1 Ɩya-ɩya 15

Bɛ ka Dɩdaka fɔ bɛ ba Yerusalem

1 Dafidi e sere akwo ɛ tɛ koro ɔkʋn gɛtɛ bee kpèlè alɛ Dafidi-Ditele, gɛ ɛ pɩna ɔkankɩ ɛ sɩ̀ gɛtɛ Wurubwarɛ Dɩdaka fɔ dàà bɛ dʋrɔ, gɛ e sere Dɩyan dii Dikwo ɛ tɛ dɩ. 2 Ɛwʋ gɛ Dafidi ɛ dɔ̀ alan, <<Lefi bete booko n ba osele gɛtɛ bàà tola Dikola dɩɩ dɩdaka fɔ, yema ɛbɛ gɛ Yahwe e tiri gɛtɛ bàà tola wo Dikola dɩɩ dɩdaka fɔ, fɔ bàà mɛ dɩsʋma dɩɩ gʋtʋn gakpaakpa.>>

3 Ɛwʋ gɛ Dafidi e kpèlè Isareli bete powu e tuma Yerusalem gɛtɛ bàà ka Yahwe Dikola dɩɩ dɩdaka fɔ ba ɔkʋn gɛtɛ ɛ pɩna ɛ sɩ̀ dɩ fɔ. 4 Dafidi e kpèlè Aaron ma Lefi boo-idu yɩɩ bɛnɩ e tuma.

5 Kohati dɩkpaara daanɩ fɔ, e kpèlè

Wuriyeli gɛtɛ è di dɩkpaara dɩɩndɩrɛ fɔ, ma bɛfʋrɩ-bɛfʋrɩ akpilin kooron (120).

6 Merari dɩkpaara daanɩ fɔ, e kpèlè

dɩkpaara dɩɩndɩrɛ Asiya ma bɛfʋrɩ-bɛfʋrɩ gɛkpɩn ma dikpilin (220).

7 Gerison dɩkpaara daanɩ fɔ, e kpèlè

dɩkpaara dɩɩndɩrɛ Yoweli, ma bɛfʋrɩ-bɛfʋrɩ akpilin kooron ma fwo (130).

8 Elisafan dɩkpaara daanɩ fɔ, e kpèlè

dɩkpaara dɩɩndɩrɛ Semaya, ma bɛfʋrɩ-bɛfʋrɩ gɛkpɩn (200).

9 Hebron dɩkpaara daanɩ fɔ, e kpèlè

dɩkpaara dɩɩndɩrɛ Eliyeli, ma bɛfʋrɩ-bɛfʋrɩ akpilin anaa (80).

10 Wusiyeli dɩkpaara daanɩ fɔ, e kpèlè

dɩkpaara dɩɩndɩrɛ Aminadabo, ma bɛfʋrɩ-bɛfʋrɩ akpilin ton ma fwo bɛnyɔɔ (112).

11 Gɛ Dafidi e kpèlè gedi gɩɩ bɛtɛlɛ bɔɔ bɛndɩrɛ Sadoki ma Abiyata, fɩya ma Lefi bete Wuriyeli, ma Asaya, ma Yoweli, ma Semaya, ma Eliyeli, ma Aminadabo e tuma. 12 Gɛ ɛ dɔ̀ bɛ alan, <<Ɛyɩ n di Lefi bete baakpara fɔ yɩɩ bɛndɩrɛ. Wù di gɛtɛ ɛyɩ ma yɩɩ bɛfʋrɩ Lefi bete yàà kpa koro dɩdɩɩ, fɔ yàà ma ka Yahwe, Isareli wo Wurubwarɛ Dikola dɩɩ dɩdaka fɔ ɩ ba ɔkʋn gɛtɛ na pɩna na sɩ̀ dɩ fɔ. 13 Gɛtɛ nka ɛyɩ Lefi bete na tola Dɩdaka fɔ dɩgyangbasɛ fɔ wuu koro gɛ Yahwe e tiira tɩ giten. Tin lila wɔ anlɛ gɛtɛ wù di gɛtɛ taà ka ti tola dɩ.>> 14 Ɛwʋ gɛ gedi gɩɩ bɛtɛlɛ ma Lefi bete fɔ bɛ kpa koro dɩdɩɩ gɛtɛ bàà ma ka Yahwe, Isareli wo Wurubwarɛ Dɩdaka fɔ. 15 Ɛwʋ gɛ Lefi bete fɔ bɛ ma ka Dɩdaka fɔ dii-iyon bɛ gyaga baagongyi yii koro anlɛ gɛtɛ Yahwe ɛ da ma Mose wo koro ɛ dɔ̀ alɛ bàà mɛ fɔ.

16 Gɛ Dafidi ɛ dɔ̀ Lefi bete bɔɔ bɛndɩrɛ fɔ alɛ be tiri bɔɔwɔlɔn ɛbɛ bɛkɩ bàà mɛ ɩnʋn yɩɩ bɛnʋmalɛ gɛtɛ bàà ka adʋlɛ ɛbɛ, ma akyaka bɛ nʋma ɔsɛ wʋʋ-ɩnʋn.

17 Okoro Lefi bete fɔ be tiri Yoweli wobi Heman. Wɔ bɛnɩ baanɩ fɔ, be tiri Berekiya wobi Asafu. Gɛ bɔɔwɔlɔn ɛbɛ Merari bete baanɩ fɔ, be tiri Kusaya wobi Etan. 18 Boonobi ɛbɛ gɛtɛ bɛ̀ gyaga boo koro fɔ n di Sekariya, ma Yaasiyeli, ma Semiramoti, ma Yehiyeli, ma Uni, ma Eliyabi, ma Benaya, ma Maaseya, ma Matitiya, ma Elifelehu, ma Mikineya, fɩya ma Obedi-Edom, ma Yayeli gɛtɛ bè di otunu wʋʋ bɛnyalɛ fɔ.

19 Ɩnʋn yɩɩ bɛnʋmalɛ Heman, ma Asafu, ma Etan n tɛ gbɛrɛ gɩwɔrɔnyan-sɩya gaakyaka fɔ. 20 Sekariya, ma Asiyeli, ma Semiramoti, ma Yehiyeli, ma Wuni, ma Eliyabi, ma Maaseya, ma Beneya n tɛ tà adʋlɛ ɛbɛ gɛtɛ bɛ̀ ba bɩta-pɩɩ fɔ. 21 Matitiya, ma Elifelehu, ma Mikineya, ma Obedi-Edom, ma Yeyeli, ma Asasiya na tà adʋlɛ ɛbɛ gɛtɛ bɛ̀ ba bɩta-dɩrɛ fɔ. 22 Lefi bete bɔɔndɩrɛ Kenaniya yema gɛtɛ ɛ̀ nyɩ̀ ɩnʋn yɩɩ gɛnʋma gaade yaanɩ okoro, bɛ sɩ̀ wɔ ɩnʋn yɩɩ bɛnʋmalɛ bɔɔndɩrɛ.

23 Berekiya ma Elikana na mɛ Dɩdaka fɔ diitunu wʋʋ bɛnyalɛ. 24 Gedi gɩɩ bɛtɛlɛ Sebaniya, ma Yosafati, ma Netaneli, ma Amasayi, ma Sekariya, ma Benaya, ma Eliyeseri na mɛ bɛnɩ gɛtɛ bɛ fʋ̀n akantan Wurubwarɛ Dɩdaka fɔ dɩɩ bʋnʋn. Obedi-Edom ma Yehiya mɔ ke na mɛ Dɩdaka fɔ diitunu wʋʋ bɛnyalɛ.

25 Ɛwʋ gɛ Dafidi ma Isareli bɛndɩrɛ ma bɩtà bʋʋ bɛndɩrɛ gɛtɛ bɛɛ nya bɩtà bʋʋ bɛtàlɛ nkpɩn ton-ton boo koro fɔ bɛ san bɛ ma ka Yahwe Dikola dɩɩ dɩdaka fɔ be ye Obedi-Edom dɩkpaara ɔsɛ waanɩ bɛ ba. 26 Gɛtɛ Wurubwarɛ ɛ kpà Lefi bete fɔ gɛ be tola Yahwe Dikola dɩɩ dɩdaka fɔ okoro, bɛ ka bɛkwɔ-teni kwarankɩ, ma ayaran-gbʋgbʋ kwarankɩ bɛ tɛ Yahwe gedi. 27 Gɛ Dafidi ɛ sa gɛgba-serelɛ-fututu anlɛ gɛtɛ Lefi bete gɛtɛ bè tola Dɩdaka fɔ, ma ɩnʋn yɩɩ bɛnʋmalɛ fɔ, ma Kenaniya gɛtɛ è di ɩnʋn yɩɩ bɛnʋmalɛ bɔɔndɩrɛ fɔ ɛ̀ sa fɔ. Dafidi ɛ sa gɛgba gɛtɛ gii tin diboro fɔ ɛ gyaga. 28 Okoro Isareli bete powu bɛ ka Yahwe Dikola dɩɩ dɩdaka fɔ bɛ ba ma afala yɩɩ gɛgbɛrɛ, ma Bɛyɛran baayela yɩɩ gɛfʋ̀n, ma akantan yɩɩ gɛfʋ̀n, ma akyaka yɩɩ gɛgbɛrɛ, ma adʋlɛ ɛbɛ kperen-kperen bɔɔ gɛtà.

29 Gɛtɛ Yahwe Dɩdaka fɔ dii gyu ɔkʋn gɛtɛ bee kpèlè alɛ Dafidi-Ditele fɔ, Sawulo wobi-nanɩ ɛ nya ma nfansɩrɩ, gɛ e we anlɛ gɛtɛ egyu Dafidi ee lèn gɛ ee di ɔsɛ fɔ, ɛ gbɛ̀ɛ̀ Dafidi woturu waanɩ.