Juízes 7

गिदोन की मिद्यानियाँ पै जीत

1 फेर गिदोन जो यरूब्बाल भी कुहवावै सै अर सारे माणस जो उसकै गैल थे सबेरै उठे, अर हरोद नाम के चोए कै धोरै अपणे डेरे खड़े करे; अर मिद्यानियाँ की छावणी उनके उत्तरी और मोरे नाम की पहाड़ी कै धोरै घाटी म्ह पड़ी थी।

2 फेर यहोवा नै गिदोन तै कह्या, "जो माणस तेरे गैल सैं वे इतणे सैं के मै मिद्यानियाँ नै उनके हाथ न्ही कर सकदा, न्ही तो इस्राएल न्यू कहकै मेरे बिरुध्द अपणी बड़ाई मारण लागैंगे, के हम अपणे ए भुजबल के जरिये बचे सां। 3 ज्यांतै तू जाकै माणसां म्ह यो प्रचार करकै सुणा दे, ‘जो कोए डर के मारे थरथरान्दा हो, वो गिलाद पहाड़ तै लौट कै चल्या जावै।’" फेर बाईस हजार माणस बोहड़ गए, अर सिर्फ दस हजार रह गए।

4 फेर यहोवा नै गिदोन तै कह्या, "इब भी माणस घणे सैं; उननै चोए कै धोरै नीच्‍चै ले चाल, ओड़ै मै उननै तेरे खात्तर परखूँगा; अर जिस-जिसकै बारै म्ह मै तेरै तै कहूँ, ‘यो तेरे गैल चाल्‍लै,’ वो तो तेरे गैल चाल्‍लै; अर जिस जिसके बारै म्ह मै कहूँ, ‘यो तेरे गैल ना जावै,’ वो ना जावै।" 5 फेर वो उन ताहीं चोवै के धोरै नीच्‍चै लेग्या; ओड़ै यहोवा नै गिदोन तै कह्या, "जितने कुत्ते की तरियां जीभ तै पाणी चपड़-चपड़ करकै पीवैं उननै न्यारा राख; अर उननै न्यारा राख जो घुटने टेककै पीवैं।" 6 जिन ताहीं मुँह म्ह हाथ लगाकै चपड़-चपड़ करकै पाणी पिया उनकी तो गिणती तीन सौ ठैहरी; अर बाकी सारे माणसां नै घुटने टेककै पाणी पिया। 7 फेर यहोवा नै गिदोन तै कह्या, "इन तीन सौ चपड़-चपड़ करकै पीण आळयां के जरिये मै थारै ताहीं छुड़ाऊँगा, अर मिद्यानियाँ नै तेरे हाथ म्ह कर दियुँगा; अर दुसरे माणस अपणे-अपणे जगहां म्ह लौट जावै।" 8 फेर उन तीन सौ माणसां नै अपणे गैल भोजन सामग्री ली अर अपणे-अपणे नरसिंगे लिए; अर उसनै इस्राएल के दुसरे सारे माणसां ताहीं अपणे-अपणे डेरे की और भेज दिया, पर उन तीन सौ माणसां नै अपणे गैल राक्ख लिया; अर मिद्यान की छावणी उसके नीच्‍चै तराई म्ह पड़ी थी।

9 उसे रात यहोवा नै उसतै कह्या, "उठ, छावणी पै चढ़ाई कर; क्यूँके मै उस ताहीं तेरे हाथ कर देऊँ सूं। 10 पर जै तू चढ़ाई करदे डरदा हो, तो अपणे सेवक फूरा नै गैल लेकै छावणी कै धोरै जाकै सुण, 11 के वे के कहण लागरे सैं; उसकै बाद तन्‍नै उस छावणी पै चढ़ाई करण की हिम्मत मिलैगी।" फेर वो अपणे सेवक फूरा नै गैल ले उन हथियारबन्दा के धोरै जो छावणी के छोर पै थे उतर ग्या। 12 मिद्यानी अर अमालेकी अर सारे पूर्वी माणस तो टिड्डियाँ के समान भोत-से तराई म्ह फैल्‍ले पड़े थे; अर उनके ऊँट समुन्दर तट के रेतकणा की तरियां गिणती तै बाहर थे। 13 जिब गिदोन ओड़ै आया, फेर एक जन अपणे किसे संगी नै अपणा सपना बताण लाग रह्या था, "सुण, मन्‍नै सपने म्ह के देख्या सै के जौ की एक रोट्टी लुढ़कदे-लुढ़कदे मिद्यान की छावणी म्ह आई, अर डेरे ताहीं इसी टक्‍कर मारी के वो गिर ग्या, अर उसनै इसा उलट दिया, के डेरा गिरया पड़या रहया।" 14 उसके संगी नै जवाब दिया, "या रोट्टी योआश के बेट्टे गिदोन नाम के एक इस्राएली माणस की तलवार ताहीं छोड़ किमे न्ही सै; उसे के हाथ म्ह परमेसवर नै मिद्यान ताहीं सारी छावणी समेत कर दिया सै।"

15 उस सपने का बखान अर फळ सुणकै गिदोन नै दण्डवत करया; अर इस्राएल की छावणी म्ह लौट कै कह्या, "उठो, यहोवा नै मिद्यानी सेना ताहीं थारे वश म्ह कर दिया सै।" 16 फेर उसनै उन तीन सौ माणसां के तीन झुण्ड करे, अर एक-एक आदमी के हाथ म्ह एक नरसिंगा अर खाल्‍ली घड़ा दिया, अर घड़यां के भित्तर एक मशाल थी। 17 फेर उसनै उनतै कह्या, "मन्‍नै देक्खो, अर उसाए करो; सुणो, जिब मै उस छावणी की छोर पै पोहंचू, फेर जिसा मै करुँ उसाए थम भी करियो। 18 यानिके जिब मै अर मेरे सारे संगी नरसिंगा फूकैं फेर थम भी छावणी के च्यांरु और नरसिंगे फूंकणा, अर ‘यहोवा की अर गिदोन खात्तर ललकार।’"

19 आध्धी रात होण तै थोड़ी देर पैहला जिस तरियां ए रुखाळयां की बदली होई थी उस्से तरियां ए गिदोन अपणे गैल के सौ माणसां समेत छावणी के छोर पै गया; अर नरसिंगे ताहीं फूँक दिया अर अपणे हाथ के घड़यां ताहीं तोड़ गेरया। 20 फेर तीन्‍नु झुण्डां नै नरसिंगा ताहीं फूँक्या अर घड़यां ताहीं तोड़ दिया; अर अपणे-अपणे बाएँ हाथ म्ह मशाल अर दाहिने हाथ म्ह फूँकण ताहीं नरसिंगा लिए होए चिल्‍ला उठे, "यहोवा की तलवार अर गिदोन की तलवार।" 21 फेर वे छावणी के च्यांरु और अपणे-अपणे जगहां पै खड़े रहे, अर दुश्मन सेना के माणस दौड़ण लाग्गे; अर उन ताहीं चिल्‍ला-चिल्‍लाकै उन ताहीं भजा दिया। 22 अर उन ताहीं तीन सौ नरसिंगा ताहीं फूँक्या, अर यहोवा नै एक-एक आदमी की तलवार उसके संगी पै अर सारी सेना पै चलवाई; तो सेना के माणस सरेरा की और बेतशित्ता ताहीं अर तब्बात के धोरै के आबेल-महोला ताहीं भाजगे। 23 फेर इस्राएली माणस नप्ताली अर आशेर अर मनश्शे के सारे देश तै कठ्ठे होकै मिद्यानियाँ कै पाच्छै पड़े। 24 अर गिदोन नै एप्रैम के सारे पहाड़ी देश म्ह यो कहण नै दूत भेज दिए, "मिद्यानियाँ तै मुठभेड़ करण नै चले आओ, अर यरदन नदी के घाटां नै बेतबारा ताहीं उनतै पैहले अपणे वश म्ह कर ल्यो।" फेर सारे एप्रैमी माणसां नै कठ्ठे होकै यरदन नदी नै बेतबारा ताहीं अपणे वश म्ह कर लिया। 25 अर उननै ओरेब अर जेब नाम मिद्यान के दो हाकिमां ताहीं पकड्या; अर ओरेब नै ओरेब नाम के चट्टान पै, अर जेब नै जेब नाम के दाखरस के कुण्ड पै घात करया; अर वे मिद्यानियाँ कै पाच्छै पड़े; अर ओरेब अर जेब के सिर यरदन पार गिदोन कै धोरै लेगे।