1 Ɔya gɛtɛ Yehoyakim ee di bugyu fɔ, Babilon wogyu Nebukadinesa e be to Yuda gɛtʋnkwaa. Ɛwʋ gɛ Yehoyakim ɛ sara wɔ gatɩn bɩkyan bisiyee. Mɔ e foma wamɩnlɛ gɛ ɛ tɔ e yela Nebukadinesa wo koro. 2 Ɛwʋ gɛ Yahwe ɛ sa bɩtà bʋʋ bɛtàlɛ e ye Babilon, ma Aram, ma Mowabi, ma Amon alɛ bàà be muru Yuda bete, anlɛ gɛtɛ Yahwe ɛ dama wɔ bɛsaranyan gɛtɛ bè di wɔ bɛtabʋrʋlɛ boo koro ɛ dɔ̀ fɔ. 3 Yahwe gbagba na yɛ gɛ ade nyayɩ ɩ ba Yuda wo koro, fɔ èè wura tiri bɛ ye wɔ bʋnʋn, Manase wade-kpen ma ade powu gɛtɛ ɛ mɛ fɔ yii koro, 4 fɩya ma gɛtɛ e wolo bɛnɩ gɛtɛ bɛɛn nyɩ ade-ɩkɩ yaanɩ fɔ wuu koro, ma anlɛ gɛtɛ ɛ da bɛnɩ gɛtɛ bɛɛn nyɩ ade ɩkɩ bɔɔ nkalan e lulu Yerusalem anɩ fɔ. Gɛ Yahwe en yera ka kyɛ wɔ.

5 Bɛ ŋwara Yehoyakim wade-kurumakyɛɛ gɛtɛ ɛ mɛ wo bugyu buu gedi gaanɩ, ma wade powu gɛtɛ ɛ mɛ fɔ, bɛ sa Yuda begyu-dɩrɛ boo koro gaade yɩɩ gɩkpa-dɩrɛ gaanɩ. 6 Yehoyakim e ku, gɛ wobi Yehoyakin e di bugyu e sere wɔ gɩsɩrɩ.

7 Gɛ Egyipiti wogyu-dɩrɛ en mini ye ɛwɔ gbagba ditele daanɩ alɛ ɛɛ ma to gɛtʋnkwaa, yema Babilon wogyu-dɩrɛ e to wɔ ntʋnkwaa powu ye Egyipiti wɔbalan wʋʋpɩ ka bɛ da san Efrati getu gɩɩpɩ.

8 Ɔkʋna gɛtɛ Yehoyakin e di bugyu fɔ, ɛ̀ ba bɩkyan fwo-nɩyɛ. Gɛ e di bugyu fɔ Yerusalem bebon besiyee. Wɔna diyere n di Nehusita gɛtɛ è di Elinatan wobi-nanɩ gɛtɛ e ye Yerusalem fɔ. 9 Ɛ mɛ ade-kpen Yahwe bʋnʋn anlɛ gɛtɛ wote ɛ bɔ ɛ mɛ fɔ.

10 Ɔya wʋtɔkɔ waanɩ fɔ, Babilon wogyu Nebukadinesa bɩtà bʋʋ bɛtàlɛ bɛ tɔ bɛ san bɩtà Yerusalem gɛ bɛ sʋ ditele fɔ bɛ sa. 11 Nebukadinesa bɩtà bʋʋ bɛtàlɛ bɔɔ gɛsʋ ditele fɔ sa waanɩ fɔ, ɛwɔ gbagba ɛ ba daanɩ. 12 Ɛwʋ gɛ Yuda wogyu-dɩrɛ Yehoyakin, ma wɔna, ma wɔ bɛnɩ, ma wɔ bɛndɩrɛbi ma ɛbɛ gɛtɛ bɛɛ mɛ gʋtʋn digyukpaara daanɩ fɔ powu bɛ ka koro bɛ tɛ.

Nebukadinesa bugyu buu gedi wʋʋ gɩkyan fwo-nɩyɛfɛ gaanɩ fɔ, e gye Yehoyakin ɛ ma tan dikwo. 13 E kpila anyan-kpara ma anyan ma ɔyɛ-kɛma gɛtɛ ɩ̀ sa Yahwe Dikwo-dɩrɛ fɔ daanɩ ma digyukpaara fɔ powu. Gɛ e kpila sɩka-sɩya wanyan powu gɛtɛ Isareli wogyu Solomon ɛ mɛ ɛ sa Yahwe Dikwo-dɩrɛ fɔ daanɩ anlɛ gɛtɛ Yahwe ɛ bɔ ɛ dɔ̀ fɔ. 14 Nebukadinesa e gye Yerusalem powu ɛ da gisela. E gye bɛndɩrɛbi ma bɩtà bʋʋ bɛtàlɛ, ma adawʋ yɩɩ bɛsalɛ fɔ powu, ma bɛwɔrɔ. Ɛbɛ powu bɛ̀ ba bɛnɩ ɩgba ton. Beyenpu booko na kuruma.

15 Nebukadinesa e gye Yehoyakin bɩtà ɛ san Babilon fɩya ma wɔna, ma wɔsɔ ɛbɛ, ma bɛnɩ gɛtɛ bɛɛ mɛ gʋtʋn digyukpaara daanɩ fɔ, ma wɔ gɛtʋnkwaa fɔ gɩɩ bɛnɩ gbaa-gbaa. 16 Nebukadinesa e nɩ ka bɩtà bʋʋ bɛtàlɛ gɛtɛ baasɔ ɩ̀ ba ɩgba isiyee ma nkpɩn ton (7,000), gɛtɛ bɛ̀ ba ɔkɛma, gɛ bɛ kʋtʋma bɩtà bʋʋ-san fɔ, ma adawʋ yɩɩ bɛsalɛ, ma bɛwɔrɔ nkpɩn ton (1,000). 17 Gɛ Nebukadinesa ɛ sɩ̀ Yehoyakin wogbete Mataniya bugyu ɛ tɛ Yuda bete, gɛ e foma wo diyere alɛ Sedekiya.

18 Ɔkʋna gɛtɛ Sedekiya e di bugyu fɔ ɛ̀ ba bɩkyan dikpilin ma dɩkɩ, gɛ e di bugyu Yerusalem bɩkyan fwo-ɛkɩ. Wɔna diyere n di Hamutali, Yeremiya wobi-nanɩ fɔ wobi. E ye Libina. 19 Ɛ mɛ ade-kpen Yahwe bʋnʋn anlɛ gɛtɛ Yehoyakim ɛ bɔ ɛ mɛ fɔ. 20 Ade nyayɩ ɩ ba Yerusalem ma Yuda boo koro, yema bɛ sa Yahwe owurufa-dɩrɛ gɛtɛ wʋ yɛ e tiri bɛ e ye wɔ bʋnʋn.

Gɛ Sedekiya ɛ bɛ tɔ e yela Babilon wogyu-dɩrɛ wo koro.