1 Ɩya-ɩya 27

Bɩtà bʋʋ bɛtàlɛ boo geyo

1 Bɛnɩ gɛtɛ bɛ sara bɩtà bʋʋ bɛtàlɛ baanɩ bɛ sʋma Dafidi, gɛtɛ bè di akpaara yɩɩ bɛndɩrɛ, ma bɩtà bʋʋ bɛndɩrɛ gɛtɛ bɛɛ nya bɛnɩ nkpɩn ton-ton boo koro, ma ɛbɛ gɛtɛ bɛɛ nya bɛnɩ akpilin ton-ton boo koro, ma gʋtʋn gii beyolɛ fɔ baayere n tɛ ba lɛ. Gɩkyan-kamasɛ, bɛnɩ bɛɛ bɛ̀ sara ebon-ebon bɛ mɛ bɔɔ gʋtʋn. Dikpi-kamasɛ dɩ̀ ba bɛnɩ disepekyi ma ɩgbaa ɩnyɔɔ (24,000).

2 Sabidiyeli wobi Yasobeyam na mɛ dikpi-gyangbasɛ diigyegeyelɛ ɛ tɛ ebon-gyangbasɛ. Beteni disepekyi ma ɩgbaa ɩnyɔɔ (24,000) na sara wɔ gatɩn. 3 E ye gɛ Peresi wodu waanɩ, gɛ ɛ mɛ ebon-gyangbasɛ bɩtà bʋʋ bɛtàlɛ powu bɔɔndɩrɛ.

4 Ahohi-te Dodayi na mɛ ebon-nyɔɔfɛ dikpi dɩɩndɩrɛ, gɛ wɔmalɛ n di Makiloti. Beteni disepekyi ma ɩgbaa ɩnyɔɔ (24,000) na sara wɔ gatɩn.

5 Bɩtà bʋʋndɩrɛ-siyeefɛ tɛ ebon-siyeefɛ fɔ n di gedi gɩɩtɛlɛ Yehoyada wobi Benaya. Ɛwɔ na mɛ egyegeyelɛ, gɛ beteni disepekyi ma ɩgbaa ɩnyɔɔ (24,000) na sara wɔ gatɩn. 6 Gɛlɛ gɩɩ Benaya nyawɔ na mɛ bɩtà bʋʋtàlɛ-dɩrɛ gɛtɛ ɛ fɩya ma bɛnɩ dikpilin ma fwo fɔ, gɛ ɛ mɛ bɔɔndɩrɛ fɔ. Wobi Amisabadi na nya wo dikpi fɔ dii koro.

7 Bɩtà bʋʋndɩrɛ-naafɛ tɛ ebon-naafɛ fɔ n di Yowabi wonobi Asaheli. Wobi Sabadiya na sere wɔ gɩsɩrɩ. Beteni disepekyi ma ɩgbaa ɩnyɔɔ (24,000) na sara wɔ gatɩn.

8 Bɩtà bʋʋndɩrɛ-tonfɛ tɛ ebon-tonfɛ fɔ n di bɩtà bʋʋndɩrɛ Samihuti gɛtɛ è di Isahari-te fɔ. Bɛnɩ disepekyi ma ɩgbaa ɩnyɔɔ (24,000) na sara wɔ gatɩn.

9 Bɩtà bʋʋndɩrɛ-kooronfɛ tɛ ebon-kooronfɛ n di Tekowa-te Ikesi wobi Ira. Beteni disepekyi ma ɩgbaa ɩnyɔɔ (24,000) na sara wɔ gatɩn.

10 Bɩtà bʋʋndɩrɛ-kwarankɩfɛ tɛ ebon-kwarankɩfɛ fɔ n di Pelon-te Helesi, gɛtɛ e ye Efrayim wodu waanɩ fɔ. Beteni disepekyi ma ɩgbaa ɩnyɔɔ (24,000) na sara wɔ gatɩn.

11 Sibekayi gɛtɛ e ye Husati, gɛ è di Sera wodu wʋʋnɩ fɔ na mɛ dikpi-nɩyɛfɛ dɩɩndɩrɛ tɛ ebon-nɩyɛfɛ. Bɛnɩ disepekyi ma ɩgbaa ɩnyɔɔ (24,000) na sara wɔ gatɩn.

12 Benyamin-te Abiyese gɛtɛ e ye Anatoti fɔ na mɛ dikpi-yɛkɩfɛ dɩɩndɩrɛ tɛ ebon-yɛkɩfɛ. Beteni disepekyi ma ɩgbaa ɩnyɔɔ (24,000) na sara wɔ gatɩn.

13 Maharayi gɛtɛ e ye Netofati, gɛ è di Sera wodu wʋʋnɩ fɔ na mɛ dikpi-fwofɛ dɩɩndɩrɛ tɛ ebon-fwofɛ. Beteni disepekyi ma ɩgbaa ɩnyɔɔ (24,000) na sara wɔ gatɩn.

14 Benaya gɛtɛ e ye Piraton, gɛtɛ wʋ̀ sa Efrayim wofoli wʋʋ gɛtʋnkwaa gaanɩ fɔ na mɛ dikpi-fwo-dɩkɩfɛ dɩɩndɩrɛ tɛ ebon-fwo-ɛkɩfɛ. Beteni disepekyi ma ɩgbaa ɩnyɔɔ (24,000) na sara wɔ gatɩn.

15 Helidayi gɛtɛ e ye Netofati ditele, gɛ e ye gɛ Otiniyeli dɩkpaara daanɩ fɔ na mɛ dikpi-fwo-dɩnyɔɔfɛ dɩɩndɩrɛ tɛ ebon-fwo-ɛnyɔɔfɛ. Beteni disepekyi ma ɩgbaa ɩnyɔɔ (24,000) na sara wɔ gatɩn.

Ifoli fɔ yii begyegeyelɛ

16 Isareli wo-ifoli fɔ yii begyegeyelɛ baayere n tɛ ba lɛ.

Ruben bɛnɩ boogyegeyelɛ n di Sikiri wobi Eliyese.

Simeyon bɛnɩ boogyegeyelɛ n di Maaka wobi Sefatiya.

17 Lefi bɛnɩ boogyegeyelɛ n di Kemuweli wobi Hasabiya.

Aaron bɛnɩ boogyegeyelɛ n di Sadoki.

18 Yuda bɛnɩ boogyegeyelɛ n di Elihu gɛtɛ è di Dafidi wɔdɩrɛ ɛbɛ baanɩ ɛkɩ fɔ.

Isaka bɛnɩ boogyegeyelɛ n di Mikayeli wobi Omiri.

19 Sebulun bɛnɩ boogyegeyelɛ n di Obediya wobi Isimaya. Nafitali bɛnɩ boogyegeyelɛ n di Asiriyeli wobi Yerimoti.

20 Efrayim bɛnɩ boogyegeyelɛ n di Asasiya wobi Hoseya.

Manase wofoli-fan fɔ wʋʋ bɛnɩ boogyegeyelɛ n di Pedaya wobi Yoweli.

21 Manase wofoli-fan gɛtɛ wʋ̀ sa Gileyadi fɔ wʋʋndɩrɛ n di Sekariya wobi Ido.

Benyamin bɛnɩ boogyegeyelɛ n di Abineri wobi Yaasiyeli.

22 Dan bɛnɩ boogyegeyelɛ n di Yeroham wobi Asareli.

Isareli wo-ifoli fɔ yɩɩ bɛndɩrɛ bɛ lɛ.

23 Egyu Dafidi ɛn kalan beteni gɛtɛ bɛ̀ ba bɩkyan dikpilin (20) abɛɛ bɩkyan dikpilin bʋʋ gatɩn fɔ fɩya, yema Yahwe ɛ dɔ̀ ɛ sɩ̀ gɛtɛ ɛɛ̀ yɛ Isareli bete bàà sɔ anlɛ aŋorobi. 24 Seruya wobi Yowabi na kya bɛnɩ fɔ bɔɔ gɛkalan, mɔ ɛn talɩ werema. Wurubwarɛ wowurufa wʋ ba Isareli wo koro, bɛnɩ bɔɔ gɛkalan fɔ gii koro. Okoro bɛn ŋwara bɛnɩ fɔ baasɔ sa egyu Dafidi wo koro gaade yɩɩ gɩkpa fɔ gaanɩ.

Egyu-dɩrɛ gʋtʋn gɩɩ bɛmɛlɛ gɩɩ bɛndɩrɛ

25 Adiyeli wobi Asimafeti na mɛ ɛndɩrɛ ɛ tɛ egyu-dɩrɛ wanyan yɩɩ gɛsɩ̀kʋn gaakwo fɔ.

Gɛ Usiya wobi Yonatan na mɛ ɛndɩrɛ ɛ tɛ anyan yɩɩ gɛsɩ̀kʋn gɛtɛ ɩ̀ sa ɩlanlanbi, ma atele-dɩrɛ, ma atelebi, ma ayela-dɩyɛkʋn yaanɩ fɔ. 26 Kelubi wobi Esiri na mɛ ɛndɩrɛ ɛ tɛ bɛfʋnlɛ gɛtɛ bɛ fʋn ili gɛtʋnkwaa fɔ gaanɩ fɔ.

27 Ramati-te Simeyi na mɛ ɛndɩrɛ ɛ tɛ wayɩn wo-ili.

Sifim-te Sabidi na mɛ ɛndɩrɛ ɛ tɛ wayɩn wabi gɛtɛ bɛ yà fɔ, ma wayɩn fɔ bʋkan bʋʋ gɛsɩ̀kʋn.

28 Gederi-te Baal-Hanan na mɛ ɛndɩrɛ ɛ tɛ olifwi ma sikamo yii-iyon gɛtɛ ɩ̀ sa odon wʋʋ bɩsɩrɩ wuufila wʋʋ gɛnʋ̀nkʋn gɩɩ gɩlan fɔ.

Yowasi na mɛ ɛndɩrɛ ɛ tɛ olifwi bʋnɔ bʋʋ gɛsɩ̀kʋn.

29 Sitirayi gɛtɛ e ye Saron fɔ na mɛ ɛndɩrɛ ɛ tɛ bɛkwɔ gɛtɛ bɛ sara Saron fɔ bɔɔ gɛnya.

Adilayi wobi Safati na mɛ ɛndɩrɛ ɛ tɛ bɛkwɔ gɛtɛ bɛ sara atagba yaanɩ fɔ bɔɔ gɛnya.

30 Obili gɛtɛ e ye Isimayeli wodu waanɩ fɔ na mɛ ɛndɩrɛ ɛ tɛ akpɔŋɔ yɩɩ gɛnya.

Yehideya gɛtɛ e ye Meronoti fɔ na mɛ ɛndɩrɛ tɛ akpɔŋɔ-tɩtɩɩ yɩɩ gɛnya.

31 Yasisi gɛtɛ e ye Hagri wodu waanɩ fɔ na mɛ ɛndɩrɛ ɛ tɛ bɛyɛran ma begbebi bɔɔ gɛnya.

Bɛnɩ nyabɛ powu bè di gɛ egyu-dɩrɛ Dafidi gbagba wanyan yɩɩ bɛnyalɛ bɔɔ bɛndɩrɛ.

32 Fɔ Dafidi woteti Yonatan è di amɩnlɛ yɩɩtɛlɛ, ma ɛsɛyɩlɛ, ma gɩkpa gɩɩnyɩnlalɛ. Yehiyeli na wùlà egyu-dɩrɛ bebi ade.

33 Ahitofeli è di egyu-dɩrɛ wamɩnlɛ yɩɩtɛlɛ.

Husayi gɛtɛ e ye Ariki wodu waanɩ fɔ na mɛ egyu-dɩrɛ wɔwɔlɔn-kanlɛ.

34 Ahitofeli diku dɩɩ gama fɔ, Benaya wobi Yehoyada, ma Abiyata na bɛ mɛ egyu-dɩrɛ wamɩnlɛ yɩɩ bɛtɛlɛ.

Gɛ Yowabi ɛ mɛ egyu bɩtà bʋʋ bɛtàlɛ bɔɔndɩrɛ.