1 N ka kan ka to n jɛrɛ matɔɔla, hali tɔnɔ si tɛ a la. Kɔni koyen mɛnilu kɛnin ikomin sibo, a ni Maari ra ko mɛnilu yiraka, n di woilu fanan fɔ. 2 N ka mɔɔ do* lɔn mɛn ye Ɲenematɔmɔnin dɔ. Wo layɛlɛra ten haan sankolo sawana. Wo taminda san tan ni naanin. A gbengben, n ma a lɔn ni a faribanku le yɛlɛra sankolo rɔ, wala ni a ka koyen de kɛ ikomin sibo. Alla le ka wo lɔn. 3 N ka a lɔn cɛɛ ɲin yɛlɛra ten de, kɔni ni a faribanku yɛlɛra, wala ni a ka koyen de kɛ ikomin sibo, n ma wo le lɔn. Alla le ka wo lɔn. 4 A yɛlɛra ten de ka yɛlɛ harijeene. A ka kumailu lamɛn mɛnilu ti se fɔla, a dahanin tɛ mɔɔ ma ka a kuma wo fɔ. 5 N di wo mɔɔ su matɔɔ, kɔni nde, n ti nala n jɛrɛ matɔɔla fɔɔ n na fankatanɲa. 6 Ni n tɛrɛ ye a fɛ ka n jɛrɛ matɔɔ, n tɛrɛ tɛ kɛla hankilidɔɔ ri, baa n tɛrɛ tuɲa le fɔla. Kɔni n ye n jɛrɛ mirala kosa mɔɔ si kana n jate ka tamin n kɛwaliilu la ai ka mɛnilu yen a ni ai ka mɛnilu lamɛn.

7 Wo rɔ, Alla ka tɔrɔya ko do latɛɛ n ma ikomin wɔnin wa kɛ faribanku rɔ, mɛn kɛnin tɛrɛ Setana la keladen do ri. Wo ka n ɲakankatan kosa n kana fa waso rɔ, n ka ko lɛnkɛnɛmayanin ba ɲinilu yen. 8 N da Maari matara siɲa sawa ka wo tɔrɔya ko bɔ n kan. 9 Kɔni, a ka n jabi, «N na hina ri i wasa. N fanka ye lakanbalila fankatanɲa le rɔ.» Wo rɔ, n nakaliman n jɛrɛ matɔɔla n na fankatanɲa rɔ, kosa Ɲenematɔmɔnin fanka ye to n fɛ. 10 Wo le rɔ, n ka n jɛrɛ hɛnɛ fankatanya ni naninniilu ni ko gbɛlɛnilu ni bɛsɛnkɔniya ni kɔndafiliilu rɔ Ɲenematɔmɔnin na ko rɔ. Baa ni n fanka banda waati mɛn na, n ye fanka sɔrɔnna wo waati le rɔ.

11 N tɛrɛ kumala ikomin hankilidɔɔ, kɔni ai ka n diyagboya ten. Aile le tɛrɛ ka kan de ka n nana, baa mɛnilu ye ii jɛrɛ jatela talibidenba fisamantɛilu ri, woilu taminnin tɛ n na foyi rɔ, hali fen tɛ n di. 12 Tɔɔmasere mɛnilu ka a yiraka ko talibidenba le mɔɔ ri, an da woilu kɛ ai tɛma tunadiya ba rɔ, ka kɛ tɔɔmasereilu ni kabannakoilu ni ko masilanninilu ri. 13 An ka lemɛniya jama doilu lafisaya ai ko ɲa ɲuman ma? Fɔɔ n donin mɛn ma to ai kun ma dɔrɔn. Ai tɛ diɲɛ wo telenbaliya ma wa?

14 Sisɛn n dabɛn ko sawana le ɲin di ka wa ai wara. N donin ti nala tola ai kun ma fanan. Ka a masɔrɔn n tɛ ai bolofenilu kɔ, kɔni fɔɔ ai jɛrɛ. Wo rɔ, denilu ma kan ka wodi ladɛn ii sɔrɔnbailu yɛ, kɔni denbaya tiilu le wodi ladɛnna ii denilu yɛ. 15 Wo rɔ, a ri kɛ sɛwa ri, ka n bolofenilu bɛɛ di, ka n jɛrɛ di ai niiilu la ko rɔ. Ni n ka n na kaninteya makafu ai yɛ, ai la kaninteya ri dɔɔya nde ma wa?

16 A ye to wo ɲa. N kɛnin tɛ donin di ai kun ma. Kɔni mɔɔilu ye a fɔla, ko baa n kɛnin janfante le ri, n ka ai mira kewuya le la. 17 N ka keladen mɛnilu lawa ai ma, n ka ai labaara le wo do fɛ wa? 18 N ka Tite madiya le kosa a ye wa ai wara, n ka lemɛniya mɔɔ do* lawa a kɔfɛ. Tite ka ai labaara le wa? An bɛɛ kɔndɔ ko kelen kɛɲa kelen tɛrɛ tɛ a ri an taama ɲa rɔ wa? 19 Tumadɔ, ai mirinin ko an karannin an kun makɛlɛ ko le la ai tɔrɔfɛ. Ɛn-ɛn. An ye kumala Alla le ɲakɔrɔ a la Mɔɔ Ɲenematɔmɔnin baraka rɔ. N kaninteilu, an ye wo ko bɛɛ kɛla ai la fanka don ko le la. 20 N silannin de, n wa na waati mɛn na, n di ai tɛrɛn ɲa mɛn ma, wo tɛ diyala n yɛ, a ni ai fanan di n sɔrɔn ɲa mɛn ma, wo tɛ diyala ai yɛ. N silannin de lagboyaɲɛ ni keleya ni jusumaya ni natabaya ni kuma juu ni mɔɔ mafɔ ni waso ni ko rabasan wa to ai tɛma. 21 N silannin de n wa na ikɔ tuun, n na Alla ri n namaloya ai ɲakɔrɔ, ko n di kasi mɔɔ siyaman na ko rɔ mɛnilu tun da julumun kɛ kɔni haan bi ii tɛ ii kɔnkɔ donna ii la ko kɔsɔnilu ni ii la jalonya ni ii la ko haramunninilu la, ii tɛrɛ mɛnilu kɛla.