1 Isareli bete boo geye Egyipiti gɛtʋnkwaa gaanɩ wʋʋ gɩkyan nkpɩn bʋnyɔɔ ma akpilin anaafɛ (480) gaanɩ, gɛtɛ wù di Solomon wɔ gɩkyan naafɛ gaanɩ gɛtɛ ɛɛ kpakya Isareli powu fɔ. Sifi gɛtɛ è di Isareli wobon nyɔɔfɛ fɔ wanɩ gɛ ɛ kya Yahwe Dikwo-dɩrɛ fɔ dii gesere. 2 Yahwe Dikwo-dɩrɛ gɛtɛ egyu-dɩrɛ Solomon e sere fɔ, daabo ɩ̀ ba bɩsɩrɩ akpilin anaa ma fwo (90), gɛ daayɛrɛ ɩ̀ ba bɩsɩrɩ dikpilin ma fwo (30), gɛ daatɔ ɩ̀ ba bɩsɩrɩ akpilin anyɔɔ ma ton (45). 3 Kpata fɔ waabo ì we kyɛkyɛ ma Dikwo fɔ daayɛrɛ. Waayɛrɛ ɩ̀ ba bɩsɩrɩ fwo ton (15), gɛ waabo ɩ̀ ba bɩsɩrɩ dikpilin ma fwo (30). 4 Ɛ sa bɛfansɩrɩ dikwo fɔ dɩɩpɔrɩ yaanɩ. Bɛfansɩrɩ fɔ bè we mɔmɔkyɩ okòro, gɛ bɛ ma yɛrɛ gamɩ. 5 Gɛ e biri e sere ɔpɔrɩ-dɩrɛ e silin Dikwo-dɩrɛ fɔ ɛ sa getite ma akwo yaabi powu gɛtɛ ɩ̀ sa dɩɩ gamɩ fɔ. E sere abansʋrʋ ma waakwobi ɛ marama ma Dikwo-dɩrɛ fɔ. 6 Abansʋrʋ fɔ gatɩn gaakwo fɔ yaabi yaayɛrɛ ɩ̀ ba bɩsɩrɩ kwarankɩ ma ɔfan (7.5). Getite gaakwo fɔ yaabi yaayɛrɛ ɩ̀ ba bɩsɩrɩ yɛkɩ (9), gɛ gatala gaakwo fɔ yaabi yaayɛrɛ ɩ̀ ba bɩsɩrɩ fwo ma ɔfan (10.5). Gatɩn gɩɩ-ɩpɔrɔ fɔ yaayɛrɛ yii koro wun mɩnɩ hiyan gɛtɛ bàà sa iyon-larɩlɛ.

7 Dikwo-dɩrɛ fɔ dii gesere gaanɩ fɔ, gɛtɛ bɛ wɛrɛ pɩna ataa powu be ye yɩɩ gɛpɩnakʋn okoro, an nan nɩ̀ nʋn hama, abɛɛ dɩkyɔɔ abɛɛ gɩwɔrɔnyan abɛɛ anyan-kurumakyɛɛ yɩɩ gewula.

8 Otunu gɛtɛ wʋ̀ dɔ san gatɩn gaakwo fɔ yaanɩ, wʋ̀ sa dikwo fɔ dɩɩ gatɩn gɩɩ gɩlan. Be tiri osele gɛtɛ wʋ bʋn san getite gaakwo fɔ yaanɩ ka ma ye gatala giiyo fɔ yaanɩ. 9 Okoro Dafidi e sere Dikwo-dɩrɛ fɔ e were. Ɛ pɩna dɩ, gɛ ɛ ka seda wo-iyon yɩɩtaa ma ɩwanlalɛ ɛ gbɛrɛ dɩ. 10 Gɛ e sere akwo yaabi-gyagalɛ ɛ marama Dikwo-dɩrɛ fɔ, gɛtɛ yaatɔ ɩ̀ ba bɩsɩrɩ kwarankɩ ma ɔfan (7.5), gɛ bɛ ka seda iyon bɛ walɩ yɩ bɛ kyaga ma Dikwo-dɩrɛ fɔ dɩɩpɔrɩ gye yɩ bɛ marama ma Dikwo-dɩrɛ fɔ.

11 Ɛwʋ gɛ Yahwe ɛ tabʋrʋ ma Solomon ɛ dɔ̀ alan, 12 <<Dikwo gɛtɛ aa sere lɛ wuu koro, gengyi àà tɛrɛma maade-wùlàlɛ, ma maade tɩyɛlɛ-sɩ̀lɛ gɛ àà di mii-ise powu yii koro, gɛ àà bù mɩ fɔ, nan da ma aa koro n mɛ ade gɛtɛ na dɔ̀ na sɩ̀ na tɛ aate Dafidi fɔ. 13 Gɛ nan sara Isareli bete baanɩ. Mɩn nan kere mɩɩn bɛnɩ Isareli bete n ya.>>

14 Okoro Solomon e sere Yahwe Dikwo-dɩrɛ fɔ e were. 15 Gɛ ɛ tɛrɛ seda wo-iyon ɛ marama ɩpɔrɩ fɔ, ma gɛtʋnkwaa, ma gɛwalɩkʋn fɔ, ma dɩɩ gamɩ gɩɩpɔrɩ fɔ ye gatɩn ma sere gatala. Gɛ ɛ tɛrɛ oloko wuu-iyon ɛ walɩ gɛtʋnkwaa fɔ mɔ. 16 Gɛ ɛ ka seda wo-iyon e yo Dikwo-dɩrɛ fɔ dɩɩ gama gɩɩ gɩlan ye gatɩn ma sere gatala gɛtɛ wàà mɛ dikwo-bi dikwo-dɩrɛ fɔ dɩɩ gamɩ gɛtɛ bee kpèlè dɩ Ɔkʋn-dɩrɛ wʋʋkʋn-dɩrɛkʋn fɔ. Dikwobi fɔ daabo ɩ̀ ba bɩsɩrɩ dikpilin ma fwo (30). 17 Dikwo dii dibi gɛtɛ dɩ̀ sa Ɔkʋn-dɩrɛ wʋʋkʋn-dɩrɛkʋn fɔ wʋʋ bʋnʋn fɔ waà mɛ anlɛ bɩsɩrɩ akpilin asiyee (60). 18 Gɛ bɛ salɩ seda wo-iyon bɛ mɛ anlɛ akumani ma afwɛ bɛ sa Dikwo-dɩrɛ fɔ dɩɩ gamɩ ɔmɩrɩ. Seda wo-iyon gɛ ɛ ka ɛ marama ɔkʋn-kamasɛ, gɛtɛ an nan we ɔpɔrɩ wʋʋkankɩ.

19 Ɛ pɩna Dikwo-dɩrɛ Dɩɩkʋn-dɩrɛkʋn, gɛtɛ bàà ka Yahwe Dikola dɩɩ dɩdaka fɔ bɛ sɩ̀ dʋkɔ. 20 Ɔkʋn-dɩrɛ wʋʋkʋn-dɩrɛkʋn fɔ wʋ gamɩ waabo ɩ̀ ba bɩsɩrɩ dikpilin ma fwo (30), gɛ waayɛrɛ ɩ̀ ba bɩsɩrɩ dikpilin ma fwo (30). Daatɔ ɩ̀ ba bɩsɩrɩ dikpilin ma fwo (30). Gɛ ɛ ka sɩka-sɩya-kpara ɛ bɔlɩ dɩɩ gamɩ, ma gedi gɩɩ gɛtɛ̀kʋn gɛtɛ bɛ ka seda wo-iyon bɛ mɛ fɔ powu. 21 Solomon ɛ ka sɩka-sɩya-kpara ɛ bɔlɩ Dikwo-dɩrɛ fɔ daanɩ, gɛ ɛ ka sɩka-sɩya wagbarɩgbarɩ ɛ kyɔlɔga ma Ɔkʋn-dɩrɛkʋn wuutunu gɛtɛ bɛ ka sɩka-sɩya bɛ bɔlɩ fɔ. 22 Okoro ɛ ka sɩka-sɩya ɛ bɔlɩ Dikwo-dɩrɛ fɔ dɩɩ gamɩ powu, ma gedi gɩɩ gɛtɛ̀kʋn gɛtɛ gɩ̀ sa Ɔkʋn-dɩrɛkʋn fɔ mɔ.

23 Solomon ɛ ka olife woyon ɛ salɩ Kerubi ɛbɛ bɛnyɔɔ, gɛtɛ ɛkamasɛ watɔ ɩ̀ ba bɩsɩrɩ fwo ton (15) ɛ sa Dikwo-dɩrɛ Dɩɩkʋn Dɩrɛkʋn daanɩ. 24 Kerubi fɔ ɛkɩ dɩbanba daabo dɩ̀ ba bɩsɩrɩ kwarankɩ ma ɔfan (7.5), gɛ ye dɩbanba dɩkɩ diinyun ma sere dɩbanba-nyɔɔfɛ diinyun fɔ, waabo ɩ̀ ba bɩsɩrɩ fwo ton (15). 25 Gɛ Kerubi-nyɔɔfɛ fɔ mɔ waabo ɩ̀ ba bɩsɩrɩ kwarankɩ ma ɔfan (7.5). Baalɩ, ma boodu wù we kyɛkyɛ. 26 Gɛ Kerubi ɛbɛ fɔ ɛkamasɛ wabo ɩ̀ ba bɩsɩrɩ fwo ton (15). 27 Ɛ ka Kerubi ɛbɛ fɔ ɛ sɩ̀ Dikwo-dɩrɛ Dɩɩkʋn Dɩrɛkʋn fɔ daanɩ, ma baabanba gɛtɛ bɛ yɛrɛba fɔ. Fɔ Kerubi fɔ ɛkɩ dɩbanba dɩɩ kya ɔpɔrɩ wʋkɩ, gɛlɛ ke gɛ Kerubi-nyɔɔfɛ fɔ mɔ wɔ dɩbanba dɩɩ kya ɔpɔrɩ-do mɔ. Gɛ baabanba ɩɩ kya bɔɔwɔlɔn dikwo fɔ dii getite. 28 Gɛ ɛ ka sɩka-sɩya ɛ bɔlɩ Kerubi ɛbɛ fɔ.

29 Gɛ ɛ salɩ-salɩ Kerubi ɛbɛ ma iben-yon, ma afwɛ ɛ marama-marama Dikwo-dɩrɛ fɔ dɩɩpɔrɩ, gamɩ ma okòro powu. 30 Gɛ ɛ ka sɩka-sɩya ɛ bɔlɩ afwɛ gɛtɛ ɛ mɛ ɛ sa gamɩ ma okòro wakwo yaanɩ fɔ powu.

31 Gɛ ɛ ka olife woyon ɛ mɛ itunu-yon gɛtɛ ɩ̀ ba igen ton ɛ sa Dikwo-dɩrɛ fɔ diitunu. 32 Gɛ ɛ salɩ Kerubi ɛbɛ ma iben-yon, ma afwɛ ɛ gyaga olife iyon yaatana anyɔɔ fɔ yii koro, gɛ ɛ ka sɩka-sɩya ɛ bɔlɩ Kerubi ɛbɛ fɔ ma iben-yon, ma afwɛ fɔ. 33 Gɛlɛ ke gɛ ɛ ka olife woyon ɛ mɛ itunu-yon gɛtɛ ɩ̀ ba igen ɩnaa ɛ sa Dikwo-dɩrɛ fɔ gbagba diitunu. 34 Ɛ ka oloko ɛ mɛ ɩpʋnʋ ɩnyɔɔ gɛtɛ ɩɩ tan i tuma. 35 E tiba sɩka-sɩya e tiri Kerubi ma iben-yon, ma afwɛ ɛ gyaga yii koro, gɛ ɛ ka sɩka-sɩya ɛ bɔlɩ yɩ.

36 Gɛ Solomon ɛ ka ataa akpen asiyee e sere ɩgba isiyee, ma seda wo-iyon-salɩlɛ ɔgba wʋkɩ e silin Dikwo-dɩrɛ fɔ.

37 Solomon bugyu buu gedi gɩɩ gɩkyan-naafɛ gaanɩ, Sifi gɛtɛ è di Isareli wobon nyɔɔfɛ fɔ wanɩ gɛ ɛ kya Yahwe Dikwo-dɩrɛ fɔ dii gesere. 38 Gɩkyan fwo gɩkɩfɛ, Buli wobon, ebon nɩyɛfɛ anɩ gɛ be sere Dikwo-dɩrɛ fɔ ma daanyan-manyan powu be were. Solomon ɛ ka gɛ bɩkyan kwarankɩ e sere di e werema.