1 Nba, mankan sumara tuma mɛn na, Pɔli ka karandenilu kili ladɛn dɔ. A ka ii lali ka ii sɛɛbɛ don, ka ban ka sila ɲinin ii fɛ. Wo rɔ, a bɔra ye ka wa Masedoni. 2 A ka jamana wo rataama ka ye lemɛniya mɔɔilu lali ka ii sɛɛbɛ don kuma siyaman ma. Wo rɔ, a nara se Kirɛki jamana rɔ. 3 A ka karo sawa kɛ ye. A tɛrɛ ye a rabɛnna tuma mɛn na ka wa Siri jamana rɔ kulunba kɔndɔ, a ka a mɛn ko Judiya doilu ra bɛn kan kelen ma ko ii ri a faa. Wo rɔ, a ka taama wo rasa ko a ri a kɔsɛ Masedoni jamana rɔ. 4 Sopatɛri mɛn bɔni Bere, Pirusi dencɛ kɔnin, wo wara Pɔli malɔ. Arisitariki ni Sekundusi, mɛn bɔni Tesaloniki, fanan wara a malɔ, a ni Kayusi, mɛn bɔni Dɛribɛ, ni Timote, a ni Tisiki ni Torofime, mɛn bɔni Asi jamana rɔ. 5 Cɛɛ woilu wara an ɲɛfɛ ka an makɔnɔ Torohasi. 6 Buru Fununbali Sali banda tuma mɛn na, an bɔra Filipi kulunba kɔndɔ. An ka tele loolu kɛ ji kan ka na ii tɛrɛn Torohasi, ka lɔɔkun kelen kɛ ye.

7 Ɲɔɲɔ Lon dafara tuma mɛn na, an ka an nadɛn ka dɔɔnnin kɛ an ɲɔɔn fɛ. Pɔli tun da a latɛɛ ko ni duu sa gbɛra, ko a ri wa. Wo le kosɔn, a mɛnda kawandili kɛla haan duu talama. 8 An bɛɛ ladɛnnin tɛrɛ sankaso do kɔndɔ. Fitinna siyaman tɛrɛ ye mɛlɛnna bon kɔndɔ ye. 9 Kanberen do, mɛn tɔɔ ko Yutikusi, siini tɛrɛ bon fɔɲɔda dakun kan bon na ye. Pɔli mɛnda kumala, sunɔɔ lɔɔ ka kanberen wo mira kosɛbɛ. A sunɔɔra ka be fɔɲɔda la. A bɔra fɔɔ sankaso bon sawana fɔɲɔda wo la ka be duu ma. Ii wara a ta ka a tɛrɛn a ra sa. 10 Pɔli jiira ka wa i la a kan ka a bolo falafala a ma, ka a fɔ ko: «Ai kana hamin. A nii ye a rɔ.» 11 Wo rɔ, Pɔli yɛlɛra sankaso bon na ikɔ. A ka buru rafara ka dɔɔnnin kɛ lemɛniya mɔɔilu fɛ. A kumara ii yɛ haan kɛnɛ bɔra, ka ban ka wa. 12 Mɔɔilu wara Yuticusi malɔ a wara. A kɛndɛ. Wo ka lemɛniya mɔɔilu bɛɛ jususuma kosɛbɛ.

13 Andeilu donda kulunba kɔndɔ ka wa Pɔli ɲɛfɛ Asɔsi, baa Pɔli ka a fɔ ko a ri wa a sen ma, ko an bɛɛ ye wa an ɲɔɔn bɛn Asɔsi. 14 A ka an nabɛn Asɔsi tuma mɛn na, a donda kulunba kɔndɔ. Wo rɔ, an wara Mitilɛni. 15 An bɔra ye lon mɛn na, wo duu sa gbɛ an sera Kiyɔsi da fɛ. Wo duu sa gbɛ filana an sera Samɔsi. Wo duu sa gbɛ sawana an sera Milɛti. 16 Pɔli tun tɛ a fɛ an ye lanɔɔ Asi jamana rɔ. Wo rɔ, a ma sɔn ka i lɔ Ɛfɛsi, baa a kɔrɔtɔni ba le tɛrɛ ka se Jerusalɛmu, sa a ri Pentekoli sali kɛ ye, ni a ri se wo kɛla.

17 Wo le rɔ, a tora Milɛti ka kela lawa Ɛfɛsi ka lemɛniya jamailu la ɲɛmɔɔilu kili, ko ii ye na a tɛrɛn ye. 18 Ii nara tuma mɛn na, a ka a fɔ ii yɛ ko: «N badenmailu, kɛbi n donda Asi jamana rɔ lon mɛn, n taamara sila mɛn kan waati mɛn bɛɛ kɔrɔ ai fɛ yan, ai ka wo lɔn. 19 Judiyailu ka janfailu don n ma ka n tɔrɔ kosɛbɛ fɔɔ ka n kasi. N ka wo bɛɛ muɲun ka n fanmajii ka baara kɛ Maari yɛ. 20 Ai la nafa ye fen fen dɔ, n ma wo si dokon ai ma. N ka ai karan jamama yɔrɔ rɔ, ka ai karan ai jɛrɛ la bonilu kɔndɔ. 21 N da a fɔ Judiyailu ni siya gbɛrɛ tɔilu yɛ ka a magbɛlɛnya ko ii ye kojuu kɛ boloka ka na Alla ma, ka lemɛniya an na Maari Isa ma. 22 Nba, a fɛrɛ tɛ fɔɔ n ye Alla la Nii Sɛniman kan mira. Wo le rɔ, n watɔ le Jerusalɛmu sisɛn. Mɛn kɛtɔ n sɔrɔnna ye, n ma wo lɔn. 23 Kɔni n ka mɛn lɔn, wo le ɲin di. N wa se so so ma, Alla la Nii Sɛniman ye a fɔla n yɛ ko mɔɔilu ri n bila kaso la, ko tɔrɔya ye n yɛ. 24 Ni n balora, wo tɛ foyi ri n ɲakɔrɔ. Mɛn tɔnɔ ye n ma, wo le n na baara ri, Maari Isa ka mɛn karifa n na. Fɔɔ n ye baara wo le ban ka Alla la kibaro ɲuma lase mɔɔilu ma, kibaro mɛn ye Alla la ɲumaya ko fɔla.

25 «Nba, n da n taamataama ai bɛɛ tɛma ka Alla la mansaya ko lase. Kɔni n ka a lɔn sisɛn ko ai ɲa tɛ la n kan butun. 26 Wo le kosɔn n ye a fɔla ai yɛ ka a magbɛlɛnya bi ko ni mɔɔ do halakira ai tɛma, wo ye wo tii jɛrɛ nɔ le wo ri de, 27 baa n ma Alla la ko latɛɛni si dokon ai ma. Ɛɛn! N ka wo bɛɛ lase ai ma. 28 Nba, ai ye ai janto ai jɛrɛ rɔ. Alla la Nii Sɛniman da mɔɔ mɛnilu karifa ai la, ai ye ai janto woilu fanan dɔ. Ai ye ai lɔ Alla la lemɛniya jamailu ɲɔrɔ ka ii latanka, baa a ra woilu kɛ a jɛrɛ ta ri a dencɛ la saya rɔ. 29 N ka a lɔn ko n wa taa, mɔɔjuuilu ri don ai tɛma ka tiɲannin kɛ. Woilu ye ikomin bakɔrɔn kuduilu, mɛnilu ye donna saailu tɛma ka ii madimin. 30 Doilu ri wuli hali ai jɛrɛ tɛma yan, ka wuya juu fɔ, sa ii ri karandenilu sɔmɔn ka woilu bila ii kɔ. 31 Wo le rɔ, ai ye a kɛ koɲuma. Ai ye ai hankili to a rɔ ko n ka ai kelen kelenna bɛɛ lali san sawa wo kɔrɔ. N ma wo boloka fewu, fɔɔ ka a kɛ su ni tele. N ɲaji bɔra ai kosɔn kosɛbɛ.

32 «Nba, n ye ai karifala Alla la sisɛn, a ni a la kuma la, mɛn kɔnin ye a la ɲumaya ko fɔla. Ale le ri se ai la lemɛniya sabatila kuma wo la. A ni a ri cɛ wo di ai ma, a ni mɛn bɛɛ bilanin a dan na. 33 N ma n nata la mɔɔ si la wodigbɛ ni sanin ni faanin kan. 34 N ka baara kɛ n bolo la ka n ni n taamaɲɔɔnilu makoilu mafa. Ai jɛrɛ ka wo lɔn. 35 N ka a yiraka ai la ɲa bɛɛ ma ko an ka kan ka baara ba kɛ ten de, sa an di se dɛsɛbatɔilu dɛmɛnna, baa Maari Isa ka a fɔ ko: ‹Sɛwa ye sɔli rɔ ka tamin sɔrɔnni kan.› An ye an hankili to kuma wo rɔ.»

36 Nba, Pɔli banda wo fɔla tuma mɛn na, a ni ii bɛɛ ka ii ɲɔnkin ka Alla tara. 37 Ii ka ii wuli ka ii ton Pɔli kan ka a sunbu. Ii bɛɛ kasira kosɛbɛ. 38 A tɛrɛ ka mɛn fɔ ko ii ɲa tɛ la a kan butun, wo kuma gbara ii la kojuuya. Ii wara a bilasila diya kulun da la.