1 Samweli 29

Filisiti bete be terema Dafidi

1 Filisiti bete be tuma bɔɔ bɩtà bʋʋ bɛtàlɛ fɔ powu Afeki, gɛ Isareli bete be sere bɔɔ gɛsarakʋn Yesereli wɔlɔkɔ wʋʋpɩ. 2 Gɛtɛ Filisiti bɛndɩrɛbi bɛ ka bɔɔ bɩtà bʋʋ bɛtàlɛ akpilin ton-ton ma nkpɩn ton-ton yaakpi be ye bɛɛ fɔrɔ fɔ. Dafidi ma wɔ bɛnɩ mɔ bɛ̀ san bɔɔ gama fɔ Akisi ɛ̀ san ma ɛbɛ gamaama. 3 Filisiti bɩtà bʋʋ bɛtàlɛ bʋʋ bɛndɩrɛbi fɔ be lila alan, <<Anʋn gɛ Hebre bete nyabɛ bee len nfan?>>

Akisi e tiri wuunyun alan, <<Dafidi gɛtɛ è di Isareli wogyu-dɩrɛ Sawulo bɩtà bʋʋ bɛtàlɛ bɔɔndɩrɛ fɔ gɛ wù di. E were di gɩkyan ɛ kààrà maakʋn, gɛ boo ye duwi gɛtɛ e ye Sawulo wakʋn e be gyu mɩ bè sere ma ǹdò lɛ, min we wɔ ma ade-kpen ɩkɩ nya.>>

4 Mɔ Filisiti bɩtà bʋʋ bɛtàlɛ bʋʋ bɛndɩrɛbi fɔ bɛ ka owurufa wokoro gɛ bɛ dɔ̀ wɔ alan, <<Yɛ wɔ è biri ma sara ɔkʋn gɛtɛ a ka a tɛ wɔ fɔ. Ɛ kara nyɩma tɩ ɛ san bɩtà fɔ baanɩ, nkɩfɔ fɔ ɛɛ̀ tɔ e yela tii koro bɩtà fɔ baanɩ. Anʋn gɛ ɛɛ̀ mɛ wàà di wofonte Sawulo gʋnʋn, da gɛtɛ eè belen tɩ ayu ɛ̀ɛ̀ ka san ma wɔ? 5 Nka Dafidi nyawɔ gɛ bɛ nʋma ɩ nʋn be len gɛ bɛ dɔ̀ alan,

<<Sawulo e wolo bɛnɩ nkpɩn ton-ton

gɛ Dafidi e wolo ɩgbaa ton-ton fɔ?> >>

6 Akisi e kpele Dafidi gɛ ɛ dɔ̀ wɔ alan, <<Na nya Yahwe gɛtɛ ɛ̀ sa lɛ na tɛ wɔ alɛ à di nʋnkwarɩ wɔnɩ gɛ nafɔ ǹ len gɛtɛ àà gyegeye tɩɩ bʋnʋn a san akpa, yema boo ye duwi gɛtɛ a ba maakʋn be ye ma ǹdò lɛ, min we wɔ ma ade-kpen ɩkɩ, mɔ bɩtà bʋʋ bɛtàlɛ bʋʋ bɛndɩrɛ fɔ ben yera gɛtɛ àà san ma ɛtɩ. 7 Okoro fi fɔ à biri san olila waanɩ, kara mɛ gɩnyankɩ gɛtɛ gɩ nan di Filisiti bɛndɩrɛ fɔ gʋnʋn.>>

8 Mɔ Dafidi e lila alan, <<Anʋn gɛ na mɛ? Anʋn yaade-kpen gɛ a we nmɩ aasaranyan miin koro ye duwi gɛtɛ na ba aakʋn be ye ma ǹdò lɛ? Anʋn yii koro gɛ wun pe nan ma kpà ma awɔ miinfonte egyu-dɩrɛ aa bɛkyʋnlɛ?>>

9 Akisi e tiri wuunyun alan, <<Ǹ nyɩ gɛtɛ aade ii di mɩ gʋnʋn anlɛ Wurubwarɛ wɔsalɛ. Mɔ Filisiti bɩtà bʋʋ bɛtàlɛ bɔɔ bɛndɩrɛ fɔ bɛ dɔ̀ alan, Ɛ kara tɛrɛma tɩ ɛ san akpa fɔ yaanɩ. 10 Okoro gɩsaa gagyɩgyan-fuu, wʋ̀ bɔ wʋ ŋmangɩ fɔ awɔ ma aafonte Sawulo bɛsaranyan gɛtɛ bɛ tɛrɛma wɔ̀ bɛ ba fɔ, ɩ tɔ fɔ yàà biri.>>

11 Gɛlɛ wuu koro Dafidi ma wɔ bɛnɩ bɛ tɔ gɛgyɩgyan-fuu gɛ bɛ da Filisiti bete bɔɔ gɛtʋnkwaa gɛtɛ bɛ ka bɛ tɛ wɔ fɔ gaanɩ, gɛ Filisiti bete bɛ bʋn bɛ da Yesereli.