1 Ɛwʋ gɛ bɛ ka Wurubwarɛ Dɩdaka bɛ ma sɩ̀ Dɩyan dii Dikwo gɛtɛ Dafidi e sere ɛ tɛ dɩ fɔ daanɩ, gɛ bɛ tɛ gekuma gii gedi ma olila wuu gedi Yahwe bʋnʋn. 2 Gɛtɛ Dafidi ɛ tɛ gekuma gii gedi, ma olila wuu gedi fɔ e were fɔ, e hira bɛnɩ fɔ Yahwe diyere daanɩ. 3 Wʋʋ gama fɔ, e yo boroboro ɛkɩ-ɛkɩ, ma dati wo keki, ma resin wo keki ɛ tɛ Isareli-te ma Isareli-na kamasɛ.

4 Gɛ e tiri Lefi bete bɛkɩ gɛtɛ bàà tɩ̀ mɛ gʋtʋn Yahwe Dɩdaka fɔ dɩɩpɩ. Bàà gyegeye bɛnɩ fɔ bàà ka onyun wuu getiri, ma onyun wʋʋ gɛsa, ma gesila bɛ tɛ Yahwe, Isareli wɔ Wurubwarɛ fɔ. 5 Asafu n di boogyeyelɛ, gɛ Sekariya è di wɔmalɛ. Yeyeli, ma Semiramoti, ma Yehiyeli, ma Matitiya, ma Eliyabi, ma Benaya, ma Obedi-Edom, ma Yeyeli n tɛ tà adʋlɛ ɛbɛ kperen-kperen fɔ. Gɛ Asafu ɛ gbɛrɛ akyaka fɔ. 6 Gedi gɩɩ bɛtɛlɛ Benaya ma Yahasiyeli ntɛ fʋ̀n akantan Wurubwarɛ Dikola dɩɩ dɩdaka fɔ dɩɩpɩ ɔya-kamasɛ.

7 Duwi dɩtɔkɔ n di dɩgyangbasɛlɛ gɛtɛ Dafidi ɛ ka ɩnʋn yɩɩ gɛnʋma-sa Wurubwarɛ onyun ɛ sa Asafu ma wɔwɔlɔn ɛbɛ Lefi bete fɔ baalɔ yaanɩ. Ɔnʋn fɔ n di alɛ,

8 Oo, ɩ ka onyun wʋʋ gɛsa ɩ tɛ Yahwe, i kpèlè wo diyere.

Ɩ yasɩ wade-dɩrɛ gɛtɛ ɛ mɛ fɔ ɩ tɛ bɩfɩɩ.

9 Ɩ nʋma ɩnʋn ɩ tɛ wɔ, ɩ nʋma gesila gɩɩ-ɩnʋn ɩ tɛ wɔ.

Ɩ dɔ̀ wade-dɩrɛ ma gɩsaa yaade.

10 Ɩ ka wo diyere-fɩrɩnfɩrɩn fɔ ɩ kɩntɩn,

ɩ yɛ ɛbɛ gɛtɛ bee bugiti Yahwe fɔ bàà di ɔsɛ boo-ituru yaanɩ.

11 I bugiti Yahwe, fɔ yàà wura wɔkɛma,

I bugiti wɔ ɔya-kamasɛ fɔ ɛ̀ɛ̀ kpa yɩ.

12 Ɩ kʋna ade ma gɩsaa gɛtɛ ɛ mɛ fɔ,

Ɩ kʋna wapenterebi ma wɔ dɩpwɛ dii getin.

13 Oo, ɛyɩ Wurubwarɛ bɛsaranyan Isareli wodu wʋʋ bɛnɩ,

Oo, Yakobu bɛnɩ, bɛnɩ gɛtɛ e tiri ɛ mɛ woyo.

14 Ɛwɔ n di Yahwe, tii Wurubwarɛ,

wɔ dɩpwɛ dii getin gɩyasɩ gɛtʋnkwaa powu gii koro.

15 Ɛɛ kʋna wo Dikola fɔ dii koro gakpaakpa,

wade gɛtɛ ɛ dɔ̀ ɛ tɛ gewo-tama giidu nkpɩn ton-ton fɔ,

16 ɛyɩ n di dikola gɛtɛ ɛ tà ma Abraham fɔ,

ntam gɛtɛ ɛ kan ɛ tɛ Isaki fɔ.

17 Ɛ da ma dii koro ɛ ka ɛ mɛ ose ɛ tɛ Yakobu,

Ɛ dama dii koro ɛ ka ɛ mɛ dikola dɩɩ gɛtà gakpaakpa ɛ tɛ Isareli.

18 Wanyungyebi fɔ n di alan, <<Awɔ gɛ nan ka Kanaan gɛtʋnkwaa n tɛ,

gàà mɛ aa gedikʋn.>>

19 Ɔkʋna gɛtɛ bè we gɛ bɛrɛɛ lɛ fɔ,

Gɛtɛ bɛn sɔ, gɛ bè di gɛ besela gaanɩ fɔ,

20 be silin bè ye gɩfɩɩ nyagɩ gaanɩ fɔ, bɛ da gido gaanɩ,

bè ye bugyu buu gedikʋn gɩkɩ gaanɩ fɔ, bɛ da gido gaanɩ.

21 Ɛn yɛ ɛnɩ ɛkɩ ɛ̀ɛ̀ nyanla bɛ,

Boo koro, ɛ tabʋrʋ ɛ sʋ begyu ɛ sa.

22 Ɩ kara kya mɩɩn bɛnɩ gɛtɛ na sʋrʋ bʋnɔ,

gɛ ɩ kara mɛ mɩɩn bɛtabʋrʋlɛ ade-kpen ɩkɩ.

23 Oo, gɛtʋnkwaa powu gɩɩ bɛnɩ, ɩ nʋma ɩnʋn i sila Yahwe,

Ɩ yasɩ wo getoya gaade fɔ duwi n di duwi.

24 I tiri wo gingyebi i wùlà bɩfɩɩ-bɩfɩɩ

i tiri wade-dɩrɛ ma gɩsaa i wùlà bɛnɩ powu.

25 Yahwe ɛ̀ sɔ, okoro ɛ kʋtʋma gesila-dɩrɛ,

wù di gɛtɛ bàà serenti wɔ da bekpen powu.

26 Yema bɩfɩɩ buu bekpen powu be di gɛ anyan-maralɛ-tuntun,

mɔ Yahwe na mɛ gatala.

27 Gingyebi-dɩrɛ ma gebu-dɩrɛ i silin wɔ i tuma,

Ɔkɛma ma ɔsɛ ɩ yɔn wɔ gɛsarakʋn fɔ gaanɩ.

28 Oo, gɛtʋnkwaa bʋʋ bɩfɩɩ powu, i sila Yahwe,

i sila wo gingyebi ma ɔkɛma,

29 ɩ ka gingyebi gɛtɛ gɩ kʋtʋma ma wo diyere fɔ i sila wɔ.

Ɩ ka gedi gɩɩ gɛtɛ̀ gaanyan ɩ ba wo Dikwo-dɩrɛ fɔ daanɩ,

ɩ sʋma Yahwe gɛtɛ wɔ gɩfɩrɩnfɩrɩn gɩɩ ŋalagɩ gakpa fɔ.

30 Gɛtʋnkwaa gɩɩ bɛnɩ powu, ɩ yɛ koro gàà gbɛrɛ yɩ wɔ bʋnʋn!

Ɩɩn, gɛtʋnkwaa gì sere kriin, gɩɩn taa kpenti.

31 Ɩ yɛ anyan powu gɛtɛ ɩ sa gatala fɔ yàà di ɔsɛ, fɔ gɛtʋnkwaa gàà di ɔsɛ!

Ɩ dɔ̀ bɩfɩɩ alɛ Yahwe n di egyu-dɩrɛ!

32 Ɛpʋ ma anyan gɛtɛ ɩ̀ sa wanɩ powu, ɩ sa bɩta!

Ili ma yaanyan gɛtɛ ɩ̀ sa yaanɩ powu, i di ɔsɛ!

33 Gɩkan gaanɩ gii-iyon yaà nʋma ɩnʋn,

yaà nʋma ɔsɛ wʋʋ-ɩnʋn Yahwe bʋnʋn,

yema Yahwe ɛɛ ba ɛ̀ɛ̀ bɛ dɔ̀ gɛtʋnkwaa gɩɩ bɛnɩ bɔɔ gɔdɔ.

34 Ɩ sa Yahwe onyun, yema ɛ̀ kɔlɔ,

wo gelen gɩ̀ sa gakpaakpa.

35 Ɩ dɔ̀ wɔ alan, <<Oo Wurubwarɛ, tiitolɛ-yalɛ, to tɩ ya!

Kʋla tɩ, fɔ àà tiri tɩ ye bɩfɩɩ bʋʋ gɛnyanla baalɔ yaanɩ,

fɔ tàà ka onyun wʋʋ gɛsa tɩ tɛ aa diyere-fɩrɩnfɩrɩn fɔ,

fɔ wàà yɛ taà sila wɔ̀ kɩntɩn.>>

36 Gesila gì di Yahwe, Isareli wo Wurubwarɛ fɔ woyo!

Gì di gɛ woyo ye ǹdò san gakpaakpa!

Ɛwʋ gɛ bɛnɩ fɔ powu be yera alan, <<Wʋ̀ ba gɛlɛ! I sila Yahwe!>>

37 Ɛwʋ gɛ Dafidi ɛ ka Asafu ma ɛbɛ gɛtɛ bɛ̀ fɩya ma ɛwɔ fɔ ɛ sɩ̀ Yahwe Dikola dɩ Dɩdaka fɔ dɩɩpɩ gɛtɛ bàà tɩ mɛ gʋtʋn ɔya-kamasɛ anlɛ gɛtɛ duwi-kamasɛ dɩɩ dɩsʋma dii wùlà fɔ. 38 Gɛ ɛ nɩ yɛ Obedi-Edom ma bɔɔ wɔlɔn ɛbɛ akpilin asiyee ma nɩyɛ (68) fɔ gɛtɛ bàà kpa bɛ gʋtʋn fɔ gaanɩ. Yedutun wobi Obedi-Edom ma Hosa na mɛ otunu wʋʋ bɛdɩyɛlɛ.

39 Dafidi ɛ ka gedi gɩɩtɛlɛ Sadoki ma wɔwɔlɔn ɛbɛ gedi gɩɩ bɛtɛlɛ fɔ ɛ ma sɩ̀ Yahwe wɔkʋn-fɩrɩnfɩrɩnkʋn, dɩsʋmakʋn gɛtɛ dɩ̀ sa Gibeyon fɔ daanɩ, 40 gɛtɛ bàà tɩ tɛ Yahwe gekuma gii gedi, gekuma gii gedi gɩɩ gɛtɛ̀kʋn fɔ gii koro, ɔya-kamasɛ, gagyɩgyan ma ɔgyɔlɔ, anlɛ gɛtɛ bɛ ŋwara bɛ sa Yahwe wose waanɩ gɛtɛ ɛ ka ɛ tɛ Isareli fɔ. 41 Bɛtɔkɔ bɔɔ gama fɔ e ni tiri Heman, ma Yedutun, fɩya ma ɛbɛ gɛtɛ e tiri, gɛ e kpèlè baayere gɛtɛ bàà tɩ nʋma ɩnʋn be sila Yahwe fɔ, <<yema Wurubwarɛ gelen gɩ̀ sa gakpaakpa.>> 42 Heman ma Yedutun ntɛ nya akantan yɩɩ gɛfʋ̀n, ma akyaka yɩɩ gɛgbɛrɛ, ma anyɩmɩnyan-kurumakyɛɛ yɩɩ gɛtà ma yɩɩ gɛgbɛrɛ bɛ fɩya ma ɩnʋn yɩɩ gɛnʋma. Gɛ Yedutun bebi-teni na mɛ otunu wuu bɛdɩyɛlɛ.

43 Ɛwʋ gɛ bɛnɩ fɔ be ye, gɛ ɛkamasɛ ɛ da wɔlɛ, gɛ Dafidi mɔ ɛ da wɔlɛ ɛ ma hira wɔ dɩkpaara dɩɩ bɛnɩ.