1 Gɛtɛ Dafidi ɛ dan ditenikwaa fɔ, ɛ sɩ̀ wobi Solomon bugyu ɛ tɛ Isareli.

2 Gɛlɛ ke gɛ e kpèlè Isareli bɛndɩrɛ, fɩya ma gedi gɩɩ bɛtɛlɛ ma Lefi bete e tuma. 3 Bɛ kalan Lefi bete gɛtɛ be di bɩkyan dikpilin ma fwo ka bʋn fɔ, ɛbɛ powu bɛ̀ ba beteni disepekyi ma ɩgbaa yɛkɩ (38,000). 4 Ɛwʋ gɛ Dafidi ɛ dɔ̀ alan, <<Baanɩ disepekyi ma ɩgbaa ɩnyɔɔ (24,000) baà nya Yahwe Dikwo fɔ dɩɩ gʋtʋn gii koro, gɛ ɩgbaa isiyee (6,000) baà mɛ bɛndɩrɛbi ma gɔdɔ gɩɩ bɛdɔ̀lɛ. 5 Bɛnɩ ɩgbaa ɩnyɔɔ (4,000) baà mɛ otunu wʋʋ bɛnyalɛ, gɛ ɩgbaa ɩnyɔɔ (4,000) baà mɛ bɛnɩ gɛtɛ baà ka ɩnʋn yɩɩ gɛnʋma gaanyan gɛtɛ na len na sɩ̀ tɛ dɩsʋma fɔ be sila Wurubwarɛ.

6 Gɛ Dafidi e yo Lefi bete fɔ akpen asiyee gɛtɛ ì yela tɛ Lefi bebi-teni besiyee fɔ. Ɛbɛ n di Gerison, ma Kohati, ma Merari.

7 Gerison wodu wʋʋ bɛnɩ n di

Ladan ma Simeyi.

8 Ladan bebi-teni n di,

Yehiyeli gɛtɛ è di ebi ɛndɩrɛ fɔ, ma Setam, ma Yoweli. Ɛbɛ powu bɛ̀ ba bɛnɩ besiyee.

9 Simeyi bebi-teni n di

Selomoti, ma Hasiyeli, ma Haran. Ɛbɛ powu bɛ̀ ba besiyee. Ɛbɛ nyabɛ n di Ladan wakpaara-akpaara fɔ yɩɩ bɛndɩrɛ.

10 Gɛ Simeyi bebi-teni n di

Yahati, ma Sisa, ma Yewusi, ma Beriya.

Ɛbɛ nyabɛ n di Simeyi bebi-teni fɔ. Ɛbɛ powu bɛ̀ ba bɛnaa.

11 Yahati n di ebi ɛndɩrɛ, gɛ Sisa n di ɛnyɔɔfɛ. Mɔ Yewusi ma Beriya ben wo bebi-teni gʋsɔ, okoro bɛ kalan bɛ gɛ dɩkpaara-kɩlɩn, gɛ be bom bɛ bɛ tɛ gɛ gʋtʋn-kɩlɩn.

12 Kohati bebi-teni n di

Amiram, ma Isahari, ma Hebron, ma Wusiyeli. Ɛbɛ powu bɛ̀ ba bɛnaa.

13 Amiram bebi-teni n di,

Aaron ma Mose.

Be tiri Aaron ma wodu wʋʋ bɛnɩ bɛ sɩ̀ gɛtɛ bàà tɩ̀ mɛ anyan fɩrɩnfɩrɩn fɔ fɩrɩnfɩrɩn, bàà tɩ̀ tɛ gedi Yahwe bʋnʋn, bàà mɛ gʋtʋn wɔ bʋnʋn, fɔ bàà tɩ hira bɛnɩ Yahwe diyere daanɩ gakpaakpa. 14 Bɛ kalan Wurubwarɛ wɔnɩ Mose bebi-teni bɛ sa Lefi wofoli waanɩ.

15 Mose bebi-teni n di

Gerisom, ma Eliyeseri.

16 Gerisom wodu waanɩ fɔ,

Subayeli n di ɛndɩrɛ.

17 Eliyeseri wodu wʋʋ bɛnɩ n di,

Rahabiya gɛtɛ è di ebi ɛndɩrɛ fɔ.

Eliyeseri en mini wo bebi-teni fɩya. Mɔ Rehabiya e wo bebi kpekpesi.

18 Isahari bebi-teni n di

Selomiti gɛtɛ è di ɛndɩrɛ fɔ.

19 Hebron bebi-teni n di,

Yeriya gɛtɛ è di ɛndɩrɛ, wobe-nyɔɔfɛ n di Amariya, esiyeefɛ n di Yahasiyeli, gɛ ɛnaafɛ n di Yekameyam.

20 Wusiyeli wodu wʋʋ bɛnɩ n di,

Mika gɛtɛ è di ɛndɩrɛ fɔ, ma ɛnyɔɔfɛ Isihiya.

21 Merari bebi-teni n di,

Mahili, ma Musi.

Mahili bebi-teni n di,

Eleyasa, ma Kisi.

22 Eleyasa e ku gɛtɛ en wo bebi-teni. Bebi-nanɩ booko-booko gɛ e wo. Bɔɔdɩrɛ ɛbɛ gɛtɛ be di Kisi bebi-teni fɔ na to bɛ gɩna.

23 Musi bebi-teni n di

Mahili, ma Ederi, ma Yerimoti. Ɛbɛ nyabɛ powu bɛ̀ ba besiyee.

24 Lefi bete boo-idu yaakpaara-akpaara fɔ yɩɩ bɛnɩ ma akpaara fɔ yɩɩ bɛndɩrɛ bɛ lɛ. Bɛ ŋwara ɛkamasɛ diyere, ma boo-idu yɩɩ bɛnɩ gɛtɛ be di bɩkyan dikpilin abɛɛ dilpilin ka bʋn gɛtɛ bɛ mɛ gʋtʋn Yahwe Dikwo-dɩrɛ daanɩ fɔ baayere. 25 Yema Dafidi ɛ dɔ̀ alan, <<Gɛtɛ Yahwe, Isareli wo Wurubwarɛ ɛ yɛ wɔ bɛnɩ be wura olila, gɛ ɛ bɛ sara Yerusalem gakpaakpa lɛ fɔ, 26 wun mini hiya gɛtɛ Lefi bete fɔ bàà ni tola Getuma gii Dikwo fɔ ma daanyɩmɩnyan gɛtɛ bè de bɛɛ mɛ dɩsʋma daade fɔ be silin.>> 27 Dafidi wade-wùlàlɛ-kurumakyɛɛ gɛtɛ ɛ dɔ̀ yaanɩ fɔ, bɛ kalan Lefi bete gɛtɛ be di bɩkyan dikpilin ka bʋn.

28 Lefi bete fɔ bɔɔ gʋtʋn n di gɛtɛ bàà tɩ kpà Aaron wodu wʋʋ bɛnɩ Yahwe Dikwo fɔ dɩɩ gʋtʋn gaade yaanɩ. Baà nya akpaara fɔ ma ikere-ikere yaakwo fɔ yii koro, bàà nya Wurubwarɛ wanyan fɔ yɩɩ gɩfɩrɩnfɩrɩn gii koro, fɔ bàà mɛ bʋtʋn kperen-kperen Wurubwarɛ dɩkpaara fɔ daanɩ. 29 Gɛlɛ ke gɛ bɛɛ nya boroboro gɛtɛ bɛɛ ka bɛ tɛ gedi fɔ, ma ɔnʋmʋ gɛtɛ bɛɛ ka bɛ tɛ anyan yaabi yii gedi fɔ, ma Bisiketi gɛtɛ bɛn sa gɩfa-ŋanlɛ, ma gekuma ma gesugba gaanyan, ma anyan kɛrɛlɛ powu yii koro. 30 Gɛlɛ ke gɛ bɛɛ tɔ be yela gagyɩgyan ma ɔgyɔlɔ-kamasɛ bɛ sa Yahwe onyun, fɔ be sila wɔ. 31 Gɛlɛ ke gɛ bɛɛ mɛ ɔya-kamasɛ gɛtɛ bɛnɩ bɛ̀ ka gekuma gii gedi bɛ bɛ tɛ Yahwe ditunawi daanɩ, abɛɛ bebon-fon bɔɔ-ɩsɛ wù gedi yaanɩ, abɛɛ ɩsɛ ɩkɩ yii gedi yaanɩ fɔ. Wù di gɛtɛ bàà mɛ gʋtʋn Yahwe bʋnʋn ɔya-kamasɛ, anlɛ gɛtɛ bɛ dɔ̀ bɛ gɛtɛ baasɔ yàà nɩma fɔ, ma anlɛ gɛtɛ be wùlà bɛ gɛtɛ bàà mɛ fɔ.

32 Okoro Lefi bete bɛ nya Getuma gii Dikwo, ma Ɔkʋn-dɩrɛkʋn fɔ yii koro, gɛ bɛ kpà bɔɔ bɛfʋrɩ Aaron wodu wʋʋ bɛnɩ bɛ mɛ gʋtʋn Yahwe Dikwo-dɩrɛ fɔ daanɩ.