1 Wʋ bɛ nɩma ɔkʋna wʋkɩ fɔ, Amori bete boogyu Nahasi e ku, gɛ wobi Hanun e di bugyu e sere wɔ gɩsɩrɩ. 2 Ɛwʋ gɛ Dafidi ɛ dɔ̀ alan, <<Nan wula Nahasi wobi Hanun gutunkoro, yema wote e wula miin gutunkoro.>> Ɛwʋ gɛ Dafidi ɛ sa bɛnɩ bɛ ma tɛ Hanun bɔbwɛ ma wote diku.

Gɛtɛ Dafidi bɛnɩ fɔ bɛ ma gyu Hanun wakʋn Amori bete bɔɔ gɛtʋnkwaa gaanɩ bàà màà tɛ wɔ bɔbwɛ fɔ, 3 Amon ditele dɩɩ bɛndɩrɛ bɛ lila Hanun alan, <<À nyɩ̀ alɛ gebù gɛ Dafidi ee bù aate, okoro gɛ ɛ sa bɛnɩ bàà bɛ̀ dɔ̀ sa wɔ̀ lɛ? Wɔ bɛnɩ fɔ bɛn ba gɛtɛ bàà bè yuri nya gɛtʋnkwaa fɔ, fɔ bàà be gye ɛtɩ ma tɩɩ gɛtʋnkwaa fɔ bɩtà?>> 4 Ɛwʋ gɛ Hanun ɛ yɛ be gye Dafidi bɛsaranyan fɔ, gɛ bɛ wɔrɔ boo bikpri, gɛ bɛ fɛɛran bɔɔ ngba getite-getite, bɔɔ yɩɩ-ɩpɩ yɩɩ gɩlan, gɛ be berema bɛ. 5 Ɛwʋ gɛ ɛnɩ ɛkɩ ɛ ma dɔ̀ Dafidi anlɛ gɛtɛ bɛ mɛ wɔ bɛsaranyan fɔ, gɛ Dafidi ɛ sa bɛnɩ bɛ ma tuma bɛ, yema bɛ sa bɛ ɩnɩnfa bɛ kààrà, gɛ egyu-dɩrɛ ɛ yɛ bɛ dɔ̀ bɛ alan, <<Ɩ sara Yeriko ɩ ma sere gɛtɛ yii bikpri bàà gyu, fɔ yàà ba.>>

6 Gɛtɛ Hanun ma Amon bete be we gɛtɛ ɛbɛ ma Dafidi be biligi bekengbelilɛ fɔ, bɛ ka sɩka-fututu gɛtɛ wʋʋdʋrʋ waà mɛ anlɛ siminti bɛbagɩ nkpɩn busiyee ma akpilin kwarankɩ (740) bɔɔdʋrʋ bɛ ma hayɩ tiiramisan ɛbɛ, ma abengyi yɩɩ bɛsaralɛ be ye Aram-Naharayim, ma Aram-Maaka, ma Soba. 7 Bɛ nɩ hayɩ tiiramisan ɛbɛ ma abengyi yɩɩ bɛsaralɛ disepekyi ma gbaa ɛkɩ, fɩya ma Maaka wogyu-dɩrɛ ma wɔ bɩtà bʋʋ bɛtàlɛ, gɛ bɛ san bɛ ma sara gbɛma Medeba. Gɛ Amon bete mɔ bɛ tɔ be ye baatele yaanɩ, bɛɛ pɩna koro bàà tà bɩtà.

8 Gɛtɛ Dafidi ɛ nʋn ade nyayɩ fɔ, ɛ sa Yowabi ma bɩtà bʋʋ bɛtàlɛ fɔ powu bàà ma kpà. 9 Amon bete fɔ bɛ pɩna koro be yela boo ditele-dɩrɛ diitunu, gɛ Aram begyu gɛtɛ bɛ bɛ fɩya ma ɛbɛ fɔ be yela ɩkʋn-pentenperenkʋn.

10 Gɛtɛ Yowabi e we gɛtɛ bekengbelilɛ bɔɔ bɩtà bʋʋ bɛtàlɛ bɛ̀ sa wɔ bʋnʋn, gɛ bɛ̀ sa wɔ gama ke fɔ, e tiri Isareli bɩtà bʋʋ bɛtàlɛ gɛtɛ bɛ̀ nyɩ̀ akpa gepepe fɔ baanɩ bɛkɩ gɛtɛ bàà ma kpà ma Aram bete. 11 Gɛ ɛ yɛ ɛ ka bɛkurumakyɛɛ fɔ ɛ sa wonobi Abisayi gʋlɔ gɛtɛ bàà ma kpà ma Amon bete. 12 Ɛwʋ gɛ Yowabi alan, <<Gengyi Aram bete bɛ̀ ba ɔkɛma da mɩ fɔ, ba àà bɛ̀ kpà mɩ. Gɛ gengyi Amon bete bɛ̀ ba ɔkɛma da wɔ̀ fɔ, nan bɛ̀ kpà wɔ̀. 13 Yela kin-kin, fɔ tàà sa oturu tɩ kpà tɩ tɛ tɩɩ bɛnɩ ma tɩɩ Wurubwarɛ watele fɔ. Yahwe ɛɛ̀ mɛ ɛwʋ gɛtɛ wʋ̀ kɔlɔ tɛ wɔ!>>

14 Ɛwʋ gɛ Yowabi ma bɩtà bʋʋ bɛtàlɛ gɛtɛ è de fɔ be ye bàà ma kpà ma Aram bete, mɔ Aram bete fɔ be serenti. 15 Gɛtɛ Amon bete be we gɛtɛ Aram bete bee serenti fɔ, ɛbɛ mɔ be serenti be ye Yowabi wonobi Abisayi bʋnʋn baanɩ bɛ san ditele-dɩrɛ daanɩ. Okoro Yowabi e biri ɛ da Yerusalem.

16 Gɛtɛ Aram bete be we gɛtɛ Isareli bete bee di boo koro fɔ, bɛ sa bɛnɩ bɛ ma ka bɩtà bʋʋ bɛtàlɛ-fon be ye Efurate bɛ bɛ fɩya ma ɛbɛ. Sofaki, na mɛ bɩtà bʋʋtàlɛ ɛndɩrɛ ɛ tɛ Hadadeseri bɩtà bʋʋ bɛtàlɛ fɔ.

17 Gɛtɛ Dafidi ɛ nʋn gɛlɛ gaade nyayɩ fɔ, ɛ kʋla Isareli bɩtà bʋʋ bɛtàlɛ powu, gɛ bɛ kààrà Yodan getu. Bɛ san bɛ ma gbɛma bɛ, gɛ be yela bɔɔ bʋnʋn. Dafidi ɛ tɩyɛ wɔ bɩtà bʋʋ bɛtàlɛ e yela, gɛ Aram bete be sere akpa ma ɛwɔ. 18 Mɔ Aram bete be serenti, gɛ Dafidi e wolo baabengyi yɩɩ bɛsaralɛ ɩgbaa isiyee ma nkpɩn ton (7,000), ma bɔɔ bɩtà bʋʋ bɛtàlɛ gɛtɛ bɛ̀ san ma bɩsɩrɩ fɔ asepekyi anyɔɔ (40,000). E wolo bɔɔ bɩtà bʋʋndɩrɛ Sofaki mɔ ke.

19 Gɛtɛ begyu gɛtɛ bɛ̀ sa Hadadeseri gatɩn fɔ be we gɛtɛ Isareli e di boo koro fɔ, bɛ fɔ gɛtɛ olila wàà ba ɛbɛ ma Dafidi boo getite, gɛ bɛ sara Dafidi gatɩn.

Okoro Aram bete ben mini len gɛtɛ bàà kpà Amon bete nya.