1 Ni n kumara adamaden kanilu ni mɛlɛka kanilu rɔ, kɔni kaninteya tɛ n jusu rɔ, n kumakan kɛnin de wo rɔ ikomin talan kan ni sangban kan. 2 Ni n ka nabiya kuma dinmali sɔrɔn, ka hankilimaya gbundu koilu bɛɛ rɔ, ka lɔnnin bɛɛ sɔrɔn, a ni lemɛniya ba ye n dɔ, mɛn di koyinkɛilu bɔ ii nɔ rɔ, kɔni ni kaninteya tɛ n jusu rɔ, foyi tɛ nde ri wo rɔ. 3 Ni n wa n bolofen bɛɛ di bolokolonilu ma, ni n wa n faribanku di ko a ri janin, kɔni kaninteya tɛ n jusu rɔ, wo tɛ foyi dila n ma.

4 Diɲɛ ye kaninteya rɔ. Kaninteya ye koɲuma le kɛla. Keleya tɛ kaninteya rɔ. Kaninteya tɛ a jɛrɛdabayala. Waso tɛ kaninteya rɔ. 5 Maloya tɛ a rɔ. A ma a jɛrɛ la hɛrɛ dɔrɔn karan. A jusu tɛ bɔla foyi rɔ. A ma duɲa lamara. 6 A tɛ sɛwa telenbaliya la fɔɔ tuɲa. 7 A ye makotoli le kɛla ko bɛɛ rɔ. A lemɛniyanin waati bɛɛ. Jii ye a ma ko bɛɛ rɔ. A tunadiyanin ko bɛɛ ma.

8 Kaninteya tɛ banna habadan. Kɔni nabiya kumailu ri tamin, kan gbɛrɛilu ri ban, lɔnnin di tamin. 9 Baa dan ye an na ko lɔn na, an ye nabiya kumailu fɔla dɔɔnin, 10 kɔni a dafanin wa na waati mɛn na, a dafabali ri ban wo rɔ.

11 N tɛrɛ den mɛsɛnya rɔ waati mɛn na, n tɛrɛ kumala ikomin denmɛsɛn, n tɛrɛ n mirila ikomin denmɛsɛn, n tɛrɛ koilu famunna ikomin denmɛsɛn. Kɔni n balikuyanin, n ka denmɛsɛnya ko lasɛ n kɔfɛ. 12 Sisɛn, an ye sawura ladibinin de yenna ikomin mafɛnɛnnin dubalen, kɔni waati natɔ rɔ, an di yennin kɛ ɲa ni ɲa. Sisɛn, dan ye n na ko lɔn na, wo waati rɔ n di koilu lɔn ikomin Alla ka n lɔn ɲa mɛn ma.

13 Sisɛn ko sawa ɲinilu tola le, lemɛniya ni jii ni kaninteya, kɔni kaninteya le ka bon ii bɛɛ ko.