1 A banni kuma wo fɔla, Isa ka a ɲakɔrɔta sankolo rɔ ka a fɔ ko: «N Fa, waati ra se. I ye i Dencɛ la gbiliya yiraka mɔɔilu la, kosa i Dencɛ fanan ye i la gbiliya yirika ii yɛ, 2 ka a masɔrɔn i ka fanka di a ma fɔlɔ adamaden bɛɛ kan kosa a ri ɲenemaya banbali di mɔɔ bɛɛ ma, i ka mɛn di a ma. 3 Wo rɔ ɲenemaya banbali ye mɛn di, wo le ɲin di: ka ile lɔn, ile mɛn kelen pe ye Alla jɛrɛjɛrɛ ri, a ni ka Isa Ɲenematɔmɔnin fanan lɔn, i ka mɛn kelaya. 4 N da i la gbiliya yiraka mɔɔilu la duukolo kan, baa i ka n lɔ baara mɛn na, n da ban wo la. 5 N Fa, gbiliya mɛn tɛrɛ ye n dɔ i dafɛ sani dunuɲa ye dan, i ye wo di n ma sisɛn i dafɛ.

6 «N da i tɔɔ yiraka mɔɔilu la i ka mɛn suwandi dunuɲa rɔ ka ii di n ma. Ii tɛrɛ ye i ta le ri, kɔni i ka ii di n ma. Ii ka i la kuma labato. 7 Sisɛn ii ka a lɔn ko i ka foyi di n ma a bɛɛ bɔni ile le rɔ, 8 baa n ka kuma lase ii ma i ka mɛn fɔ n yɛ. Ii ka kuma wo masɔrɔn, ii ra a lɔn ko n bɔni ile le rɔ a ni ii ka la a la ko ile le ka n kelaya. 9 N ye i madiyala woilu le ta fan dɔ. N tɛ i madiyala dunuɲa ta fan dɔ, kɔni i ka mɛnilu di n ma, ka a masɔrɔn ii ye i ta le ri. 10 Fen fen ye n ta ri wo fanan ye i ta le ri. Fen fen ye i ta ri, wo fanan ye n ta le ri. N ye gbiliyala woilu le rɔ. 11 N tɛ dunuɲa rɔ butun, kɔni ii ye dunuɲa rɔ, nde natɔ i ma. Fa Sɛniman, i ye ii lamara i tɔɔ sɛniman na, i ka tɔɔ mɛn di n ma, sa ii ye kɛ kelen de ri ikomin an ye kelen di ɲa mɛn ma. 12 Ka n to ii dafɛ, n ka ii lakandan i la sebaya la, sebaya mɛn ye i tɔɔ rɔ, i ka tɔɔ mɛn di n ma. N ka n janto ii rɔ. Wo rɔ, ii si ma tunun, fɔɔ halaki latɛɛra mɛn ma. Wo tununda sa i la kuma ri dafa, mɛn sɛbɛni kitabu sɛniman kɔndɔ. 13 Sisɛn, n natɔ i ma; n ye kumala dunuɲa rɔ, sani n na sɛwa ba ɲɔɔn di kɛ ii la fɔɔ ka kɛ sɛwa dafani ri. 14 N ka i la kumakan di ii ma. Wo rɔ ii gboyara dunuɲa yɛ, ka a masɔrɔn ii tɛ dunuɲa ta ri, ikomin nde tɛ dunuɲa ta ri de. 15 N tɛ i madiyala ko i ye ii bɔ dunuɲa rɔ, kɔni i ye ii kandan Ko Juu Tii ma. 16 Ii sa dunuɲa ta ri ikomin nde sa dunuɲa ta ri ɲa mɛn ma. 17 Ii bila a dan na i jɛrɛ ma ka fara i la tuɲa la, i la kuma, mɛn ye tuɲa ri. 18 Ikomin i ka n kelaya dunuɲa rɔ, nde fanan da ii kelaya dunuɲa rɔ. 19 N ye n jɛrɛ bilala a dan na i yɛ ii kosɔn, sa ii fanan di bila a dan na bɛrɛbɛrɛ kɛ i yɛ.

20 «N tɛ i matarala ii kelen ta fan dɔ, kɔni ni mɛn lemɛniyara nde ma ii la sereya rɔ, 21 kosa bɛɛ ye kɛ kelen di. N Fa, ikomin ile ni nde ye kelen di, woilu fanan ni ande bɛɛ ye kɛ kelen di, kosa dunuɲa ye a lɔn ko ile le ka n kelaya. 22 Nde, n ka gbiliya di ii ma i ka mɛn di n ma, kosa ii ye kɛ kelen di, ikomin nde ni ile, 23 nde ni ile ye kelen de ri, kosa ii ri kɛ kelen di, a ni dunuɲa ri a lɔn ko ile le ka n kelaya a ni ii duman i yɛ fanan, ikomin nde duman ile yɛ ɲa mɛn ma.

24 «N Fa, n ye a fɛ ko n ye yɔrɔ mɛn na, i ka mɛnilu di n ma, woilu ni nde ye kɛ ye, sa ii ri n na gbiliya yen, i ka gbiliya mɛn di n ma, ka a masɔrɔn n duman i yɛ sani dunuɲa damira waati. 25 N Fa, mɛn telenni, dunuɲa ma i lɔn, kɔni nde ka i lɔn, woilu fanan ye a lɔn ko ile le ka n kelaya. 26 I ye ɲa mɛn ma, n da wo yiraka ii la. N di to wo yirakala fanan sa ii ri mɔɔilu kanin ikomin i ra nde kanin ɲa mɛn ma, a ni n sidinin ri kɛ ii ma.»