1 Ɩya-ɩya 11

Dafidi e di bugyu Isareli

1 Ɛwʋ gɛ Isareli bete powu bɛ ma tuma Dafidi wakʋn, Hebron ditele daanɩ, gɛ bɛ dɔ̀ wɔ alan, <<Ɛtɩ ma awɔ tì di gɛ nkalan-kɩlɩn. 2 Ɔya wʋkɩ wʋ bɛ da gɛtɛ ma gɛtɛ Sawulo n di egyu fɔ, awɔ n tɛ tɩ̀ ka Isareli a san bɩtà a ba. Gɛ Yahwe, aa Wurubwarɛ ɛ dɔ̀ wɔ̀ alan, <<Awɔ nan nya mɩɩn bɛnɩ Isareli bete boo koro, gɛ awɔ nan mɛ boogyu.> >>

3 Gɛtɛ Isareli bɛndɩrɛbi bɛ san Egyu-dɩrɛ Dafidi wakʋn Hebron ditele daanɩ fɔ, Dafidi ɛ tà dikola ma ɛbɛ Hebron dʋkɔ, Yahwe bʋnʋn baanɩ. Wʋʋ gama fɔ, bɛ sʋrʋ Dafidi bʋnɔ bɛ sɩ̀ wɔ bugyu, anlɛ gɛtɛ Yahwe ɛ fʋrʋma ɛ da ma Samuweli wo koro ɛ dɔ̀ ɛ sɩ̀ fɔ.

Dafidi e di Yerusalem bete boo koro

4 Wʋʋ gama fɔ, Dafidi ma Isareli bete powu bɛ tɔ bɛ ma tà Yerusalem gɛtɛ bè biri bee kpèlè alɛ Yebusi fɔ bɩtà. Waanɩ fɔ, Yebusi bete na sara dʋkɔ. 5 Yebusi bete bɛ dɔ̀ Dafidi alan, <<À nan talɩ a gyu nfan.>> Mɔ Dafidi e gye Siyon gɛtɛ be sere ɔpɔrɩ be silin, gɛ bè biri bee kpèlè alɛ Dafidi-Ditele fɔ bɩtà.

6 Gɛ Dafidi ɛ dɔ̀ alan, <<Ɛnɩ-kamasɛ gɛtɛ eè gyegeye ɛ ma tà Yebusi bete bɩtà èè di boo koro fɔ, ɛɛ̀ mɛ bɩtà bʋndɩrɛ.>> Ɛwʋ gɛ Seruya wobi Yowabi e gyegeye ɛ san. Okoro bɛ sɩ̀ wɔ bɩtà bʋʋndɩrɛ.

7 Ɛwʋ gɛ Dafidi ɛ ma sara ɔkʋn gɛtɛ bɛ mara ɔpɔrɩ bɛ sʋ fɔ. Okoro gɛ bɛ yɛ bee kpèlè dʋkɔ alɛ Dafidi-Ditele fɔ. 8 Ɛ pɩna e sere ditele fɔ, ye kpata anɩ ka ma ye ɔpɔrɩ gɛtɛ wu silin di fɔ, gɛ Yowabi ɛ pɩna ditele fɔ dɩɩkʋn-kʋrʋmakyɛɛ. 9 Gɛ Dafidi ɛ̀ bɔ ee wura ɔkɛma ɛ fɩya, yema Yahwe, Ɔkɛma powu Wuute fɔ ɛ̀ fɩya ma ɛwɔ.

Dafidi bɩtà bʋʋ bɛtàlɛ ma ɔkɛma fɔ

10 Dafidi bɩtà bʋʋ bɛtàlɛ gbaa-gbaa bɔɔ bɛndɩrɛ gɛtɛ ɛbɛ ma Isareli bete powu na kpà, gɛ bugyu fɔ bu yela ɔkɛma waanɩ anlɛ gɛtɛ Yahwe ɛ dɔ̀ fɔ, baayere n tɛ ba lɛ. 11 Dafidi bɩtà bʋʋ bɛtàlɛ gɛtɛ bɛ̀ ba ɔkɛma fɔ baayere n di Yasobeyam gɛtɛ e ye Hakimon wodu waanɩ fɔ na mɛ ɛndɩrɛ ɛ tɛ bɩtà bʋʋ bɛtàlɛ bɔɔ bɛndɩrɛ besiyee fɔ. Ɛwɔ na ka wɔ gɩsɩnta e wolo bɛnɩ gɛkpɩn ma akpilin ton (300) akpa yii getuma-kɩlɩn gaanɩ fɔ.

12 Bɩtà bʋʋ bɛtàlɛ gbaa-gbaa besiyee fɔ baanɩ ɛnyɔɔfɛ n di Eleyasa, gɛtɛ è di Ahoti-te Dodayi wobi-teni fɔ. 13 E yela Dafidi gama ɛ kpà ma Filisiti bete ɔkʋn gɛtɛ bee kpèlè alɛ Pasi-Damim fɔ. Fɔ ɛ̀ sa oli wʋkɩ gɛtɛ amɔrɔ ì yela waanɩ gepepe, ɔkʋna gɛtɛ Isareli bɩtà bʋʋ bɛtàlɛ akpi-akpi be serenti be ye Filisiti bete bɔɔ bʋnʋn fɔ. 14 Mɔ Eleyasa ma wɔ bɩtà bʋʋ bɛtàlɛ bɛ ma to oli fɔ wuu getite be yela. Bɛ kpà be to oli fɔ, gɛ be wolo Filisiti bete fɔ. Gɛ Yahwe ɛ yɛ bɛ be di akpa fɔ yii koro gepepe. 15 Duwi dɩkɩ, bɩtà bʋʋ bɛtàlɛ bɔɔ bɔndɩrɛ dikpilin ma fwo fɔ baanɩ besiyee bɛ san Dafidi wakʋn Adulam dɩtaa-fwe fɔ daanɩ. Ɔkʋna wʋtɔkɔ ke fɔ, Filisiti bete bɔɔ bɩtà buu dikpi fɔ dɩ̀ sa Refayim dɩtagba daanɩ. 16 Ɔya wʋtɔkɔ waanɩ fɔ, Dafidi ɛ̀ sa ɔkʋn gɛtɛ ekengbelilɛ ɛkɩ ɛn talɩ e gyu, gɛ Filisiti bɩtà bʋʋ bɛtàlɛ bɛ ma sere gɛsarakʋn Betelehem ditele daanɩ. 17 Butu bʋ gbɛrɛ Dafidi ɔmɩrɩ, gɛ ɛ dɔ̀ alan, <<Oo, mɩn nan wura ɛkɩ ɛ̀ɛ̀ ma kpà ditiribun gɛtɛ dɩ̀ gbɛma Betelehem wotunu fɔ dii butu ɛ mɔma mɩ? 18 Ɛwʋ gɛ bɩtà bʋʋ bɛtàlɛ gbaa-gbaa besiyee fɔ bɛ tɩtɩrɩ be gyu ma Filisiti bete fɔ baanɩ, gɛ bɛ ma kpà butu fɔ be ye ditiribun gɛtɛ dɩ̀ gbɛma Betelehem wotunu dii butu bɛ mɔma Dafidi. Mɔ Dafidi e terema bʋʋ gɛnyʋn. Gɛ ɛ daa bʋ e lù gɛtʋnkwaa Yahwe bʋnʋn. 19 Gɛ Dafidi ɛ dɔ̀ alan, <<Wurubwarɛ ɛ ka ɛ san ɔfɔ gɛtɛ nan nyʋn butu nyabu! Wʋ̀ bɔ wù we gɛ anlɛ gɛtɛ ntɛ nyʋn beteni nyabɛ gɛtɛ be yera diku lɛ bɔɔ nkalan?>> Yema be yera diku bɛ ma kpà butu bɛ ba. Okoro gɛ e terema bʋʋ gɛnyʋn fɔ.

Ade-dɩrɛ anlɛ gɛ bɩtà bʋʋ bɛtàlɛ gbaa-gbaa fɔ bɛ mɛ. 20 Fɔ Yowabi wɔdɩrɛ Abisayi n di bɩtà bʋʋ bɛtàlɛ besiyee fɔ bɔɔndɩrɛ. Ɛ ka gɩsɩnta ɛ kpà ma bɛnɩ gɛkpɩn ma akpilin ton (300), gɛ e wolo bɛ. Okoro ɛwɔ mɔ e be di diyere anlɛ bɩtà bʋʋ bɛtàlɛ besiyee fɔ. 21 Bɩtà bʋʋ bɛtàlɛ besiyee fɔ baanɩ fɔ ɛwɔ na di diyere na da bekurumakyɛɛ, okoro ma gɛtɛ ɛn fɩya baanɩ gba fɔ, ɛ bɛ mɛ bɔɔndɩrɛ.

22 Yehoyada wobi-teni Benaya ɛ mɛ bɩtà bʋʋtàlɛ-dɩrɛ ɛ nya. E ye gɛ Kabiseeli, gɛ ɛ mɛ dɩkpatɩ daade. E wolo Mowabi bɩtà bʋʋ bɛtàlɛ-dɩrɛ bɛnyɔɔ. Gɛlɛ ke gɛ duwi dɩkɩ gɛtɛ akpenkperebi-dɩrɛ-dɩrɛ ɩ nʋ̀n gɛtɛ wʋn ma ɔkpɛɛran fɔ, ɛ waran ɛ san difwe daanɩ ɛ ma wolo ɛdɩrɛ. 23 Gɛ e ni wolo Egyipiti-te ɛkɩ gɛtɛ wabo yaà mɛ anlɛ meta bɛnyɔɔ ma ɔfan. Ma gɛtɛ Egyipiti-te fɔ è de gɩsɩnta-dɩrɛ gba fɔ, Benaya ɛ ka digoli ɛ tàmà wɔ, gɛ ɛ labɩrɩ gɩsɩnta fɔ e ye Egyipiti-te fɔ gʋlɔ gaanɩ, gɛ e birima Egyipiti-te fɔ gbagba gɩsɩnta-dɩrɛ fɔ e wolo wɔ. 24 Ade-dɩrɛ gɛtɛ Yehoyada wobi Benaya ɛ mɛ fɔ ɩ lɛ. Ɛwɔ mɔ ke e di diyere anlɛ bɩtà bʋʋ bɛtàlɛ gbaa-gbaa besiyee fɔ. 25 Bɛnɩ dikpilin ma fwo fɔ powu baanɩ fɔ, ɛwɔ gɛ bee bù gepepe, mɔ ɛn fɩya besiyee fɔ baanɩ. Gɛ Dafidi ɛ ka wɔ ɛ mɛ bɛdɩyɛlɛ fɔ bɔɔndɩrɛ.

26 Bɩtà bʋʋ bɛtàlɛ gbaa-gbaa-do n di

Asaheli gɛtɛ è di Yowabi wonobi fɔ,

ma Elihanan gɛtɛ è di Dodo gɛtɛ e ye Betelehem fɔ wobi,

27 ma Harori-te Samoti,

ma Pelon-te Helesi,

28 ma Ikesi gɛtɛ e ye Tekowa fɔ wobi Ira,

ma Abiyese gɛtɛ e ye Anatoti fɔ,

29 ma Hasati-te Sibekayi,

ma Ahohi-te Ilayi,

30 ma Netofati-te Maharayi

ma Netofati-te Baana wobi Heledi,

31 ma Ribayi gɛtɛ e ye Gebeya, Benyamin wofoli waanɩ fɔ wobi Itayi,

ma Piraton-te Benaya,

32 ma Hurayi gɛtɛ e ye Gaasi fɔ,

ma Aribati-te Abiyeli,

33 ma Baharum-te Asimafeti,

ma Salibon-te Eliyahiba,

34 ma Gosen-te Hasem bebi-teni,

ma Harari-te Sagee wobi Yonatan,

35 ma Sakari gɛtɛ e ye Harari fɔ wobi Ahiyam,

ma Elifali, gɛtɛ wote n di Uri fɔ,

36 ma Heferi gɛtɛ e ye Mekerati fɔ,

ma Ahiya gɛtɛ e ye Pelon fɔ,

37 ma Hesiron gɛtɛ e ye Karimeli fɔ,

ma Narayi, gɛtɛ è di Esibayi wobi fɔ,

38 ma Natan wonobi Yoweli,

ma Hagiri wobi Mibihari

39 ma Amon-te Seleki,

ma Beroti-te Naharayi, gɛtɛ ɛ mɛ Suriya wobi Yowabi wɔ gɩwɔrɔnya-dɩyɛlɛ koro giitolalɛ fɔ,

40 ma Itiri-te Ira,

ma Itiri-te Gerebi,

41 ma Hiti-te Uriya,

ma Ahilayi wobi Sabedi,

42 ma Adina gɛtɛ è di Ruben-te Sisa wobi fɔ. Gɛ ɛwɔ na mɛ Ruben bete bɔɔndɩrɛ, gɛ bɛnɩ dikpilin ma fwo fɔ bɛ̀ fɩya ma ɛwɔ fɔ,

43 ma Maaka wobi Hanan,

ma Mitini-te Yosafati,

44 ma Asiterati-te Usiya,

ma Arori-te Hotam bebi Sama ma Yeyeli,

45 ma Tisi-te Simiri bebi Yediyayeli,

ma wonobi Yoha,

46 ma Mahafi-te Eliyeli,

ma Elinaam bebi Yeribayi ma Yosafiya,

47 ma Eliyeli, ma Obedi, ma Mesobayi-te Yaasiyeli.