1 Samweli 14

1 Duwi dɩkɩ Sawulo wobi Yonatan ɛ dɔ̀ ɛsaranyan gɛtɛ è tola wakpanyan fɔ alan, <<Ba taà kààrà tɩ san Filisiti bɩtà bʋʋ bɛtàlɛ baasarakʋn ofèn lɛ.>> Mɔ Yonatan ɛn dɔ̀ wote.

2 Fɔ Sawulo è si Gibeya ditele diitunu pomegraniti woyon gɛtɛ wʋ̀ sa Migron fɔ wʋʋ gatɩn. Fɔ bɩtà bʋʋ bɛtàlɛ nkpɩn bisiyee (600) bɛ̀ fɩya ma ɛwɔ. 3 Ahitubi wobi Ahiya gɛtɛ è di Ikabodi wonobi fɔ ɛ̀ sa gɛgba tinlɛ diboro gɛ ɛwɔ mɔ ɛ̀ fɩya ma Sawulo. Ahitubi è di gɛ Finehasi wobi, gɛ Finehasi wote n di Eli, gɛtɛ è di Yahwe gedi gɩɩtɛlɛ Silo ditele daanɩ fɔ. Mɔ ɛnɩ ɛkɩ ɛn nyɩnla alɛ Yonatan e kpe e ye.

4 Osele gɛtɛ Yonatan ɛ ka è de ɛ ma gyu Filisiti bɩtà bʋʋ bɛtàlɛ bɔɔ gɛsarakʋn fɔ, ɛɛ̀ da ma ɔkʋn mɔmɔkyɩ gɛtɛ ataa anyɔɔ ofèn ɩ̀ sa ma ofèn fɔ. Bee kpèlè dɩkɩ alɛ Bosesi, gɛ dido fɔ mɔ alɛ Sene. 5 Dɩtaa fɔ dɩkɩ dì yela gatala gɩɩ gɩlan san ma Mikimasi gɩlan, gɛ dido mɔ dì yela gatɩn gɩɩ gɩlan san ma Geba gɩlan.

6 Gɛ Yonatan ɛ dɔ̀ wɔsaranyan gɛtɛ è tola wakpanyan fɔ alan, <<Ba taà kààrà tɩ san bɩtà bʋʋ bɛtàlɛ gɛtɛ ben belen bɩsan fɔ baakʋn. Nkɩfɔ, Yahwe eè yela tɩɩ gama. Gɩnyankɩ gɩn ma gɛtɛ gaà talɩ gɩ sʋ Yahwe osele ɛ̀ɛ̀ yɛ tɩ taà di boo koro, wʋn fɛ alɛ tɩ sɔ abɛɛ tɩn sɔ.>>

7 Gɛ wɔsaranyan fɔ ɛ dɔ̀ wɔ alan,<<Mɛ gɩnyan-kamasɛ gɛtɛ gɩ̀ sa aa duyu daanɩ. San bʋnʋn, ǹ de miinturu powu ǹ tɛrɛma wɔ.>>

8 Gɛ Yonatan ɛ dɔ̀ wɔ alan, <<Ba taà kààrà tɩ san bɛnɩ fɔ baakʋn, fɔ taà yɛ bɛ bàà we tɩ. 9 Gɛ gengyi gɛ bɛ dɔ̀ tɩ alan, <I yela dʋkɔ taà bɛ tama yɩ fɔ>, ɛwʋ bɩrɛ, taà yela ɔkʋn gɛtɛ tì yela fɔ gɛtɛ tɩn nan san baakʋn. 10 Mɔ gengyi bɛ̀ dɔ̀ alan, <Ɩ bʋn ɩ ba taakʋn> fɔ, ɛwʋ fɔ, taà bʋn tɩ san, yema ɛwʋ ǹ te wùlà alɛ, Yahwe e tiri bɛ ɛ tɛ tɩ.>>

11 Okoro bɔɔ bɛnyɔɔ be tiri koro be wùlà Filisiti bɩtà bʋʋ bɛtàlɛ fɔ, gɛ Filisiti bete fɔ bɛ dɔ̀ alan, <<Ɩ nya, Hebre bete fɔ be ye baafwe gɛtɛ be bu yaanɩ fɔ.>> 12 Gɛ Filisiti bɩtà bʋʋ bɛtàlɛ fɔ be kpen be kpèlè Yonatan ma wɔsaranyan gɛtɛ è tola waakpanyan fɔ alan, <<Ɩ bʋn ɩ ba taakʋn, fɔ taà wùlà yɩ gɩnyan-kpara gɩkɩ.>>

Gɛ Yonatan ɛ dɔ̀ wakpanyan yiitolalɛ fɔ alan, <<Bʋn tɛrɛma mɩ, yema Yahwe ɛ ka bɛ ɛ sa Isareli bete baalɔ yaanɩ.>>

13 Gɛ Yonatan ɛ ŋwalan ma walɔ ma wɔ bɩsɩrɩ ɛ bʋn, gɛ wakpanyan yiitolalɛ fɔ ɛ nyɩma wɔ. Gɛ Yonatan ɛ gbɛrɛ-gbɛrɛ Filisiti bɩtà bʋʋ bɛtàlɛ fɔ bɛkɩ e wolo, gɛ wakpanyan yiitolalɛ fɔ mɔ e wolo ɛ tɛrɛma wɔ. 14 Akpa-gyangbasɛlɛ fɔ yaanɩ fɔ, Yonatan ma wakpanyan yiitolalɛ fɔ be wolo bɛnɩ gɛtɛ baà mɛ anlɛ bɛnɩ dikpilin gɛtɛ bɔɔ gɛsarakʋn gaà mɛ ɩŋʋʋ nɩyɛ silin.

Isareli e di Filisiti bete boo koro

15 Okoro gɩsaa gi gyu Filisiti bɩtà bʋʋ bɛtàlɛ powu. Ɛbɛ gɛtɛ bɛ̀ sa asarakʋn-dɩrɛ ma dɩfa daanɩ ma asarakʋnbi ma bekpilalɛ anyan fɔ powu be gyu gɩsaa. Gɛtʋnkwaa gi kpenti. Gɩsaa-dɩrɛ nyagɩ gi ye gɛ Wurubwarɛ wakʋn.

16 Sawulo bɛnɩ-dɩyɛlɛ gɛtɛ bɛ̀ sa Gibeya fɔ be fi bɛ nya gɛ be we Filisiti bɩtà bʋʋ bɛtàlɛ bee serenti bɛ yasɩ. 17 Gɛ Sawulo ɛ dɔ̀ bɛnɩ gɛtɛ bɛ sa wakʋn fɔ alan, <<Ɩ kalan, taà nya alɛ, ɛnyan mɩnɩ ma taanɩ.>> Gɛtɛ bɛ kalan fɔ, Yonatan ma wakpanyan yiitolalɛ fɔ mɩnɩ ma baanɩ.

18 Gɛ Sawulo ɛ dɔ̀ Ahiya alan, <<Ka Wurubwarɛ Dikola dɩɩ dɩdaka fɔ ba.>> (Ɔkʋna wʋtɔkɔ fɔ Wurubwarɛ Dɩdaka fɔ dɩ̀ sa Isareli bete baakʋn) 19 Ɔkʋna gɛtɛ Sawulo ɛɛ tabʋrʋ ma gedi gɩɩtɛlɛ fɔ, Filisiti bete bɔɔ bɩtà bʋʋ bɛtàlɛ bɔɔ gɛsarakʋn fɔ wuu gyu gidi-gidi wʋ fɩya. Okoro Sawulo ɛ dɔ̀ gedi gɩɩtɛlɛ fɔ alan, <<Oke! Tiri aa gʋlɔ.>>

20 Ɛwʋ gɛ Sawulo ma wɔ bɛnɩ be tuma, gɛ bɛ da bɩtà fɔ baanɩ. Be we Filisiti bete fɔ bɛ̀ sa getutu gaanɩ gɛ bè de bedon bee wolo-wolo bɛwɔlɔn. 21 Hebre bete gɛtɛ nafɔ bɛ̀ fɩya ma Filisiti bete gɛ bɛɛ tɩ kpà, bɛ tɛ bɛ fɔ, be biri bɛ ma fɩya ma Isareli bete gɛtɛ bɛ̀ sa Sawulo ma Yonatan baakʋn fɔ. 22 Gɛlɛ ke gɛ gɛtɛ Isareli bete gɛtɛ be ma bu Efarim wodon waanɩ bɛ nʋn alɛ Filisiti bete bee serenti fɔ, ɛbɛ mɔ bɛ gbɛrɛ be gyu akpa fɔ yaanɩ bɛ kpa bɛ gyaga Filisiti bete fɔ boo koro. 23 Okoro Yahwe e to Isareli bete ɛ ya duwi dɩtɔkɔ. Gɛ akpa fɔ ɩ kààrà ɩ san Beti-Afen.

Yonatan e di ɛŋɔɔ

24 Duwi dɩtɔkɔ, Isareli bete bɛ fana bɛ kààrà, yema Sawulo ɛ fʋrʋma kan ntam alan, <<Baà fwala ɛnɩ-kamasɛ gɛtɛ eè di anyandilɛ pɛ ɔgyɔlɔ wàà nɩma nan le mɩɩn bɛkyʋnlɛ gutunkoro pɛ.>> Okoro bɩtà bʋʋ bɛtàlɛ fɔ baanɩ ɛkɩ ɛn dɩya anyandilɛ.

25 Bɩtà bʋʋ bɛtàlɛ fɔ powu be gyu gɩkan gaanɩ, gɛ be we ɛŋɔɔ gɛtʋnkwaa. 26 Gɛtɛ be gyu gɩkan fɔ gaanɩ fɔ, be we ɛŋɔɔ ɛɛ kyasɩ ɛ nʋ̀n gɛtʋnkwaa. Mɔ baanɩ ɛkɩ ɛn ka gʋlɔ kya wɔ alɛ ee di, yema bè serenti ntam gɛtɛ Sawulo ɛ kan fɔ. 27 Mɔ Yonatan ɛn nʋn ntam gɛtɛ wote ɛ kan e tin bɛnɩ fɔ. Okoro ɛ ka oyon gɛtɛ è de wɔ gʋlɔ gaanɩ fɔ gɛ ɛ nyɩ ɛ sa ɛŋɔɔ dɩfʋgʋlʋn daanɩ, gɛ ɛ ka ɛ sa wonyun, gɛ wɔ bʋnʋn bʋ ŋmaŋɩ wɔ. 28 Gɛ bɩtà bʋʋ bɛtàlɛ fɔ baanɩ ɛkɩ ɛ dɔ̀ wɔ alan, <<Aate ɛ kan ntam ɛ sʋ bɩtà bʋʋ bɛtàlɛ fɔ alan, <Gɛfwala gaà ba ɛnɩ-kamasɛ gɛtɛ eè di anyandilɛ ǹdò fɔ wo koro.> Okoro nyawʋ wʋ yɛ bɛnɩ fɔ bɛɛ nʋ̀n agbalɩ.>>

29 Gɛ Yonatan ɛ dɔ̀ alan, <<Miinte ɛ ka dɩyɩyɛ ɛ ba gɩfɩɩ fɔ gaanɩ. Nya anlɛ gɛtɛ mɩɩn bʋnʋn bʋ ŋmaŋɩ mɩ, gɛtɛ na dɩya ɛŋɔɔ fɔ pɩɩ fɔ. 30 Gengyi nafɔ bɩtà bʋʋ bɛtàlɛ nyabɛ powu bɛ daà di anyan gɛtɛ be gye bɩtà baanɩ lɛ fɔ, nafɔ bɛn daà belen Filisiti bete nyabɛ ayu kpekpesi?>>

31 Duwi dɩtɔkɔ, gɛtɛ Isareli bete be wolo Filisiti bete, ye Mikimasi ma sere Ayalon be were fɔ, bɛ fana bɛ kààrà. 32 Be firingi be gyu Filisiti bete baanyan yii gekukuru. Be gye bɛyɛran, ma bɛkwɔ, ma akwɔbi be wolo bɛ gɛtʋnkwaa gɛtɛ ben belen bɛ ayu nkalan ɛ̀ɛ̀ kyasɩ, gɛ bɛ kɔrɔ bɛ gɛlɛ. 33 Gɛ ɛnɩ ɛkɩ ɛ ma dɔ̀ Sawulo alan, <<Nya, bɛnɩ fɔ bɛɛ mɛ ade-kpen Yahwe bʋnʋn. Bɛ kɔrɔ bɛnan gɛtɛ ben belen bɛ ayu fɔ bɔɔ gɩnan.>>

Gɛ Sawulo ɛ dɔ̀ alan, <<Ɩ mɛ giten-kɛma. I bilima dɩtaa-dɩrɛ ɩ tɛ mɩ nfan bilenten!>> 34 Gɛ Sawulo ɛ dɔ̀ alan, <<Ɩ san ɩ ma dɔ̀ bɛ alan, <ɛnɩ-kamasɛ ɛ ka wɔkwɔ, ma wɔyɛran ɛ ba nfan, èè be wolo wɔ nfan fɔ ɛ̀ɛ̀ kɔrɔ wɔ nfan. Ɩ kara mɛ ade-kpen Yahwe wo koro gɛtɛ yàà kɔrɔ bɛnan gɛtɛ ben belen bɛ ayu fɔ bɔɔ gɩnan.> >>

Okoro bɩtà bʋʋ bɛtàlɛ fɔ powu bɛ ka bɔɔkwɔ-teni bɛ ba odente wʋtɔkɔ be be wolo dʋkɔ. 35 Ɛwʋ gɛ Sawulo e sere gedi gɩɩ gɛtɛ̀kʋn ɛ tɛ Yahwe. Nyawʋ n di gedi gɩɩ gɛtɛ̀kʋn-gyangbasɛ gɛtɛ e sere.

36 Gɛ Sawulo ɛ dɔ̀ alan, <<Ɩ yɛ taà waran tɩ san Filisiti bete fɔ baakʋn odente nyawʋ, fɔ taà kpila baanyan, gɛ tɩn nan kere baanɩ ɛkɩ tɩ ya ɛ̀ɛ̀ sara nkpa.

Gɛ Isareli bete fɔ bɛ dɔ̀ alan, <<Mɛ gɩnyan gɛtɛ wʋ̀ kɔlɔ tɛ wɔ̀.>>

Mɔ gedi gɩɩtɛlɛ fɔ alan, <<Ɩ yɛ taà lila Wurubwarɛ pɛ.>>

37 Gɛ Sawulo e lila Wurubwarɛ alan, <<Ǹ waran ǹ san n ma kpà ma Filisiti bete fɔ? Aà ka bɛ a sa Isareli bete bɔɔ gʋlɔ gaanɩ?>> Mɔ Wurubwarɛ en tiri wuunyun tɛ wɔ duwi dɩtɔkɔ.

38 Gɛ Sawulo ɛ dɔ̀ alan, <<Ɛyɩ bɩtà buu begyegeyelɛ fɔ powu ɩ ba nfan. Ɩ yɛ taà nya ade-kpen kitii gɛtɛ tɩ mɛ ǹdò. 39 Na nya Yahwe gɛtɛ e to Isareli ɛ ya fɔ alan, gengyi gɛ miinbi Yonatan gba na mɛ ade-kpen fɔ, wù di gɛtɛ èè ku.>> Mɔ bɛnɩ fɔ baanɩ ɛkɩ ɛn dɔ̀ digyebi.

40 Gɛ Sawulo ɛ dɔ̀ Isareli bete fɔ powu alan, <<I yela ofèn lɛ, fɔ nmɩ ma miinbi Yonatan mɔ taà yela ofèn nfan.>>

Gɛ bɛnɩ fɔ bɛ dɔ̀ Sawulo alan, <<Mɛ anlɛ gɛtɛ wʋ̀ kɔlɔ tɛ wɔ̀.>>

41 Gɛ Sawulo e tiri onyun ɛ tɛ Yahwe, Isareli wo Wurubwarɛ alan, <<Tiri ade yiinyun tɛ mɩ gepe.>> Anʋn yii koro gɛ an tiri maade-lilalɛ fɔ yiinyun tɛ mɩ ǹdò? Gengyi wù di gɛ nmɩ abɛɛ miinbi Yonatan na mɛ ade-kpen fɔ, Urim e tiri e wùlà. Mɔ gengyi wù di gɛ Isareli bɛnɩ fɔ baakʋn gɛ wu ye fɔ, Tumim e tiri e wùlà. Mɔ wu gye Yonatan ma Sawulo. Gɛ bɛnɩ fɔ be ye ade fɔ yaanɩ. 42 Gɛ Sawulo ɛ dɔ̀ alan, <<Tiri ɛtɩ ma Yonatan tii getite!>> Gɛ wʋ Tiri Yonatan.

43 Gɛ Sawulo e lila Yonatan alan, <<Dɔ̀ mɩ ade-kpen gɛtɛ a mɛ?>>

Gɛ Yonatan ɛ dɔ̀ wɔ alan, <<Na ka miinyon gɛtɛ ǹ de fɔ wuunyun na kya ɛŋɔɔ pɩɩ na nʋnʋn. Okoro nan ku?>> 44 Gɛ Sawulo ɛ dɔ̀ alan, <<Yonatan, gengyi an ku fɔ, Wurubwarɛ e tiira mɩ giten.>>

45 Gɛ Isareli bete fɔ bɛ dɔ̀ Sawulo alan, <<Wun di gɛtɛ Yonatan èè ku! Kpakpaakpa! Ɛwɔ na kpà e to Isareli bete nkpa! Na nya Yahwe alɛ, wo diyungu-kɩlɩn gba dɩn nan nʋ̀n gɛtʋnkwaa, yema Yahwe na kpà wɔ gɛ ɛ mɛ gʋtʋn nyagɩ ǹdò lɛ.>> Okoro bɛnɩ fɔ be to Yonatan nkpa, okoro ben wolo wɔ.

46 Okoro Sawulo ɛ mɩnɩ tɛrɛma Filisiti bete fɔ, gɛ Filisiti bete fɔ bɛ da boo geyekʋn.

47 Gɛtɛ Sawulo e di bugyu Isareli fɔ, ɛ kpà ma bɔɔ bɛkyʋnlɛ fɔ powu ɔkʋn-kamasɛ. Ɛ kpà ma Moba bete, ma Amon bete, ma Edom bete, ma Soba begyu-dɩrɛ, ma Filisiti bete. Ɔkʋn-kamasɛ gɛtɛ ɛ̀ san fɔ, ee di boo koro. 48 Sawulo ɛ ka dɩkpatɩ ɛ kpà ma Amaleki bete gɛ e di boo koro, gɛ e to Isareli ɛ ya e ye Isareli bɛnɩ gɛtɛ bɛɛ tà bɩtà ma ɛwɔ gɛ bee kpila waanyan fɔ baalɔ yaanɩ.

Sawulo dɩkpaara dɩɩ bɛnɩ

49 Sawulo bebi-tenibi n di Yonatan, ma Isiwi, ma Maliki-Suwa. Wobi-nanɩbi ɛndɩrɛ diyere n di Merabi, gɛ etiti fɔ wo diyere n di Mikali. 50 Sawulo wɔsɔ diyere n di Ahinoham gɛtɛ wote n di Ahimasa fɔ. Wɔ bɩtà bʋʋ bɛtàlɛ bɔɔdɩrɛ n di Abineri gɛtɛ è di Neri wobi fɔ, gɛ Sawulo woteti n di Neri nyawɔ. 51 Sawulo wote Kisi, ma Abineri wote Neri, bè di gɛ Abile bebi.

52 Sawulo wɔ nkpa wawi powu yaanɩ fɔ akpa-dɩrɛ na sara ɛbɛ ma Filisiti bete. Gengyi Sawulo è we eteni ɛkɩ ɛ̀ ba ɔkɛma gɛ è ba oturu fɔ, ɛɛ ka wɔ ɛ fɩya ma wɔ bɩtà bʋʋ bɛtàlɛ.