1 Ai ka mɛn sɛbɛ bolo ladɛn na ko rɔ ka bɛn jama sɛniman na ko ma, an ye na wo ma. Ai ye kɛ ikomin n ka jamarili mɛn di Kalati jamana lemɛniya jama ladɛnilu ma. 2 Lahadi lahadi, ai kelen kelenna bɛɛ ye wodi do lamara a danna ai wara, ka bɛn ai la sɔrɔnninya jate ma, kosa ai kana n makɔnɔn ai la bolo ladɛn ko rɔ. 3 N wa na waati mɛn na, ai wa mɔɔ mɛnilu suwandi, n di woilu lawa jamarili bataki ye ii bolo, ka ai la dinmalifenilu lawa Jerusalɛmu so kɔndɔ. 4 Kɔni ni a bɛnnin nde jɛrɛ ye wa, fɔɔ an bɛɛ ye wa wo rɔ.

5 N wa tamin Masedoni jamana rɔ waati mɛn na, n di wa ai wara, baa n di tamin ye. 6 Tumado n di waati dɔndɔ kɛ ai wara, wala nɛnɛ waati bɛɛ. Wo rɔ, ai ri n fanda n na taama rɔ n wa kɛ taala yɔrɔ mɛn. 7 N tɛ a fɛ, ka ai yen gbansan, ka tamin. N ye a fɛ le ka waatinin kɛ ai wara, ni Maari sɔnda. 8 Kɔni n di to Ɛfɛsi so kɔndɔ haan Dabondɛ Sali lon, 9 ka a masɔrɔn da ba ra laka n yɛ ka baara bɛrɛ kɛ, wo ni n kɛlɛkɛɲɔɔilu ka siya.

10 Ni Timote nara, ai ye a ramira kosa silan si kana a mira, baa a ye baarala Maari le yɛ ikomin nde. 11 Wo rɔ, mɔɔ si kana a lagboyaɲɛ. Kɔni ai ye a fanda a la taama rɔ jususuma rɔ, kosa a ye a kɔsɛ n tɔrɔfɛ ikɔ tuun, n ye a ni an badenma doilu makɔnɔnna yan.

12 Ai ka mɛn sɛbɛ an badenma Apɔlɔsi la ko rɔ, an ye na wo ma. N da a madiya haan kosa a ye wa ai wara a ni badenma doilu, kɔni a ɲɛnikɛ tɛrɛ tɛ a ri ka wo kɛ fɔlɔ. Ni a ka fɛrɛ sɔrɔn, a ri wa.

13 Ai ye to ai ɲana, ka to lemɛniya rɔ gben gben. Ai ye ai wakila, ka fanka sɔrɔn. 14 Ai ye ko bɛɛ kɛ kaninteya rɔ.

15 Ai ka a lɔn ko Esitefana ni a la denbaya le fɔlɔ tubira Isa ma Akaya jamana rɔ, ii ka ii jɛrɛ to jama sɛnimanna baara la. N badenmailu, n ye ai madiyala, 16 ai ye kolo wo mɔɔ suilu ma, a ni mɛnilu bɛɛ ye ii kologbɛlɛyala baara ɲin dɔ.

17 N da sɛwa Esitefana na ko la, a ni Foritunatusi ni Akayikusu. Baa ai tɛrɛ tɛ yan, mɛn dɛsɛnin tɛrɛ n ma ii ka wo don de n bolo ai nɔ rɔ. 18 Ii ra n nii ladiya n ma ikomin ii ka ai nii ladiya ai ma ɲa mɛn ma. Ai ye wo mɔɔ suilu gbiliya.

19 Asi jamana lemɛniya jamailu ye ai tuwala. Akila ni Pirisili ni lemɛniya jama mɛnilu ye ii ladɛnna ii la bon kɔndɔ, woilu ye ai tuwala Maari tɔɔ rɔ kosɛbɛ! 20 Lemɛniya mɔɔ mɛnilu bɛɛ ye yan, woilu ye ai tuwala. Ai ye ai ɲɔɔn tuwa badenmaya tuwali sunbuli rɔ.

21 Nde Pɔli le tuwali kan ɲin sɛbɛla n bolo la.

22 Mɛn tɛ Maari kaninna, wo ye danka.

«An Maari, na jonna!» 23 An Maari Isa la hina ye to ai fɛ. 24 N na kaninteya ye ai bɛɛ yɛ Ɲenematɔmɔnin Isa baraka rɔ.