1 Wo rɔ, mɔɔilu ye an jate Ɲenematɔmɔnin na baarakɛlailu le ri, Alla la gbundu koilu karifanin mɛnilu la. 2 Nba, telen de maɲininkanin baaradenilu la. 3 Wo tɛ foyi ri nde yɛ, ni aile ka n na kiti tɛɛ wala adamadenilu la kitila diya do. Nde jɛrɛ ti se n jɛrɛ lakiti tɛɛla, 4 baa n hankili ma n na kiti tɛɛ, kɔni wo tɛ a kɛ ko n telennin. Mɛn ye n makitila, Maari le wo ri. 5 Wo le rɔ, ai kana kiti la sani a waati lanin ye se, sani Maari ye na, mɛn ye dibi ko dokonniilu labɔla kɛnɛma, ka jusu rɔ koilu lɛnkɛnɛmaya. Wo rɔ, bɛɛ ri a la gbiliya sɔrɔn Alla bolo.

6 N badenmailu, n ka wo koilu bɛɛ fɔ n jɛrɛ ni Apɔlɔsi ma aile le la ko rɔ kosa an na misali ye sanda ɲin kɔrɔ yiraka ai la ko «Ai kana tamin ko sɛbɛninilu la.» Wo rɔ, ai ti nala wasola, ka mɔɔilu lafisaya ii ɲɔɔn ko. 7 Nfen ka ile tamin doilu la? Nfen ye i bolo, mɛn ma don i bolo? Ni a donnin i bolo le, nfenna wo rɔ i ye i jɛrɛ matɔɔla ikomin ile jɛrɛ le ka a sɔrɔn?

8 Ai ra wasa jonna! Ai ra kɛ nanfulutiilu ri jonna! Ai ra kɛ mansailu ri wa? A ri diya n yɛ fewu ai tun da kɛ mansailu ri kosa an fanan ye kɛ a ri ai fɛ. 9 Baa n hankili tɛrɛ a ma ko Alla ra andeilu talibidenbailu to kɔma ikomin mɔɔ miranin mɛnilu jalakinin ii ye faa jama ɲa lamaa fen di, an da kɛ ragbɛ fen di dunuɲa mɔɔilu bɛɛ ɲakɔrɔ a ni mɛlɛkailu. 10 Hankilidɔɔ le andeilu ri Ɲenematɔmɔnin na ko rɔ. Kɔni hankilima le aile ri Ɲenematɔmɔnin dɔ. Fanka tɛ andeilu la, kɔni aile, fanka ye aile la. Aile gbiliyanin, kɔni andeilu yarabinin. 11 Haan sisɛn kɔnkɔ ye an na, ji lɔɔ ye an na, feriya ye an na. An ɲakankatannin, jiya diya tɛ an bolo. 12 An ye baara gbɛlɛn kɛla an boloilu la. Ii wa an nanin, an di duwa ii yɛ. Ii wa an ɲakankatan, an di lemɛniya. 13 Ii wa an mafɔ, andeilu ri ii lalemɛniya. An da kɛ dunuɲa ɲama duu ta ri ikomin fen kɔsɔnilu haan sisɛn.

14 N ma ɲin sɛbɛ ai ma kosa n ye ai lamaloya, kɔni kosa n ye ai lalɔn ikomin n kaninte denilu. 15 Baa hali karanmɔɔ waa tan (10,000) lɔnin tɛrɛ ai ɲɛrɔ mɛnilu ye ai karanna Ɲenematɔmɔnin na ko rɔ, fa siyaman tɛ ai la, baa n da kɛ ai fa ri Ɲenematɔmɔnin Isa la ko rɔ, a la ko Kibaro Ɲuma la ko kosɔn. 16 Wo le rɔ, n ye ai madiyala, ai ye n nadɛn. 17 N ka Timote lawa ai ma wo le rɔ. N diyanan dencɛ le a ri a ni lemɛniya mɔɔ Maari la ko rɔ. A ri n na silailu labila ai la Ɲenematɔmɔnin Isa la ko rɔ, n ye lemɛniya jamailu bɛɛ karanna mɛnilu la yɔrɔ bɛɛ rɔ.

18 Aile doilu ye ai jɛrɛdabayala, ikomin n tɛ nala ai tɔrɔfɛ. 19 Kɔni ni Maari sɔnda, n di na ai tɔrɔfɛ sisɛn. Wo rɔ, n di na wo mɔɔ wasoninilu fanka lɔn diya, wala ni ii ye kumala gbansan. 20 Baa kuma tɛ Alla la mansaya ri, fɔɔ fanka. 21 Nfen duman ai yɛ? N ye na bonsan di ai ɲɛrɔ? Wala kaninteya ni ɲumaya?