1 Nba, Isa ka kuma kɔrɔlama do fɔ ii yɛ. A ka a fɔ ko: «Harijeene mansaya kɛnin ikomin sɛnɛtii do la ko. Sɛnɛtii wo bɔra sɔɔma da la jonna ka wa baaraden doilu ɲinin, mɛnilu ri sɔn ka wa baara diya a la rɛsɛnfɛ rɔ. 2 A ka mɔɔ mɛnilu sɔrɔn, a ni woilu bɛnda a rɔ ko tele kelen baara sara ri kɛ wodi gbanan kelen di. Wo rɔ, a ka ii lawa baara diya a la rɛsɛnfɛ rɔ. 3 Waati sawa ɲɔɔn taminni kɔ, sɛnɛtii bɔra ikɔ tuun. A ka mɔɔ doilu lɔni yen bara rɔ, mɛn tɛ foyi kɛla. 4 A ka a fɔ woilu yɛ ko: ‹Ai fanan ye wa baara diya rɛsɛnfɛ rɔ. Sara mɛn ka kan ka a di ai ma, n di wo di ai ma.› 5 Mɔɔ woilu wara rɛsɛnfɛ rɔ. Midi waati, sɛnɛtii bɔra ka wa wo ɲɔɔn kɛ. Waati sawa taminni wo kɔ, a bɔra ka wa wo ɲɔɔn kɛ ikɔ tuun. 6 Wura fɛ, sɛnɛtii bɔra ikɔ tuun. A ka mɔɔ doilu lɔni yen ikɔ. A ka a fɔ woilu yɛ ko: ‹Nfenna ai ra tele bɛɛ kɛ lɔni yan, ai ma baara kɛ?› 7 Ii ka a jabi: ‹An ma baara kɛ ka a masɔrɔn mɔɔ si ma an ta baara la.› A ka a fɔ ii yɛ ko: ‹Ai fanan ye wa baara diya n na rɛsɛnfɛ rɔ.›

8 «Nba, tele bera tuma mɛn na, sɛnɛtii ka a fɔ a la baara kuntii yɛ ko a ye baaradenilu kili ka ii sara. Ko baaraden mɛnilu nara a tɔilu bɛɛ kɔ, ko a ye sarali damira woilu ma, ka na se mɔɔ fɔlɔilu ma. 9 Wo rɔ, mɔɔ mɛnilu sera ye telebe tumana, a ka wodi gbanan kelen di ii kelen kelenna bɛɛ ma. 10 Mɔɔ mɛnilu fɔlɔ sera baara diya, sarali dakun seni ii ma, ii tɛrɛ ye ii mirila ko ii sara ri siyaya ka tamin tɔilu ta la. Kɔni woilu bɛɛ ka wodi gbanan kelen kelen sɔrɔn. 11 Nba, wodi dini kɔ ii ma, ii ka sɛnɛtii mafɔ damira. 12 Ii ka a fɔ ko: ‹Baaraden mɛnilu nara bɛɛ kɔ ɲin di, ii ka waati kelen pe baara le kɛ. Kɔni i ra an ni woilu bɛɛ sara kɛ kelen di, ka a tɛrɛn andeilu le ka an daja tele muumɛ kɔrɔ, ka baara kɛ tele kɔrɔ.› 13 Sɛnɛtii ka kelen jabi ii rɔ: ‹N badenma, n ma i tɔɲɔ de! An bɛnda wodi gbanan kelen de ma, wo tɛ? 14 I ye i la sara ta ka wa. Mɔɔ mɛn nara baara diya ai tɔ la, n ye a fɛ ka wodi gbanan kelen di wo fanan ma, ikomin n ka a di i ma ɲa mɛn ma. 15 A ye di? N ma kan ka n bolofenilu kɛ ɲa ma mɛn duman n yɛ wa? Ni wo tɛ, n fonesere, wo ɲangboya ye i la wa?›

16 «Wo le rɔ, kɔmɔɔilu ri kɛ ɲɛmɔɔilu ri. Ɲɛmɔɔilu ri kɛ kɔmɔɔilu ri fanan.»

17 Nba, Isa watɔla Jerusalɛmu, a ka a la karanden tan ni fila kili ii dan na. Ka ii to taamanna, a ka a fɔ ii yɛ ko: 18 «Ai ɲa lɔ! An watɔ Jerusalɛmu. Mɔɔ Dencɛ ri don sarakalasela kuntiiilu ni sariya karanmɔɔilu bolo. Woilu ri kiti labe a kan ko a ka kan ka faa. 19 Ii ri a don siya gbɛrɛ mɔɔilu bolo sa woilu ri a lafɛya, ka a gbasi bonsan na, ka a gbɔngbɔn jiri kan ka a faa. Kɔni tele fila a sawana, a ri wuli.»

20 Nba, Sebede muso ni a dencɛ fila nara Isa tɛrɛn. A ka a majii Isa kɔrɔ ka a madiya ko do la. 21 Isa ka a fɔ a yɛ ko: «Ai ye a fɛ n ye nfen de kɛ ai yɛ?» A ka Isa jabi: «I ye a to n dencɛ fila ye ii sii i dafɛ. Kelen di a sii i bolokinin fɛ, a tɔ kelen di a sii i bolomaran fɛ, i wa don i la mansaya rɔ tuma mɛn na.» 22 Kɔni Isa ka a jabi: «Ai ye ko mɛn tarala, ai ma wo kɔrɔ lɔn. Tɔrɔya mɛn kɛtɔ n sɔrɔnna, ai ri se wo muɲunna wa?» Sebede dencɛ fila ka Isa jabi: «Ɔɔn, an di se a kɔrɔ.» 23 Isa ka a fɔ ko: «N di tɔrɔya mɛn muɲun, ai fanan di wo ɲɔɔn muɲun. Kɔni sii diya mɛnilu ye n bolokinin ni n bolomaran fɛ, woilu diba tɛ nde ri. N Fa ka sii diya woilu rabɛn mɔɔ mɛnilu yɛ, a ri ii di woilu le ma.»

24 Karanden tɔ tan ka kuma wo mɛn tuma mɛn na, woilu mɔnɛra badenma fila woilu kanma. 25 Kɔni Isa ka karandenilu bɛɛ kili, ka a fɔ ii yɛ ko: «Ai ka a lɔn ko jamana mansailu ye kuntiiya kɛla ii la jamanadenilu kan diyagboya la. Jamana mɔɔbailu ri fanka la jamanadenilu kan. 26 A ma kan ka kɛ ten ai tɛma. Mɛn ye a fɛ ka kɛ mɔɔba ri ai rɔ, wo tii ka kan ka kɛ ai dɛmɛnba ri. 27 Mɛn ye a fɛ ka kɛ ai rɔ ɲɛmɔɔ ri, wo tii ye kɛ ai la jɔn di. 28 Wo ɲa kelen ma, Mɔɔ Dencɛ ma na dunuɲa rɔ ko mɔɔilu ye baara kɛ a yɛ. A jɛrɛ nara baara kanma, a ni ka a nii di ka kɛ mɔɔ siyaman kunka sara ri.»

29 Nba, Isa ni a la karandenilu bɔtɔla Jeriko so kɔndɔ, jama ba bilara a kɔ. 30 Ɲa funyen cɛɛ fila siini tɛrɛ sila dala. Woilu ka a mɛn tuma mɛn na ko Isa le tamintɔ, ii wɔyɔra ko: «Maari, mansa Dawuda dencɛ, i ye hina an na.» 31 Jama ka ii makuma ko ii ye ii makun. Kɔni ii pɛrɛnda ka tamin fɔlɔman kan ko: «Maari, mansa Dawuda dencɛ, i ye hina an na.» 32 Isa ka a lɔ ka ii kili, ka a fɔ ii yɛ ko: «Ai ye a fɛ n ye nfen de kɛ ai yɛ?» 33 Ii ka a fɔ ko: «Maari, an ye a fɛ i ye an ɲa laka.» 34 Ii kininkinin donda Isa rɔ. A ka a maa ii ɲa la, ii ɲa lakara i kɔrɔ ye. Ii ka ii bila Isa kɔ i kɔrɔ.