1 Ai ye ai raja ka to kaninteya rɔ. Nii Sɛniman na dinmalifenilu kunfan ye ai mira, a gbengben ai ye nabiya kumailu fɔ. 2 Baa mɔɔ mɛn ye kan gbɛrɛ fɔla, wo tɛ kumala mɔɔilu le yɛ, fɔɔ Alla, ka a masɔrɔn mɔɔ si tɛ a kan mɛnna. A ye gbundu koilu fɔla Alla la Nii Sɛniman baraka le rɔ. 3 Kɔni mɛn ye nabiya kumailu fɔla, wo ye kumala ii sabati ko le la, ka ii lalemɛniya, ka ii jusu suma. 4 Mɔɔ mɛn ye kumala kan gbɛrɛ rɔ, wo ye a jɛrɛ le dɔrɔn dɛmɛnna, kɔni mɛn ye nabiya kumailu fɔla, wo ye lemɛniya jama bɛɛ le dɛmɛnna.

5 Ni ai bɛɛ ye kan gbɛrɛilu fɔla, wo duman n yɛ. Kɔni mɛn duman n yɛ ka tamin wo la, ai bɛɛ ye nabiya kumailu fɔ. Ka a masɔrɔn mɔɔ mɛn ye nabiya kumailu fɔla, wo taminnin kan gbɛrɛ fɔla, fɔɔ ni mɔɔ do ye ye mɛn di a kan natamin kosa lemɛniya jama bɛɛ ri dɛmɛn ɲa mɛn ma. 6 N badenmailu, ni n wara ai tɔrɔfɛ, ka wa kuma ai yɛ kan gbɛrɛilu rɔ, n ka nfen ɲa ai ma wo rɔ, na n ma Alla la ko do yiraka ai la, wala lɔnnin do wala nabiya kuma wala karan?

7 Hali fɔlifenilu, nii tɛ woilu mɛn dɔ, wo fanan ye wo ɲa le ma, ikomin fule ni silaman. Ii ye fɔlifenkan mɛn nabɔla, mɔɔ ye wo lɔnna di na ii ma a kan nabɔ a ɲuma la? 8 Ni buru kan ɲuma ma bɔ fanan, ka gbɛ, yon di a rabɛn kɛlɛkɛ kanma? 9 A ye wo ɲa le ma ai wara, ai wa kuma kan gbɛrɛilu rɔ, na a ma kɛ kumakan gbɛnin di, wo kɔrɔ ye lɔnna di wo rɔ? Kuma fuu le dɔrɔn ye wo ri. 10 Kan siyaman de dunuɲa rɔ, kɔni woilu foyi tɛ ye mɛn kɔrɔ tɛ a la. 11 Kɔni kan mɛn ye fɔla, ni n ma a kɔrɔ lɔn, mɛn ye a fɔla, londan de nde ri wo ɲakɔrɔ. Londan de a fanan di n ɲakɔrɔ. 12 A ye wo ɲa le ma ai fanan yɛ. Baa ai lɔɔ ye Alla la Nii Sɛniman na dinmalifenilu la, mɛnilu ye lemɛniya jama dɛmɛnna, ai ye ai raja woilu le ma.

13 Wo le rɔ, mɔɔ mɛn ye kumala kan gbɛrɛ rɔ, a ye Alla matara kosa a ri se a kɔrɔ fɔla. 14 Baa ni n ka Alla matara kan gbɛrɛ rɔ, n nii le Alla matarala wo rɔ, kɔni n hankili tɛ baarala. 15 N di nfen kɛ wo rɔ? N di Alla matara n nii rɔ a ni n hankili fanan dɔ. N di kalaman bɔ n nii rɔ a ni n hankili fanan dɔ. 16 I wa baraka bila Alla yɛ i nii rɔ, mɔɔ mɛn ma wo kɔrɔ lɔn, wo ye a fɔla di ko «Amina» ka a masɔrɔn i ye mɛn fɔla, a ma wo lɔn? 17 Hali i ye baraka bilala Alla yɛ kosɛbɛ, mɔɔ gbɛrɛ tɛ dɛmɛnnin sɔrɔnna.

18 N ye baraka bilala Alla yɛ ka a masɔrɔn nde ye kan gbɛrɛilu fɔla ka tamin ai bɛɛ la. 19 Kɔni an wa kɛ lemɛniya jama ladɛn dɔ hali n ka kumakan loolu le dɔrɔn fɔ, mɛnilu kɔrɔ ri lɔn, kosa n ye mɔɔilu karan, wo ka fisa nde yɛ sani n ye kuma waa siyaman fɔ kan gbɛrɛ rɔ.

20 N badenmailu, ai hankili kana kɛ ikomin denniilu. Ai ye kɛ ikomin denmɛsɛnilu kojuuilu la ko rɔ, kɔni ai ye kɛ balikuyanin di ai hankili rɔ. 21 A sɛbɛnin Sariya Kitabu kɔndɔ:

«Maari ka a fɔ ko,

‹N ye kumala jama ɲin yɛ woilu le fɛ

mɛnilu ye londan kanilu fɔla

a ni londanilu da rɔ kan fɛ

kɔni hali wo,

ii ti nala ii tolo malɔla n na.› »*

22 Wo rɔ, kan gbɛrɛilu kɛnin tɔɔmasereilu ri lemɛniyabaliilu le yɛ. A tɛ kɛla lemɛniya mɔɔilu la ko rɔ, kɔni nabiya kumailu kɛnin tɛ tɔɔmasereilu ri lemɛniyabaliilu yɛ fɔɔ lemɛniya mɔɔilu.

23 Nba, ni lemɛniya jama bɛɛ ka ii ladɛn, bɛɛ ye kumala a ta kan gbɛrɛilu rɔ, ni mɔɔ doilu nara, mɛnilu ma a kɔrɔ lɔn wala ii lemɛniyanin tɛ, woilu tɛ a fɔ wa, ko fa le donni ai rɔ? 24 Kɔni ni ai bɛɛ ye nabiya kumailu fɔla, lemɛniyabali do wa don ai tɔrɔfɛ, wala mɛn ma a kɔrɔ lɔn, wo kumailu bɛɛ ye a sɔnilu le yirakala a la, bɛɛ ri a kiti. 25 A jusu rɔ gbunduilu ri bɔ gbɛma. Wo rɔ, a ri a ɲɔnkin, ka a ɲakɔrɔ bɛn duu ma, ka Alla bato, ka a fɔ ko, «Tuɲa le a ri, Alla ye ai tɛma.»

26 N badenmailu, ai ye nfen kɛ ai wa ai ladɛn waati mɛn na? Bɛɛ ye na kalaman do ri, wala karan, wala Alla la ko lɛnkɛnɛmaya, wala kan gbɛrɛ do, wala kan natamin. Wo bɛɛ ye kɛ lemɛniya jama sɛɛbɛ don ko ri. 27 Ni mɔɔ doilu ye kumala kan gbɛrɛ rɔ, mɔɔ fila wala sawa, woilu bɛɛ ye kuma kelen kelen ɲa ma. Kɔni ii ye mɛn fɔla fɔɔ mɔɔ gbɛrɛ ye wo latamin. 28 Ni mɔɔ tɛ ye mɛn di a kɔrɔ fɔ, wo tii ye a makun lemɛniya jama rɔ wo rɔ, kɔni a ye kuma a ni Alla tɛma. 29 Keladen fisamanteilu fanan, mɔɔ fila wala sawa mɛnilu ye nabiya kumailu fɔla, woilu ye kuma, doilu ye ii la kumailu fɛsɛfɛsɛ. 30 Kɔni ni mɔɔ do siinin ai tɛma ladɛn dɔ, Alla ye ko do yiraka a la, a bɛnnin de, kumala fɔlɔ ye a makun fɔlɔ. 31 Baa A bɛnnin de, ai ye nabiya kumailu fɔ kelen kelen ɲa ma kosa ai bɛɛ ye karan sɔrɔn, ka lalemɛniya. 32 Keladen fisamanteilu la dinmalifen ye ii la nɔɔ le kɔrɔ, 33 baa Alla kɛnin tɛ ko rabasanna Alla ri, kɔni fɔɔ jususuma Alla.

A ye wo ɲa le ma mɔɔ sɛnimanilu lemɛniya jama bɛɛ rɔ.

34 Musoilu ka kan ka ii makun ladɛn dɔ, ka a masɔrɔn ii ma kan ka kuma, kɔni ii ye ii fanmajii ikomin sariya ka a fɔ ɲa mɛn ma. 35 Ni ii ye a fɛ, ka ko do ɲayen, ii ye ii la cɛɛilu maɲininka ii wara. Muso wa kuma ladɛn dɔ, maloya ko le wo ri.*

36 Alla la kuma bɔnin ai wara le wa? Wala a nanin aile le kelen ma wa? 37 Ni mɔɔ si ka a miri ko keladen fisamante le ale ri wala Alla la Nii Sɛniman na dinmalifen ye a bolo, n ye ko mɛnilu sɛbɛla ai ma, a ka kan ka a lɔn ko Maari la jamariilu le woilu ri. 38 Ni a ma kuma ɲin jate, a fanan tɛ a jatela.

39 Wo le rɔ, n badenmailu, nabiya kumailu fɔ lɔɔ ye ai mirala. Ai kana tɔn sii kan gbɛrɛ fɔ ko la fanan. 40 Kɔni ko bɛɛ ye ɲabɔ koɲuma sila kan.