1 Cɛɛ mɛn tɔɔ ko Lasari, wo jankarɔra. A tɛrɛ siini Betani so kɔndɔ, Mariyamu ni a nakelenɲɔɔ muso Marita fanan siini so wo kɔndɔ. 2 Mariyamu ɲin ye muso le ri mɛn ka Maari sen mamun latikɔlɔn na ka a masusa a kunsi la. Wo dɔɔcɛ Lasari tɛrɛ ma kɛndɛ. 3 Muso fila wo ka kela lawa Isa ma ko: «Maari, mɔɔ mɛn duman i yɛ, wo ma kɛndɛ.» 4 Awa Isa ka kuma wo lamɛn tuma mɛn na, a ka a fɔ ko: «Jankarɔ ko ɲin na ban ti nala saya ri; a ye ye Alla la gbiliya le ko rɔ, kosa Alla Dencɛ la gbiliya ye yiraka ka bɛn jankarɔ ko ɲin ma.» 5 Marita ni a dɔɔmuso a ni Lasari bɛɛ duman Isa yɛ.

6 Awa, a ka a lamɛn waati mɛn na ko Lasari ma kɛndɛ, a tora a nɔ rɔ haan tele fila. 7 Wo kɔ rɔ, a ka a fɔ a la karandenilu ye ko: «An ye an kɔsɛ Jude ikɔ tuunni.» 8 A la karandenilu ka a jabi: «Rabi, a ma mɛn bakɛ Judiyailu tɛrɛ ye a fɛ ka i mabon kaba la ka i faa, diya mɛn dɔ. I ye a fɛ ka i kɔsɛ ye wa?» 9 Isa ka ii jabi: «Waati tan ni fila le ye tele kelen kɔrɔ, wo tɛ? Ni mɔɔ taamara tele kɔrɔ a ti nala a sennatula, ka a masɔrɔn a ye dunuɲa kɛnɛ yenna. 10 Kɔni ni mɔɔ taamara su rɔ, wo ri a sennatu ka a masɔrɔn a ɲa sa kɛnɛya la.»

11 A banni wo bɛɛ fɔla, Isa ka do la kuma wo kan ko: «An duɲɔɔcɛ Lasari sunɔɔtɔ. N watɔ a lakunun diya.» 12 Karandenilu ka a jabi: «Maari, ni a sunɔɔtɔ le, a ri kɛndɛya.» 13 Awa, Isa tɛrɛ ye kumala a la saya ko le rɔ, kɔni woilu mirini ko a sunɔɔtɔ le. 14 Isa ka a fɔ ii yɛ gbɛ rɔ ko: «Lasari ra sa. 15 N sɛwani ba ai la kosɔn ko n tɛrɛ ti ye, kosa ai ri lemɛniya. Kɔni, an ye wa a tɛrɛn yɛ.» 16 Wo rɔ Tomasi (mɛn tɛrɛ ye kilila ko filani) wo ka a fɔ karanden toilu yɛ ko: «An fanan ye wa, kosa an di faa a fɛ.»

17 Isa kɔseyini ka a tɛrɛn Lasari su tun da tele naanin kɛ kaburu rɔ. 18 (Betani so ni Jerusalɛmu tɛmala ye kilo sawa le ri. 19 Wo rɔ, Judiya siyaman da na Marita ni Mariyamu wara ii dɔɔcɛ saya fɔ diya, ka ii masabari ii dɔɔcɛ la saya ko rɔ.) 20 Marita ka a mɛn tuma mɛn na ko Isa ra na, a wara a labɛn, kɔni Mariyamu siini tora bon na. 21 Marita ka a fɔ Isa yɛ ko: «Maari, ni i tɛrɛ ye yan, n dɔɔcɛ tɛrɛ tɛ sala. 22 Kɔni sisɛn n ka a lɔn ko i wa foyi maɲininka Alla la, Alla ri sɔn wo ma.»

23 Isa ka a jabi: «I dɔɔcɛ, a ri wuli ka bɔ saya rɔ.» 24 Marita ka a fɔ ko: «N ka a lɔn ko su wa wuli tuma mɛn na laban lon, n dɔɔcɛ fanan di wuli ka bɔ saya rɔ.» 25 Isa ka a fɔ a yɛ ko: «Nde ye su lawulila le ri. Nde ye ɲenemaya le ri fanan. Mɛn wa lemɛniya n ma, hali ni a wa sa a ri ɲenemaya. 26 Mɔɔ si wa kɛ dunuɲa rɔ ka a la lemɛniya la n dɔ, wo ti saya sɔrɔn habadan. I lani wo la?» 27 A ka a jabi: «Maari, n lani a la ko i ye Ɲenematɔmɔnin de ri, Alla Dencɛ, mɛn nani dunuɲa rɔ.»

28 A banni wo fɔla, a wara a dɔɔmuso Mariyamu kili ka a fɔ a yɛ sutura rɔ ko: «Karanmɔɔ ra na, a ye i kilila.» 29 Mariyamu ka kuma wo lamɛn tuma mɛn na, a ka i wuli ka ibori ka wa Isa diya. 30 Isa tɛrɛ ma don so ɲin kɔndɔ fɔlɔ, kɔni a tɛrɛ ye nɔ rɔ, Marita nara a la bɛn yɔrɔ mɛn. 31 Judiyailu mɛnilu tɛrɛ nani Mariyamu saya fɔ diya, woilu ka a yen a ra wuli i kɔrɔkɔrɔ ka a bɔ ka wa tuma mɛn na, ii mirini ko a ye wala kaburu da la ka wa kasi.

32 A se mɛn kɛra ye Isa tɛrɛ yɔrɔ mɛn dɔ, Mariyamu bera a sen kɔrɔ ka a fɔ a yɛ ko: «Maari, ni i tɛrɛ ye yan n dɔɔcɛ tɛrɛ tɛ sala!» 33 Isa ka a yen kasila a ni Judiya mɛnilu nara a kɔfɛ, Isa sɔnɔmɛ yɛrɛyɛrɛra ka a sunun. 34 A ka a maɲininka ko: «Ai ka a la min?» Ii ka a fɔ a yɛ ko: «Maari, na a mafɛnɛ.»

35 Isa kasira. 36 Wo rɔ Judiyailu ka a fɔ ko: «Ai ra a yen, a duman a yɛ ɲa mɛn ma!» 37 Kɔni doilu tɛrɛ ye a fɔla ko: «Mɛn ka ɲa funyen ɲa laka, a ti se ɲin lakɛndɛyala wa?»

38 Ikɔ tuunni Isa sɔnɔmɛ yɛrɛyɛrɛra. A sera kaburu da la. Kaburu tɛrɛ ye falan de ri. A da tɛrɛ latuunni kaba ba le la. 39 Isa ka a fɔ ko: «Kaba bɔ da la.» Sayabatɔ nakelenɲɔɔ muso, Marita ka a fɔ a yɛ ko: «Maari, a suma ye bɔla. A ra tele naanin bɔ a ye yan.» 40 Isa ka a jabi: «N ma a fɔ i yɛ ko ni i lemɛniyala, i ri Alla la gbiliya yen?» 41 Wo rɔ ii ka kaba bɔ ye. Isa ka a ɲakɔrɔta, ka a fɔ ko: «Fa, n ye baraka bilala i yɛ, baa i ka i tolo malɔ n na. 42 N ka a lɔn ko i ye i tolo malɔla n na waati bɛɛ; kɔni ka a masɔrɔn n namininni jama mɛn bolo n ye kumala i yɛ, sa ii ri lemɛniya ko ile le ka n kelaya.» 43 A ka wo fɔ tuma mɛn na, a ka a kan ba labɔ ko: «Lasari, bɔ gbɛ ma!» 44 Su wulira ka bɔ. A sen ni a bolo bɛɛ mamininni kasankɛ rɔ, a ɲakɔrɔla tununni jala la. Isa ka a fɔ ii yɛ ko: «Ai ye kasankɛ bɔ a ma, ai ye a bila, a ye wa.»

45 Judiya siyaman ba mɛn nara Mariyamu kɔfɛ, ka a yen Isa ka ko mɛn kɛ, ii ka ii lemɛniya a ma. 46 Kɔni doilu bɔra ii tɛma ka wa dantɛɛli kɛ Farisiilu yɛ Isa ka ko mɛn kɛ. 47 Awa, sarakalasela kuntiilu a ni Farisiilu ka kititɛɛ dɛkuru ladɛn ka a fɔ ko: «An di nfen de kɛ? Cɛɛ ɲin da tɔɔmasere kabannako siyaman kɛ. 48 Ni an ka a to a jɛrɛ ma, dunuɲa bɛɛ ri lemɛniya a ma. Wo rɔ Romukailu ri na ka an na yɔrɔ tiɲan ka an na siya fanan halaki.»

49 Do ye ii tɛma ye mɛn tɔɔ ko Kayifasi, san wo la wo le tɛrɛ ye sarakalasela kuntiiya la. Wo ka kuma ta ko: «Ai ma foyi lɔn. 50 Ai ma a yen, ni mɔɔ kelen di faa jama nɔ rɔ sa an na siya bɛɛ kana halaki, wo le ka fisa ai ma wa?» 51 A ma wo fɔ a jɛrɛ yɛ; kɔni ikomin a tɛrɛ ye sarakalasela kuntiiya la san wo la, a kumara ikomin kelalasela ko Isa ri na faa Judiya siya nɔ rɔ. 52 Kɔni Isa ri sa mɛnilu nɔ rɔ, Judiya siya kelen ko tɛ. A ri sa ka Alla denilu bɛɛ ladɛn denbaya kelen di mɛnilu siini dunuɲa bɛɛ rɔ. 53 Ka bɔ lon kelen wo le Judiyailu bɛnnin tɛrɛ a ma ko ii ri Isa faa ɲa ɲinin.

54 Wo rɔ Isa ka a jɛrɛ yiraka lalɔ jama la. A bɔra mara wo rɔ ka wa wula ba kɔndɔ, ka a se so mɛn tɔɔ ko Efirayimu. A ni a la karandenilu tora ye dɔɔnin.

55 Taminkunna Sali wa sudunya tuma mɛn na, jamana siyaman mɔɔilu ye nala Jerusalɛmu sani sali ye se ii ri ii jɛrɛ sɛninya ka a bɛn ii la namun ma. 56 Ii tɛrɛ ye Isa ɲininna ii jɛrɛ ma Alla batobonba jin kɔndɔ, ka i ɲɔɔn maɲininka ko: «Ai miriya ye nfen di? A ti nala sali rɔ wa?» 57 Sarakalasela kuntiilu ni Farisiilu ka jamarili di ko ni mɔɔ ka a lɔn a ye yɔrɔ mɛn dɔ, a ri se a yirakala sa ii ri se a mirala ɲa mɛn.