1 Ɩya-ɩya 10

Sawulo diku

1 Wʋ bɛ ba gɛtɛ Filisiti bete bɛ ma tà bɩtà ma Isareli bete. Gɛ Isareli bete fɔ be serenti, gɛ kpekpesi be ku Gilibowa wodon wuu koro. 2 Gɛ Filisiti bete bɛ tɛrɛma Sawulo ɔnʋn-sɩna waanɩ, gɛ be wolo wo bebi-teni Yonatan, ma Abinadabo, ma Malikisuwa. 3 Wʋ bɛ nɩma ɔkʋna wʋkɩ fɔ, akpa fɔ ɩɩ mɛ ɔkɛma ɩ tɛ Sawulo, okoro wo bekengbelilɛ bɔɔ bɩsɩnta bu sere wɔ, gɛ e pira.

4 Ɛwʋ gɛ Sawulo ɛ dɔ̀ wakpa-nyan yiitolalɛ fɔ alan, <<Tiri aa tata, fɔ àà sere mɩ wolo. Nka gɛlɛ fɔ Filisiti bete nyabɛ gɛtɛ ben belen bɩsan lɛ baà be wolo mɩ, fɔ bàà mʋmwa mɩ.>>

Mɔ wakpanyan yiitolalɛ fɔ e terema, yema wʋ mɛ wɔ gɩsaa wʋ kààrà. Gɛlɛ wuu koro Sawulo ɛ ka ɛwɔ gbagba wɔ tata e sere gɛtʋnkwaa, gɛ ɛ tà ɛ nʋ̀n wo koro. 5 Gɛtɛ akpan-yan yiitolalɛ fɔ e we gɛtɛ Sawulo e ku fɔ, ɛwɔ mɔ e fun koro ɛ fɩna wodon wo koro, gɛ e ku. 6 Okoro Sawulo, ma wo bebi-teni besiyee fɔ, ma wɔ dɩkpaara dɩɩ bɛnɩ be ku onyun-kɩlɩn.

7 Gɛtɛ Isareli bete gɛtɛ bɛ̀ sa Yesereli dɩtagba daanɩ fɔ, be we gɛtɛ bɩtà bʋʋ bɛtàlɛ fɔ be serenti, gɛ Sawulo ma wo bebi-teni fɔ be ku fɔ, be serenti be kere baatele bɛ ya. Ɛwʋ gɛ Filisiti bete fɔ be to atele fɔ yaanɩ bɛ sara.

8 Gɛtɛ kere gɩ kpa, gɛ Filisiti bete bɛ san bɛ̀ ma kpila bekpena fɔ baanyan fɔ, be we gɛtɛ Sawulo ma wo bebi-teni mɔ bɛ nʋ̀n bɩtà fɔ baanɩ, Gilibowa wodon fɔ wuu koro. 9 Ɛwʋ gɛ be lo Sawulo wanyan gɛtɛ ɛ̀ sa fɔ, gɛ be belen wɔ duyu, gɛ bɛ ka dɩ, fɩya ma wɔ gɩwɔrɔnyan-dɩyɛlɛ koro fɔ bɛ da. Gɛ bɛ sa bɛnɩ Filisiti bete bɔɔ gɛtʋnkwaa powu gaanɩ alɛ bɛ ma yasɩ gɛlɛ gaade fɔ boo bekpen ma bɔɔ bɛnɩ baanɩ. 10 Gɛ bɛ ka wɔ gɩwɔrɔnyan-dɩyɛlɛ koro fɔ bɛ ma sɩ̀ boo bekpen boo dikwo daanɩ, gɛ bɛ ka wo duyu bɛ ma fà Dagon wokpen dikwo daanɩ.

11 Gɛtɛ Yabesi-Gileyadi bete powu bɛ nʋn ade gɛtɛ Filisiti bete bɛ mɛ Sawulo fɔ, 12 bɔɔ bɩtà bʋʋ bɛtàlɛ gbaa-gbaa fɔ bɛ san bɛ ma ka Sawulo ma wo bebi-teni fɔ boo bikpena bɛ san Yabesi. Gɛ be lò baanankʋba oyon-dɩrɛ wʋkɩ wʋʋ gatɩn, Yabesi ditele daanɩ, gɛ bɛ ban onyun awi kwarankɩ. 13 Sawulo e ku, yema en di Yahwe wade yii koro. En ton Yahwe wanyun-gyebi fɔ yaanɩ, gɛ ɛɛ san bekpèlèlɛ bekpena gba baakʋn ɛ ma kpèlè bekpena bàà wùlà wɔ isele, 14 gɛ ɛn taa lila Yahwe gelenbi. Okoro Yahwe e wolo wɔ, gɛ ɛ ka bugyu buu gedi fɔ ɛ sa Yese wobi Dafidi gʋlɔ.