1 Samweli 28

Sawulo ma Endo wɔsɔlɔ-nanɩ

1 Ɔkʋna wʋkɩ waanɩ Filisiti bete bɛ pɩna koro gɛtɛ bɛ bɛ kpà ma Isareli bete. Ɛwʋ gɛ Akisi ɛ dɔ̀ Dafidi alan, <<Nyɩnla alɛ wù di gɛtɛ àà awɔ ma aa bɛnɩ yàà fɩya ma nmɩ ɩ ma kpà ma Isareli bete ɩ tɛ mɩ.>> 2 Gɛ Dafidi ɛ dɔ̀ alan, <<Awɔ gbagba aà we ɛwʋ gɛtɛ aasaranyan ɛɛ̀ talɩ ɛ mɛ.>> Ɛwʋ gɛ Akisi alan, <<Wʋ̀ kɔlɔ. Nan mɛ wɔ̀ ɛnɩ gɛtɛ ɛ tɩ dɩyɛ mɩ gakpaakpa.>>

3 Nkele Samweli e ku, gɛ Isareli bete fɔ powu be wula wɔ, gɛ be lo wɔ wɔlɛ Rama ditele daanɩ. Fɔ Sawulo ɛ fʋrʋma berema bɛbwɔ, ma bɛfa-te e ye Isareli gɛtʋnkwaa gaanɩ.

4 Filisiti bete be tuma gɛ be sere bɔɔ gɛsarakʋn gbɛma Sunemi ditele. Fɔ Sawulo mɔ e tuma Isareli bete powu gɛ be sere bɔɔ gɛsarakʋn gbɛma Gilibwa wodon wʋʋpɩ. 5 Gɛtɛ Sawulo e we Filisiti bɩtà bʋʋ bɛtàlɛ fɔ, gɩsaa gi ton wɔ gɛ woturu wu belen wɔ. 6 Sawulo e lila Yahwe gɩnyan gɛtɛ ɛ̀ɛ̀ mɛ. Mɔ Yahwe ɛn da ma okute waanɩ abɛɛ ataa yɩɩ gɛsɩ̀ abɛɛ Wurubwarɛ wɔtabʋrʋlɛ èè tiri ade wùlà wɔ. 7 Ɛwʋ gɛ Sawulo ɛ dɔ̀ wɔ bɛsaranyan alan, <<I bugiti ɛbwɔ-nanɩ ɩ tɛ mɩ, fɔ nan san gɩbɔ wakʋn.>>

Ɛwʋ gɛ bɛ dɔ̀ wɔ alan, <<Ɛbɔ ɛkɩ ɛ̀ sa Endo ditele daanɩ.>>

8 Okoro Sawulo e foma wo koro, ɛ sa ngba-fon, gɛtɛ ɛkɩ ɛɛn nyɩnla wɔ. Gɛ ɛwɔ ma bɛsaranyan bɛnyɔɔ bɛ da ɛna fɔ waakʋn odente. Gɛ Sawulo ɛ dɔ̀ wɔ alan, <<Sɔma tɛ mɩ, kpèlè ete gɛtɛ nan kpèlè wo diyere lɛ, wo gikpena tɛ mɩ ɛ̀ɛ̀ ba.>>

9 Mɔ ɛna fɔ ɛ dɔ̀ wɔ alan, <<Gbagbaagba fɔ à nyɩ̀ ɛwʋ gɛtɛ egyu-dɩrɛ Sawulo ɛ mɛ, e berema bɛbwɔ, ma bɛfa-te e ye Isareli gɛtʋnkwaa gaanɩ. Gɛ nkele, anʋn yii koro gɛ a ba aa ten mɩ ɔdʋ, fɔ wàà mɔma mɩ diku?>>

10 Ɛwʋ gɛ Sawulo ɛ ka Yahwe ɛ kan ntam ɛ tɛ wɔ alan, <<Na nya Yahwe gɛtɛ ɛ̀ sa lɛ na tɛ wɔ̀ alɛ bɛn nan tiira wɔ̀ giten ade nyayɩ yii koro.>>

11 Ɛwʋ gɛ ɛna fɔ e lila wɔ alan, <<Ɛnyan gɛ n kpèlè n tɛ wɔ̀?>> Gɛ e tiri wuunyun alan, <<Kpèlè Samweli ba!>> 12 Gɛtɛ ɛna fɔ e we Samweli fɔ, ɛ gbɛrɛ afala-kin-kin ɛ dɔ̀ Sawulo alan, <<Awɔ ǹ di egyu-dɩrɛ Sawulo. Anʋn yii koro gɛ a gban mɩ?>>

13 Ɛwʋ gɛ egyu-dɩrɛ ɛ dɔ̀ wɔ alan, <<Kara yɛ gɩsaa gàà ton wɔ̀. Anʋn gɛ a we?>> Gɛ ɛna fɔ ɛ dɔ̀ alan, <<Na we ekpena ɛkɩ gɛtɛ e duru e ye gɛtʋnkwaa gaanɩ ɛɛ ba.>>

14 Ɛwʋ gɛ e lila wɔ alan, <<Lan gɛ è we?>> Ɛwʋ gɛ ɛna fɔ e tiri wonyun alan, <<Diteni-kwaa dɩkɩ gɛtɛ dɩ̀ sa gɛgba serelɛ n tɛ ba.>> Ɛwʋ gɛ Sawulo ɛ nyɩnla gɛtɛ wù di gɛ Samweli, gɛ ɛ waran e kura ɛ ka wɔ bʋnʋn e tin gɛtʋnkwaa. 15 Gɛ Samweli ɛ dɔ̀ Sawulo alan, <<Anʋn yii koro gɛ aa sʋra mɩ koro gɛ a kpèlè mɩ a ba?>> Ɛwʋ gɛ Sawulo e tiri wuunyun alan, <<N sa ɔnʋn-sɩna waanɩ, yema Filisiti bete fɔ bee len baà bɛ kpa ma mɩ, mɔ Wurubwarɛ e tiri bʋnʋn ɛ yɛ mɩ. Nkenkele ɛ mɩnɩ taà nɩ nʋn maakʋn. Ɛn mɩnɩ taà nɩ da ma wɔ bɛtabʋrʋlɛ, abɛɛ ma okute waanɩ e tiri maade yiinyun ɛ tɛ mɩ. Okoro gɛ na kpèlè wɔ̀, fɔ àà dɔ̀ mɩ ade gɛtɛ nan mɛ.>> 16 Samuweli e tiri wuunyun alan, <<Anʋn yii koro gɛ aa kpèlè mɩ ɔkʋna gɛtɛ Yahwe e tiri bʋnʋn ɛ yɛ wɔ̀, gɛ a biligi wɔkyʋnlɛ lɛ? 17 Yahwe ɛ mɛ ade gɛtɛ ɛ da ma miin koro ɛ dɔ̀ wɔ̀ fɔ. E to bugyu fɔ e ye aakʋn, gɛ ɛ ka bʋ ɛ tɛ Dafidi, aa bɛnɩ fɔ baanɩ ɛkɩ. 18 Gɛtɛ an bu Yahwe gɛ an di wade gɛtɛ ɛ dɔ̀ wɔ̀ ka da ma Amaleki bete boo koro fɔ, ɛwʋ na yɛ gɛ ɛ mɛ wɔ̀ gɛlɛ ǹdò lɛ. 19 Yahwe ɛɛ̀ ka awɔ ma Isareli bete fɔ ɛ sa Filisiti bete baalɔ yaanɩ. Gɛ gɩsa awɔ ma aa bebi yaà bɛ fɩya ma nmɩ. Gɛ Yahwe ɛɛ̀ ka Isareli bɩtà bʋʋ bɛtàlɛ fɔ mɔ ɛ sa Filisiti bete baalɔ yaanɩ.>> 20 Ade gɛtɛ Samuweli ɛ dɔ̀ wɔ fɔ ɩ mɛ wɔ gɩsaa ɩ kààrà, okoro e belen ɛ nʋ̀n disere-kɩlɩn ɛ tʋna gɛtʋnkwaa. Ɛ yɔlɔ, yema en di gɩnyankɩ duwi dɩtɔkɔ powu wuudente. 21 Gɛtɛ ɛna fɔ e be we Sawulo ɛ̀ dɔ̀ ɛɛ gbɛrɛ kpakpakpa fɔ, ɛ dɔ̀ wɔ alan, <<Nya, nmɩ aasʋgʋgyan na bù wɔ̀. Na yera diku gɛ na mɛ ade gɛtɛ a lila mɩ fɔ. 22 Nkele, nʋn nmɩ aasʋgʋgyan maakʋn. Yɛ mɩ nan tɛ wɔ anyandilɛ à di fɔ àà wura ɔkɛma fɔ àà talɩ biri san aa geyekʋn.>> 23 Mɔ Sawulo e terema alan, <<Mɩn nan di.>>

Mɔ bɛsaranyan bɛ fɩya ma ɛna fɔ be koturu wɔ, gɛ ɛ nʋn baakʋn. Ɛ tɔ gɛtʋnkwaa ɛ sara difenge dii koro. 24 Ɛna fɔ ɛ̀ ba ɛkwɔ dɩtan ma ayò, e wolo dɩ, gɛ ɛ ka ɔnʋmʋ ɛ mɛ boroboro gɛtɛ bɛn sa gɩfa-ŋanlɛ. 25 Ɛwʋ gɛ ɛ ka ɛ bɛ sɩ̀ Sawulo ma wɔ bɛsaranyan, gɛ be di. Gɛ odente wʋtɔkɔ, bɛ tɔ gɛ bɛ da.