1 Beteni bɛkɩ bɛ san bɛ ma fɩya ma Dafidi, Sikilagi ditele daanɩ ɔkʋna gɛtɛ e serenti e ye Kisi wobi Sawulo bʋnʋn fɔ. Bè di gɛ bɛnɩ gɛtɛ bɛ̀ nyɩ̀ akpa yaade gepepe, gɛ bɛ kpà wɔ akpa fɔ yaanɩ. 2 Bè di bɛnɩ gɛtɛ bɛ̀ nyɩ̀ bɩsɩnta bʋʋ gɛtà, gɛ bɛ̀ nyɩ̀ taya gɛtà dɩbɩyan ma ologyi. Bè di gɛ Sawulo wɔ bɛfʋrɩ gɛtɛ ɛbɛ mɔ be ye gɛ Benyamin wofoli waanɩ.

3 Bɔɔ bɛndɩrɛ n di Gibeya-te Semaa bebi-teni Ahiyeseri ma Yowasi, ma Asimafeti bebi Yesiyeli, ma Peleti, ma Baraka, ma Anatoti-te Yehu, 4 ma Isimaya gɛtɛ e ye Gibeyon fɔ, gɛ è di bɩtà bʋʋtàlɛ-dɩrɛ gɛtɛ ɛ̀ fɩya bɛnɩ dikpilin ma fwo fɔ baanɩ, gɛtɛ è di begyegeyelɛ fɔ baanɩ ɛkɩ fɔ. Yeremiya, ma Yahasiyeli, ma Yosabadi gɛtɛ e ye Gederati fɔ, 5 ma Elusayi, ma Yerimoti, ma Beyaliya, ma Semariya, ma Sefatiya gɛtɛ e ye Harufi fɔ, 6 ma Elikana, ma Isiya, ma Asareli, ma Yoweseri, ma Yasobeyam gɛtɛ be di Kora bete fɔ, 7 ma Yoram gɛtɛ e ye Gedori fɔ bebi Yowela ma Sebediya.

8 Bɩtà bʋʋ bɛtàlɛ fɔ bɛkɩ gɛtɛ bè di Gadi bɛnɩ fɔ bɛ ma fɩya ma Dafidi, ɔkʋn gɛtɛ ekengbelilɛ ɛkɩ ɛn talɩ e gyu fɔ, otonkuma waanɩ. Bè di gɛ bɩtà bʋʋ bɛtàlɛ gɛtɛ bɛ̀ nyɩ̀ akpa gepepe, gɛ bɛ̀ nyɩ̀ gɩwɔrɔnyan-dɩyɛlɛ koro gii geton gepepe, gɛ bɛ̀ nyɩ̀ gɩsɩnta gɩɩ gɛtà gepepe. Bɔɔ bʋnʋn bʋ̀ ba gɩsaa anlɛ bɛdɩrɛ bɔɔ bʋnʋn, gɛ bɛ̀ ba ɔsa anlɛ idon yaanɩ yɩɩ bɛkwalan.

9 Eseri n di bɔɔndɩrɛ,

wɔmalɛ n di Obadiya, boosiyeefɛ n di Eliyabi.

10 Ɛnaafɛ n di Misimana, gɛ etonfɛ n di Yeremiya.

11 Ekooronfɛ n di Atayi, gɛ ɛkwarankɩfɛ n di Eliyeli.

12 ɛnɩyɛfɛ n di Yohanan, gɛ ɛyɛkɩfɛ n di Elisabadi.

13 Efwofɛ n di Yeremiya, gɛ fwo-ɛkɩfɛ n di Makibanayi.

14 Gadi bɩtà bʋʋ bɛtàlɛ nyabɛ bè di gɛ bɩtà bʋʋ bɛtàlɛ bɔɔ bɛndɩrɛ. Baanɩ ɛpɩɩ-kɩlɩn ɛ̀ talɩ e ten ma bɛnɩ akpilin ton èè di boo koro, gɛ ɛndɩrɛ-kɩlɩn ɛ̀ talɩ e ten ma bɛnɩ nkpɩn ton èè di boo koro. 15 Gɩkyan gɩkɩ giibon-gyangbasɛ anɩ, gɛtɛ Yodan getu gɩ yɔn gɩ walɩ powu fɔ, ɛbɛ n di bɛnɩ gɛtɛ bɛ kààrà getu fɔ bɛ san bɛ ma berema bɛnɩ powu gɛtɛ bɛ̀ sa atagba fɔ yaanɩ, ofila wʋʋ gɛtàkʋn wʋʋ gɩlan, ma ofila wʋʋ gɛnʋ̀nkʋn wʋʋ gɩlan powu fɔ.

16 Benyamin bɛnɩ bɛkɩ ma Yuda beteni bɛkɩ mɔ bɛ ma fɩya ma Dafidi, ɔkʋn gɛtɛ ekengbelilɛ ɛkɩ ɛn talɩ egyu fɔ. 17 Gɛtɛ Dafidi e ye gɛtɛ ɛ̀ɛ̀ ma tuma bɛ fɔ, ɛ dɔ̀ bɛ alan, <<Gengyi ɩ ba olila waanɩ, gɛtɛ yàà bɛ kpà mɩ fɔ, ɛwʋ bɩrɛ nan yɛ yɩ yàà bɛ mɛ ɛkɩlɩn ma nmɩ. Mɔ gengyi ɩ ba gɛtɛ yàà bɛ gban mɩ ɩ sa mɩɩn bɛkyʋnlɛ baalɔ yaanɩ, ma gɛtɛ mɩn mɛ ade-kpen ɩkɩ gba lɛ fɔ, ɛwʋ bɩrɛ tiitu ɛbɛ boo Wurubwarɛ e we yɩ, fɔ èè tin yɩ dɩpwɛ.>>

18 Ɛwʋ gɛ Wurubwarɛ gifiye gɩ bɛ gyaga Amasayi gɛtɛ è di bɛnɩ dikpilin ma fwo fɔ bɔɔndɩrɛ fɔ wo koro, gɛ ɛ dɔ̀ alan,

<<Oo Dafidi, tì di gɛ aayo!

Oo Yese wobi, tɩ̀ fɩya ma awɔ!

Olila, olila wʋ sara ma awɔ,

gɛ olila wʋ sara ma ɛbɛ gɛtɛ bɛɛ kpà wɔ̀ fɔ,

yema aa Wurubwarɛ ɛɛ̀ kpà wɔ̀.>>

Okoro Dafidi e to bɛ gɛ ɛ mɛ bɛ bɩtà bʋʋ bɛtàlɛ akpi-akpi yii begyegeyelɛ.

19 Manase wofoli wʋʋ bɛnɩ bɛkɩ bɛ ma fɩya ma Dafidi, ɔkʋna gɛtɛ ɛ fɩya ma Filisiti bete gɛ bɛ ma kpa ma Sawulo fɔ. (Mɔ Dafidi ma wɔ bɛnɩ fɔ bɛn ma kpà gɛ Filisiti bete, yema gɛtɛ Filisiti bete bɛ ka ayu be ten be were fɔ, be berema Dafidi. Bɛɛ dɔ̀ be wùlà alan, <<Gengyi Dafidi è biri ɛ ma fɩya ma wofonte Sawulo fɔ, ti ku ti lulu.>>) 20 Gɛtɛ Dafidi ɛ san Sikilagi fɔ, bɛnɩ gɛtɛ bɛ ma fɩya ma ɛwɔ fɔ n di Adina, ma Yosabadi, ma Yediyayeli, ma Mikayeli, ma Yosabadi, ma Elihu, ma Siletayi. Bè di Manase wofoli wʋʋ bɩtà bɔɔ bɛtàlɛ bɔɔ bɛndɩrɛ gɛtɛ bɛnɩ nkpɩn ton bɛ̀ sa baanɩ-kamasɛ wɔ gatɩn. 21 Bɛ kpà Dafidi e di bɛnɩ akpi-akpi fɔ boo koro, yema ɛbɛ powu bè di gɛ bɩtà bʋʋ bɛtàlɛ gɛtɛ bɛ̀ ba oturu, gɛ bè di gɛ bɩtà bʋʋ bɛtàlɛ bɔɔ bɛndɩrɛ. 22 Duwi n di duwi, bɛnɩ-fon bɛɛ bɛ fɩya ma Dafidi, ka ma ye gɛtɛ e wura bɩtà bʋʋ bɛtàlɛ ma ɔkɛma kpekpesi anlɛ Wurubwarɛ bɩtà bʋʋ bɛtàlɛ dikpi.

23 Bɛnɩ gɛtɛ bɛ ban gbagya, gɛtɛ bɛ ma fɩya ma Dafidi, Hebron ditele daanɩ, gɛtɛ bàà ma to bugyu fɔ ye Sawulo gʋlɔ gaanɩ bɛ tɛ Dafidi, anlɛ gɛtɛ Yahwe ɛ fʋrʋma ɛ dɔ̀ fɔ baasɔ n tɛ ba lɛ.

24 Yuda bete gɛtɛ bè de awɔrɔnyan-dɩyɛlɛ koro, ma bɩsɩnta tɛ akpa fɔ bɛ̀ ba ɩgbaa isiyee ma nkpɩn bɩnaa (6,800).

25 Simeyon bɛnɩ gɛtɛ bɛ pɩna koro bɛ tɛ akpa fɔ bɛ̀ ba ɩgbaa isiyee ma nkpɩn ton ma akpilin ton (7,100). 26 Lefi bɛnɩ bɛ̀ ba ɩgbaa ɩnyɔɔ ma nkpɩn bisiyee (4,600), 27 fɩya ma Yehoyada, gɛtɛ è di Aaron dɩkpaara dɩɩndɩrɛ gɛtɛ è de bɛnɩ gbaa ma nkpɩn nɩyɛ ma akpilin ton (3,700), 28 ma Sadoki gɛtɛ è di ɛsaranyan, gɛ è di bɩtà bʋʋtàlɛ-dɩrɛ fɔ, ma bɩtà bʋʋ bɛtàlɛ bɔɔ bɛndɩrɛ dikpilin ma bɛnyɔɔ (22) gɛtɛ be ye Sadoki wafʋrɩ yaanɩ.

29 Benyamin wofoli wʋʋ bɛnɩ, gɛtɛ bè di Sawulo wonobi ɛbɛ fɔ bɛ̀ ba bɛnɩ ɩgbaa ɩnyɔɔ ma nkpɩn ton. Yema ɔya wʋtɔkɔ waanɩ fɔ, baanɩ kpekpesi bɛ̀ sangba bɛ̀ tɛrɛma Sawulo.

30 Efrayim wofoli wʋʋ bɛnɩ bɛ̀ ba disepekyi dɩkɩ ma nkpɩn bɩnaa (20,800). Bè di gɛ bɩtà bʋʋ bɛtàlɛ gɛtɛ bɛ̀ ba oturu gɛ baayere i ye baakpaara yaanɩ.

31 Bɛnɩ gɛtɛ Manase wofoli-fan wʋʋ bɛnɩ be tiri gɛtɛ bàà ma yela bɔɔ gɩsɩrɩ, fɔ bàà sɩ̀ Dafidi bugyu fɔ bɛ̀ ba ɩgbaa yɛkɩ (18,000).

32 Isaka wofoli wʋʋ bɛnɩ gɛtɛ bɛ kɛrɛ ade bɛ nya, gɛ be we ɛwʋ gɛtɛ wʋ̀ kɔlɔ, ma ɔya gɛtɛ wʋ kʋtʋma gɛtɛ Isareli ɛ̀ɛ̀ mɛ ade ɩkɩ fɔ, bɛ̀ ba bɛndɩrɛ gɛkpɩn (200), fɩya ma bɔɔ bɛfʋrɩ powu gɛtɛ bɛ̀ sa ɛbɛ bɛndɩrɛ fɔ bɔɔ gatɩn.

33 Sebulun wofoli wʋʋ bɛnɩ bɛ̀ ba asepekyi anyɔɔ ma ɩgbaa ton (50,000). Bè di bɩtà bʋʋ bɛtàlɛ gɛtɛ bɛ̀ nyɩ̀ akpa yaanyan-kamasɛ yaade. Bɛ ka booturu powu bɛ ba bàà be yela Dafidi gama.

34 Nafitali wofoli waanɩ fɔ, akpa yii begyegeyelɛ nkpɩn ton (1000), ma bɩtà bʋʋ bɛtàlɛ disepekyi ma ɩgbaa nɩyɛ ma nkpɩn ton (37,000). Bè di bɛnɩ gɛtɛ bɛ̀ nyɩ̀ gɩwɔrɔnyan-dɩyɛlɛ koro ma bɩsɩnta buu geton.

35 Dan wofoli wʋʋ bɛnɩ gɛtɛ bɛ ban gbagya fɔ bɛ̀ ba disepekyi ma ɩgbaa ɩnaa ma nkpɩn bisiyee (28,600).

36 Aseri wofoli wʋʋ bɛnɩ gɛtɛ bɛ̀ nyɩ̀ akpa yaade gepepe gɛtɛ bɛ pɩna koro tɛ bɩtà fɔ, bɛ̀ ba asepekyi anyɔɔ (40,000).

37 Ifoli gɛtɛ ɩ̀ sa Yodan getu-fen, gɛtɛ ɛyɩ n di Ruben wofoli, ma Gadi wofoli, ma Manase wofoli-fan fɔ, yɩɩ bɛnɩ bɛ̀ ba bɛnɩ asepekyi kooron (120,000). Bɛ̀ ba akpanyan kperen-kperen.

38 Gɛlɛ gɩɩ bɛnɩ nyabɛ powu bè di gɛ bɛnɩ gɛtɛ bɛ ka koro bɛ tɛ gɛtɛ bàà kpà akpa fɔ. Ɛbɛ powu bɛ ka ɔnʋn-sɩna bɛ ba Hebron bàà bɛ̀ sɩ̀ Dafidi bugyu tɛ Isareli powu. Isareli bete-kurumakyɛɛ mɔ bè yela tɛ Dafidi bugyu buu gedi. 39 Be di awi asiyee Dafidi wakʋn dʋkɔ. Be di gɛ bɛ nyʋn, yema bɔɔ bɛfʋrɩ bɛ pɩna koro bɛ tɛ gedi ma gɛnyʋn yaade. 40 Gɛlɛ ke gɛ bɔɔ bɛfʋrɩ gɛtɛ be ye ɔfɔ anlɛ Isaka bɛnɩ, ma Sebulun bɛnɩ, ma Nafitali bɛnɩ fɔ bɛ ka anyan-dilɛ bɛ gyaga akpɔŋɔ, ma abengyi, ma akpɔŋɔ-tɩtɩɩ yii koro, fɩya ma bɛnan bɛ san. Ɔnʋmʋ, ma figi wo keki, ma resin wo keki, ma wayɩn, ma bʋnɔ, ma bɛkwɔ ma bɛyɛran ma begbebi ɩ gbintin, yema bee di ɔsɛ Isareli.