1 N badenmailu, Alla la hina ye baarala Masedoniya lemɛniya jama tɛma ɲa mɛn ma, an ye a fɛ ai ye wo lɔn. 2 Ka bɔ ii la tɔrɔya juu rɔ, ii la sɛwa ba ni ii la bolokolonya gbɛlɛn ka sɔli kɛ fonesereya ba rɔ. 3 N ye ii la sereya bɔla ko ii ka sɔli kɛ le ikomin ii fanka bɛrɛ, a taminda wo la fanan ii ɲɛnikɛ ɲuma rɔ. 4 Ii ka an madiya le kosɛbɛ, ko ii ye wo gbiliya sɔrɔn, kosa an bɛɛ ye jama sɛniman dɛmɛn an ɲɔɔn fɛ Jerusalɛmu so kɔndɔ. 5 Ii taminda ten an na miriya la. Ii ka ii jɛrɛ di Maari ma fɔlɔ. Wo kɔ rɔ, ka ii jɛrɛ di an fanan ma Alla sawo rɔ. 6 Wo rɔ, Tite mɛn ka hina baara ɲin damira ai wara, an da wo madiya, a ye wa a lakanbali ai tɛma. 7 Kɔni ai ye ai fanka donna ko bɛɛ rɔ ɲa mɛn ma, lemɛniya ni kuma ni lɔnnin ni wakali bɛɛ ni kaninteya la an yɛ, wo rɔ ai ye ai fanka don hina baara ɲin fanan dɔ.

8 N tɛ jamarili lala ai kan, kɔni n wa kɛ doilu la baara la ko fɔla, n ye wo kɛla kosa n di ai la kaninteya kɔrɔbɔ ka a lɔn ko ai wakalinin. 9 Baa ai ka an Maari Isa Ɲenematɔmɔnin na hina lɔn, ko hali fen tii le tɛrɛ a ri, adon a ka a jɛrɛ kɛ bolokolon di ai la ko rɔ, kosa ai ye kɛ fen tiilu ri a la bolokolonya baraka rɔ.

10 Wo rɔ, n ye n miriya le yirakala ai la ko ɲin dɔ: aile le fɔlɔ ka ai bolo ladɛn sɔli la ko rɔ san taminnin, ka bɔ wo la fanan, aile le fɔlɔ ka a wɔnike. 11 Awa, ai ye wo baara laban kosa ai bɛnnin ɲɛnikɛ ɲuma mɛn ma a damira, ai ye wo lakanbali wo ɲa ma, ka fara ai la fɛrɛilu la. 12 Baa ni wɔnike ɲuma ye ai la, Alla ri ai la sɔlifen jate ai bolofenilu kasabi ma, fen mɛn tɛ ai bolo, wo tɛ.

13 An tɛ a fɛ, ka donin bɔ doilu kun ma, ka a sii aile kun ma, kɔni an ye a fɛ le bɛɛ ye kaɲa. 14 Kɔni baa fen siyaman ye ai bolo waati ɲin dɔ, a bɛnnin de, ai ye woilu dɛmɛn mɛnilu mako ye ai bolofenilu la ten. Wo rɔ, ai bolofenilu wa dɛsɛ waati mɛn na, ii fanan di ai dɛmɛn ii bolofenilu la kosa ai bɛɛ ye kaɲa. 15 A sɛbɛnin Kitabu kɔndɔ ko, «Mɛnilu ka a siyaman matɔmɔ, woilu ta ma siya. Mɛnilu ka dɔɔni matɔmɔ, a ma dɛsɛ woilu fanan ma.»*

16 An ye baraka bilala Alla yɛ, mɛn ka wo haminya kelen bila n ni Tite jusu rɔ ai yɛ. 17 An ka mɛn maɲininka Tite la, a ra sɔn wo ma, a ra a wakali fanan, ka a ɲɛnikɛ ko a ye wa ai tɔrɔfɛ. 18 An ye a ni an badenma do lawala ai ma, lemɛniya jamailu ye matɔɔla a la baara la ko rɔ Isa la ko Kibaro Ɲuma lase ko la. 19 Mɛn taminnin wo la, lemɛniya jama bɛɛ ra ale suwandi, ka wa an malɔ diya, an wa kɛ tala sɔlifen ɲinilu ri waati mɛn na, mɛnilu donin siinin an kun ma Maari jɛrɛ gbiliya ko rɔ, ka an na wakali yiraka doilu dɛmɛn ko rɔ.

20 An ye a kɛla an hankili la kosa mɔɔ si kana an mafɔ sɔlifen ba ɲinilu mamira ɲa la ko rɔ. 21 Baa mɛn dahanin Maari ɲakɔrɔ a ni mɔɔilu ɲakɔrɔ, an ye karanna wo le kɛ diya.

22 An ye mɛn lala wo mɔɔ filailu kan, an ye an badenma do lawala ii malɔ diya. An da a ragbɛ siɲa siyaman, ka a lɔn, ka a ɲɛnikɛ waati bɛɛ. A ra wo ɲɛnikɛ yiraka ten fanan baa a lanin ai la haan! 23 Tite le, wo kɛnin n teri ni baaradenɲɔɔ le ri ai tɛma. An badenma mɛnilu lawanin, lemɛniya jama la keladenilu le woilu ri Ɲenematɔmɔnin na gbiliya la ko rɔ. 24 Wo le rɔ, ai ye kaninteya yiraka ii la, wo ni an jɛrɛdabaya kun ai la ko rɔ, kosa lemɛniya jamailu ye a yen.