1 "मन्‍नै अपणी आँखां कै बारै म्ह वाचा बाँधी सै,

फेर मै किसे कुँवारी पै क्यूँ आँख लगाऊ?

2 क्यूँके परमेसवर सुर्ग तै कौण सा अंश

अर सर्वशक्तिमान उप्पर तै कोणसी जायदाद बाँटै सै?

3 के वो दुष्ट माणसां कै खात्तर मुसीबत्त

अर अनर्थ काम करण आळयां कै खात्तर सत्यानाश का कारण न्ही सै?

4 के वो मेरी चाल न्ही देखदा

अर के वो मेरे पग-पग नै न्ही गिणदा?

5 जै मै बेकार चाल चाल्‍लूँ सूं,

या कपट करण कै खात्तर मेरे पैर भाज्जे हो;

6 तो मै धर्म की तराजू म्ह तोल्या जाऊँ,

ताके परमेसवर मेरी खराई नै जाण ले।

7 जै मेरे पैर राह तै बहक ग्ये हो,

अर मेरा मन मेरी आँखां की देक्खी चाल चाल्या हो,

या मेरे हाथ्थां म्ह कुछ कलंक लाग्या हो;

8 तो मै बीज बोऊँ, पर अनाज दूसरा खावै;

बल्के मेरे खेत की उपज उखाड़ गेरी जावै।"

9 "जै मेरा मन किसे जनान्‍नी पै मोहित होग्या सै,

अर मै अपणे पड़ोसी के दरबाजे पै घात म्ह बैठ्या सूं;

10 तो मेरी जनान्‍नी दुसरे की खात्तर पिस्सै,

अर पराए माणस उस ताहीं भ्रष्ट करै।

11 क्यूँके वो तो घणा बड़ा पाप होन्दा;

अर न्यायियाँ तै सजा पाण कै लायक अधर्म का काम होन्दा;

12 क्यूँके वो इसी आग सै जो जळाकै भस्म कर देवै सै,

अर वो मेरी सारी उपज नै जड़ तै नाश कर देवै सै।"

13 "जिब मेरे दास अर दास्सी नै मेरे तै झगड़ा करया,

फेर जै मन्‍नै उनका हक मारया हो;

14 तो जिब परमेसवर उठ खड्या होवैगा, फेर मै के करुँगा?

अर जिब वो आवैगा फेर मै के उत्तर देऊँगा?

15 के वोए परमेसवर उसका बणाण आळा न्ही जिसनै मेरे ताहीं गर्भ म्ह बणाया?

के एके नै हम दोनुवां की सूरत गर्भ म्ह न्ही रची थी?"

16 "जै मन्‍नै कंगालां की इच्छा पूरी ना करी हो,

या मेरै कारण बिधवा की आँख कदे निराश होई हो,

17 या मन्‍नै अपणा टुकड़ा एक्ला खाया हो,

अर उस म्ह तै अनाथ न्ही खाण पाए हो,

18 (पर वो मेरे लड़कपण तै ए मेरै गैल इस ढाळ पळया जिस ढाळ बाप के गैल,

अर मै जन्म तै ए बिधवा नै पाळदा आया सूं);

19 जै मन्‍नै किसे ताहीं बिना कपड़यां के मरदे होए देख्या,

या किसे गरीब नै जिसकै धोरै ओढ़ण नै न्ही था

20 अर उस ताहीं अपणी भेड्डां की ऊन के कपड़े न्ही दिए हो,

अर उसनै गरम होकै मेरे ताहीं आशीर्वाद न्ही दिया हो;

21 या जै मन्‍नै नगर के फाटक म्ह अपणे मददगार देखकै

अनाथ्थां ताहीं मारण नै अपणा हाथ ठाया हो,

22 तो मेरी बाँह कंधे तै उखड़कै गिर पड़ै,

अर मेरी बाज्जु की हाड्डी टूट जावै।

23 क्यूँके परमेसवर के प्रताप कै कारण मै इसा न्ही कर सकूँ था,

क्यूँके उसकी ओड़ की मुसीबत्त कै कारण मै डरकै काम्बया करदा।"

24 "जै मन्‍नै सोन्‍ने का भरोस्सा करया होन्दा,

या कुन्दन तै अपणा आसरा कह्या होन्दा,

25 या अपणे भोत घणे धन तै

या अपणी बड़ी कमाई कै कारण आनन्द करया होन्दा,

26 या सूरज नै चमकदे

या चाँद नै घणी शोभा तै चाल्दे होए देखकै

27 मै मन ए मन मोहित होग्या होन्दा,

अर अपणे मुँह तै अपणा हाथ चूम लिया होन्दा;

28 तो यो भी न्यायियाँ तै सजा पाण कै लायक अधर्म का काम होन्दा;

क्यूँके इसा करकै मन्‍नै सब तै ऊच्‍चें परमेसवर का इन्कार करया होन्दा।"

29 "जै मै अपणे बैरी के नाश तै खुश होन्दा,

या जिब उसपै मुसीबत्त पड़ी फेर मै उसपै हाँस्या होन्दा;

30 (पर मन्‍नै ना तो उस ताहीं श्राप देन्दे होए,

अर ना उसकी मौत की सजा की प्रार्थना करदे होए अपणे मुँह तै पाप करया सै);

31 जै मेरे डेरे के रहण आळयां नै यो ना कह्या होन्दा,

‘इसा कोए कित्त मिलैगा, जो इसके उरै का माँस खाकै ना छिक्या हो?’

32 (परदेशी नै सड़क पै टिकणा न्ही पड़ै था;

मै मुसाफिर कै खात्तर अपणा दरबाजा खुल्‍ला राख्या करुँ था);

33 जै मन्‍नै आदम की तरियां अपणा कसूर छिपाकै

अपणे अधर्म ताहीं ढाँप लिया हो,

34 इस कारण के मै बड़ी भीड़ तै भय खाऊँ था,

या लोगां तै निकम्मा करे जाण तै डर ग्या

उरै तक के मै दरबाजा तै बाहर न्ही लिकड्या

35 भला होन्दा के मेरा कोए सुणण आळा होन्दा!

सर्वशक्तिमान परमेसवर इब्बे मेरा न्याय चुकावै! देक्खो, मेरा दस्तखत योए सै।

भला होन्दा के जो शिकायतनामा मेरे बैरी नै लिख्या सै वो मेरै धोरै होन्दा!

36 पक्‍का मै उस ताहीं अपणे कंधे पै ठाए फिरदा;

अर सुथरी पगड़ी जाणकै अपणे सिर पै बाँधे रहन्दा।

37 मै उस ताहीं अपणे पग-पग का हिसाब देन्दा;

मै उसकै धोरै प्रधान की तरियां बेधड़क जान्दा।"

38 "जै मेरी धरती मेरै खिलाफ दुहाई देन्दी हो,

अर उसकी हळ की लिख मिलकै रोन्दी हो;

39 जै मन्‍नै अपणी धरती की उपज बिना मजदूरी दिए खाई,

या उसके माल्‍लिक की जान ली हो;

40 तो गेहूँ कै बदलै झड़बेरी,

अर जौ के बदलै जंगळी घास उगैं!"

अय्यूब के वचन पूरे होए सै।