɛtɛ Arawuna è yela ee tiba wanaabi fɔ, e fi ɛ nya gɛ e we ɛsalɛ fɔ. Gɛ wobebi bɛnaa gɛtɛ bɛ̀ fɩya ma ɛwɔ fɔ be serenti bɛ ma bu. 21 Ɛwʋ gɛ Dafidi e kpe ɛ gbɛma Arawuna. Gɛtɛ Arawuna ɛ tɔ̀là bʋnʋn, gɛ e we wɔ fɔ, e kpe e ye anaabi yii getibakʋn fɔ gɩɩpɩ, gɛ ɛ waran e kura ɛ ka bʋnʋn e tin gɛtʋnkwaa.

22 Gɛ Dafidi ɛ dɔ̀ wɔ alan, <<Ka anaabi yii getibakʋn nyagɩ tɛ mɩ nan sere gedi gɩɩ gɛtɛ̀kʋn n tɛ Yahwe, fɔ gyerebi gɛtɛ ee di bɛnɩ lɛ èè ten. Fu gɩ tɛ mɩ gɩɩ gɩyɛ-gbagba.>>

23 Ɛwʋ gɛ Arawuna ɛ dɔ̀ Dafidi alan, <<Miinfonte, ka gɩ, fɔ àà mɛ gɩnyan-kamasɛ gɛtɛ gɩ̀ kɔlɔ tɛ wɔ̀! Nya, nan tɛ ɛkwɔ-teni tɛ gekuma gii gedi fɔ, anaabi yii-iyon fɔ yaà mɛ bʋtan, anaabi yaabi fɔ mɔ yaà mɛ gedi gɩɩ gɛtɛ̀ gaanyan. Nan tɛ anyan nyayɩ powu.>>

24 Mɔ egyu Dafidi ɛ dɔ̀ wɔ alan, <<Kpakpaakpa! Wù di gɛtɛ nan se gɩ gɩɩ gɩyɛ gbagbaagba. Mɩn nan talɩ n to aanyan n tɛ Yahwe, abɛɛ nan tɛ gekuma gii gedi gɛtɛ min le gɩnyankɩ.>>

25 Okoro Dafidi e le gɛtʋnkwaa fɔ gii gutoro sɩka-fututu wabi nkpɩn busiyee. 26 Gɛ Dafidi e sere gedi gɩɩ gɛtɛkʋn dʋkɔ ɛ tɛ Yahwe, gɛ ɛ tɛ gekuma gii gedi, ma olila wuu gedi. E tiri onyun e kpèlè Yahwe, gɛ Yahwe e yera wɔ ma ɔtan e ye gatala gekuma gii gedi gɩɩ gɛtɛkʋn fɔ gii koro.

27 Ɛwʋ gɛ Yahwe ɛ tabʋrʋ ɛ tɛ wɔsalɛ fɔ, gɛ e birima wɔ tata fɔ ɛ sa wɔ dɩfwa daanɩ. 28 Gɛtɛ Dafidi e we gɛtɛ Yahwe e to wonyun-tiri Yebusi-te Arawuna wanaabi yii getibakʋn gɛlɛ fɔ, ɛ tɛ gedi dʋkɔ. 29 Ɔkʋna wʋtɔkɔ fɔ, Yahwe Dikwo-dɩrɛ gɛtɛ Mose e sere fɔ dɩ̀ sa otonkuma waanɩ, gɛ gekuma gii gedi gɩɩ gɛtɛ̀kʋn fɔ gɩ̀ sa dɩsʋmakʋn, Gibeyon ditele daanɩ. 30 Mɔ Dafidi ɛn talɩ san dʋkɔ alɛ ɛ̀ ma lila ade e ye Yahwe wakʋn, yema è serenti Yahwe wɔsalɛ fɔ wɔ tata fɔ.