1 Samweli 21

Dafidi e serenti e ye Sawulo wakʋn

1 Dafidi ɛ san gedi gɩɩtɛlɛ Ahimeleki wakʋn Nobi ditele daanɩ. Gɛtɛ Ahimeleki e we wɔ fɔ, gɩsaa gɩ ton wɔ gɛ e lila wɔ alan, <<Anʋn yii koro gɛ à san aako? Anʋn yii koro gɛ ɛnɩ ɛkɩ ɛn fɩya ma awɔ?>>

2 Dafidi e tiri wuunyun ɛ tɛ gedi gɩɩtɛlɛ Ahimeleki alan, <<Egyu ɛ sa mɩ gʋtʋn gɩkɩ gɛ ɛ dɔ̀ mɩ alan, <Wun di gɛtɛ àà yɛ ɛnɩ ɛkɩ ɛ̀ nyɩnla gʋtʋn gɛtɛ na tɛ wɔ̀ lɛ.> Mɔ mɩɩn bɛnɩ bɩrɛ, na dɔ̀ bɛ alɛ be tuma mɩ ɔkankɩ. 3 Nkele anyan-dɩlɛ mɔmɔ gɛ à ba? Tɛ mɩ boroboro ton abɛɛ gɩnyan-kamasɛ gɛtɛ à ba fɔ.>>

4 Mɔ gedi gɩɩtɛlɛ fɔ e tiri wuunyun ɛ tɛ Dafidi alan, <<Ǹ ma anyan-dɩlɛ tuntun ɩkɩ maakʋn, mɔ boroboro gɛtɛ bè gye bɛɛ tɛ gedi wuuko n sa. Gengyi bɛn dʋrɔ ma ɛna bɩrɛ fɔ bɛ̀ talɩ be be di.>>

5 Gɛ Dafidi e tiri wuunyun alan, <Ɩɩn bɛnanɩ ben taà gbɛma tɩ ɔya-kamasɛ gɛtɛ n tɛ fɔrɔ gʋtʋn tuntun gba fɔ, wàà ba yɛ ǹdò wuuyo nyawʋ.> 6 Okoro gedi gɩɩtɛlɛ fɔ ɛ tɛ Dafidi Wurubwarɛ wo boroboro gɛtɛ nafɔ osele wʋn dɔ tɛ ɛnɩ ɛkɩ gɛtɛ èè di fɔ, yema boroboro ɛkɩ ɛ mɩnɩ ma fɩya ma boroboro gɛtɛ bɛ ka bɛ tɛ Yahwe gedi fɔ, gɛ bɛ ka boroboro yalɛ bɛ sɩ̀ wʋʋ didin duwi dɩtɔkɔ gɛtɛ bɛ ka wʋ fɔ.

7 Duwi dɩtɔkɔ fɔ, Sawulo, bɛnan bɔɔ bɛnyalɛ bɔɔndɩrɛ gɛtɛ bee kpèlè Dohegi, gɛ e ye Edom fɔ ɛ̀ sa dʋkɔ bɛ, yema ee len ɛ̀ɛ̀ mɛ Yahwe gelen-bi duwi dɩtɔkɔ.

8 Dafidi e lila Ahimeleki alan, <<À ma gɩtʋrʋnyan abɛɛ tata nfan? Mɩɩn ka mɩɩn tata abɛɛ maakpanyan yaanɩ wʋkɩ ba, yema egyu-dɩrɛ gʋtʋn fɔ gɩ yɛ mɩ na kutuma na kere mɩɩn tata ma maakpanyan na ya.>>

9 Gedi gɩɩtɛlɛ fɔ e tiri wuunyun alan, <<Filisiti-te Goliyati gɛtɛ a wolo Ela dɩtagba daanɩ fɔ wodon ɛ̀ sa nfan, wʋ̀ ban ma dɩyan wʋ̀ sa gɛgba tinlɛ diboro gɩɩ fɔ gɩɩ gama. Gengyi à len wʋ fɔ, à talɩ a ka, yema edon ɛkɩ ɛɛn mɩnɩ ma nfan.>> Gɛ Dafidi ɛ dɔ̀ alan, <<Edon ɛkɩ ɛn mɩnɩ ma nyawʋ gama, ka wʋ tɛ mɩ.>>

Dafidi e serenti ɛ san Gati

10 Duwi dɩtɔkɔ Dafidi e serenti e ye Sawulo wakʋn gɛ ɛ san Gati wogyu Akisi wakʋn. 11 Mɔ Akisi bɛsaranyan bɛ dɔ̀ wɔ alan, <<Nka Dafidi nyawɔ n di gɛtʋnkwaa giigyu? Nka ɛwɔ gɛ bɛɛ nʋma ɩ nʋn boo gelen gaanɩ bɛ dɔ̀ alan, <Sawulo e wolo bɛnɩ gɛkpɩn mɔ Dafidi e wolo gbaa ton fɔ?> >> 12 Dafidi e gyu ade nyayɩ ɛ sa woturu waanɩ gɛ e serenti Gati wogyu Akisi gepepe. 13 Gɛlɛ wuu koro, Dafidi ɛ mɛ anlɛ e di gɛ ɛbalanɩ. Ɛɛ ŋwara ɩpʋnʋ wuu koro gɛ ɛ yɛ atɩtan ɩ waran wɔ ma wo bikpri.

14 Gɛ Akisi ɛ dɔ̀ wɔ bɛsaranyan fɔ alan, <<Ɩ nya ete fɔ, è di gɛ ɛbalanɩ. Gɛ anʋn yii koro gɛ ɩ ka wɔ ɩ ba maakʋn? 15 Bɛbalanɩ be were mɩ, okoro gɛ i birima nyawɔ ɩ bɛ mɔma nmɩ? Anʋn yii koro gɛ ɩ ka ɛnɩ nyawɔ wodu ɩ ba mɩɩn dɩkpaara?>>