1 Ɩya-ɩya 18

Dafidi e di akpa kpekpesi yii koro

1 Ɔya wʋkɩ wʋʋ gama fɔ, Dafidi ɛ kpà ma Filisiti bete, gɛ e di boo koro. E to Gati ditele ma daatelebi gɛtɛ i silin di i tuma fɔ e ye Filisiti bete baalɔ yaanɩ.

2 Dafidi ɛ nɩ di Mowabi bete boo koro, gɛ bɛ sara wɔ gatɩn, gɛ bee le gɩkyan-gɩkyan gɩɩ sɩka bɛ tɛ wɔ.

3 Gɛlɛ ke gɛ egyu Dafidi e di Soba wogyu-dɩrɛ Hadadeseri wo koro, gbɛma Hamati gɛtʋnkwaa, ɔkʋna gɛtɛ Hadadeseri ɛɛ yaraba wo bugyu buu gedikʋn ɛɛ fɔrɔ Efurate getu gaanɩ fɔ. 4 Dafidi e gye wo tiiramisan ɛbɛ nkpɩn ton (1,000), ma wabengyi yɩɩ bɛsaralɛ ɩgbaa isiyee ma nkpɩn ton (7,000), ma bɩtà bʋʋ bɛtàlɛ gɛtɛ bɛ̀ san ma bɩsɩrɩ disepekyi (20,000). E kebi abengyi fɔ yɩɩ-ɩsɩrɩ-kpaa, gɛ e kere akpilin ton (100) ɛ ya ɛ tɛ abengyi akpilin ton (100) gɛtɛ yii tiira tiiramisan ɛbɛ fɔ.

5 Gɛtɛ Aram bete gɛtɛ be ye Damasiko fɔ bɛ ba bàà bɛ kpà Soba wogyu-dɩrɛ Hadadeseri fɔ, Dafidi e wolo baanɩ disepekyi ma gbaa (22,000). 6 Ɛwʋ gɛ Dafidi ɛ sɩ̀ bɩtà bʋʋ bɛtàlɛ Aram bugyu buu gedikʋn buu ditele-dɩrɛ Damasiko daanɩ, gɛ Aram bete bɛ sara wɔ gatɩn, be le gɩkyan-gɩkyan gɩɩ sɩka bɛ tɛ wɔ. Yahwe ɛ yɛ Dafidi ee di akpa yii koro ɔkʋn-kamasɛ gɛtɛ ɛ san ɛ ma akpà fɔ.

7 Gɛ Dafidi ɛ labɩrɩ sɩka-sɩya wawɔrɔnyan panpasan-dɩyɛlɛ koro gɛtɛ Hadadeseri bɩtà bʋʋ bɛtàlɛ bè de fɔ ɛ san Yerusalem. 8 Dafidi ɛ labɩrɩ awɔrɔnyan-sɩya kpekpesi e ye Tibati ma Kun atele gɛtɛ Hadadeseri e di bugyu yii koro fɔ. Bʋwɔrɔnyan-sɩya bʋtɔkɔ gɛ gamama Solomon ɛ bɛ ka ɛ mɛ gɩwɔrɔnyan-sɩya gɩɩ tasa-dɩrɛ fɔ, ma bepila fɔ, ma gɩwɔrɔnyan-sɩya gaanyan kperen-kperen fɔ.

9 Gɛtɛ Hamati wogyu-dɩrɛ Towu ɛ nʋn gɛtɛ Dafidi e di Soba wogyu-dɩrɛ Hadadeseri wo koro fɔ, 10 ɛ sa wobi-teni Hadoram egyu Dafidi wakʋn alɛ ɛ ma sa wɔ onyun, fɔ èè sila wɔ gɛtɛ e di Hadadeseri wo koro akpa yaanɩ fɔ. Fɔ Towu ma Hadadeseri bɛɛ tɩ kpà. Hadoram ɛ ka sɩka-sɩya, ma sɩka-fututu, ma gɩwɔrɔnyan-sɩya yaanyɩmɩnyan ɛ ma tɛ Dafidi.

11 Ɛwʋ gɛ egyu Dafidi ɛ mɛ yɩ fɩrɩnfɩrɩn ɛ tɛ Yahwe, fɩya ma sɩka-fututu, ma sɩka-sɩya gɛtɛ e to e ye Edom, ma Mowabi, ma Amoni bete, ma Filisiti bete, ma Amaleki bete baakʋn fɔ.

12 Seruya wobi Abisayi e wolo Edom bete ɩgbaa yɛkɩ (18,000) Bʋbɔlɛ bʋʋ Dɩtagba daanɩ. 13 Ɛ sɩ̀ bɩtà bʋʋ bɛtàlɛ Edom, gɛ Edom bete bɛ sara Dafidi gatɩn. Yahwe ɛ yɛ Dafidi e di akpa yii koro ɔkʋn-kamasɛ gɛtɛ ɛ san ɛ ma akpa fɔ.

Dafidi bɛndɩrɛbi

14 Dafidi e di bugyu Isareli powu wanɩ. Ɛ mɛ ade kyɛkyɛ, gɛ ɛ mɛ ade gɛtɛ ɩ̀ tʋna ɛ tɛ wɔ bɛnɩ powu. 15 Seruya wobi Yowabi na mɛ bɩtà bʋʋndɩrɛ ɛ tɛ bɩtà bʋʋ bɛtàlɛ fɔ. Gɛ Ahiludi wobi Yehosafati na mɛ egyu wɔtabʋrʋlɛ. 16 Ahitubi wobi Sadoki, ma Abiyata wobi Ahimeleki na mɛ gedi gɩɩ bɛtɛlɛ, gɛ Safisa ɛ mɛ gɩkpa gɩɩŋwaralɛ. 17 Yehoyada wobi Benaya na mɛ egyegeyelɛ ɛ tɛ Kereti ma Peleti bete. Gɛ Dafidi bebi-teni bɛ mɛ egyu bɛndɩrɛbi bɔɔ bɛndɩrɛ.