1 Ɩya-ɩya 5

Ruben wodu wʋʋ bɛnɩ

1 Isareli wobi ɛndɩrɛ bebi baade. Ruben n di Isareli wobi ɛndɩrɛ, mɔ gɛtɛ ɛ dʋrɔ ma wote wodima okoro, be to wɔ gɩndɩrɛ fɔ bɛ tɛ Isareli wobi Yosefu bebi-teni. Okoro bɛn mɩnɩ kalan wɔ sa gewo-tama giidu gɩɩ gɩkpa fɔ gaanɩ anlɛ ebi ɛndɩrɛ. 2 Gɛ ma gɛtɛ Yuda n ba ɔkɛma wɔdɩrɛ ɛbɛ ma wonobi ɛbɛ baanɩ, gɛ egyu e ye wanɩ gba fɔ, gewo gɩɩ gɩndɩrɛ fɔ gɩ mɛ gɛ Yosefu woyo. 3 Isareli wobi-teni ɛndɩrɛ Ruben bebi-teni n di

Hanoki, ma Palu, Ma Hesiron, ma Karimi.

4 Yoweli wodu wʋʋ bɛnɩ n di

Semaya, ma Semaya wobi-teni Gogi,

ma Gogi wobi-teni Simeyi,

5 ma Simeyi wobi-teni Mika,

ma Mika wobi-teni Rehaya, ma Rehaya wobi-teni Baali,

6 ma Baali wobi-teni Beera, ma Beera wobi-teni gɛtɛ Asiriya wogyu-dɩrɛ Tigilati-Pileseri e gye ɛ da fɔ. Beera na mɛ Ruben wofoli fɔ wʋʋndɩrɛ.

7 Bɔɔ bɛfʋrɩ baayere, anlɛ gɛtɛ boo gewo-tama giidu gii wùlà fɔ n tɛ ba lɛ.

Yeyeli gɛtɛ ɛwɔ n di bɔɔndɩrɛ fɔ, ma Sekariya, 8 ma Bela gɛtɛ wote n di Asasi, gɛ Asasi wote n di Sema gɛtɛ ɛwɔ mɔ wote n di Yoweli fɔ. Bɛ sara gɛ ɔlanlan gɛtɛ wʋ ka wu ye Arore fɔ san Nebo ma Baali-Meyon fɔ waanɩ. 9 Ofila wʋʋ gɛtàkʋn wʋʋ gɩlan fɔ, be to gɛtʋnkwaa fɔ bɛ ma ye otonkuma wuunyun, ɔkʋn gɛtɛ wʋ̀ dɔ san Efrati getu gɩɩpɩ fɔ, yema bɔɔ bɛnan bɛ sɔ Gileyadi gɛtʋnkwaa gaanɩ.

10 Sawulo wo bugyu buu gedi gaanɩ fɔ, Ruben bɛnɩ bɛ tà bɩtà ma Hagiri bete, gɛ be di boo koro. Be to Hagiri bete baasarakʋn fɔ powu gɛtɛ ɩ̀ sa Gileyadi wofila wʋʋ gɛtàkʋn gɩɩ gɩlan.

Gadi wodu wʋʋ bɛnɩ

11 Gadi wodu wʋʋ bɛnɩ bɛ sara bɛ gbɛma Ruben wodu wʋʋ bɛnɩ Basan gɛtʋnkwaa gaanɩ, ka ma ye Saleka.

12 Yoweli n di ɛndɩrɛ, gɛ Safam ɛ̀ nyɩma, gɛ Yanayi ma Safati bɛ mɛ akpaara yɩɩ bɛndɩrɛ fɔ bɛkɩ Basan.

13 Bɔɔ bɛfʋrɩ ɛbɛ akpaara-akpaara gɛtɛ i ye ofoli fɔ waanɩ fɔ n di

Mikayeli, ma Mesulam, ma Seba, ma Yorayi, ma Yakan, ma Siya, ma Eberi. Ɛbɛ powu bɛ̀ ba kwarankɩ.

14 Abihayili gɛtɛ wote n di Huri fɔ gewo-tama gii-idu n tɛ ba lɛ. Huri wobi n di Abihayeli, Yarowa wobi n di Huri, Gileyadi wobi Yarowa, Mikayeli wobi n di Gileyadi, Yesisayi wobi n di Mikayeli, Yahido wobi n di Yesisayi, Busi wobi n di Yahido.

15 Abidiyeli wobi Ahi gɛtɛ è di Guni wɔnana fɔ na mɛ bɔɔ dɩkpaara dɩɩndɩrɛ.

16 Gadi bɛnɩ bɛ sara Gileyadi, Basan gɛtʋnkwaa gaanɩ ma atele gɛtɛ i silin yɩ i tuma fɔ yaanɩ, ma Saron ntʋnkwaa gɛtɛ bù di bɛnan baadikʋn fɔ baanɩ.

17 Bɛ ŋwara ɛbɛ powu baayere bɛ sa gewo-tama gii-idu yaakpa gɛtɛ bɛ ŋwara ɔkʋna gɛtɛ Yuda wogyu-dɩrɛ Yotam, ma Isareli wogyu-dɩrɛ Yerobwam-nyɔɔfɛ bee di bugyu fɔ yaanɩ.

18 Ruben bete, ma Gadi bete, ma Manase wɔfan wʋʋ bɛnɩ be wura bɩtà bʋʋ bɛtàlɛ asepekyi anyɔɔ ma ɩgbaa ɩnyɔɔ ma nkpɩn bisiyee ma akpilin nɩyɛ (44,760). Ɛbɛ n di bɛnɩ gɛtɛ be wùlà bɛ akpa gɛtɛ baà talɩ be ton gɩwɔrɔnyan-dɩyɛlɛ koro, ma bedon, ma bɩsɩnta, ma bɛgyangarɩ fɔ. 19 Bɛ ma tà bɩtà ma Hagiri wo-ifoli gɛtɛ bè di Yeturi fɔ, ma Nafisi, ma Nadabi bete fɔ. 20 Wurubwarɛ ɛ kpà bɛ akpa fɔ yaanɩ, gɛ ɛ ka Hagiri bete ma ɛbɛ gɛtɛ bɛ fɩya ma ɛbɛ fɔ powu ɛ sa Isareli bete bɔɔ gʋlɔ, yema be wula be kpèlè wɔ akpa fɔ yaanɩ. Ɛ nʋn boonyun-tiri, yema bɛ ka bʋnʋn bɛ gyaga wo koro. 21 Be gye Hagiri bete baabengyi asepekyi anyɔɔ ma ɩgbaa ton (50,000), ma bɛyɛran asepekyi fwo anyɔɔ ma ɩgbaa ton (250,000), ma akpɔŋɔ gbaa ɛkɩ (2000). Gɛ be ni gye bɛnɩ asepekyi ton (100,000) bɩtà, 22 gɛ be wolo baanɩ kpekpesi yema akpa fɔ ì di gɛ Wurubwarɛ wakpa. Isareli bete be to gɛtʋnkwaa fɔ gaanɩ bɛ sara ka ma sere ɔkʋna gɛtɛ Babilon bete mɔ be be gye bɛ bɛ da.

Manase wofoli-fan

23 Manase wofoli-fan fɔ wʋʋ bɛnɩ bɛ̀ sɔ gepepe. Bɛ sara ye Basan wɔlanlan waanɩ san Baali-Herimon gɛtɛ wù di Seniri (Herimon wodon) fɔ. 24 Akpaara fɔ yɩɩ bɛndɩrɛ n di Eferi, ma Isi, ma Eliyeli, ma Asiriyeli, ma Yeremiya, ma Hadafiya, ma Yahidiyeli. Bɛ mɛ bɩtà bʋʋ bɛtàlɛ gbaa, gɛ be di diyere, gɛ bɛ mɛ baakpaara yɩɩ bɛndɩrɛ. 25 Mɔ bɛn tɛrɛma bootu ɛbɛ boo Wurubwarɛ fɔ, mɔ fɔ bɛ sʋma gɛ bɩfɩɩ gɛtɛ Wurubwarɛ e berema bʋ e ye bɔɔ bʋnʋn fɔ buu bekpen. 26 Okoro Isareli wo Wurubwarɛ ɛ yɛ Asiriya wogyu-dɩrɛ Puli, gɛtɛ bee ni kpèlè alɛ Tigilati-Pileseri fɔ ɛ ma tà bɛ bɩtà, gɛ be gye Ruben bete, ma Gadi bete, ma Manase wofoli-fan fɔ bɛ da. Ɛ ka bɛ ɛ san ɛ ma sɩ̀ Hala, ma Habori, ma Hara, ma Gosan getu gɩɩpɩ, gɛtɛ bɛ̀ sangba bɛ̀ sa dʋkɔ bè ye ma ǹdò.