अय्यूब 10

अय्यूब की परमेसवर तै बिनती

1 मै अपणी जिन्दगी तै तंग आ ग्या सूं;

मै आजादी तै कुड़कुड़ाऊँगा;;

अर मै अपणे मन की कड़वाहट के मारे बात करुँगा।

2 मै परमेसवर तै कहूँगा, मन्‍नै दोषी ना ठहरा;

मन्‍नै बता दे, के तू किस कारण मेरे तै मुकद्दमा लड़ै सै?

3 के तन्‍नै अंधेर करणा,

अर दुष्टां की योजना ताहीं कामयाब करकै

अपणे हाथ्थां के बणाए होए नै निकम्मा जाणणा भला लाग्गै सै?

4 के तेरी देह धारियां की जिसी आँख सै?

अर के तेरा देखणा माणस का जिसा सै?

5 के तेरे दिन माणस के दिन की तरियां सै,

या तेरे साल आदमी के बखतां के बराबर सै,

6 के तू मेरा अधर्म टोहवै,

अर मेरा पाप पूच्छै सै?

7 तन्‍नै तो बेराए सै, के मै दुष्ट न्ही सूं,

अर तेरे हाथ तै कोए छुटाण आळा न्ही!

8 तन्‍नै अपणे हाथ्थां तै मेरे ताहीं ठीक रच्या सै अर जोड़कै बणाया सै;

फेर भी तू मन्‍नै नाश कर गेरै सै।

9 याद कर, के तन्‍नै मेरे ताहीं गुँधी होई माट्टी की तरियां बणाया,

के तू मन्‍नै फेर धूळ म्ह मिलावैगा?

10 के तन्‍नै मेरे ताहीं दूध की तरियां उण्डेल कै, अर

दही की तरियां जमाकै न्ही बणाया?

11 फेर तन्‍नै मेरे पै चमड़ा अर माँस चढ़ाया

अर हाड्डी अर नस गूँथकै मेरे तै बणाया सै।

12 तन्‍नै मेरे ताहीं जिन्दगी दी, अर मेरे पै करुणा करी सै;

अर तेरी चौकसी तै मेरी जान की हिफाजत होई सै।

13 फेर भी तू इसी बात्तां नै अपणे मन म्ह छिपाये राक्खै;

मै तो जाण ग्या, के तन्‍नै इसाए करण नै ठाण्या था।

14 के जै मै पाप करुँ, तो तू उसका लेखा लेवैगा;

अर अधर्म करण पै मन्‍नै बेकसूर ना ठहरावैगा।

15 जै मै बुरा करुँ तो मेरे पै हाय!

अर जै मै धर्मी बणु फेर भी मै सिर ना ठाऊँगा,

क्यूँके मै अपमान तै भरया होया सूं

अर अपणे दुख पै ध्यान राक्खूँ सूं।

16 अर जै सिर ठाऊँ तोभी तू शेर की तरियां मेरा शिकार करै सै,

अर फेर मेरे खिलाफ अचम्भे के काम्मां नै करै सै।

17 तू मेरै स्याम्ही अपणे नये-नये गवाह ले आवै सै,

अर मेरे पै अपणा छो बढ़ावै सै;

अर मेरे उप्पर सेना पै सेना चढ़ाई करै सै।

18 "तन्‍नै मेरे ताहीं गर्भ तै क्यूँ काढया? न्ही तो मै ओड़ैए अपणी जान दे देन्दा,

अर कोए मन्‍नै देक्खण भी न्ही पान्दा।

19 मेरा होणा ना होण की तरियां होन्दा,

अर पेट तैए कब्र म्ह पोहचाया जान्दा।

20 के मेरे जीवन के दिन थोड़े न्ही? मन्‍नै छोड़ दे,

अर मेरी ओड़ तै मुँह फेर ले, के मेरा मन थोड़ा शान्त हो ज्यां

21 इसतै पैहला के मै ओड़ै जाऊँ, जित्त तै फेर ना बोहडुंगाँ,

यानी घोर अन्धकार के देश म्ह, अर मौत की छाया म्ह;

22 अर मौत के अन्धकार का देश

जिस म्ह सब किमे गड़बड़ सै;

अर जित्त चाँदणा भी इसा सै जिसा अन्धकार।"