1 An da an jɛrɛ lanali damira ikɔ tuun wa? Wala an mako ye an dantɛɛ batakiilu le la wa mɛnilu ye an tɔnɔ fɔla ai yɛ wala ai ye mɛnilu sɛbɛla doilu ma an na ko rɔ ikomin mɔɔ doilu ye ɲa mɛn ma? 2 Aile jɛrɛ kɛnin an dantɛɛ bataki le ri, mɛn sɛbɛnin an jusuilu rɔ, mɔɔilu bɛɛ ri se mɛn lɔnna, ka a karan. 3 Ai ra kɛ bataki ri Ɲenematɔmɔnin ka mɛn sɛbɛ an na baara rɔ, mɛn sɛbɛnin tɛ duwa ji la wala kaba walan kan,* kɔni Alla ɲenema la Nii Sɛniman de ka wo sɛbɛ faribanku walan kan ai jusuilu rɔ.

4 Wo jii le an bolo Alla ɲakɔrɔ a la Mɔɔ Ɲenematɔmɔnin baraka rɔ. 5 Adon, wo tɛ wo ri ko fanka ye an na an wa baara si kɛ, kɔni an fanka bɔnin Alla le bolo. 6 Ale le ka fanka di an ma, ko an ye teriya kura baara kɛ, mɛn faranin tɛ sariya sɛbɛnin na fɔɔ Alla la Nii Sɛniman, baa sariya sɛbɛnin ye saya le lanala, kɔni Alla la Nii Sɛniman ye nii lakisi le dila.

7 Nba, sariya baara mɛn ka saya lana, mɛn kɛrɛndɛnnin tɛrɛ kaba walanilu kan, ni wo nanin gbiliya le rɔ haan Musa ɲakɔrɔ tɛrɛ ti se mafɛnɛnna a nɔɔrɔ rɔ, Isirayɛlikailu ti se ii ɲa lɔla a la hali a ɲakɔrɔ nɔɔrɔ tɛrɛ wala banna, ni wo nara wo gbiliya su rɔ, 8 Alla la Nii Sɛniman baara gbiliya ti nala warala ka tamin wo la wa? 9 Baara mɛn ye mɔɔilu jalakila, ni wo kɛra gbiliya ri, baara mɛn ye mɔɔilu latelenna Alla ɲakɔrɔ, wo gbiliya ri wara haan ka tamin wo la. 10 Baa, mɛn kɛnin tɛrɛ gbiliya ri, gbiliya tɛ a rɔ, ni an ka a ni gbiliya fisamantɛ la ɲɔɔn ma. 11 Awa, baara mɛn tɛrɛ banna, ni wo nanin gbiliya le rɔ, wo rɔ mɛn ye tola habadan, wo la gbiliya dan ye min?

12 Wo le rɔ, baa wo jii ye an bolo, an hankili latɛɛnin haan. 13 Andeilu kɛnin tɛ ikomin Musa, mɛn tɛrɛ faanin birinna a ɲa kun na kosa Isirayɛlikailu kana a ɲakɔrɔ mɛlɛn yen, mɛn tɛrɛ wala banna. 14 Kɔni ii jusu tɛrɛ ra gbɛlɛnya bakɛ, baa haan bi, ii wa kɛ Teriya Kɔrɔ karanna, a kɛnin ikomin wo faanin ye ye fɔlɔ, ii ma a ɲayen. A ma bɔ fɔlɔ, ka a masɔrɔn a tɛ bɔ fɔɔ Alla la Mɔɔ Ɲenematɔmɔnin dɔ. 15 Hali bi, ii wa kɛ Musa la Kitabu yɔrɔilu karanna, faanin birinnin ii jusu kun na. 16 Kɔni mɔɔ wa a ɲa latiliminin Maari ma, faanin di bɔ wo rɔ.* 17 Nba Maari le Nii Sɛniman di. Maari la Nii Sɛniman ye yɔrɔ mɛn dɔ, hɔrɔya le ye. 18 Andeilu bɛɛ, Alla la gbiliya nɔɔrɔ le mɛlɛnmɛlɛnna an ɲakɔrɔilu rɔ, an tɛ faanin birinna an ɲa kun na. An ye tola yɛlɛmanna ale sawura le rɔ, an na gbiliya ri to warala, ka fara Maari la, mɛn kɛnin Alla la Nii Sɛniman di.