1 Filisiti bete bɛ kpà ma Isareli bete. Mɔ Isareli bete bɛn talɩ yela Filisiti bete bɔɔ bʋnʋn gɛ be serenti. Be belen Isareli bete kpekpesi ayu Gilibwa wodon wuu koro. 2 Filisiti bete bɛ kpa bɛ gyaga Sawulo ma wo bebi besiyee boo koro gɛ be wolo wo bebi-teni, Yonatan, Abinadabi ma Maliki-Suwa. 3 Akpà fɔ yiinyun ɩ mɛ ɔtan wʋ tɛ Sawulo, gɛ bɩsɩnta bʋʋ bɛtàlɛ fɔ bɛ gbɛma wɔ gɛ be pira wɔ gɛtɛ wʋn ma gɛnya. 4 Gɛ Sawulo ɛ dɔ̀ wakpa-anyan yiitolalɛ fɔ alan, <<Tiri aa tata fɔ àà sere mɩ wolo! Fɔ Filisiti bete gɛtɛ ben belen bɩsan lɛ, bɛ kara bè fuli mɩ fɔ bàà wolo mɩ.>> Mɔ gɩsaa gi ton wakpa-nyan yiitolalɛ fɔ, okoro e terema gɛ ɛn mɛ anlɛ gɛtɛ ɛ dɔ̀ wɔ fɔ. Gɛlɛ wuu koro Sawulo ɛ ka ɛwɔ gbagba wo tata e sere gɛtʋnkwaa, gɛ ɛ tà ɛ nʋ̀n wo koro. 5 Gɛtɛ wakpa-nyan yiitolalɛ fɔ e we gɛtɛ Sawulo e ku fɔ, ɛwɔ mɔ ɛ ta ɛ nʋn ɛwɔ mɔ wɔ tata wo koro gɛ e ku ɛ fɩya ma ɛwɔ. 6 Okoro Sawulo, ma wo bebi besiyee, ma wakpa-nyan yiitolalɛ ma wɔ bɛnɩ powu be ku duwi-kɩlɩn dɩtɔkɔ.

7 Gɛtɛ Isareli bete gɛtɛ bɛ̀ sa dɩtagba daanɩ ma ɛbɛ gɛtɛ bè sì Yodan wofèn fɔ be we gɛtɛ Isareli bɩtà bʋʋ bɛtàlɛ fɔ be serenti, gɛ Sawulo ma wo bebi be ku fɔ, bɛ tɔ be serenti be kere baatele fɔ bɛ ya. Okoro Filisiti bete fɔ be be to baatele fɔ. 8 Duwi-nyɔɔfɛ fɔ, gɛtɛ Filisiti bete bɛ ba bàà be lo bekpena fɔ baanyan gbaa fɔ, be we Sawulo ma wo bebi besiyee fɔ gɛtɛ be ku bɛ̀ dɔ Gilibwa wodon wuu koro. 9 Be kebi Sawulo duyu, gɛ be tiri wakpanyan, gɛ bɛ sa ɔtʋn Filisiti bete bɔɔ gɛtʋnkwaa powu gaanɩ gɛtɛ bàà ma yasɩ ade fɔ baakpen-kwo ma bɔɔ bɛnɩ powu baanɩ. 10 Ɛwʋ gɛ bɛ ka wakpanyan bɛ ma sɩ̀ Asitaroti dikpen-kwo daanɩ, gɛ bɛ gbɛrɛ wo gikpena bɛ marama Beti-San wɔpɔrɩ fɔ. 11 Gɛtɛ Yabesi gɛtɛ wʋ̀ sa Gileda gɛtʋnkwaa gaanɩ fɔ bɛnɩ bɛ nʋn ade gɛtɛ Filisiti bete bɛ mɛ Sawulo fɔ, 12 beteni powu gɛtɛ bɛ ba oturu fɔ, bɛ san ma odente bɛ san Beti-San ditele. Be tiri Sawulo ma wo bebi fɔ boo gikpena be ye ɔpɔrɩ fɔ wuu koro, gɛ bɛ san Yabesi bɛ ma kuma bɛ. 13 Ɛwʋ gɛ be kpila anankʋba-kurumakyɛɛ fɔ be ma lò oyon gɛtɛ bee kpèlè Tamarisiki fɔ wʋʋ gatɩn, Yabesi ditele daanɩ. Gɛ bɛ ban onyun awi kwarankɩ.