2 Begyu-dɩrɛ 2

Wurubwarɛ wɔkɛma wʋ bʋma Eliya wʋ da gatala

1 Ɔya wʋ bɛ nɩma gɛtɛ Wurubwarɛ ɛ̀ɛ̀ da ma dɩkpafʋlʋbenten dii koro ɛ̀ɛ̀ ka Eliya da gatala, fɔ Eliya ma Elisa be ye Giligali bɛɛ fɔrɔ. 2 Eliya ɛ dɔ̀ Elisa alan,<<Sara nfan! Yahwe ɛ sa mɩ Beteli>>.

Mɔ Elisa ɛ dɔ̀ wɔ alan, <<Na nya Yahwe na tɛ wɔ̀, gɛ na nya na tɛ wɔ̀ alɛ mɩn nan kere wɔ̀ n ya.>> Okoro bɔɔ bɛnyɔɔ bɛ waran bɛ da Beteli.

3 Wurubwarɛ bɛtabʋrʋlɛ dikpi gɛtɛ bɛ̀ sa Beteli fɔ be be lila Elisa alan, <<À nyɩ̀ gɛtɛ Yahwe ɛɛ̀ ka aafonte e ye aakʋn ǹdò?>>

Gɛ Elisa e yera bɛ alan, <<Ɩɩn ǹ nyɩ̀. Mɔ ɩ kara tabʋrʋ waade!>>

4 Gɛ Eliya ɛ dɔ̀ wɔ alan, <<Elisa, sara nfan, Yahwe ɛ sa mɩ Yeriko.>>

Gɛ Elisa e tiri wuunyun alan, <<Na nya Yahwe, gɛ na nya na tɛ wɔ̀ alɛ mɩn nan kere wɔ̀ n ya.>> Okoro bɔɔ bɛnyɔɔ bɛ san bɛ da Yeriko.

5 Gɛ Wurubwarɛ bɛtabʋrʋlɛ dikpi gɛtɛ bɛ̀ sa Yeriko fɔ be be lila Elisa alan, <<À nyɩ̀ gɛtɛ Yahwe ɛɛ̀ ka aafonte e ye aakʋn ǹdò?>>

Gɛ Elisa e yera bɛ alan, <<Ɩɩn ǹ nyɩ̀. Mɔ ɩ kara tabʋrʋ waade!>> 6 Gɛ Eliya ɛ dɔ̀ Elisa alan, <<Sara nfan! Yahwe ɛ sa mɩ Yodan.>>

Mɔ Elisa ɛ dɔ̀ wɔ alan, <<Na nya Yahwe na tɛ wɔ̀, gɛ na nya na tɛ wɔ̀ alɛ, mɩn nan kere wɔ̀ n ya.>> Okoro bɔɔ bɛnyɔɔ bɛ san bɛ da.

7 Wurubwarɛ bɛtabʋrʋlɛ fɔ baanɩ bɛnɩ akpilin anyɔɔ ma fwo bɛ tɛrɛma bɛ bɛ san Yodan, gɛ bɛ ma yela ɔfɔ bɛrɛɛ ma ɔkʋn gɛtɛ Eliya ma Elisa bè yela fɔ, fɔ bɔɔ bʋnʋn bù ten Eliya ma Elisa. 8 Ɛwʋ gɛ Eliya e tiri wɔ gɛgba, gɛ e filin gɩ, gɛ ɛ ka gɩ ɛ fʋbʋlɩ butu fɔ buu koro. Gɛ butu fɔ bu yo akpen anyɔɔ dɩbɩyan ma ologyi gɛ bɔɔ bɛnyɔɔ bɛ san gɛtʋnkwaa-kɔlɛ gii koro bɛ kààrà.

9 Gɛtɛ bɛ kààrà be were fɔ, Eliya e lila Elisa alan, <<Dɔ̀ mɩ ade gɛtɛ à len nan mɛ n tɛ wɔ̀ pɛ Wurubwarɛ ɛ̀ɛ̀ ka mɩ ye aakʋn?>>

Gɛ Elisa e tiri wuunyun alan, <<Yɛ mɩ nan wura aa sunsun gɛtɛ wʋ̀ sa aanɩ lɛ wuudu dɩnyɔɔ.>>

10 Gɛ Eliya ɛ dɔ̀ wɔ alan <<Ade ma ɔkɛma gɛ a lila lɛ. Mɔ gengyi à we mɩ, ɔkʋna gɛtɛ Yahwe è de mɩ ɛɛ fɔrɔ gatala fɔ, aà wura gɩnyan gɛtɛ aa lila lɛ. Mɔ gengyi an we mɩ fɔ an nan wura.>> 11 Gɛtɛ bɛ̀ san bɛɛ tabʋrʋ fɔ, disere-kɩlɩn fɔ tiiramisan ɛkɩ ma abengyi gɛtɛ ii tiira wɔ gɛ ɔtan wuu gye wu silin yɩ fɔ, i be yo bɔɔ bɛnɩ bɛnyɔɔ boo getite, gɛ dɩkpafʋlʋbenten dɩ ka Eliya dɩ da gatala. 12 Gɛtɛ Elisa e we ade nyayɩ fɔ, ɛ gbɛrɛ afala alan, <<Miinte! Miinte! Isareli wo tiiramisan ɛbɛ ma wabengyi yɩɩ bɛsaralɛ!>> Gɛ Elisa en mini we wɔ. Ɛwʋ gɛ Elisa e gye wɔ ngba ɛ fɛɛran.

13 Ɛwʋ gɛ Elisa ɛ kukuru Eliya gɛgba gɛtɛ gi ye wakʋn gɩ nʋ̀n fɔ, gɛ e biri ɛ san ɛ ma yela Yodan getu-kere. 14 Gɛ Elisa ɛ ka gɛgba gɛtɛ gi ye Eliya wakʋn gɩ nʋ̀n fɔ ɛ fʋbʋlɩ butu fɔ buu koro. Gɛ e lila alan, <<Yahwe, Eliya wo Wurubwarɛ fɔ de?>> Gɛtɛ ɛ ka gɛgba fɔ ɛ fʋbʋlɩ butu fɔ buu koro fɔ, bu yo akpen anyɔɔ, gɛ ɛ kààrà ɛ da.

15 Gɛtɛ Wurubwarɛ bɛtabʋrʋlɛ boo dikpi gɛtɛ be ye Yeriko fɔ be we ade nyayɩ fɔ, bɛ dɔ̀ alan, <<Eliya wo sunsun fɔ wʋ̀ sa Elisa wanɩ.>> Ɛwʋ gɛ bɛ san bɛ ma tuma wɔ, gɛ be kura wɔ. 16 Ɛwʋ gɛ bɛ dɔ̀ alan, <<Nya! Ɛtɩ aa bɛsaranyan tɩ̀ ba bɩtà bʋʋ bɛtàlɛ akpilin anyɔɔ ma fwo (50). Yɛ bɛ bàà san ma buguti aafonte. Nkɩfɔ anlɛ Yahwe gifiye gɩ ka wɔ gɩ bʋn gatala gɛ gɩ ka wɔ gɩ ma sɩ̀ odon wʋkɩ wuu koro abɛɛ dɩtagba dɩkɩ daanɩ.>>

Ɛwʋ gɛ Elisa e tiri wuunyun alan, <<Kwa, ɩ kara sa bɛ!>>

17 Mɔ bɛ nyɩ wɔ gɛlɛɛ gɛtɛ ɛn mɩnɩ talɩ èè terema. Okoro ɛ dɔ̀ bɛ alan, <<Ɩ yɛ bɛ bàà san!>>Ɛwʋ gɛ bɛ sa bɛnɩ akpilin anyɔɔ ma fwo (50) bɛ ma bugiti Eliya awi asiyee, mɔ ben we wɔ. 18 Gɛtɛ Elisa è si Yeriko ditele ee so bɛ, gɛ be biri bɛ ba wakʋn fɔ, e lila bɛ alan, <<Mɩn dɔ̀ yɩ alɛ ɩ kara san?>>

Elisa ɛ yɛ Yeriko butu bʋ mɛ butu-kpara

19 Ɛwʋ gɛ Yeriko ditele dɩɩ bɛnɩ bɛ dɔ̀ Elisa alan, <<Tiifonte, nya! Ditele nyadɩ dɩɩ gɛsarakʋn gɩ̀ kɔlɔ, anlɛ gɛtɛ aa we lɛ. Mɔ gɛtɛ butu fɔ bʋn kɔlɔ okoro, wʋ yɛ gɛtɛ anyan-fʋnlɛ ɩn taa pe gɛtʋnkwaa fɔ gaanɩ.>>

20 Gɛ Elisa ɛ dɔ̀ bɛ alan, <<Ɩ ka tasa-fon ɛkɩ ɩ mɔma mɩ, fɔ yàà sa bʋbɔlɛ wanɩ. Okoro bɛ ka yɩ bɛ mɔma wɔ.

21 Gɛ Elisa e ye ɛ san getu fɔ gii duyu, gɛ e fun bʋbɔlɛ fɔ ɛ sa gaanɩ ɛ dɔ̀ alan,<<Yahwe ɛɛ dɔ̀ alan, <Na fi butu nyabʋ na mɛ butu-kpara. Bʋn nan nɩ yɛ ɛnɩ ɛkɩ èè ku, gɛ anyan yaà ti pe gɛtʋnkwaa fɔ gii koro.> >> 22 Elisa wanyun-gyebi gɛtɛ ɛ dɔ̀ fɔ yii koro, butu fɔ bu biligi butu-kpara be ye ma ǹdò.

Elisa wade ma gɩsaa gɛtɛ ɛ mɛ

23 Elisa e ye Yeriko ɛ san Beteli. Gɛtɛ ɛ̀ san osele waanɩ ɛɛ fɔrɔ fɔ, bɛsaranyan bɛkɩ be ye ditele fɔ daanɩ bɛɛ sa wɔ dɩkpàtà. Bɛ dɔ̀ alan, <<Duyu-kpalɛ diite, kpe ye nfan! Duyu-kpalɛ diite, kpe ye nfan!>> 24 E fi ɛ nya bɛ, gɛ ɛ fwala bɛ Yahwe diyere daanɩ. Gɛ begbongbon bɛnyɔɔ be ye gɩkan gaanɩ bɛ bɛ fɛɛran-fɛɛran bɛsaranyan fɔ baanɩ akpilin anyɔɔ ma bɛnyɔɔ (42). 25 Gɛ ɛ san ɛ da Kameli wodon wuu koro, gɛ ye dʋkɔ fɔ e biri ɛ da Samariya.